ده‌قى وته‌ى مه‌سعود بارزانی و نێچیرڤان بارزانى له چواره‌مین رۆژى كۆنگره‌ى (13)ى پارتى
Thursday, 16/12/2010, 12:00
1) وته‌که‌ی مه‌سعود بارزانی:بەناوی خوای گەورەو میهرەبان
هەڤاڵانی بەڕێز و خۆشەویست. خوشك و برایانی ئازیز.
پڕ بە دڵ سوپاسی هەمووتان دەكەم بۆ ئەو متمانەیەی كە بەمنتان دا، بۆ من جێگەی شەرەف و پێزانینێكی گەورەیە، شەرەفێكی گەورەیە بۆ من و بۆ هەر كەسێك كە ئەندام بێت لەم حزبەدا، چونكە حزبی بەرخودان و فیداكاری و مەردایەتی و شەهیدپەروەر و نیشتمانپەروەرییە، حزبی قارەمانپەروەرە، حزبی بارزانی ــ ییە. دەبێ پارتی بە ئەرك بزانین بۆ خزمەتی گەل نەوەكو وەسیلەیەك بۆ ژیان، ژیانی هەر ئەندام و هەر كادرێكی ئەم حزبە چەند خۆش و بەختەوەر بێت، بۆ ئێمە سەربەرزی و شانازییە، بەڵام جارێكی دیكە دەڵێم: حزبایەتی دەبێ وەسیلەیەك بێت بۆ خزمەتی گەل و نیشتمان.
بۆ من شەرەفێكی گەورەیە كە ئێوە ئەو متمانەیە بەمن دەدەن، بەڵام خۆشحاڵی من ئی ئەوەیە كە سێزدەمین كۆنگرەی پارتیمان زۆر بە ڕێكوپێكی دەستیپێكرد و خەریكە كۆتاییشی پێدێت، لە هەمووی خۆشتر هەر لە ڕۆژی هەڵبژاردنی نوێنەرانی كۆنگرەوە، ئەمجارە من هەستمكرد جیاوازییەكی یەكجار زۆر گەورەی هەبوو لەگەڵ جاران. بەڕاستی ئەو كادرانە هەڵبژێردران كە كادری حزبن، نە مەسەلەی خزمایەتی، نە عەشیرەتگەری، نە ناوچەگەری هیچ تەئسیری نەكرد، بەشی هەرە زۆری كادرەكان ئەو كادرانەن كە لەلایەن قاعیدەی حزبەوە خۆشەویستن و جێگەی ئومێدن.
ئەمە بۆمن جێگەی خۆشحاڵی بوو، هۆی دووەم كە من زۆر پێی خۆشحاڵم، لەكاتی گفتوگۆكردندا من سەردانی هەموو لیژنەكانم كرد، بەڕاستی یەك دونیا دڵخۆشی كردم، ئەو گفتوگۆیانەی كە گوێم لێبوون و ئەو ئاستە بەرزەی كە گەنجەكانمان پێی گەیشتوون زۆر كەس وایدەگووت كە گەنج لەناو پارتیدا كەمە، لە خوا بەزیادبێت لەم گەنجە ناسك و نازدارانە زیاتر چیدیكە. من حەزم دەكرد كاتی زیاتر هەبووایە و گوێم لە گفتوگۆی ئەو گەنجانە گرتبا، كە بەڕاستی بۆ من جێگەی شانازی و جێگەی ئومێدن.
پارتی خاوەن جەماوەر و سەركردایەتیەكی دڵسۆزه ، جاران پارتی هەمیشە خاوەن قاعیدەیەكی جەماوەری فراوان بووەو هەمیشە سەركردایەتییەكی دڵسۆزی هەبووە، بەڵام ئێمە لە كادری ناوەڕاست خەلەلی گەورەمان هەبوو. ئەمجارە دەبینم ئەو خەلەلە زۆر بەباشی چارەسەركراوەو ئەمە ئومێدێكی گەورەی بەمن داوە. هەروەها ڕێكوپێكی ڕێكخستنی كۆنگرە، شوێنێكە، جێگە. من دەمەوێ سوپاسی هەر هەموویان بكەم، سوپاسی هەموو ئەو هەڤاڵانە بكەم كە ڕۆڵێكی سەرەكیان بینی و زەحمەتێكی زۆریان كێشا لە ڕێكخستنی ئەم شوێنە و بەرنامەی ئەم كۆنگرەیە. سوپاسی لیژنەی ئامادەكاری كۆنگرە دەكەم، كە بە ڕێكوپێكی ئەركەكانی خۆیان ئەنجامدا.
