پارتیی ته‌نگه‌تاو بووه، هاوار بۆ جه‌ماوه‌ری تێکۆشه‌ری پارتیی و بارزانی ده‌بات!
Thursday, 13/05/2010, 12:00
پاش شه‌هیدکردنی سه‌رده‌شت عوسمان، ئه‌مڕۆ پاراستن بنه‌ماڵه‌ی ئه‌و شه‌هیده‌یان بانگکردووه، که ده‌بێت له راگه‌یاندنه‌کاندا بڵاوی بکه‌نه‌وه، که پارتیی و پاراستن ده‌ستیان له تیرۆرکردنی کوڕه‌که‌یاندا نییه، به‌ڵکو سه‌رده‌شت خۆی کێشه‌ی کۆمه‌ڵایه‌تیی هه‌بووه، ئه‌وه بۆته هۆی ئه‌وه‌ی که ناحه‌زه‌کانی بیکوژن.
به‌‌مه‌دا ده‌رده‌که‌وێت که پارتیی و بنه‌ماڵه‌ماڵه ته‌نگه‌تاوبوون، و ئیستا هێرش ده‌که‌نه سه‌ر هه‌موو لایه‌نه کوردییه‌کان.
بنه‌ماڵه ته‌نگه‌تاوبووه، ئه‌مجاره راسته‌وخۆ په‌لاماری گۆڕان و نه‌وشیروان موسته‌فا ده‌ده‌ن، تاوانباری ده‌که‌ن به‌و مێژووه کۆنه‌یه‌وه که له‌ناو یه‌کێتییدا رووی داوه، به‌تایبه‌تیی مه‌سه‌له‌ی قه‌رناقه و پشت ئاشان و ئه‌وانه‌یش که یه‌کێتیی له سلێمانی گوایه تیرۆری کردوون، له‌به‌ر ئه‌وه‌ی سه‌ر به پارتیی بوون
له خواره‌وه ده‌قی به‌یاننامه‌که‌ی پارتییتان بۆ بڵاوده‌که‌ینه‌وه، که به عه‌قڵی حه‌فتاکان بانگ له جه‌ماوه‌ر و رۆڵه به‌شه‌ره‌فه‌کانی بارزانی ئاشبه‌تاڵچی ده‌کات، پڕه له زمانی هه‌ڕه‌شه‌و تۆقاندن، هێشتا له‌وه نه‌گه‌یشتووه که ئه‌م تاوانه‌ی ئه‌نجامیان داوه، چ لێکدانه‌وه‌یه‌ک و تێکشاندنێکی تێدایه بۆ پارتیی و بنه‌ماڵه، سه‌ره‌تای کۆتاییانه.
ئێمه ئه‌م به‌یاننامه‌یه وه‌رده‌گێڕینه سه‌ر زمانی ئینگلیزی و زمانه‌کانی تر، ئه‌مه به‌ڵگه‌‌یه که پاراستن بنه‌ماڵه له پشتی تیرۆرکردنی سه‌رده‌شته‌وه بوون. زمانی به‌یاننامه‌که زمانی هه‌ڕه‌شه و ئیرهابه، لێ نازاننن ئه‌و سه‌رده‌مه به‌سه‌رچوو، پارتی بتوانێت به‌و زمانه خه‌ڵکی بترسێنێت، دیاره ئه‌وه‌ی له سه‌ره‌نجامی تیرۆرکردنه‌که‌ی سه‌رده‌شه‌وه بینی، ده‌رسی لیوه‌رنه‌گرتووه. و تووشی هیستیریای کردووه، که له ژیانی سیاسیی بنه‌ماڵه‌دا به‌ره‌وه رووی ناڕه‌زایی وا نه‌بۆته‌وه. پارتی و بنه‌ماڵه ده‌بێت بزانن، که ئیستا هێزێکی جه‌ماوه‌ریی بۆته پێشه‌نگ، که هه‌موو ناڕه‌زاییه‌تییه‌کان و تیرۆره‌کانی بنه‌ماڵه ئاشکراش ده‌کات و له‌م بنه‌ماڵه‌یه ناترسن، تازه هێزێک په‌یدا بووه، که زۆر له هێزی سه‌رکوتکه‌ره‌وه‌ی پارتی و پاراستن به‌هێزتره.
