نەوشێروان مستەفا خەریكە هەمان بۆیاخ بوونەوەكەی یەكێتی دووبارە دەكاتەوە

Wednesday, 07/07/2010, 12:00

لە دوای ڕاپەڕینەكەی بەهاری ساڵی 1991 خەڵكی كوردستان ئەوەندە زووڵمی بەعسی بینیبوو، بۆیە یەكێتی و پارتییان وەكو بت دەپەرست و براو كەس و كاری خۆیانیشیان بۆ دەناردن بۆ شەڕی خۆكوژییكانیان. بەڵام پاش دەرچوونی میدیای ئازاد لە كوردستان وردە وردە خەڵكی كوردستان بۆیان دەركەوت كە سەرانی یەكێتی و پارتی كورد كوژ و دزوو جەردەن، بۆیە هیواش هێواش خەڵكانی بە ئاگا و گەنجانی تازە پێگەشتوو لەو حیزبانە دوور كەوتنەوە و خۆپیشاندان و ناڕازیان بەرامبەر دەسەڵات ڕێك دەخست لە شار و شارۆچكەكان، لە كاتی خۆپێشاندانەكانیشدا خەڵكێكی زۆرتر بۆیان دەركەوت كە ئەم دەسەڵاتە لە بەعس پیسترن كاتێك بەرژەوەندیە شەخسیەكانیان دەكەوێتە مەترسیەوە.
ئێستاش ئەو خەڵكە ناڕازییەی كە درووست بوون و زۆربەی هەرە زۆریان گەنجە تازە پێگەشتووكانن، لەهەڵبژاردنی پەرلەرلمانی كوردستان لە 25/7/2009 وە لە دەوری بزوتنەوەی گۆڕان كۆبوونەتەوە، لیستی گۆڕان خەریكە وەكو ساڵی 1991 پارتی و یەكیتی خۆشەویست دەبێت لە بەرچاوی خەڵك بە هۆی بوونی كۆمەڵێك عەقڵی نوی لە ناو گۆڕاندا، بۆ ئەوەی گۆڕان بە دەردی یەكێتی و پارتی نەچێت و خەڵك لە بیر بكات كە كەرستەی سەرەكی درووست بوونی گۆڕانن. پێویستە گۆڕان بەر ڕەخنەی توند بكرێتەوە كە خەریكە عەقڵە كۆنەكانی ناو یەكێتی باڵی بەسەردا دەكێشن.
یەكێك لەو عەقڵیتە ژەنگ گرتوانەی گۆڕان ئەوەیە كەس ناوێرێت ڕەخنەی لێبگرێت بە هەمان عەقڵی بۆگەنی دەسەڵات تۆمەتی جاسوسی دەدەنە پاڵ و بە هەڵگەڕاوەی دەزانن و بە ئاژاوە گێڕو قسەی ناحەزانی گۆڕانی دەزانن، باڵ كێشانی ئەو عەقڵە ژەنگ گرتوانە بەسەر گۆڕانە خەتەرێكی گەورەیە بۆ ئایندەی گۆڕان، وای لێهاتووە هەرچ كەسێك لە ناو گۆڕان ڕەخنەیەكی هەبێت نەوێرێت باسی بكات و وەكو بڤە سەیر بكرێت.
لە وتەكانی ئەو شەوەی نەوشێروان مستەفادا بۆ مان دەركەوت كە گۆڕان تەسلیم بە چ كەسانێك دەكرێت، بۆ مان دەركەوت نەوشێروان چی بێڕێزیەكی بە خەڵكانی نوخبەی ناو گۆڕان كرد، كاتێك نەوشێروان مستەفا ئەو خەڵكانەی كە لە ناو یەكێتیەوە هاتوونەتە ناو گۆڕانەوە كە زۆربەی هەرە زۆریان دز و گەندەڵ بوونە و خەڵكی زۆر ڕقی لێیانە، ئەو خەڵكانە بە مامۆستای گۆڕان ناو دەبات، بۆ خۆی ئەوە گەورەترین بێ ڕێزیە بەو خەڵكە نوخبەییەی ناو گۆڕان كە خەڵك دڵی بەوانە خۆشە لە ناو گۆڕاندا. من ناڵێم هەموو ئەوانەی لە ناو یەكێتیەوە هاتوونەتە ناو گۆڕان هەموویان دزن و هەمووشیان فریشتەن، بەڵكو دەڵێم زۆربەی هەرە زۆریان بەشێكی گرنگی كارەكتەری ئەو گەندەڵییەی ناو یەكێتی بوون، ناشڵێم ئەو گەنج و نوخبەیەی لە ناو گۆڕاندان هەموویان فریشتەن یان گەندەڵن، دیارە لە ناو ئەو جیلەشدا خەڵكانی بەرژەوەندی خواز و فیكر گەندەڵ خواز بوونیان هەیە. بە كورتیەكەی لە ناو هەموو حیزب و كۆڕو كۆمەڵێكدا خەڵكی بەرژەوەندی خواز و ماستاوچی هەیە، ئەو خەڵكە ماستاوچی بەرژەوەندی خوازانە هەمیشە لە هەموو جێگایەك هیچ مامە حەمەیەكیان پێ عەیب نیە بۆ هێنانەدی مەرامە شەخسیەكانی خۆیان، خەڵكانی تەواو ڕۆشنبیر وبە ئویژدان و پاك و چاكیش هەمیشە قسەیان ڕەقە و ناحەقەیان پێ قەبووڵ نییە، بۆیە هەمیشە بە ئاژاوە گێڕ و بەلادەر و چی و چیتر لە قەڵەم دەدرێن.
