هاوبەندی کۆمەڵایەتی کورد

Friday, 18/02/2011, 12:00

هاووڵاتییانی خۆشەویست، هاوزمانانی خاوەن هەستوو باوەڕ، لەڕۆژگاری ئەمڕۆدا کە کایەی حیزبی بۆتە مەیدانێ بۆ داهێزرانی ڕووحی تاکوو گەورەکردنی درزی کۆمەڵایەتی لەنێو کۆی خەڵکی کوردستاندا. بەکارهێنانی زەبروزەنگ بەرامبەر بە ڕۆناکبیرانوو ڕاکێشانی بەهرەو هونەری زاناو بیرمەندانی کورد بۆ ئاقاری گەندەڵی و پوچانەوە. باری دەمارگیرانەی ڕەوتەکانی نێو کۆمەڵگە بەرامبەر بەیەکترو گرنگینەدانیان بە دۆزینەوەی میکانزمێکی گونجاو بۆ ڕێکخستنی شێوازی ململانێی و ڕووبەڕووبوونەوەی ویستوو بۆچوونە جیاکان، بوونی مەیلی بەهێزی پاوانخوزانەو تاک جەمسەرانە لە عەقلییەتی سیاسیدا، تەڵخی و دزێوی چارەنووسی هاوپەیمانییەتی ناهاوسەنگوو ناڕوونی بانزۆرایەتی، کە زۆربەی کۆمەڵانی خەڵک بەنیگەرانییەوە لێی دەڕواننوو وەک پڕۆژەیەکی قوڕخکارانەی دەستەڵات، بۆ درێژەدانوو گەمەکردنی زیاتر بە داهاتوو قووتی کۆمەڵانی خەڵک چاوی دەدەنێ. دوورکەوتنەوە لە گیانی تەبایی و سازانی عادیلانە، نادیدەکردنی ویستی زۆرایەتی و هاوبەشییەکانی کۆمەڵانی خەڵک، مانەوەی هزری کۆنی بێواتای شەڕخوازی و دووبەرەکایەتی ناشارستانی، کە هەردەم وەک ئامرازێکی هەڕەشە ماوەتەوە بۆ زەڕبەدان لە ئارامی و سەقامگیرییەکی نیسبی کە پێی گەیشتووین لەولات، ئەمانەو زۆری تریش بۆتە هۆکاری دوورکەوتنەوەی کۆمەڵانی خەڵک لە یەکتر. باوەڕوو متمانەی خۆبەخۆی لای زۆرێک لە خەڵکی کوردستان لاواز کردووە. بەها ئینسانییەکان، ڕەسەنایەتی و سازگاری ژیانی کۆمەڵایەتی لە ئاستی گشتیدا خەریکە دەپووکێتەوە. دۆلار و دەستەڵات شوێنی شیاوی خۆی جێهێشتووەو خەریکە دەبێ بە بەدیلی بەها ئینسانییەکانمان، پەیتا پەیتا حوکمڕانی ڕووگەی نائاسایی و ڕەهابوون و دڵڕەقانە وەردەگرێ. بە داشۆرانی تاکی کورد لە بوونی کۆمەڵایەتی خۆی، بەمانای گۆڕینی خۆشییەکانی ئارامی دەروون و بەختییاری مرۆڤە، بە کالا و پارە و دەستەڵاتێکی زێدەڕەوانە، کە هەرگیز تێربوون و هاوسەنگی و عەدالەت ناناسێ و لەزەت لە دەستبەسەرداگرتنوو ئازاردانوو ژێرپێخستنی زۆربە وەردەگرێ.
بێگوومان کەسێکی هۆشیار و ژیر ڕازی نابێ بە جەهالەت، بە دوورکەوتنەوە لە ژیانێکی واقعی کە بە کۆششو ڕەنجی فیکری و جەستەیی خۆی بەرهەمی دێنێ. مافی خۆمانە نیگەران بین سەبارەت بە لاوازبوونی پردی پەیوەندی کۆمەڵایەتی و مراندنی نەریتوو دابە دێرین و جوانەکانی تێکەڵاوی و بەخشندەیی و وەرگرتنی خۆشەویستی و ڕێزوو ڕسکانی هەستی متمانە بەیەکتروو پشتیوانی کردنمان لە یەکتر. ئەوە ویستی زۆربەمانە کە کۆتایی بەم نیگەرانییە بێنین، ویستی ئاسایی زۆربەمانە کە بە ئاسودەیی و تەبایی لە وڵاتی خۆمان بژین، وەک هەر مرۆڤێکی ژیر پێمان خۆشە ڕێگەی ڕوونمان ئاسۆی کراوەمان لە وێڵی و تاریکستانی غوربەت دووربێ. فەرهەنگ و زمانمان بە بڕشتوو پاراوو پڕ حیکمەتبێ، ڕێی نەچێتەوە سەر گەنکاوی نامرۆڤانەی شەڕەنگێزو نەژادپەرستانەی چڵکگرتوو. گومانی تێدانییە گەر ویستمان لە ڕاستگۆیی و نزیکایەتی و گەرمی و سۆزی پەیوەندی کوردانەمان چڕکەینەوە بەڕاشکاوی ویستە مەشرووعەکانی خۆمان