وەزیری دارایی حوکمەتە کارتۆنییەکەی هەرێم وتی، "ئه‌م سیستمه‌ سیاسیه‌ی هه‌رێم به‌ حكومه‌ت و په‌رله‌مان ده‌بێت هه‌مومان هه‌وڵی پاراستنی بده‌ین، ئه‌م حكومه‌ته‌ی ئێمه‌ له‌ ساڵی 1992 نزیكه‌ی 140.000  موچه‌خۆری هه‌بوو، 84 ملیۆن دینار پاره‌ی موچه‌ بووه‌، به‌ڵام ئێستا ژماره‌ی فه‌رمانبه‌ران گه‌یشتوه‌ته‌ ملیۆنێك و 250 هه‌زار موچه‌خۆر".

ئەمە باشترین شایەدییە لە کەسێکەوە کە لە سەرەتای دروستبوونی حوکمەتی جووت حیزبیی و قەوارە کارتۆنیی ڕاووڕووتەوە ئاگاداری هەموو وردو درشتی کاروباری دارایی و کەین و بەینەی مەسئول و کەسە حیزبییەکان هەیە چاوێکی پێدا بخشێنین و سەری داوەکە بدۆزینەوە کە ئایا هۆی چییە موچەخۆر بووە بە بار بەسەر حوکمەتەو بۆچی ئەم کێشەیان بۆ چارەسەر ناکرێت؟

ئێمە باسی عەقدی فرۆشتنی ٥٠ ساڵەی داهاتی نەوتی کوردستان ناکەین کە کەس ئاگای لە وردەکارییەکانی نییە، باسی ئەوش ناکەین بۆچی تەنیا  %٤٢ی ئەو داهاتی نەوتە بۆ حوکمەت بێت، لێرەدا حوکمەت مەبەست یەکێتی و پارتییە، چونکە ئەو حوکمەتە هیچ خەمخۆرێکی هاوڵاتی و کێشەی چارەنووس سازی کوردانی جیهان نییە، بەڵکو کۆمەڵێك مافیاو تاوانکار سەری داوەکانیان بەدەستەوە گرتووەو وەکو بووکەشوشە بە ناو وەزیرو ئەندامان پارلەمان ئاراستە دەکەن، خاوەن نەوت بۆچی دەبێت تەنیا %٤٢ی داهاتەکە ببات؟ ئەگەر ئەمە نایاسایی و تاڵانفۆشتن نەبێت و پارەکەی زۆریشی زیادە بۆ دوو بنەماڵە کە هیچ ئەرکیان پێوە نەکێشاوە. خەڵکیش قوڕوقەپیان لێ کردووە چونکە پریشکی ئەو گەندەڵییە وەکو شەوی تاریك لە هەمووان نیشتووە و هەیەکە بە جۆرێك رۆڵی تیا دەبینێت، تەنانەت هەیە خۆی بە دژی گەندەڵی دەزانێت بەڵام پارچەیەکە لەو سیستەمە فاشیلە، یان ناڕاستەوخۆ لە خزمەت ئەجیندای بەرپرسەکانی ئەو دوو حیزبەدایە. لەم حاڵەشدا تەڕو وشك دەبنە قوربانیی و هەمووان دەبێت تاڵاوی ئەو مەهزەلەیە بچێژن کە چەند کەللەیەکی بۆگەن سەرکردایەتی دەکەن.

بابێینەوە سەر وتەکەی وەزیری دارایی و بە شێوەی هاوکێشەی بیرکاری ڕوونی بکەینەوە:

١- ( لە ١٩٩٢ دا/ ڕێژەی دانیشتووان  ٥ر٣ ملیۆن/ ژمارەی موچەخۆران ٠٠٠ر١٤٠).

٢-( لە ٢٠٢١دا/ ڕێژەی دانیشتووان ٥ ملیۆن/ ژمارەی موچەخۆران ١ملیۆن و چارەك  ٠٠٠ر٢٥٠ر١).

پرسیار:

ئایا ٥ ملیۆن کەس پێویستیان بە دامەزارندنی ١ ملیۆن و ١١٠ هەزار هەیە لە موچەخۆر لەماوەی ئەو ٢٨ ساڵەدا، تەنانەت گەر بەراوردی بکەین بە زیادبوونی رێژەی دانیشتوان کە نزیکەی %٣٠ زیادبووە، دەبێت هەر لە %٣٠ش ڕێژەی موچەخۆر زیادبکات لە رێژەی ئەسڵیەکە کە ٠٠٠ر١٤٠بوو کە دەکاتە ٠٠٠ر٤٠ موچەخۆر، واتە لەو ماوەیەدا زیاد لە ١ ملیۆن موچەخۆر بە واستەو تەزکیەی حیزبیی دامەزراون، یان بۆ ئەوەی لەکاتی هەڵبژاردنەکاندا دەنگیان پێ بدەن، دەبخۆن دەردتان بێت، قەد ئەو باری گەندەڵییە لە کۆڵتان نابێتەوە تا سەرتان دەخوات، چونکە نە دەتوانن دەریان بکەن ، نە دەتانەوێت موچەیان بۆ دابین بکەن، ئەمە لە کاتێکدایە خراپترین سێکتەر لە کوردستاندا سێکتەری کەرتی گشتی و دام و دەزگا رەسمییەکانە کە بە هیچ جۆرێك کاروبارت ڕایی نابێت گەر بەرتیل نەدەیت و دەیان رۆژ بۆ ئاسانترین موعامەلە هەزار کەین و بەینەت پی نەکەن و تووشی زەغت و شەکرەو دڵت دەکەن، کەچی وڵاتێکی ئەوروبی بۆ نموونە ٦٨ ملیۆن کەسیی وەك بەریتانیا تەنها ١ ملیۆن و ٧٥٠ هەزار موچەخۆری حوکومیی تێدایە!

لێرەوە دەردەکەوێت ئەم دوو دەسەڵاتە هەر بە خواریی هاتوون و هەزار موساوەمەی کوشندەو خیانەتی گەورەیان کردووە بەس بۆ ئەوەی لەسەر کورسی دەسەڵات بمێننەوە، مانەوەشیان بۆ ئەو ماوە درێژەی رابردوو رەنگە بۆ ئەوە بگەڕێتەوە خەڵکیشیان وەك خۆیان فێری گەندەڵیی کردووەو کەواتە کەس هیمەتی لابردنی ئەو دەسەڵاتە مافیاو گەندەڵە ناکات، بە پیی ئەم داتایانە بێت هەرچەندە %٦٥ی هاوڵاتیانی هەرێم هیچ موچەو بەرژەوەندییەکیان لەگەڵ ئەو دوو دەسەڵاتەدا نییە بەڵام بوونەتە قوربانی دەردو بەڵاو ستەم و گەندەڵییەکانی ئەو دوو خێڵە قێزەون و ڕووڕەشە.