هه‌ڵه‌بجه و ئه‌نفال مه‌یدانێک بۆ کاسپی کردن!
Saturday, 17/03/2012, 12:00
له 16/03 ی هه‌موو ساڵێکی دوای ساڵی 1988 وه به‌تایبه‌تی دوای ڕاپه‌ڕینی ساڵی 1991ی خه‌ڵکی ئازادیخوازی کوردستان دژی سیسته‌می زاڵی فاشیزمی به‌عس، ئه‌م مانگی سێ و چواره هه‌موو کات بۆ چه‌ند ڕۆژێک له‌لایه‌ن ده‌سه‌ڵاتدارانی کوردستانه‌وه دێته‌وه نێو مه‌یدانی لێدوان و به‌ڵێنی بێجیبه‌جێ کردنه‌وه، بۆ لێقه‌وماوانی شاری هه‌ڵه‌بجه و کۆی ڕزگار بوانی ئه‌نفالکراوانی گونده‌کانی کوردستان. مه‌یدانه‌کانی میدیای سه‌ر به‌م ده‌سه‌ڵاته‌ش درێغی ناکه‌ن له نیشان دانی ئه‌و وێنه مه‌رگه‌ساتانه‌ی که بۆیان بووه‌ته سه‌رمایه و هه‌رده‌م له ڕێگای پیشاندانی ئه‌و وێنانه‌وه خه‌روارێک له به‌زه‌یی نیشاندان و فرمێسک ڕشتن ده‌که‌ن به‌دیاری بۆ خه‌ڵکی کوردستان. خودی ئه‌و تاوانه که‌م وێنه جینۆساید کردنه، گه‌ر له هه‌رچ وڵاتێکی تری ئه‌م جیهانه‌دا ڕوی بدایه، نه‌ک بۆیان ده‌بوو به جێگای کاسپی پێوه کردن، به تایبه‌تیش له‌لایه‌ن ده‌سه‌ڵاته‌کانیانه‌وه، به پێچه‌وانه‌وه ده‌کرا به دۆسییه‌ی گرنگی ڕۆژانه تا ئه‌وه‌ی له جێگای ئه‌و په‌روه‌رده فاشیستی و ڕاسیستیه که به‌رهه‌مهێنه‌ری ئه‌و کوشتارگایه‌ی به‌دی هێنا، په‌روه‌رده‌یه‌کی ته‌ندروست له جێگای ئه‌و دڵ ڕه‌قیه بنیات بنرێته‌وه بۆ ئه‌و سیسته‌مه‌ی که ژیان تێیدا ته‌نها جه‌هه‌نمێک بوو بۆ زۆربه‌ی خه‌ڵکه هه‌ژار و به‌هه‌ڵوێسته‌که‌ی، یانی له بری دوباره کردنه‌وه‌ی هه‌مان حیکایه‌تی هه‌ڵوێست نواندنی حه‌ماسی له‌لایه‌ن ده‌سه‌ڵاتدارانه‌وه، ژیانێکی شایسته به‌و خه‌ڵکه به‌رکه‌وتوه دیاری بکرایه، تا ده‌گات به جێبه‌جێ کردنی ژیانێکی یه‌کسانیخوازانه بۆ کۆی خه‌ڵکی کۆمه‌ڵگاکه.. به‌ڵام ده‌سه‌ڵاتدارانی کوردستان تا ئێستاشی له‌گه‌ڵدا بێت ته‌نها ئه‌و ساته بیری خه‌ڵکی کیمیاباران کراوی هه‌ڵه‌بجه‌یان ده‌که‌وێته‌وه که پێ ده‌نێینه مانگی سێ وه. ئاخۆ تۆ بڵێی هۆکاره‌که‌ی چیه وا تا ئێستا ئه‌م ده‌سه‌ڵاته خه‌مخۆره نایه‌ت چاره‌سه‌ری ئه‌و مرۆڤانه بکات که له که‌ناری مه‌رگدان، به‌هۆی ئه‌و گازه ژه‌هراویه‌وه که ڕژێمی به‌عسی ناسیۆنالیست فاشیست به‌کاری هێنا، دژیان؟! تۆ بڵێی هۆکاره‌که‌ی بۆ بێ ئیماکانێتی مادیی بگه‌ڕێته‌وه که ئه‌م ده‌سه‌ڵاته کوردیه له ماوه‌ی ئه‌م بیست و یه‌ک ساڵه‌ی ته‌مه‌نیدا نه‌یتوانیوه ببێته خاوه‌نی هێنده ئیمکاناتی مادیی که بڕێکی زیاد بوایه بۆ چاره‌سه‌ری ئه‌و مرۆڤه به‌ڕێزانه یان هۆکاره‌که‌ی ئه‌وه بێت بۆ ئه‌وه‌ی وه‌ک وه‌ره‌قه‌یه‌کی جه‌خت کردنه‌وه له به‌رانبه‌ر حیزبه نه‌یاره‌کانیان وه زلهێزه‌کانی جیهاندا به‌کاری بهێنن و بڵێن ئه‌گه‌ر بڕوا ناکه‌ن به‌وه‌ی به‌عس کیمیابارانی هه‌ڵه‌بجه‌ی کردبێت، فه‌رموون، بێن و ببینن بزانن ئه‌و مرۆڤانه تا ئیستاش له چ بارێکی ناته‌ندورستدا ده‌ژین به‌هۆی ئه‌و گازه ژه‌هراویه‌وه؟ ئاخۆ ئه‌گه‌ر ده‌سه‌ڵاتی کوردی له خه‌می چاره‌سه‌ری ژیانی ئه‌و هه‌زاران ئینسانانه‌ی به‌رده‌م شاڵاوی گازی ژه‌هراوی و قڕکردنی به‌ناو ئه‌نفالن، بۆچی ئاماده نین له ناسۆری ژیانی ئه‌و مرۆڤه به‌دبه‌ختانه تێبگه‌ن؟
تاوانی به‌دناوی ئه‌نفالیش وا به‌م نزیکانه- دیسانه‌وه ده‌که‌وێته به‌ر گوێوه و دیسان میدیاکانی ئه‌حزابی بۆرژوازی کوردی دێنه‌وه مه‌یدان و شه‌یپوری گریان و هاواری لایلایه‌ی ئه‌و پیره ژنه به‌ڕێزانه ده‌خه‌نه‌وه سه‌ر شاشه‌ی تیڤیه‌کانیان، جارێکی تر به کۆمه‌ڵگا ڕاده‌گه‌یه‌نن که ئه‌وانه چه‌ند جێگای به‌زه‌یین، (به‌زه‌یی له بری ڕێزگرتن؟!). دوباره کردنه‌وه‌ی ئه‌م یادانه له هه‌موو ساڵێکدا نه‌ک نه‌یتوانیوه ئه‌و خه‌م و په‌ژاره ده‌رونیه‌ی نێو ئه‌و خێزانانه بره‌وێنێته‌وه به‌ڵکو ده‌هێنده‌ی تر خه‌م و په‌ژاره ده‌خاته‌وه نێو ئه‌و خێزانانه و هه‌زاران خێزانی به هه‌ڵوێستی کوردستانه‌وه. یادی هه‌ڵه‌بجه له ئه‌م ساڵدا وه ده‌ربڕینی ناڕه‌زایه‌تی له‌لایه‌ن ئه‌و خێزانانه‌ی که به‌رکه‌وتوی ئه‌و چه‌که دژی مرۆڤانه‌یه‌ن، ده‌ریخسته‌وه که ئه‌م ده‌سه‌ڵاته به شوێن چاره‌سه‌ری ژیان و گوزه‌رانی ئه‌و خه‌ڵکه هه‌ژاره‌وه نیه، هێنده‌ی ئه‌و یاده بۆ بردنه پێشی مه‌رامه سیاسی و به‌رژه‌وه‌ندیه چینایه‌تیه‌کانی خۆیان به‌کار ده‌هێنن. خۆ ئه‌گه‌ر بڕیار بوایه ئه‌و ده‌سه‌ڵاته له خزمه‌تی ژیانی ئه‌و خه‌ڵکه هه‌ژاره‌دا بوایه، ده‌بوا له ماوه‌ی ئه‌م بیست و یه‌ک ساڵه‌ی ته‌مه‌نی ئه‌م ده‌سه‌ڵاته کوردیه‌دا هیچ یه‌ک له‌و مرۆڤه به‌رکه‌وتوانه‌ی ده‌ستی ڕژێمی فاشیستی به‌عس به‌چه‌کی کیمیاوی به‌بێ چاره‌سه‌ر، نه‌بینرانایه. یان ده‌بوا سه‌رۆکی هه‌رێم و سه‌رۆکی عێراق هێنده شانازی نه‌که‌ن به‌وه‌ی ئه‌وه هه‌ڵه‌بجه و ئه‌نفاله که کوردیان ناساندوه به‌جیهان، له بری ئه‌وه‌ی بیان گوتایه سه‌د خۆزگا تاوانی کاره‌ساتی کیمیاباران و ئه‌نفالی خه‌ڵکی به‌شمه‌ینه‌تی گونده‌کانی کوردستان ڕوینه‌دایه و با کورد هه‌ر نه‌ناسرایه له نێو ئه‌م جیهانه به‌رژه‌وه‌ند خوازه‌دا؟ ئاخۆ سه‌رانی ده‌سه‌ڵاتداری سیسته‌می سه‌رمایه‌داری بۆخۆیان فرۆشیاری یه‌که‌م نین له دانی عێراق به‌و چه‌که یاساغانه؟ ئیتر چۆن به‌ئاگا نه‌بوون له کاتی ڕودانی ئه‌و تاوانه که‌م وێنه‌یه‌دا؟!