سوپاسی هەموو ئەو هەڤاڵانە دەكەم كە هەر كەس و بەپێی پسپۆڕی خۆی درێغیان نەكرد لەسەرخستنی ئەم كۆنگرەیە تا ئێستا پەنا بە خوا هەر واش دەبێت. دەبێ ئێمە حزبایەتی خۆمان بە عیشقەوە بكەین، بە ئیلتزامەوە. من دوو نموونەتان بۆ دەهێنمەوە: نموونەی پابەندی كادری پارتی، كە وەختی خۆی چۆن پارتی كراوە؟ یەكێكیان، كۆمەڵێك كادری پارتی خەریكی حزبایەتی بوون و لە دەشتی هەولێر خەڵك بێننە ناو حزب. هەر كادرێك لە دێیەك هاتبووە خوارێ و پەرت و بڵاوببوون. دوا كادر كە چووبوو بۆ گوندێك، جووتیارێكی دەشتی هەولێر لێی پرسیبوو: ئەرێ فڵانە كەس پارتی یانی چی؟ ئەویش بیری كردبۆوەو گوتووبوی: كاكە پارتی یانی پەرتوبڵاو. ئەوە نابینیی هەریەكەمان بەرتوبڵاو بووینە و هەر یەكەمان لە گوندێكەوە خەریكی حزبایەتی و خەریكی پارتایەتین. پارتی یانی ئەمە.
نموونەی دووەم: جارێك شەهید حەمید باتاسی قاسدی مەكتەبی سیاسی بووە بۆ لای جەنابی بارزانی. ناوی نهێنی حزبی حەمید باتاسی (مێروولە) بووە، كە دەچێ بۆ خزمەتی جەنابی بارزانی دوو سێ كەسی دیكەش لەوێ دانیشتبوون، ئەویش لێی دەپرسێ: كاكە ناوت چییە؟ دەڵێ: قوربان ناوم مێروولەیە. دەڵێ: خەڵكی كوێی؟ دەڵێ: خەڵكی كوردستانم. گوتی: ئێ باشە كوردستان گەورەیە، خەڵكی چ شارێكی، خەڵكی چ ناوچەیەكی؟ گوتی: قوربان فەرقی نییە، كوردستان هەمووی یەكە، من خەڵكی كوردستانم. هەرچی جەنابی بارزانی كردی، ئەو نە ناوی خۆی گوت نە ناوی گوندەكەشی، كە هاتەدەرێ گوتی: ئەو منی تاقیدەكردەوە بۆ ئەوەی بزانێ من چەند پابەندی پارتایەتیم، قابیلە ناوی من نەزانێ، بەهەقیقەت نەشیدەزانی، بۆیە پارتی بەقۆناغی زۆر سەختدا تێپەڕیووە، هەر لەرۆژی دروستبوونی تا بەئەمڕۆ گەیشتووە.
سوپاس بۆ خوا ئێمە گەیشتینە رۆژێكی گەش، خوێنی شەهیدانمان بەفیڕۆ نەچوو، زۆر شت لەسەر دەستی پارتی هاتۆتەدی، ئومێدەوارم ئەوەی ماویشە هەر لەسەردەستی پارتی بێتەدی.
خەبات و ماندووبوونی گەلەكەمان، خەباتێكی بێ وچان و سەخت و پڕ قوربانیدان بووە، پارتی هیچ كاتێك نە لەبەرپرسیاریەتی رایكردووە نە راشدەكات، پارتی تەحەمولی سەركەوتن و نسكۆكانی كردووە، ئەگەر پارتی، حزبێكی ریشەدار نەبوایە لەناو ئەم گەل و وڵاتەدا، كارەساتی وای بەسەرهاتووە، نەدەبوایە جارێكی دیكە سەر هەڵداتەوە، بەڵام ئیسپات بوو كە هێزێك نییە لەم دنیایەدا بتوانێ پارتی لەناوببات. ئەو ڕۆژە ئێمە بینیمان زۆر لە برایانی بەرپرس و حزبی و سەركردایەتی سیاسی ئێراقی هاتن و لە ڕۆژی كردنەوەی كۆنگرەدا بەشدارییان كردین و من جارێكی دیكەش سوپاسیان دەكەم، ئەمە نیشانەی بایەخپێدانی ئەوانە بە ڕەوشی هەرێمی كوردستان، هاوكات سەنگی پارتیش نیشاندەدات. لەو ڕۆژەدا وتەیەكی دوورودرێژم پێشكەشكرد، ویستم بەرنامە و سیاسەتی پارتی و هێڵەكانی سیاسەتەكەمان پیشانی هەموو لایەك بدەم. باسی مافی چارەنووسم كرد.
