دکتۆر ساجید و هه‌ڵوێسته باڵاکانی
Saturday, 20/01/2024, 17:14
که له شاخ بوون ، خاوه‌نی تفه‌نگێک و ٦ مه‌خزه‌ن فیشه‌ک و تاقمێکی ریش تاشین و مه‌تاره‌یه‌کی ئاو و چارۆکه‌یه‌ک نانە رەقەی خه‌ڵکی ئاواییه‌کان بوون.
گیرفانه‌کانیان خاڵی بوو ، به‌ڵام ناخیان پڕبوو له‌خۆشه‌ویستی خاک و خه‌لک .
دوای راپه‌رین . بوون به خاوه‌نی کۆشک و ته‌لار و به‌نزین خانه و کۆمپانیای زه‌به‌لاح ، ده‌فته‌ره دۆلاری ناو قاسه ی بانقی ناوه‌وه و ده‌ره‌وه‌ی وڵات ، ده‌یان کاسه لێس و ماستاوچی و کەسێتی پەڕپوت و لەن لەبان یان ، له ده‌وری خۆیان کۆکرده‌وه .
ده‌یان پێشمه‌رگه‌ی هاوڕێ ی شاخی یان ،به‌ده‌م ئازاری برینی چالاکی و نەبەردی و داستانه‌کانی شاخ، بێ چاره سه‌ر ، به ئازاری بێ وه‌فایی ئه‌مانه‌وه و سپڵه‌یی شۆڕش و راپه‌ڕین وپه‌رله‌مان و حکومه‌تی هه‌رێم ، به رێ ده‌که‌ن.
ئه‌م ده‌م وچاوانه ده‌مێکه ، له گه‌ڵ کۆنه به‌عسی وماستاو چی و ئینتیهازییه‌کان دا شه‌ریکن .
هه‌موو کارو باره نهێنییه‌کانیان و به‌رژوه‌ندییه خه‌یاڵاوییه‌کانیان ، له گه‌ڵ سه‌رانی ناو حیزبه‌کان و سه‌رانی حکومه‌تی هه‌رێم دایه ، له پێناوی به‌رژه‌وه‌ندی نه‌رجسیه‌تیان دا ، براو هاوڕێ ی گیان به گیانین،
رۆژانه لێره‌و له وێ له کۆڕو کۆبونه‌وه‌کاندا هه‌موو یان پێکه‌وه ، پێکی قازانجی خه‌یاڵاوی وده‌سکه‌وتی گه‌وره ،له شه‌وه په‌مه‌ییه‌کانیان دا ، له‌سه‌ر خوینی شه‌هیدان وپێشمه‌رگه‌ی دێرین وزیندانیانی سیاسی وئەنفال و ره‌نج و ماندووبوون و قوتی خه‌ڵک هه‌ڵده‌ده‌ن.
له ناو ئه‌م هه‌ڵپه هه‌ڵپی ده‌سکه‌وت و قازانج و جه‌رده‌یی و دنیای خۆپه‌رستی ئه‌م ده‌م و چاوانه‌دا .
روخسارێکی پڕ له به‌های شکۆمه ند ده‌بینین ، وه‌ک زیندانی سیاسی و پیشمه‌رگه‌ی ون هەبوو ، تا دواهه‌ناسه‌ی هه‌ر کرێچی ماڵان بوو.
له گه‌ڵ ئازارو موعاناتی خه‌ڵک دا دەژیا ، هه‌موو ته‌مه‌نی زیندانی وپێشمه‌رگایه‌تی ئه‌و بۆ خزمه‌تی خه‌ڵک بوو.
ئه‌و کەسێتی یە شکۆمه‌نده نمونه‌ییه دکتۆر ساجید بوو ، به‌قه‌د هه‌موو خۆپه‌رستی و دنیای نه‌رجسیه‌تی ئه‌وان ، پڕ بوو له رۆحی خۆشەویستی و به‌خشنده‌یی ومیهره‌بانی
به‌قه‌د هه‌موو چاو چنۆکی وبه‌رچاو ته‌نگی و ره‌زیلی ئه‌مانە ، پڕ بوو له نه‌فس به‌رزی و هه‌ستی خۆشەویستی مرۆڤ و مرۆڤایه‌تی
هیچی بۆ خۆی نه‌ویست ، هه‌رچیه‌کی هه‌بوو ده‌یبه‌خشی به خه‌ڵک ، به قه‌د باڵای ته‌لاره‌کانیان ، پڕ بوو له عیزه‌تی نه‌فسی گه‌وره .
به کرده‌وه‌و هه‌ڵوێسته‌کانی ، بەو دەسەڵات دارە نەفسیەت نزمانەی وت :
له سایه‌ی عیزه‌تی نه‌فسم
سه‌ر شۆڕ ناکه‌م بۆ هیچ که‌سێ
سه‌ربه‌رزیمه که نایه‌ڵێ
ده‌مم به‌رم بۆ هیچ ده‌ستێ !
عه‌بدوڵڵا که‌ریم مه‌حمود
وێنه‌که به‌هادین مه‌جید و دکتۆر ساجید - ه له ساڵی 1982له گوندی قازانقایه‌ی قه‌ره‌داخ
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
