پاریزەرانی بەعسه ئەنفالچییەكان، ده‌تانه‌وێت من تیرۆر بکه‌ن؟
Friday, 12/02/2010, 12:00
لەوەتەی زوڵم و زۆرداری جەبرو ستەم هەیە دژی گەلەكەمان لە لایەن ڕژێمە یەك لە دوای یەكەكانی عیراقەوە، بنەماڵەكەی من لە خەبات و تێكۆشاندندان و نەترسانە بەرەنگاری زمانی ئاگرو ئاسنی ئەو ڕژێمانە بوونەتەوە، لەو ڕێگایەدا بە دەیان شەهید و ئەنفالی داوە، بۆ تەنها ڕۆژێكیش خیانەتیان لە گەلەكەی خۆیان نەكردووە. هەمیشە بەگژ زوڵم و زۆرداریدا چوونەتەوە و پێیان هەزم نەكراوە.
لە دوای ڕاپەڕینەكەی 1991 وە و گرتنە دەستی دەسەڵات لە لایەن دوو بنەماڵەوە. هەتاوەكو ئێستا داهاتی وڵات تاڵان دەكرێت و خەڵك بە مێگەل دەكەن و ئازادیەكانی خەڵك زەوت دەكەن و كەرامەتی تاكی كوردی تیك دەشكینن و كۆمەڵگەی كوردیان كردوەتە دووژمنی یەكتری و كردویانەتە دووبەشەوە و هتد... هەر بۆیە بەندەش وەكو تاكێكی جوتیار و هەژار و نیشتمان پەرەوەرەی بنەماڵەكەم، چەند ساڵییەكە لە ڕێگای نووسینەوە كە بە خەباتێكی شارستانی و دیموكراسیم زانیوە، نەترسانە بە كیبۆردی كۆمپیتەرەكەم بە گژ ئەو زوڵم زۆرداری و نایەكسانی و ناعەدالەتی هەردوو بنەماڵەی بارزانی و تاڵەبانی چوومەتەوە كە بەرامبەر بە خەڵكی كوردستان كردوویانەلە ڕێگای چەند بەكرێی گیراویك و هەڵقە لەگوی و كویلەكانیانەوە. ئەوەی وایكردووە نەترسانە بەگژ ئەم دەسەڵاتە دزەدا بچمەوە،ڕابردوی پاكی بنەماڵەكەم بووە. بەڵام ئەوانەی كە ویستیان من بڕفێنن تیرۆرم بكەن ئەوانەشی لە پشتی ئەو هەڵقە لە گویانەوەن زۆر نامەردوو ترسنۆكن، چونكە ئەگەر ترسنۆك نین بۆ پەنا بۆ كاری نامەردی و تیرۆر دەبەن، كە پیشەی ئەو دیكتاتۆرە ترسنۆكانەیە لە ڕێگای ترس و تۆقاندن و تیرۆرەوە ئەیانەوێت بەزۆر خۆیان بسەپێنن بە سەر خەڵكیدا.
دەپرسین ئایە بۆچی یەكێتی و پارتی پەنابۆ تیرۆركردنی كەسانی ڕۆشنبیرو ڕۆژنامەنووسانی سەربەخۆ نەیارە سیاسیەكانیان دەبەن؟ كەنعان مەكییە نوسەری كتێبی (كۆماری ترس)ە نوسیوێتی: (حكومەتە ستەمگەرو دیكتاتۆرەكان كاتێك دەسەڵاتیان دەكەوێتە مەترسیەوەپەنا بۆ توندوتیژی دەبەن). وەلی ئێستا لە كوردستاندا لە ژێر لەچكی دیموكراسیەدا دوو بەچكە دیكتاتۆرو ستەمگەر خۆیان حەشارداوە و حوكمی كوردستان دەكەن، نمونەشمان زۆرە لەو باریەوە كە ئەم دوو دەسەڵاتە دیكتاتۆر و ستەمگەرن. بۆ نمونە لە شەستەكانی سەدەی ڕابردوەوە تاوەكو ئێستا جەلالی و مەلای یەكتریان قەبوڵ نەبووە، كە ماوەی چەند ساڵ جارێك یەكێكیان برابچوك بێت و ئەویتریشیان براگەورە، هەربۆیە بۆ سڕینەوەی یەكتری بێشەرمانەپەنایان بردووە بۆ دووژمنانی گەلەكەمان و بوونەتە كەواسوری بەر لەشكری داگیركەران. هەموو ئەو یەكتر قەبوڵ نەكردنە كە ڕووبارێك خوێنی براكانی ڕشت بەدەستی یەكتری، هیچ سودێكی نەبوو بۆ گەلەكەمان و كەسیشیان نەیانتوانی بە براكوژی و جاشێتی یەكتری لەناو بەرن.ئەوەی سودمەندی یەكەم بووە دووژمنانی گەلەكەمان و هەردوو بنەماڵەكە بوو. ئێستا ئەوەی یەكێتی و پارتی بەیەكەوە گونجاندووە تەنها دەسەڵاتی برابەشی و پارییە. لە دوای 25/7/2009 وە، كە هاوكێشەی سیاسی لە كوردستان گۆڕاوە و ترازوی هێزی هەردوولا تێك شكاوە، دەزانن بە هیمەتی قەڵەمە بوێرەكان كە توانوییانە خەڵكی هوشیار بكەنەوە و ئەو كاریگەریە درووست بكەن كە خەڵك بە یەك پەنجە مۆریەك بییانخاتە نێو زبڵدانی مێژووی دەسەڵاتە ستەمگراكان و دیكتاتۆرەكانەوە. بۆیە هەردوو بنەماڵكە بۆ ئەوەی خەڵك چاوترسێن بكەن و كۆیلەی بكەن، پەنایان بردووەتە بەر تیرۆر كردن و ڕفاندن و تۆقاندنی ئەو ڕۆژنامەنووس و ڕۆشنبیرانی كە ناتوانن بە پارەی دزراوی خەڵك بیانكڕن و دەمكوتیان بكەن. بەڵام خەیاڵیان خاوە كە بتوانن بە كوشتنی خەڵكانی وەكو ئێمە خەڵك دەمكوت بكەن. چونكە ئەو شۆڕشە نوێیەی هوشیاری تاكە كە بە هەوڵی ڕۆشنبیران و ڕۆژنامەنووسە بوێرەكان درووست بووە، تازە هیچ ستەمگەرو دیكتاتۆریك ناتوانێت بەری پێی بگرێت.