هەروەكو ئێستا ئەو مەسەلەیە باسكراوە، ئەم مەسەلەیە لە هەموو كۆنگرەكانی پارتی باسكراوەو پەسندیش كراوە. بەڵام لەو ماوەیەدا دیسان شۆڤێنییەكان پێیانوابوو كە مادەیەكی دیكەیان كەوتە دەست بۆ ئەوەی هەم دیسان پەلاماری كورد و شەخسی من بدەنەوە. پێیانوابوو كە ئەمە دەرفەتێكە بۆ ئەوەی ئەو دەسپێشخەرییە گەورەیەی كە ئێراقی لە بن بەست ڕزگاركرد تەشویشی بخەنەسەر و كەمی بكەنەوە، وایان نیشاندا ئێمە داوای سەربەخۆیی دەكەین. من دەمەوێ بۆ ئەوان ڕوونبكەمەوە، ئەگەر ئەو شۆڤێنیانە دەیانەوێ گوێی لێبگرن. جارێ ئێمە یەك نەتەوەین، نەتەوەی كوردین و كوردستانین. خوای گەورە ئێمەی وا خەڵق كردووەو ئەو مافەی بە ئێمە داوە. ڕەنگە من لەگەڵ زۆ كەس بۆچوونم جیاوازبێت، بەڵام دەڵێن مافی ئێمە بدەن. من دەڵێم: دەوڵەتێك یان لایەنێك دەتوانێ مافی تۆ زەوت بكات، بەڵام ئەو ئەو مافەی نییە ماف بدات، دەبێ ئیعترافی پێ بكات، چونكە مافی خۆتە، ئەو زەوتی كردووەو پێت نادات، نە موڵكی ئەوە، دەتوانێ ئیعترافی پێبكات. من لەگەڵ ئەوەدانیم بە یەكێك بڵێت، بینە مافی ئێمە بدە، چونكە مافی ئێمە دراوە، خوا بە ئێمەی داوە.
مەسەلەی مافی چارەنووس مافی هەموو نەتەوەیەكە، مافێكی سرووشتییە. مەبەستم ئەوەیە ئێمە چۆن موماڕەسەی ئەو مافە بكەین. من هەمیشە گوتوومە و ئێستاش دەیڵێمەوە: وەكو نەتەوەیەك مافێكی سرووشتی ئێمەیە، مافی چارەنووسمان هەبێت وەكو هەموو نەتەوەكانی دیكەی ناوچەكە، بەڵام ئێمە لێرە لە كوردستانی ئێراق، پەرلەمانی كوردستان بڕیاری لێیداوە، بە مەرجیك ئێراقێكی فیدراڵی دیموكراتی بێت، ئێمە لە چوارچێوەی ئەم ئێراقە دەبین و ڕۆڵی خۆمان دەبینین. لەسەر ئەو بنەمایەش ئێمە پشكدارییەكی جددیمان كرد لە بونیادنانی ئێراقی تازەدا. لە دەستووری ئێراقیشدا هاتووە، لە دێباجەكەی كە پابەندبوون بەم دەستوورەی كە ناسنامەی ئێراقی بە ئێراقێكی ئیتحادی (فیدراڵی) دیاریكردووە، پابەندبوون بەم دەستوورە مەرجە بۆ مانەوەی ئێراق بە یەكپارچەیی. كاتێك كە لێكتێگەیشتن هەبێت یا خیلاف هەبێ، ئەمە شتێكی زۆر سرووشتییە لە نێوان ئێمە و هەر حزبێكی عەرەبی هەر كەسایەتییەكی عەرەبی دەتوانین بە دیالۆگ لەیەكتری تێبگەین و كێشەكە چارەسەر بكەین، بەڵام كاتێك بڕیاری لەپێشینە هەبی كە تۆ دەبێ نەبیت، ئیتر هیچ ڕێگای تەفاهوم