نەوشێروان مستەفا گوێ لە خەڵكانی نوخبە دەگرێت، بەڵام بە قسەیان ناكات. بۆ نمونە ئێستا سەیر دەكەیت لە گەرمیاندا نەوشێروان هاتووە خەڵكی تەعین كردووە، ئەو خەڵكە تەعینكراوانە ئەو خەڵكانەن كە لە ناو یەكێتیەوە هاتوونەتە ناو گۆڕانەوە و زۆرترین خەڵك ڕقی لێیانە، زۆرترین خەڵكی ناوچەكەشی توڕەكردووە، وای لێهاتووە خەڵك دەڵێن: جا مەڵًبەندی یەكێتی و بزوتنەوەی گۆڕان چی فەرقێكیان هەیە، ئەوانە تا دوێنی خەڵكیان لە ناو یەكیتی توڕە دەكرد و ئیشیان بۆ نەدەكردن، ئێستا لە ناو گۆڕاندا ئەوانەش شتن. من لە نەوشێروان مستەفا دەپرسم كێ شەرعێتی بەو داوە بێت خەڵك تەعین بكات؟ ئایە ئەوە دیكتاتۆریەت نیە؟. یەكێك لە خەسڵتەكانی دیموكراسی ئەوەیە كە بگەڕێتەوە بۆ ڕەهی خەڵكی، بەڵام گۆڕان تا ئێستا ئەوەی نەكردووە. بۆ نمونە كاتێك بزوتنەوەی گۆڕان ئەندام پەرلەمانەكانی دیاری دەكرد بۆ شارەكان تا چەند گەڕایەوە بۆ ڕەهی خەڵكی ناوچەكان؟ ئەتوانین بڵێن بە هیچ شێوەیەك نەگەڕایەوە بۆ ڕەهی خەڵكی، بەڵكو خۆیان خەڵكیان تەعین دەكرد بە میزاجی شەخسەكان. ئەپرسم ئایە نەگەڕانەوە بۆ ڕەهی خەڵكی دیكتاتۆریەت نیە؟ ئایە هەمان عەقڵێتی بۆگەنی یەكێتی و پارتی نیە؟.
نەوشێروان مستەفا پێی وایە كە دەتوانێت لە ناو گۆڕاندا هەرچ كەسێك ئەگەر پێشوتر خراپ بووبێت ئەوە لەناو گۆڕاندا چاكی دەكەنەوە، بەڵام بەو شێوەیە سەر ناگرێت.
ئەو ڕۆژە بە سوتفە لەگەڵ یەكێك لەو كەسانەی كە پێشوتر بەرپرسێكی یەكێتی بووە و ئێستا دەم ڕاستی گۆڕانە، كەوتینە گفتوگۆوە، ئەو برادەرە كاتێك گیوم لێگرت بە هەمان بەزمەكەی ناو یەكێتیەوە بیری دەكردەوە و قسەی دەكرد، دەیگوت سبەینی گیو لە چەنسەد كەسێكی تر دەگرم بۆ ئەوەی ڕەهیان وەربگرم. بەڕاستی بەزەیم بە عەقڵیدا هاتەوە كە وادەزانێت من كەسێكی زۆجوو بێ ئاگام لەم دوونییایەدا، ئاخر نازانم ئەبێت ئەو چەنسەد كەسە كێ بن كە لە شارێكی بچوكدا ئیشیان بۆ گۆڕانكردبێت و یان بوێرن بچنە دەوری گۆڕاندا خەڵك قسەیان بۆ بكات، ئایە ئەو چەندسەد كەسە بۆ لە كاتی هەڵبژاردنەكاندا دیار نەبوون ئیش بۆ گۆڕان بكەن؟ ئەم دەم ڕاستەی گۆڕانی كۆنە یەكێتیە ئاوا بەو شێوەیە بیەوێت بە عەقڵی خۆی من هەڵ دەخەڵەتێنێت، ئیتر ئەبێت چی ژمارەیەكی خەیاڵی بۆ نەوشێروان وتبێت وا تەعینیكردووە. ئەگەر ئەم عەقڵانە نەوشێروان بە مامۆستای گۆڕانی بزانێت ئیتر گۆڕان جیاوازی چییە لە گەڵ یەكێتی و پارتیدا؟.
