ته‌قینه‌وه‌كه‌ی هه‌ولێر دیوێكی دیكه‌ی په‌یوه‌ندییه‌كانی نێوان ده‌زگای پاراستن و داعش
Friday, 21/11/2014, 12:00
له سه‌روبه‌ندی دوا هه‌ڵبژاردنی ئه‌نجوومه‌نی پارێزگای هه‌ولێر و پۆستی پارێزگاری هه‌ولێر، ناكۆكییه‌كانی نێوان مه‌سرور (پاراستن) و نێچیرڤان گه‌یشته لووتكه. ئه‌وه‌بوو نه‌وزاد هادی نوێنه‌ری نێچیرڤان و پشتیوان سادقیش نوێنه‌ری مه‌سرور بوو بۆ هه‌ڵبژاردن. بانگه‌شه‌ی هه‌ڵبژاردن ده‌ستی پێكرد و كار گه‌یشته ململانێیه‌كی یه‌كجار زۆر توند له‌نێوان نه‌وازد هادی و پشتیوان سادق، به‌شێوه‌یه‌ك هه‌ردووك به‌بێ پێچ و په‌نا كه‌وتنه یه‌كتر شكاندنه‌وه له چه‌ندین كۆڕ و كۆبوونه‌وه‌یان له‌گه‌ڵ ئه‌ندامان و لایه‌نگرانی پارتی. دواتر ئه‌م هه‌واڵه به مه‌سعود بارزانی گه‌یشت یه‌كسه‌ر داوای له مه‌سرور كرد كه پشتیوان له هه‌ڵبژاردن بكێشێته‌وه، چونكه له‌وه ده‌ترسا ئه‌وه ببێته هۆی دۆڕان و كه‌رامه‌ت شكاندنی پارتی له هه‌ولێر. به‌ڵام له هه‌مان كاتدا مه‌سعودیش زۆر ڕقی له نه‌وزاد هادی ده‌بووه‌وه ئه‌وه‌ش له‌به‌ر چه‌ند هۆكارێك:
- نه‌وزاد هادی ده‌توانێت ده‌نگێكی زۆری خه‌ڵكی پارتی و هه‌روه‌ها غه‌یره پارتی له‌هه‌ولێر به‌ده‌ست بێنێت، به‌مه‌ش ده‌بێته كه‌سایه‌تیه‌كی به‌هێز به‌بێ ئه‌وه‌ی پێویستی به پاڵپشتی پاراستن بێت، چونكه مه‌سعود و كوڕه‌كه‌ی هه‌رگیز حه‌زناكه‌ن هیچ كه‌سێكی سۆرانی به قووه‌تی كه‌سێتی خۆی پۆست و پله به‌ده‌ست بێنێت و پێیان خۆشه پۆست و پایه به خه‌ڵكانێكی بێ ئابروو بده‌ن كه كه‌سێتیان له قه‌ڵه‌می ئه‌وانه‌وه به‌ده‌ست بێنن (نموونه‌ش زۆرن له‌سه‌ر ئه‌و جۆره كه‌سانه).
- خاڵێكی دیكه ئه‌وه‌یه نه‌وزاد هادی له ڕێبازی پارتی و بارزانی لایداوه، چونكه راسته‌وخۆ په‌یوه‌ندییه ته‌له‌فۆنییه‌كانی خه‌ڵك وه‌ڵام ده‌داته‌وه و بۆ چاره‌سه‌ركردنی كێشه‌كانیان، هه‌روه‌ها چاوپێكه‌وتنی رأسته‌وخۆ له‌گه‌ڵ هاوڵاتیان ئه‌نجام ده‌دات و تاڕاده‌یكی زۆر كاره‌كانیان ڕایی ده‌كات و ئه‌مه‌ش ده‌بێته هۆی زیاتر به‌هێزبوونی له هه‌ڵبژاردنه‌كانی داهاتوودا. هه‌روه‌ك خۆشتان ده‌زانن ئه‌م كرده‌وانه كارێكی نامۆیه به به‌رپرسانی پارتی و له هیچ شوێنێكی ژێر فه‌رمانڕه‌وایی پارتی كه‌سێكی دیكه له‌م شێوه‌یه نادۆزیه‌وه. ئه‌مه‌ش خۆی له‌خۆیدا مه‌ترسییه‌كی دیكه‌یه بۆ پارتی و بنه‌ماڵه. چونكه ئه‌وان زۆر دوور ده‌ڕوانن و وا بیرده‌كه‌نه‌وه ده‌كرێت رۆژێك له رۆژان نه‌وزاد لێیان یاخی بێت و بۆ نموونه ببێته ڕكابه‌ری مه‌سعود یان مه‌سرور له هه‌ڵبژاردنی سه‌رۆكایه‌تی هه‌رێم یان هه‌رپۆستێكی دیكه.