پاساوه‌کانی سه‌رانی ده‌سه‌ڵاتی کوردی هێند لاوازن، هیچ مرۆڤێکی ئازادیخواز ناتوانێت بڕوا بهینێت که ئه‌م ده‌سه‌ڵاته ده‌توانێت چاره‌سه‌ری ڕیشه‌ی ژیانی ئه‌و مرۆڤه به‌دبه‌ختانه بکات. چونکه ده‌رئه‌نجامی ئه‌و خه‌ته چینایه‌تیه‌ی که بۆ سه‌رانی ده‌سه‌ڵاتی کوردی هه‌ڵکه‌وت، ئه‌و دوو تاوانه قێزه‌ونه‌ی ڕژێمی به‌عس ئه‌نجامی دا دژی خه‌ڵکی بێدیفاعی کوردستان، بوو به مایه‌ی ده‌وڵه‌مه‌ند بونی ئه‌و دوو زلهێزه‌ی کوردستان و مانه‌وه‌یان له سه‌ر کورسی ده‌سه‌ڵات تا ئێستا. ئه‌وان له بری ئه‌وه‌ی له‌م یاده‌دا بێن تاوانه‌کانی زلهێزانی جیهان و ده‌سه‌ڵاتی ڕژێمی به‌عس له گۆڕنێن و له جێی ئه‌ودا په‌روه‌رده‌یه‌کی یه‌کسانیخوازی بۆ خه‌ڵکی کوردستان بهێننه به‌رهه‌م، به پێچه‌وانه‌وه ته‌نانه‌ت له یادکردنه‌وه‌ی ئه‌م ڕۆژه‌شدا درێغی ناکه‌ن له‌وه‌ی په‌لاماری ئه‌و مرۆڤه ناڕازیانه بده‌ن که ڕه‌خنه‌ی گه‌وره‌یان هه‌یه له ده‌سه‌ڵات. ده‌سه‌ڵاتێک بۆخۆی بووه به جێگره‌وه‌ی کۆی ئه‌و ڕۆشنبیریه دیکتاتۆریه‌ی که سیسته‌می سه‌رمایه‌داری به‌عس جێبه‌جێی ده‌کرد ده‌رهه‌ق به ژیانی هه‌رچ ئیناسانێک که ناڕازی بوایه به‌و ده‌سه‌ڵاته. ئه‌م دوباره‌کردنه‌وه‌یه ڕێک نیشانه‌ی ئه‌و که‌لتوره ده‌رده‌خات که خودی ئه‌م ده‌سه‌ڵاته‌ش له‌سه‌ر هه‌مان هه‌یکه‌له‌ی سیسته‌می ترس و کوشتن و تیرۆرکردن خۆی ڕاگرتوه، وه نه‌ک ناتوانێت به‌رگه‌ی ڕه‌خنه‌ی ئه‌و خه‌ڵکه ناڕازیه بگرێت به‌ڵکو به بوونی هه‌رده‌نگێکی ناڕازی به‌رانبه‌ر به‌و ژیان و گوزه‌رانه‌ی زه‌حمه‌ته‌ی دراوه به‌سه‌ر ژیانیاندا، ئه‌م ڕاسته‌وخۆ زمانی هه‌ڕه‌شه و به‌دناو کردن دێنێته مه‌یدانه‌وه. هاتنی سه‌رانی ده‌سه‌ڵاتدار بۆ شاری هه‌ڵه‌بجه، نیشانه‌ی ئه‌وه نیه ئه‌م به‌ڕێزانه له خه‌می چاره‌سه‌ری پیسبوونی ژینگه‌ی ئه‌و شاره و خه‌ڵکه‌که‌یدان، به‌ڵکو ده‌یانه‌وێت له‌م ڕێگایه‌وه ئه‌و په‌یامه به‌خه‌ڵکی بده‌ن که ئه‌گه‌ر ئه‌مان نه‌بن، ئه‌وه کوردستان قابیلی ئه‌وه‌یه جارێکی تر ڕوبه‌ڕووی هه‌مان تاوان و چاره‌نوسی ڕابردوو ببێته‌وه له‌لایه‌ن ئه‌و ده‌سه‌ڵاتانه‌ی که هاوشێوه‌ی ڕژێمی به‌عسی ڕابردوون؟ دیاره ئه‌م به‌ڕێزانه که ئێستا خاوه‌نی سه‌رمایه‌ی بێ ئه‌ژمارن، هه‌ر هه‌موو سه‌رمایه‌کانیان له ڕێگای ئه‌و به کۆیلله کردنه‌ی خه‌ڵکی به‌شمه‌ینه‌تی کوردستانه‌وه پێکه‌وه ناوه. باشه گه‌ر سه‌رانی ئه‌م ده‌سه‌ڵاته ترسیان له خه‌ڵکی ناڕازی کوردستان نیه، ئه‌وه کام هۆکاره له ڕێگای میلیشیاکانیانه‌وه هه‌رده‌م به زمانی چه‌ک وه‌ڵامی خۆپیشانده‌ران و ئازادیخوازان ده‌ده‌نه‌وه؟
بۆ خه‌ڵکی ئازادیخوازی کوردستان ڕێگا چاره ئه‌وه‌یه که بایکۆتی ئه‌م یاد و گریان و شیوه‌نانه، بکه‌نه‌وه، چونکه یاد کردنه‌وه‌ی ئه‌م ڕۆژه به به‌زه‌یی نواندن، نه‌ک به چاوێکی که‌م سه‌یری ئه‌و مرۆڤه ڕزگار بوانه ناکات، به‌ڵکو هێشتا له پله‌ی خوار مرۆڤ بوونه‌وه ده‌بینرێن. یاد کردنه‌وه‌ی ئه‌م ڕۆژه پێویسته به جۆرێک بێت که خودی ئه‌و خه‌ڵکه‌ی له‌و تاوانه‌دا ڕزگاریان بووه، بیکه‌نه ڕۆژێک بۆ وه‌ده‌ستخستنی داواکاریه‌کانیان و به‌رز کردنه‌وه‌ی په‌یامی ئه‌و داخوازیه‌ی؛ که هه‌رچی ده‌وڵه‌ت و کۆمپانیایه‌ک له به‌رهه‌مهێنانی ئه‌و چه‌که‌دا ده‌ستیان هه‌یه بدرێنه دادگای نێو ده‌وڵه‌تی تا ئه‌وه‌ی ڕۆژێک دابێت ئه‌و چه‌که نه‌فره‌تیانه بۆ هه‌میشه له‌نێو ببرێن.. کارێکی ئاوا مه‌زن شایانی ڕێز لێنانه بۆ خه‌ڵکی هه‌ڵه‌بجه و ڕزگاربوانی دوای ئه‌نفاله به‌دناوه‌کان، نه‌ک په‌تی سێداره‌ی ملی عه‌لی کیمیاوی به‌دیاری پێشکه‌شی خه‌ڵکی هه‌ڵه‌بجه و مۆنۆمینتی ئه‌و شاره بکرێت؟؟؟؟؟؟! په‌تی سێداره نیشانه‌ی دڕنده‌ی ئه‌و ده‌سه‌ڵات و سیسته‌مه ده‌گه‌یه‌نێت، نه‌ک نیشانه‌ی داد په‌روه‌ری، چونکه تا سێداره بوونی هه‌بێت، مانای وایه سیسته‌مێکیش له ته‌نیشتیدا ڕاوه‌ستاوه که ئازادیه‌کان و حورمه‌تی مرۆڤ پێشێل ده‌کات!؟
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