یەكێكی تر لەو پاساوانەی كە زۆریەك لە یەكێتیەكانی ناو گۆڕان بۆ خۆیانیان دەهێننەوە، كە دەڵێن ئێمە لە ناو یەكێتیدا چەندین مللوێن دینارمان هەبووە وازمان لێی هێناوە، ئەپرسم ئایە كەسێك ئەگەر گۆڕان خواز بێت چۆن ئویژدانی قەبوڵی كردووە لە دویخانێكی مەڵبەندا بەس چابخواتەوە چەندین مللوێن وەربگرێت و پۆلیسێكی هاتووچۆش كە ڕۆژتائێوارە خەریكە گیانی دەردەچی لە گەرماو سەرمادا بۆ چەندسەد هەزارێك وەربگرێت؟ ئێستاش ئەوە بە سەروەری بزانێت و بڵێت من گۆڕان خوازم، ئایە ئەگەر لە ناو گۆڕاندا چنگی لە پارە گیربێت هەمان شت دووبارە ناكاتەوە؟.
نەوشێروان لە گەرمیاندا هەرچی ئەو جۆرە عەقڵانەی كە ئێستا نمونەیەكیانم باسكرد تەعینكردووە ڕایسپاردوون گۆڕان ڕێك بخەنەوە، ئەوەش خەڵكانی ناڕازی و گەنج و نوخبەی گۆڕانی تووڕەو بێزار كردووە.
بە پێچەوانەی نەوشێروانەوە دەڵێم: دەبێت ئەو كۆنە یەكێتیانە دانیشن گیوی لە نوخبەی ناو گۆڕان بگرن، نەك ببنە مامۆستای نوخبە عەقڵانیەكان. نەوشێروانیش خەریكە گۆڕانەكەی وەكو بۆیاخبوونەوەكەی یەكێتی لێ دەكات، یەكێتی چەند مانگە مێشكی خەڵكیان بردووە لە میدیا زۆڕناژەنەكانیەوە گوایە نوێ بوونەوە دەكەن، كاتێك كۆنگرەیان تەواو بوو سەیرمانكرد بۆیاخ بوونەوەیان كردووە، هەمان دەموچاوەكۆنەكانیان هەڵبژاردەوەو بە بۆیاخەوە بە خەڵكیان نیشاندا و بە نوێ بوونەوەیان لە قەڵەمدا. ئەم شێوازەی نەوشێروان هەڵیبژاردووە ئەگەر وابڕوات دەبێتە بۆیاخ بوونەوەكەی یەكێتی و ئەمیش دووبارەی دەكاتەوە.
ئەگەر سەیرێكی كەناڵی كەی ئین ئین و ڕادوێی گۆڕان بكەیت، خەڵكی وادەستیان بە سەریدا گرتووە لە عەقڵێتی ڕاگەیاندنكارانی یەكێتی و پارتی خراپتر بیر دەكەنەوە، خۆیان زۆر بە شت دەزانن و زۆریش لە خۆباین و وادەزانن دەعبایەكی زۆر عاجباتین و لە خەڵكی تر جیاوازترن. ئەو عەقڵێتە خراپانە سەیر دەكەیت هەمیشە لە بەر مامە حمەی و ماستاوكردن هەمیشە لە پێشەون، خەڵك ڕاستگۆ و دڵسۆزخوازەكانیش وردە وردە دەكشێنەوەو جێگایان پێ لێژ دەكرێت.
ئەم ڕەخنانەی من دەیگرم بۆ ڕووخاندنی گۆڕان نیە، بەڵكو ڕاستیەكە ئەگەر گیوی لێنەگیرێت، ئەوە نمونەیەكی یەكێتی و پارتی دووبارە دەبێتەوە، ئەوجار چۆن كەس و كارێكی ئەنفال خۆزگە بە سەردەمی سەدامی جەلاد دەخوازێت، ئاواش خۆزگە بەشەرواڵ پیس و دزەكانی سامانی گشتی و مرۆڤ كوژەكانی یەكێتی و پارتی دەخوازن.