بەیانکەین، دەکرێ دەستەبەری ماڵینوو کەمکردنەوەی دووبەرەکایەتی، رق، دووڕوویی، خەراپ لێکحالیبوون، گەفوگڕی تاقەت پڕووکێنی خۆبەخۆ بکەین. دەتوانین بە تێگەیشتنێکی تازەوە لە کەسەرە کۆنو تازەکانمان وردبینەوە، بینینوو خوێندنەوەیەکی زیرەکانە لەپێناو خۆمان پیادەکەین کە نوێکەرەوەی ڕۆح، هیوا، سەروەرییەکانمان بێ. هەربۆیە بە ڕەچاوکردنی ئەو باوەڕەی کە دەبێ خۆمان ئەو باشییە بین، خۆمان ئەو ڕاستی و پاکییەبین کە گەرەکمانە بیکەین بە ڕەخشینی دونیاو سیمای سەردەمی ئێستای وڵاتمانی پێ دەوڵەمەند کەین. هەربۆیە گێڕانەوەی سازگاری و نمە بۆ پەیوەندییە کۆمەڵایەتییەکانمان لە ئەستۆی خۆمانداییە، چاوەڕوانییەکان، ویستوو حەزەکان، لە عۆدەی خۆمانداییە کە شکلی پێ بدەین و بیخەینە نێو چێوەی ژیانی حەقیقی و لە تاریکی پێچیی خەیاڵێکی ڕاڕەو دەریکێشین،. ئەم کارە شیاو بە تۆییە کە خۆت نوێنەرایەتی هەستو ویستەکانی خۆتی تیا بکەی، خۆت لە مینبەرو سەکۆی خۆنواندن نزیککەیتەوەو بوێرانە بواروو پێگەی لەبار بۆ خۆت فەراهەمکەیت. بۆ ساتێ بیر لە ڕاستییەکانی ژیانت بکەوە، گەر هەر باوەڕوو ڕەوتێکی باو کە عەیامێکە لەگەڵی راهاتووی، دوورت دەخاتەوە لە گۆڵمەزی کوردانە و لە کۆمەڵایەتی بوونت دادەشۆرێ، گەر هەرشتێ هاندەرنییە بۆ کرانەوەو هاوکاری و هاوپشتی، هەر ئامرازێ کە لاوازکەری متمانەییە و تاوی ڕقوو هەڵەشەییت تیادا دەوروژێنێ، بەهاکانی ژیانت لا لاواز دەکات، بزانە گەمەیەکی نامرۆڤانە لەئارادایە، هێزی چەواشە هەڵوەدای شتێکی دوور و جیا لە مەنفەعەتوو چاکی خۆتت دەکا. سەرانی گەمەکەری ئەم جۆرە مانۆڕە گەرەکییانە پیرۆزییەکانی خۆیان بسەپێنن بە زۆرەکی، دەیانەوێ بەویستی خۆیان هەڵمان سوڕێنن، بۆ هەمیشە لە سوچی لاوازی و زەلیلیدا بمانهێڵنەوە. لەخزمەتی شتێکدا ژیان وەڕێخەین کە زۆر دوورەو پێچەوانەی ویستەکانمانە. لەپێناو گێڕانەوەی خۆشترین شت لەژیانا، ئەو شتەی کە تەنانەت ناکرێ بەبێ بوونی وێنای بوونی ئادەمیزادانەمان بکەین، ئەویش پەیوەندی کۆمەڵاییەتی خۆبەخۆییە، کە بەگوێرەی هەلومەرجی ژینگەی ئەوڕۆ سازاوەو شکلی گرتووە. دیارە ئێمە بەتەنیاو تاکەتاکەش هەر هەین، بەڵام بوونمان پێکەوە ، ئاڵوگۆری ڕاو مشتومڕێ کە لەساییەی پەیوەندییەکانمان دێتەئارا، بڕیاری هەر کارێ کە خۆمان دەمانەوێ لەپێناو خۆماندا ئەنجامی دەین، بەواتای تەکامولو هێز دێتەوە و توانای بەرگری و خۆڕاگریمان هاوسەنگ و توندووتۆڵدەکات. تۆ ئازادی لە بڕیاروو هەلوێستەکانت دەزانی چی بکەی باشە بۆئەوەی لە کایەی ژیاندا خاوەن شەقڵوو نیشانی خۆتبی، خۆت دەزانی چۆن جوانی ناخت بە هاوزمانو هاوڕێکانت دەناسێنی، چۆن بوار دەڕەخسێنی بۆ ویستەکانت، دەزانی پێتاکی ئەم ڕێگەییە چییە و چۆن دەستەبەر دەکرێت. گەرەکە لەخۆت بپرسی بەڕاشکاوی، بۆ ئەم پرسە پیرۆز و پڕلە میهروو خۆشەویستیو ڕێزە بۆ خۆمان و بۆ دەورووبەرمان، یەکەم کاری سەلامەتوو بەسود لەپێناو خۆتا پێی هەڵسی چییە تا بیکەی؟


(بوونی هاوبەندی کۆمەڵاییەتی بەهێز بەڵگەیی هزری فراوان و کاری ئافەریدەی تۆییە)

هاوبەندیمان هێزە، بەبوونی تۆ، بە دەربڕینی ویستەکانت شکلدەگرێ

[email protected]