پارتی ده‌بێت له‌وه تێبگات، که ئیستا رۆژنامه و راگه‌یاندنه ئه‌وروپییه‌کان وه‌ک نیۆرک تایمز، واشتنتۆن پۆست، گاردیانی به‌ریتانی، رێکخراوه جیهانییه‌کان، لۆس ئه‌نجلس، هه‌موویان ئسیا له‌سه‌ر ئه‌م رووداوه ده‌نووسن، پێشتریش هه‌ر ئه‌مانه‌بوون له‌سه‌ر رژێمی دیکتاۆره‌کان نووسیاون حکومه‌تی ئه‌مه‌ریکی و ئه‌وروپی ناچارکران، پشتیان تێبکه‌ن و دواجاریش رووخان.
*-*****************
جه‌ماوه‌ری سه‌ربه‌رز و تێكۆشه‌ری كوردستان
سه‌ركه‌وتن و پێشكه‌وتنه یه‌ك له دوایه‌كه‌كان، له بواره‌كانی سیاسی و ئابووری و كۆمه‌ڵایه‌تی و یاسایی هه‌رێمی كوردستان و هه‌نگاوه‌كانی په‌ره‌سه‌ندنی هه‌ڵكشاوی كۆمه‌ڵگاكه‌مان له ماوه‌ی ساڵانی رابردوودا و به تایبه‌تیش سه‌قامگیریی باری ئاسایش و ئه‌منیه‌ت كه زه‌مینه و كه‌شوهه‌وای یه‌كجار ئه‌رێنی بۆ گه‌شه‌كردنی سیاسی و ئابووری هه‌رێمی كوردستان ره‌خساندووه، هه‌میشه جێنیشانه‌ی دوژمنان و ناحه‌زانی گه‌له‌كه‌مان بوون و به‌رده‌وام پیلانیان گێراوه بۆ تێكدانی بارودۆخی سیاسی و راگرتنی ره‌وڕه‌وه‌ی پێشكه‌وتن و په‌كخستنی كاروانه‌كه‌مان و بۆ لێدانی ئاسایشی نه‌ته‌وه‌ییمان.
نه‌یارانی گه‌له‌كه‌مان زۆر باش ده‌زانن، كه پارتی دیموكراتی كوردستان به سه‌رۆكایه‌تی سه‌رۆك (مه‌سعود بارزانی)، له پێشه‌وه‌ی به‌دیهاتنی ئه‌و ده‌سكه‌وتانه‌ن و داینه‌مۆی هه‌ر چی زیاتر پێشڤه‌چوون و گه‌شه‌كردنن ، بۆیه هه‌میشه سه‌رۆك بارزانی و پارتی دیموكراتی كوردستانیان له‌سه‌ره‌وه‌ی لیستی پیلانه‌كانیان داناوه، بۆ ئه‌وه‌ی ئازاریان بده‌ن و زیانیان پێ بگه‌یێنن.
ئه‌و ناحه‌زه پیلانگێرانه ده‌زانن كه ئه‌گه‌ر بۆیان بلوێ هه‌نگاوه‌كانی پارتی سڕ بكه‌ن و سه‌رقاڵی كێشه‌ی لاوه‌كی و شه‌ری لابه‌لای بكه‌ن ، ئه‌وا ده‌ستیان ده‌كرێته‌وه بۆ ئه‌وه‌ی له ناوجه‌رگه‌ی ئه‌زمونه دیموكراتیه‌كه‌ی هه‌رێم و ده‌سكه‌وت و سه‌ركه‌وتنه‌كانی گه‌لی كوردستان بده‌ن و ئیتر ئه‌و رۆله پێشه‌ڕه‌و واقعبینیه‌ی پارتیمان و سه‌رۆكی هێژامان كۆتایی پێده‌هێنن، كه له‌سه‌ر ئاستی كوردستان و عێراق و ناوچه‌كه و كۆمه‌ڵگای نێوده‌وڵه‌تی هه‌یه‌تی.
له‌و سۆنگه‌یه‌وه ئێوه‌ی جه‌ماوه‌ری خۆراگری كوردستان، وه‌كو ئێمه له پارتی دیموكراتی كوردستان سه‌رنجتان داوه كه ماوه‌یه‌كه شاڵاوێكی هه‌مه‌لایه‌نه له دژی پارتیمان و سه‌رۆكی هه‌رێمی كوردستان ، سه‌رۆك (مسعود بارزانی) به‌رپایه.