ئایا ئەزانن بۆ ئێمە بە ڕفاندن و تیرۆركردنیش سڵاتان لێ ناكەینەوە. لەبەر ئەوەی ئێمە نە جاشێتیمانكردوەو نە بەعسی بوینەوە نە دەبینە كۆیلەی ئێوەش، لەبەر ئەوەی ئێمە نە دەبابەی بەعس و توركان هێناوەتە سەر خاكی كوردستان ، نە پازداری ئێرانیمان هێناوە، نە لەلایەك فرمێسكی درۆینەمان ڕشتووە بۆ ئەنفال و كیمیابارن كراوەكان و لەولاشەوە نەبووینەتە پارێزەری بەعسی و ئەنفالچیەكان. نە چوینەتە سەر قەبری ئەتاتورك و خومەینی و حافز ئەسەد، نە لەسەر گۆڕی ئەتاتورك دەوڵەتی كوردیمان بە خەونی شاعیرانە شوبهاندووە، نە داهاتی وڵاتمان تاڵانكردوە، نە هێزی سەركوتكەرو تۆقێنەرمان هەبووە، نە بە پارەی دزراوی خەڵك ڤێلاو كۆمپانیاو جۆرەها ئۆتۆمۆبیلمان هەیە، نە داوێنیپیس و دەست پیس بووینە، نە ڕۆژنامەنووس و ڕۆشنبیرمان تیرۆركردووە،نە لەشكرێك بەناو ڕۆشنبیرمان بە پارە كۆیلەكردووە، نە زیندانی نهێنی و گۆڕی بە كۆمەڵمان هەیە، نە جەرگی دایكانی پاش ماوەی ئەنفال و شەهیدمان سوتاندووە،نە خۆمان بەزل زانیوەو خەڵكیش بە كۆیلە و مورید، نە چی و چیترمان كردووە.
ئەوە ئێوەن هەموو ئەوانەتانكردووە و ترساون لە هێرشی خەڵكی هوشیاری كوردستان، ترستان كەوتوەتە ئەو ڕادەیەی كە كاتێك لە ماڵ دەردەچن لەشكرێك هێزو دۆشكەو بیكەیسی و دەخەنە دوای خۆتان. خۆتان دەزانن چیتان چاندوەو چیشی لێ دەدورنەوە. ئەوە ئێوەن لە ڕاپەڕینی دیموكراسی و سندوقی دەنگدان دەترسن كە خەڵك بە پەنجە مۆرێك تۆڵەی خۆیانتان لێدەسێننەوە.
دابڕانتان لە خەڵك و ناعەدالەتیتان بووەتە ترسێك تەنانەت لە سێبەرەكانی خۆشتان دەترسن، بەڵام ئێمە كە لە ناو ئازارو موعاناتی خەڵكی ئەنفال و شەهید و هەژاردا دەژین و خەڵك پشتیوانمانە. بۆیە ناترسین لەو لەشكرە میلیشیا و جاسوس و هەڵقە لەگوێیانەتان كە بەكاری دەهێن بۆ پارێزگاری لە كورسیە قاچ شكاوەكانتان.
ئەوتا ئەو هەڵقە لە گوێیانەی یەكێتی كە یەكییەكیانم ناسی و لە دەستیان هەڵهاتم و ڕزگارمبوو لە ژێر چەقۆی خۆیان وئاغاكانیان. زۆر لەرزۆكانە ترسنۆكانە بە هەڵەداوان شاهیدی درۆینە دەهێننە دادگا، سەیركەن چەند ترسنۆك و نامەردن كاتێك كارە تیرۆرستیەكەیان ئاشكرا دەبێت، چۆن شپرز دەبن و نازانن چۆن ئەو شەرمەزاریە گەورەیەی خۆیان و حیزبە لەرزۆكەكەیان و ئاغا ترسنۆكەكانیان بشارنەوە. بەو كارە قێزەونەی كە ویستان ئەنجامی بدەن و هەوڵەكەیان سەری نەگرت، سەلماندیان كە كیبۆردی كۆمپیتەرەكەی من سەری لە خۆیان و ئاغاكانیا تێكداوە و قەڵای ستەمگەری دیكتاتۆریەتیانی هەژاندووە. دڵنیام لە دوای 7/3/2010 وە، چۆن خۆیان و ئاغاكانیان كونە مشكیان لێ دەبێتە قەیسەری و ئایندەی ملازم موحسین كۆنەكەی سەردەمی بەعسی شاری سلیمانی چاوەڕوانیانە، چونكە ئەگەر لە ملازم موحسینەكان سەردەمی بەعس زۆرتریان نەكردبێ كەمتریان نەكردووە.
[email protected]
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