- زۆربوونی جه‌ماوه‌ری نه‌وزاد به‌شێوه‌یه‌ك كه ده‌ربچێت له ده‌ستی پاراستن ئه‌مه هه‌رگیز رێگه پێدراو نییه و مه‌ترسییه‌كی گه‌وره‌یه چونكه به‌م شێوه‌یه ده‌كرێت رۆژێك له‌رۆژان خه‌ڵك بێنێته سه‌ر شه‌قامه‌كان و له دژی مه‌سعود و مه‌سرور به‌كاریان بێنێت.
هه‌ربۆیه مه‌سرور بڕیاریدا سنوورێك بۆ نه‌وزاد هادی دابنێت و تۆڵه‌ی هه‌ڵبژاردنی پارێزگاری هه‌ولێریشی لێ بكاته‌وه (چونكه زۆر هه‌وڵیدا نه‌وزاد رازی نه‌بوو له هه‌ڵبژاردن بكشێته‌وه). له یه‌كه‌م هه‌نگاودا نه‌وزاد هادی ده‌رمانخوارد كرا و یه‌كسه‌ر چوو بۆ ده‌ره‌وه‌ی وڵات بۆ چاره‌سه‌ر كردن و هه‌واڵیان له‌ناو خه‌ڵك وا بڵاوكرده‌وه كه‌گوایا نه‌وزاد هادی جه‌ڵته لێی داوه. دوای چاره‌سه‌ركردنی، كه‌گه‌ڕایه‌وه دیسان هه‌ڕه‌شه‌یان لێكرد و گوتیان واز له پۆستی پارێزگاری بێنه به‌بیانووی نه‌خۆشی، به‌ڵام نه‌وزاد ته‌نها ئیستیقاله‌ی له ئه‌نجوومه‌نی پارێزگادا و هه‌ر به پارێزگاری مایه‌وه، ئه‌مجاره‌یان له رێگه‌ی ته‌قینه‌وه هێرشیان كرده سه‌ر كه ئه‌وه‌ش دوایین نامه‌ی مه‌رگ ئامێزی پاراستنه بۆ نه‌وزاد و واپێده‌چێت به هه‌ر شێوه‌یه‌ك بێت له شێوه‌كان بڕیاری له كوشتن یان له‌ناوبردنیان دابێت.
له‌دوای ته‌قینه‌وه‌كه‌ی به‌رده‌م پارێزگای هه‌ولێریش پاراستن زۆر بێ شه‌رمانه به‌یاننامه‌یه‌كیان ده‌ركرد و گوتیان بۆیه داعش توانیویانه خۆیان بگه‌یه‌ننه ناو شاری هه‌ولێر، چونكه ئاسانكارییه‌كی زۆر كراوه بۆ خه‌ڵكی باشووری عیراق بۆ هاتنه ناوه‌وه‌ی هه‌ولێر، خه‌ڵكی هه‌ولێر و ڕه‌نگه كه‌ركوك و سوله‌یمانیش ئه‌وه باش بزانن له خاڵه‌كانی پشكنین بۆ هاتنه ناوه‌وه‌ی هه‌ولێر ماوه‌ی سێ مانگ زیاتره كه نه‌ك خێزان به‌ڵكو پێشكه‌یه‌كی عه‌ره‌بیش داخلی هه‌ولێر نه‌بووه هه‌رچه‌نده ئه‌گه‌ر كه‌فیلیشی هه‌بوو بێت له خه‌ڵكی هه‌ولێر.