ئه‌م هێرشه رووكاری جۆراوجۆری هه‌یه و به شێوه‌یه‌كی زۆر تایبه‌تیش ماكینه‌یه‌كی ئیعلامی له ده‌ره‌وه و ناوه‌وه‌ی كوردستانی خراوه‌ته خزمه‌ته‌وه، بۆ ئه‌وه‌ی به‌رده‌وام دیعایه و پرۆپاگه‌نده‌ی ژه‌هراوی به ناو خه‌لكی كوردستاندا بڵاو بكه‌نه‌وه و گومان و دڵه‌ڕاوكێ و نائومێدی به‌رپا بكه‌ن و میلله‌ته‌كه‌مان بتۆقێنن .
ئێمه له پارتی دیموكراتی كوردستان زۆر باش ده‌زانین ئه‌وانه‌ی كه له پشت ئه‌م هێرشه‌وه‌ن ، ئه‌وانه‌ن كه چاویان به سه‌ركه‌وتن و سه‌رفرازیه‌كانی پارتی هه‌ڵنایه‌ت و هه‌ر وه‌كو چۆن له رابردوودا به شكل و ناو و به‌رنامه‌ی جۆراوجۆره‌وه بۆ په‌لاماردانی پارتیمان هه‌ڵده‌تۆقین، ئاواش ئه‌مڕۆ ده‌مامكی جیا جیا ده‌پۆشن و لێره و له‌وێ خۆیان له دژمان تاقی ده‌كه‌نه‌وه . به‌ڵام لهلای پارتیمان و جه‌ماوه‌ره دڵسۆزه‌كه‌ی و لهلای خه‌لكی كوردستانیش ناسراون و ناسنامه و شێوازی كار و جێپه‌نجه‌ی تاوانكاری و دوژمنكارانه‌یان ئاشكرا و دیاره .
ئه‌ی خه‌لكی به ئه‌مه‌كی كوردستان
چه‌ند ساڵی رابردوو تا هه‌ڵبژاردنه‌كانی ئه‌م جاره بۆ په‌رله‌مانی كوردستان و په‌رله‌مانی عێراق، برێتی بوون له رۆژگاره پرشنگداره‌كانی پارتی دیموكراتی كوردستان و هێزه سیاسییه هاوپه‌یمانه‌كانی ، ئه‌وه‌ش ناراحه‌تی و نیگه‌رانی زۆری بۆ ناحه‌زان و نه‌یاره‌كانیان دروست كردووه، بۆیه ئێمه ده‌مانزانی سه‌رله‌به‌ر خه‌ریكی هۆنینه‌وه‌ی ته‌ونه‌كانی پیلانن له دژمان و به‌هه‌ر كلۆج و ئه‌نجامێك بووه ده‌یانه‌وێ گورزێ له پارتیمان بوه‌شێنن .
ورووژاندنه ئیعلامیه‌كان ، پاشان رووداوه‌كانی چه‌ند رۆژی رابردوو ، هه‌ر له ته‌قینه‌وه‌ی سنووردار و هه‌وڵی تێكدانی باری ئاسایشی پایته‌ختی هه‌رێم و شاره‌كانی دیكه ، تا رفاندن و تیرۆر كردنی قوتابی لاو كاكه (سه‌رده‌شت عوسمان)، برێتی بوون له سه‌ره‌تاكانی ده‌ست پێكردنی ئه‌و پیلانه‌یان كه ئێمه پێشبینیمان ده‌كرد .
جا ئه‌گه‌ر زوو ده‌ستی ره‌شی نه‌گریسیان نه‌بڕینه‌وه، له‌و بڕوایه‌داین كار و كرده‌وه‌ی دڕنده‌تریشیان له به‌رنامه‌دایه .
بۆیه ئێمه له كاتێكدا ئه‌م كرده‌وه قیزه‌وه‌نه ریسوا و شه‌رمه‌زار ده‌كه‌ین و پرسه و سه‌ره‌خۆشیمان بۆ خانه‌واده به‌رێزه‌كه‌ی و هه‌ڤالان و هاوپۆله‌كانی و سه‌رجه‌م خه‌لكی كوردستان ده‌نێرین ، به‌و تاقمه گێره‌شێوێنه تاوانكاره‌ش ڕاده‌گه‌یێنین ، كه ئه‌وان لای ئێمه ناسراون و سه‌ره‌داوه‌كانی پیلانه‌كه‌یان و ئامانجه نه‌گریسه‌كانیان ئاشكرا بووه.
پارتیمان و جه‌ماوه‌ره دڵسۆزه به‌رفراوانه‌كه‌ی و خه‌لكی كوردستان به گشتی له ئاستی تاوان و به‌دكارییه‌كانیان بێده‌نگ نابن و شێلگیرانه هاوكاری دام و ده‌ستگا ئه‌منیه‌كانی حكومه‌تی هه‌رێمی كوردستان ده‌كه‌ن بۆ ئاشكراكردنیان و گه‌یاندنیان بۆ به‌رده‌م دادگا .
