خه‌تی سوور و جامانەی سوور
Friday, 19/03/2010, 12:00
[email protected]
كتێبی "خەتە سوورەكان " لە نوسینی سەرۆك بەرزانی بەم زوانە دەكەوێتە بەردەستی كوردی بێ عار***********************************
حاڵی حازر،خەتە سوورەكانی جه‌نابی ڕه‌ئیس له کوردستاندا ئه‌وه‌نده زۆر بووه وه‌ک حەقلی ئەلغام دەوروبه‌ری ته‌نیوین. ئه‌و سه‌رۆکایه‌تیی وڵات به یاری خه‌تخه‌تێن تێگه‌یشتووه، خوتبه نییه چه‌ند خه‌تێک نه‌کێشێت. ئه‌و هه‌ر که‌س جامانه‌ی سوور له‌سه‌ر نه‌نێت، له‌ناو هه‌زارویه‌ک خه‌تی سووردا به‌گیری ده‌هێنێت.
من زۆر تورەم لە دارودەستەكەی فەخامەتی سەرۆك مەسعود بارزانی له‌وه‌ی که ئه‌گه‌ر غیرەتی ئەوەیان نییە نەسیحەتی سەرۆك بكەن و ھەندێ لە پرانسیپەكانی دیموقراتی و ئازادی بیرو ئاخافتنی پیشان بدەن، بۆ ناچن وه‌ک کتابولئه‌خزه‌ری سه‌رۆک قه‌زافی، خەتە سوره‌کانی بۆ بکه‌ن به کتابولئه‌حمه‌ری سه‌رۆک بارزانی، تا ئیتر ئەو خەڵكە بێ عارە حدودە سوورەكانی دیموقراتی لەو دەڤەرە ئازاد و ئاوەدانه‌که‌ی ئه‌ودا بناسێ و ئەوەندە زوو زوو خۆی لێنەدا و دڵە گەورەكەی سەرۆك بارزانی زیز نەكات. ئنجا توخوا ئێمە لەو زیاتر كێ شك دەبەین كە بتوانێ ئاوھا كۆمان بكاتەوە و حەسرمان بكات لە چوارچێوەیەكی دیموقراتی، ئازادی، سەرفرازی دا، كە پشتەوەمان خەتی سوور بێ و پێشەوەشمان جامانەی سوور.
بەگوێرەی خیتابەكەی سەرۆك بارزانی لە ھەمبەر پێشمەرگە بێت، ئه‌وا ئەمەیان لە خەتی سوور سوورترە... كەواتە لەگەڵ كاڵ و تۆخی سۆرەكە، سزاكانیش دەگۆڕێن. بە گوێرەی قسەكانی فەخامەتیان، ئەگەر سووره‌که زۆر تۆخ بوو، ئەوە دیارە سزاكەی ''تەررحیل''ە لە كوردستانی ئازاد و دیموقراتی و بێبەریبوونە لەو ھەموو نازو نعمەتەی كە لەسایەی سەری سەرۆك و خینی سووری شەھیدانەوە ھاتۆتە ''بەرھەم''.
دختۆر بەرھەم ساڵحی رەئیسول وزه‌را نا. به‌رهه‌م به‌ستزمانه پیاوێکی بێ زه‌ره‌ر و بێبه‌رهه‌مه و با تووشی په‌نجه‌ڕاوه‌شاندنی سه‌یدولڕه‌ئیسی نه‌که‌ین. سه‌یدولڕه‌ئیس هه‌ر که‌سی به دڵ نه‌بێت هه‌روا زۆر نا، 30 ساڵێک زیندانیی بۆ ده‌بڕێته‌وه. ئەگەریش تۆخیی ئه‌و خه‌ته سووره‌ی که ته‌جاوز ده‌کرێت له سووریی ئه‌و په‌ڕۆیانه چوو، که له یاری ''کۆریدا''ی ئیسپانییدا گامێشه دڕه‌کان تووڕه ده‌کات، سه‌رۆک گڕ له کونه لووتی دێته ده‌ر و کێی به دڵ نه‌بێت ئیزنی ده‌دات له کوردستان.