لێره‌دا ده‌مه‌وێت به خه‌ڵكی هه‌ولێر ڕابگه‌یه‌نم كه ئه‌و ته‌قینه‌وه‌یه‌ی له پارێزگای هه‌ولێر ڕوویدا ته‌نها سیناریۆیه‌كی دیكه بوو له سیناریۆكانی پاراستن هه‌روه‌ك چۆن هێرش و ته‌قینه‌وه‌كه‌ی سه‌ر ئاسایشی هه‌ولێر به ئیسعاف ئه‌نجامدرا. به‌ڵام هه‌ندێك خه‌ڵك به‌وه سه‌ریان لێ شێواوه كه چۆن داعش به‌رپرسیارێتی خۆی له‌م كرده‌وانه ڕاگه‌یاندووه؟ له‌وه‌شدا ناهه‌قیان ناگرم، چونكه ته‌سه‌ور ناكه‌ن كه پارتی و بنه‌ماڵه له بێ ئه‌خلاقیدا هیچ سنوور و له‌مپه‌رێكیان نییه. سیناریۆی ئه‌مجاره‌ش ئه‌وه‌بوو كه پاراستن له رێگه‌ی په‌یوه‌ندییه تووند و تۆڵه‌كانیان له‌گه‌ڵ داعش، داوایان لێكردن كه كه‌سێكی خۆكوژیان بۆ بنێرن و ئه‌وانیش ئاسانكاری هاتنه ناو هه‌ولێری بۆ ده‌كه‌ن له‌گه‌ڵ دابین كردنی پێداویستییه‌كانی ته‌قینه‌وه.
له‌كۆتاییدا ته‌نها ده‌مه‌وێت ئه‌وه به‌بیر خه‌ڵكی هه‌ولێر بێنمه‌وه كه تاكو ئێستا هیچ ته‌قینه‌وه‌یه‌ك به‌بێ ڕه‌زامه‌ندی پاراستن له هه‌ولێر ئه‌نجام نه‌دراوه، ته‌نانه‌ت ته‌قینه‌وه‌كه‌ی مه‌ڵبه‌ندی یه‌كێتی و لقی پارتی له یه‌كی شوبات پاراستن ئه‌نجامیدا، هه‌ربۆ مێژوو و زانیاری خوێنه‌ر هه‌موو ئه‌و به‌رپرسه پارتیانه‌ی كه‌له لقی دوو بوون به‌شێوه‌یه‌كی ره‌سمی له‌لایه‌ن پارتییه‌وه ئاگادار كرابوونه‌وه كه رۆژی جه‌ژن له یه‌كی شوبات ده‌بێت له لقی دوو ئاماده‌بن، چونكه پاراستن بڕیاری كوشتنی هه‌موویانی ده‌ركردبوو، له‌به‌ر ئه‌وه‌ی زۆربه‌یان له حزبه‌كانی شوعی و سۆشیالیست و پاسۆك و پارتی گه‌ل و ...هتد، هاتبوون یاخود به‌رپرسی كۆنی پارتی بوون و شه‌رمیان له بنه‌ماڵه نه‌ده‌كرد بۆ ده‌ربڕینی ناره‌زایی و بگره رێگریشیان له بنه‌ماڵه ده‌كرد، ئه‌مه‌ش ئاسته‌نگێكی گه‌وره بوو، هه‌روه‌ها نه‌مانی به‌رپرسه كۆنه‌كان ده‌بووه هۆی هاتنه پێشه‌وه‌ی چه‌ند گه‌نجێكی په‌روه‌رده‌ی ژێرده‌ست و گوێڕایه‌ڵی خۆیان. یه‌كێك له‌و به‌رپرسانه‌ی پارتی كه بڕیاری كوشتنیان دابوو، پارێزگاری ئه‌و كاته‌ی هه‌ولێر بوو به‌ناوی (ئه‌كره‌م مه‌نتك)، به‌ڵام ئه‌و ڕۆژه كه‌ریم سنجاری چاو ده‌گێڕێت ته‌ماشا ده‌كات ئه‌كره‌م مه‌نتك دیار نییه و نه‌هاتووه‌ته لقی دوو، هه‌ربۆیه یه‌كسه‌ر ته‌له‌فۆنی بۆ ده‌كات و ئه‌مری له‌سه‌ر ده‌كات كه‌ده‌بێت هه‌ر ئێستا بێیته لق، هه‌رچه‌ند ئه‌كره‌م باری ته‌ندروستی زۆر خراپ بووه و له‌ناو جێگه‌دا كه‌وتبوو و لێی ده‌پارێته‌وه كه ده‌یه‌وێت له ماڵه‌وه پشوو بدات، به‌ڵام كه‌ریم سنجاری خۆی لێ تووڕه ده‌كات و پێی ده‌ڵێت ده‌بێت هه‌ر ئێستا له لق ئاماده بیت. (هه‌ر كه‌سێك گومانی له‌و بابه‌ته هه‌یه ده‌كرێت راسته‌وخۆ په‌یوه‌ندی به بنه‌ماڵه‌ی ئه‌كره‌م مه‌نتك بكات). بۆ زانیاری خوێنه‌ری به‌رێز كه ته‌قینه‌وه‌كه‌ی یه‌كی شوبات به سه‌رپه‌رشتی كه‌ریم سنجاری ئه‌نجامدرا به هه‌ماهه‌نگی له‌گه‌ڵ شێخ زانا. كه‌ریم سنجاری یه‌كێك بوو له‌و كه‌سانه‌ی كه له‌ناو بینایه‌ی لقی دوو بوون له‌ڕۆژی یه‌كی شوبات، به‌ڵام به‌بیانووی ئه‌وه‌ی كه هاری شۆت (به‌رپرسێكی سه‌ربازی ئه‌مریكی بوو) به‌رێ ده‌كات له‌ناو بینایه‌ی لق هاته ده‌ره‌وه و ئیشاره‌تی بۆ شێخ زانا كرد كه كه‌سه خۆكوژه‌كه بنێرێته ناو لقی دوو بۆ ئه‌نجام دانی ته‌قینه‌وه‌كه.