نییە. پەیمانیی من بۆ ئەو برا عەرەبانەی چ شیعە چ سوننە كە هاوپەیمانی ئێمەن یان دۆستی ئێمەن یا هەندێكیان بە هەڵە لە ئێمە گەیشتوون. ئێمە پابەندین بە ئێراقی فیدراڵی فرەیی. ئێمە پابەندین بە ئێراقی دیموكراتی. ئێمە پابەندین بەو ئێراقەی خاوەنی ئەم دەستوورەیە، بەڵام ڕۆژێك لە ڕۆژان ئێمە ئامادەنین لە ژێر دەستی شۆڤێنەكان لەناو ئەم ئێراقەدا بژین. هەندێكیان باسی ئەوەیان كردووە، كە ئەو ڕۆژە ئاڵای ئێراق نەبووە، كینەكەیان ئەوەندە لە دڵە، فێربوونە و هەتا نەیانتوانیووە ئاڵاكەش ببینن، ئەگینا فەرموون چەند ئاڵای ئێراق لەم هۆڵەدابوو. ئەمە یەك، دووەم سروودی نیشتمانی ئێراقی ئەوەندە درێژیشیان لێدا، ئەگەر خەلەلێك لە بەرنامەی كۆنگرەدا هەبوو، ئەوەبوو ئەوەندە درێژ بوو خۆیان دەیانگووت ئەوە چییە بۆ ئەوەندە درێژە. ئەمە هەمووی نیشاندانی پابەندبوونی ئێمەیە بە ئێراق، بەڵام جارێكی دیكە دەیڵێمەوە: ئێراقێكی فیدراڵی دیموكراتی تەعەدودی نەك ئێراقێك لە ژێر دەستی شۆڤێنی و دیكتاتۆری دابێت. شۆڤێنییەكان ناتوانن تەئسیر لەو دەسپێشخەرییە بكەن، ئێمە لەناو هێزە عەرەبییەكان چ شیعە و چ سوننە هاوپەیمانمان زۆرە، زۆریشیان هەن بە هەڵە لە وەزعەكە گەیشتوون، خەریكن ئێستا هەڵوێستی خۆیان چاك دەكەنەوە. ئەوانەی كەوا داخ لە دڵن ژمارەیەكی كەمن و هەندێكیان دەڵێن: ئەگەر كورد دەیانەوێ جیاببنەوە، با بڕۆن بەبێ گەڕانەوەو ئاو ئاو بچن. یاخوا ئاوئاوبچن، چونكە ئێراق وڵاتی ئێمەیە و موڵكی ئێمەیە.
بە یەكگرتوو ڕاگرتنی ماڵی كورد
هەڤاڵیینە..
ئێمە دەبێ ماڵی كورد وا بە یەكگرتوویی ڕابگرین و بیپارێزین، مەرج نییە هەموومان لەیەك حزبدا بین، بەڵام مەرجە هەموومان كۆك و هاوهەڵوێست بین لە پرسە ستراتیژییەكاندا. خۆشبەختانە تا ڕادەیەكی زۆر ئێمە لەم بوارەدا سەركەوتووین، هەرچەندە هێشتا كەموكوڕی و گرفت ماوە، بەڵام لەمەودوا پارتی دەبێ زۆر كراوەتر بێت لەسەر هەموو حزبەكانی كوردستانی، هاوپەیمانی ستراتیژی نێوان پارتی و یەكێتیش لە خزمەتی گەل و نیشتمان دایە. ئەمەش بەلای ئێمەوە خاڵێكی گرنگە.
لەكاتی داوەتنامە بۆ حزبەكان خەلەلێك هەبوو، ئەو حزبانەی كە داوەت نەكراون، من لێرەوە داوای لێبوردنیان لێدەكەم و دەبێ ئەم خەلەلە چارەسەر بكرێ، چونكە ئێمە بەبێ ئیستسنا ویستوومانە هەموو حزبەكان بێن.