سەرۆكی قارەمان و عەزیم لە ئەسنای خیتابەكەی دا باسی شوێنێکی ده‌کرد به‌ناوی "حەلەپچە". من بزانم مەبەستی ھەڵەبجەیە. پێم باشە ئەم كارەیان یەكێ لە ئەدیبەكانی به‌رده‌م ده‌رباری بنەماڵە پێی ھەڵبستێ و وەكو ئەركێكی نیشتیمانیی سەرۆك فێری ناوی شاره‌کانی وڵاته‌که‌ی خۆی بكات.
خوا ھەڵناگرێ گروپی چەپڵەرێزان، واتە ئەو حەشاماتەی كە دایمە تەنھا بە چەپڵە لە خوتبەكانی سەرۆكدا بەشداری دەكەن، زۆر به خرۆش ولە سەر ئیقاع، به شڵپه‌شڵپی چه‌پڵه عەھد و وەفاو ئەشھەدومابیلا وایەیان بۆ سه‌رۆک دووپات کرده‌وه. جا شه‌پۆلی چه‌پڵه‌کانیان وا ڕێک رێكخستوە ده‌ڵێی مۆسیقا بۆ ئه‌و سه‌رۆکه حه‌کیمه لێ ده‌ده‌ن و ئه‌ویش گۆرانییان بۆ ده‌ڵێ:
حیكمەتێك لە سەرۆكەوە .. چەپڵەیەك لە جەماوەرەوە .. ئینجا حیكمەتێكی تر ..
چەپڵەیەكی تر ..
حیمەتێك ..
چەپڵەیەك ..
حیكمه‌تێکی حه‌ماسیی ..
چه‌پڵه‌یه‌کی حه‌ماسیی ..
حیکمه‌تێکی ساردوسڕ .. که‌چی دیسانه‌وه چه‌پڵه‌یه‌کی حه‌ماسیی! ..
وەھاكەزا، بەبێ هیج نەشازییه‌ک. جا جار هه‌یه گروپی پڕۆفیشیناڵی چەپڵەڕێزان ھەست دەكەن بۆ ھەندێک لە حیكمەتە حه‌کیمانه‌کانی سەرۆكی فه‌رمانده ته‌نها یه‌ک سێت چەپڵە كافی نییە، بۆیه دوو سێت چەپڵەی بۆ لێ دەدەن.
جا سه‌رۆکی بسته‌باڵا ئه‌و جۆره چه‌پڵه‌یه‌ی پێ خۆشه و بست بست باڵای پێ ده‌کات. ئه‌وه‌نده پێی به‌رز ده‌بێته‌وه که ئیتر گروپی چه‌پڵه ده‌توانن به‌ئاسانیی سه‌ری به‌جامانه و ڕوخساری شه‌رمنی له‌به‌ینی مایکرۆفۆن و سوراحیی و په‌رداخه‌که‌ی سه‌ر مێزه‌که‌دا ببینن.
ئه‌وان بڕیاریان داوه هه‌رده‌م نموونەی چەپڵەو وەفا بن بۆ سەرۆك تا ئه‌ویش لایه‌کیان لێ بکاته‌وه چونكە مه‌علومه خوتبەی سه‌رۆکه تووڕه‌کانی ڕۆژه‌هه‌ڵاتی ناوه‌ڕاست بەبێ چەپڵە نابێ و، ئێ خۆ چه‌پڵەش بە یەك دەست لێ نادرێ!
سەرۆك به‌ر له هه‌ڵبژاردنه‌کانی ئه‌مجاره گوایه وه‌ک عیلاقاتی دیپلۆماسیی به شاندێکه‌وه، سه‌لاموعه‌له‌یکوم، خۆی کرد به به‌یتولئه‌بیه‌زدا و سه‌ردانی سه‌رۆک ئۆبامای کرد. چاودێرانی سیاسیی ده‌گێڕنه‌وه که کاتێک مه‌سعود چووه‌ته پرسگه‌که و که ئۆباما چاوی به ئه‌ندامانی شانده‌که که‌وتووه و بینیویه‌تی له کوڕ و باب و برا و برازا و زاوا پێکهاتووه، به چرپه به مه‌سعودی ووتووه:
''
ئه‌رێ مه‌سعود ئه‌فه‌نی تۆ بۆ سیاسه‌ت هاتوویت یان بۆ خوازبێنیی ژن؟''
ده‌ڵێن دوایی ئۆباما پرسیاری خانمی یه‌که‌می کوردستانی کردووه که بۆچی نه‌هاتووه. مه‌سعود له وه‌ڵامدا وتوویه‌تی: چشتێك نییە لە سیاسەتی ئێمەدا ناوی خانمی یه‌که‌م و دووه‌م بێت ، تۆ دیارە حەز دەكەی ژنه‌که‌م ببینیت.ئەگینا ئه‌وانه ژنی ئێمه‌ن و بۆیان نییە بەحسی سیاسەت بكەن و هاتنه‌وه‌ده‌ره‌وه‌یان له ماڵ خه‌تێکە له سووریدا "جەرگی" دەنوێنێت.