مونه‌سیقی ئه‌وكاته‌ی نێوان پاراستن و تیرۆریسته‌كان شێخ زانا بوو، به‌ڵام له‌به‌ر ئه‌وه‌ی ئه‌و كاته پاراستن و ئاسایشی هه‌ولێر دوو ده‌زگای جیابوون له‌یه‌كتر، هه‌ربۆیه لێك تێنه‌گه‌یشتنێك له‌نێوانیاندا ڕوویدا و ئاسایشی هه‌ولێر بووه هۆی كه‌شف بوونی شێخ زانا، هه‌ر دوای ئه‌و ڕووداوه پاراستن یه‌كسه‌ر بڕیاری تێكه‌ڵ كردنی ده‌زگای پاراستن و ده‌زگای ئاسایشی دا. یه‌كێك له‌و به‌رپرسانه كه‌بووه هۆی ده‌ستگیركردنی شێخ زانا به‌رێوه‌به‌ری ئاسایشی ئه‌وكاته‌ی هه‌ولێربوو به‌ناوی عه‌بدوڵڵا عه‌لی. هه‌ربۆیه پاراستن كه‌وتنه دژایه‌تی كردنی به‌هه‌موو شێوه‌یه‌ك، چونكه سه‌ر به‌خه‌تی نێچیرڤان بوو، هه‌ربۆیه توانی چه‌ند ساڵێك به پاڵپشتی نێچیر له شوێنه‌كه‌ی خۆی بمێنێته‌وه، به‌ڵام دواجار پاراستن توانیان له پۆسته‌كه‌ی دووری بخه‌نه‌وه و رێگه‌شیان پێنه‌دا له هه‌ڵبژاردنی كۆنگره‌ی پارتی خۆی بپاڵێوێت. هه‌ربۆیه عه‌بدوڵڵا عه‌لی له‌به‌ر ئه‌وه‌ی خۆی كۆنه به‌رێوه‌به‌ری ئاسایشی هه‌ولێر بوو (له نه‌وزاد هادی زیره‌كتربوو) ده‌یزانی پاراستن چه‌نده مه‌ترسیداره و له‌ناوی ده‌به‌ن، بڕیاریدا كوردستان به‌جێ بێلێت و به‌ڵام نه‌وێرا ڕوو له ئه‌وروپا بكات، چونكه ده‌یزانی له ئه‌وروپا پاراستن ده‌سه‌ڵاتیان به‌هێزه و مه‌ترسی بۆ سه‌ر ژیانی ده‌بێت. هه‌ربۆیه ئێستا له ئه‌مریكا نیشته‌جێیه.
دوا وته‌شم كورته نامه‌یه‌كه بۆ پارێزگاری هه‌ولێر: تكایه تا زووه واز له پۆسته‌كه‌ت بێنه، له‌گه‌ڵ ئه‌وه‌شدا دڵنیا نیم له‌وه‌ی كه پاراستن وا به ئاسانی وازت لێبێنن، به‌ڵام هه‌رچۆنێك بێت تۆزێك ویژدانت بخه‌گه‌ڕ و با هه‌ر خۆت به ته‌نها له‌ناو بچیت و خه‌ڵكی دیكه با به‌هۆی تۆوه له‌ناونه‌چن!
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