هه‌روه‌ها به شێوازی جۆراوجۆری چالاكی جه‌رماوه‌ری ڕووبه‌ڕووی ئه‌م شاڵاوه‌یان ده‌بنه‌وه و په‌رده له‌سه‌ر ڕووی دزێوی هه‌موو ئه‌وانه هه‌ڵده‌ده‌نه‌وه كه ڕاسته‌وخۆ و ناراسته‌وخۆ ده‌ستیان تێیدا هه‌یه و به رێوشوێنی یاسایی به سزای خۆیان ده‌گه‌یێنن . ئیتر ئه‌زمونه‌كه‌مان له‌و جه‌نجاڵی و ئاڵۆزیانه رزگار ده‌كه‌ن كه ئه‌وان ده‌یانه‌وێ له‌م هه‌رێمه ئارام و پێشكه‌وتووه‌ماندا به‌رپای بكه‌ن .
جه‌ماوه‌ری دڵسۆزی كوردستان
ئه‌ی رۆله‌كانی پارتی و بارزانی نه‌مر
به بكوژانی هه‌ڤاڵانی تێكۆشه‌رمان، شه‌هیدان (شه‌فیق ئاغا و عه‌بدولی سۆران و سدیق ئه‌فه‌نی و نوری حمه عه‌لی و عه‌ولا سور و ئه‌و پێشمه‌رگه ئافره‌ته شیوعییانه‌ی له قڕناقه و پشتئاشان) شه‌هید كران ، با بزانن گه‌له‌كه‌مان لێیان بێده‌نگ نابێت و ئێستا ڕشتنی فرمێسكی تیمساحانه بۆ شه‌هید (سه‌رده‌شت)، تاوانه‌كانیان ناسرێته‌وه .
گه‌لی كوردستان كه په‌رۆشی ئازادی و ئارامی و پێشكه‌وتنه، هه‌رگیزا و هه‌رگیز رێگه نادات تاقمێكی هه‌ڵتۆقیوی گێره‌شێوێن ، شار و شارۆچكه‌كانی هه‌رێم بكاته مه‌یدانی فه‌وزا و ئاشوب و به‌و نه‌ریته‌ی له‌سه‌ری ڕاهاتوون له تیرۆر و تۆقاندن و پشێوی نانه‌وه و نه‌هێشتنی ئه‌خلاق، ژیان و گوزه‌ران و ئه‌منیه‌تی هاولاتیان بخه‌نه مه‌ترسیه‌وه.
هه‌رگیزا و هه‌رگیز رێگه ناده‌ن ئه‌و شاڵاوه ئیعلامیه ژه‌هراویه‌ی وه‌كو ته‌واوكه‌ری پیلانه نه‌گریسه‌كه‌یان به‌رده‌وام بێت . هه‌موو ئه‌وانه‌ی له‌و ماوه‌یه‌ی رابردوودا بوختانیان به دام و ده‌ستگا ئه‌منیه‌كانی هه‌رێم و به پارتیمان كردووه و به بێبه‌ڵگه و هه‌روا له خۆڕا، تۆمه‌تباریان كردوون، راپێچی به‌رده‌م دادگا ده‌كرێن و لێپێچینه‌وه‌ی یاساییان له‌گه‌ڵدا ده‌كرێت .
جه‌ماوه‌ری خه‌لكی كوردستانیش دڵنیا ده‌كه‌ینه‌وه كه ئه‌م پیلانه و دارێژه‌ر و ئه‌نجامده‌رانی له گۆڕ ده‌نێین و وڵات و ئه‌زمونه‌كه‌مان جارێكی دیكه ڕووی گه‌شی خۆی نیشانی دۆست و نه‌یارانمان ده‌داته‌وه .
سه‌ركه‌وتن بۆ گه‌لی كوردستان و ئه‌زمونه دیموكراتیه‌كه‌ی
سه‌رفرازی بۆ پارتی دیموكراتی كوردستان و سه‌رۆكی هێژامان كاكه (مسعود بارزانی)
سه‌ر شۆڕی بۆ بكوژانی (سه‌رده‌شت عوسمان) و هه‌موو ئه‌وانه‌ی كراونه‌ته قۆچی قوربانیی تیرۆر و مه‌رامی تێكده‌ران
مه‌كته‌بی سیاسی پارتی دیموكراتی كوردستان
13/5/2010
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