جا ده‌ڵێن ئۆباما چونکه شاره‌زای ئه‌م خۆگیڤکردنه‌وانه‌ی سه‌رۆک و بنه‌ماڵه‌که‌ی نییه، له وه‌ڵامدا وتوویه‌تی ''خوا شفای بدات''،ئیتر یان بەئەنقەست یان وای زانیوه مه‌سعود باسی ئه‌وه ده‌کات که خانمی یەكەمی كوردستان ناساغە.
ده‌گێڕنه‌وه سیاسییترین پرسیار که مه‌سعود مێشکی خۆی بۆ گوشی و له ئۆبامای کرد ئه‌وه‌بوو که پرسی :كاك ئۆباما، تۆ نەجاحەتێكی باشت ھێنا لە ئنتیخابات، بە بێ تەزویر بە ئەغلەبییەی ساحیق بردتەوە و شعبیەتێكی باشت پەیدا كردوە:
ئایا بۆچی بیر لەوە ناكەیتەوە دوای خۆت سه‌رۆکایه‌تیی ئه‌مریکا بده‌یتە یەكێ لە براكانت؟
جا ئۆباما له وه‌ڵامدا بە زەردەخەنەوە وتوویه‌تی که:
براکه‌ی ئه‌و سیاسه‌ت ناکات.
مه‌سعودیش پێی سه‌یر بووه و ووتوویه‌تی:
باشه بوو نایكات؟ خۆ وه‌ڵا سیاسه‌ت کاسبییه‌کی گەلك باشه.
ئۆباماش بە سەرۆكی وتووە:
ماشەڵا دیارە ئێوە ھەر بە بنەماڵە ھەموتان سیاسین؟
سەرۆك بارزانیش لە وەڵام دا بە ئۆبامای بێ ئاگای وتووە:
ئالحەمدولیلا، ئێمە پشتاوپشت ھەموو سیاسین و تیایشیدا خەبیرین، بەلای منەوە باشترین سیاسی ئەو كەسەیە كە بزانێ چون لێی بخوات نەك چونی بكات.
ئه‌وانه‌ی ئاگاداری دانیشتنه‌که بوون ده‌گێڕنه‌وه، که دوای ئه‌وه‌ی سه‌رۆک ئۆباما گوێی له‌م حیکمه‌ته‌ی سه‌رۆکه خڕۆڵه‌که‌ی کوردستان بوو، داوای لێ کرد کۆتایی مانگی دوانزه‌ی ئه‌مساڵ به جلی كوردی و جامانەی سووره‌وه سه‌ردانێکی ئه‌مریکا بکاته‌وه. ده‌ڵێن سه‌رۆک ئه‌م داوه‌ته‌ی وه‌ک هه‌نگاوی گه‌وره به‌ره‌و دامه‌زراندنی ده‌وڵه‌تی سه‌ربه‌خۆی کوردیی لێکداوه‌ته‌وه، بێئاگا له‌وه‌ی که سه‌رۆک ئۆباما وای لێک داوه‌ته‌وه که بۆ جه‌ژنه‌کانی كرسمیس و سه‌ری ساڵ له به‌یتولئه‌بیه‌زدا، بابانوئێلێکی كڵاو سووری له مه‌سعود عه‌نتیکه‌تری ده‌ست ناکه‌وێت.
بۆ بینینی خیتابەكەی سەرۆك مەسعود بارزانی (حه‌فیزه‌ڵڵاهو) كلیكی ئەمەی خوارەوە بكە.....
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