لەبارەی ناوچە دابڕاوەكانیش، ماددەی 140 ماددەیەكی دەستوورییە، ئێمە پابەندین بەو ماددەیە و مومكین نییە تەنازوولی لێبكەین. ئێمە كراوەین، ئەو ڕۆژەش گوتم: ئەوانەی مەترسیان هەیە، كە ئەگەر ناوچە دابڕاوەكان بە كەركووكەوە هاتنەوە سەر هەرێمی كوردستان، مەترسی ئەوە هەیە ئێمە تاكڕەوی حوكمڕانی بكەین، دەڵێم: نەشتی وا لە خەیاڵی ئێمەدا هەیە و نە ڕێگەی ئەوەش دەدرێ، باوەڕ بكەن ئێمە زۆر كراوەتر دەبین لەسەر برا عەرەبەكان و توركمانەكان، چونكە هەموومان هاووڵاتی ئێراقین و برای یەكین و دەبێ پێكەوە ئیدارەیەكی هاوبەشی ئەو شوێنانە بكەین، بەڵام هەروەكو گوتم: مساوەمە لەسەر ناسنامەی كەركووك و ئەو ناوچانە ناكرێ، چونكە كەس ناتوانێ ئەمە بكات.
من نموونەیەكی سادەتان بۆ دەهێنمەوە، پێشی 2 ساڵ كە گرووپێك لەناو پەرلەمان خەریكی موئامەرەیەكی گەورەبوون دەربارەی پرسی كەركووك، ئەوەبوو من هەستام چووم بۆ بەغدا، نزیكەی 6،7 ڕۆژ مامەوە، سوپاس بۆ خوا لەگەڵ هێزە هاوپەیمانەكانی دیكە توانیمان ئەو پیلانە پووچەڵ بكەینەوە، كە گەڕامەوە نەوەیەكم هەیە كوڕی مەسروور تەمەنی پێنج شەش ساڵ بوو، وەڵاهی لەسەر پلیكانەكان هاتە سەر ڕێگەم و گوتی: بابە كەركووك ئی ئێمەیە بە كەس نەدەی. پێم گوت: ڕۆڵە وەڵڵاهی باپیرە گەورەت خەریكی كەركووك بووەو سەری لەسەر داناوە، باپیرت و بابیشت، پەنا بە خوا تۆ بۆمانی وەربگریتەوە. ئێمە هەر ئەوەندەمان پێكراوە.
هەڤاڵینەە لەم بڕگەیەی ئێستا باسی دەكەم حەزدەكەم تەحەمولم بكەن: خوا شاهیدە ئێستا حەزمدەكرد چەندین كەس خۆیان بۆ سەرۆكایەتی پارتی دیموكراتی كوردستان پاڵاوتبایە و من دەنگم بە یەكێكی دیكە دابوایە.
هەڤاڵینە... خوشك و برایانی خۆشەویست سونەتی ژیان وایە هەر مرۆڤێك كۆتایی هەیە، من حەزدەكەم واقیعی بن بە عاتیفە ڕووبەڕووی ئەم مەسەلەیە نەبنەوە. هەر مرۆڤێك كۆتایی هەیە. مرۆڤ چەند بژێت ڕۆژێك یا دەكوژرێ یا دەمرێ. مرۆڤ چەند بەهێز و بەتوانا بێت، پیر دەبێت و دواتر تاقەتی ئەوەی نابێ دوو هەنگاویش بهاوێژێ. زۆر زۆر خۆشتر و سەربەرزانەترە، هەر مرۆڤێك بەتایبەتی من، مرۆڤ لە كاتێكی وادا بە ئێوە بڵێ خواحافیز، كە لایەنی كەم بڵێین نەخێر و حەزناكەین و پێمان ناخۆشە و دڵتان بەدواوەی بێت، نەك بڵێن ئەرێ بۆ لەكۆڵمان نابیەوە.
من كە لە 1962/5/20 بوومە پێشمەرگە، خواشاهیدە هەر بەتەمای ئەوەش نەبووم كە دەگەمە ئەو ڕۆژە. من بە عیشقەوە بوومە پێشمەرگە یانی وەكو عاشقێكی پێشمەرگایەتی، بەڵام باوەڕێكی تەواوم بەوە هەبوو كە ئەمڕۆژە هەر دادێ، بەڵام نەمدەزانی من ئەم ڕۆژە دەبینم. ئیستاش ئیمانێكی تەواوم هەیە ڕۆژی لەمەش گەورەتر و گەشتر دەبێت، بەڵام نازانم ئایا دەبینم یان نەوەی دیكە دەیبینێ. من ئێستاش داواتان لێدەكەم، لەم بارەدا كە سوپاس بۆ خوا ئەو هەموو دەسكەوتانە بەدەستهاتوون، ئەو هەموو سەركەوتنانە بەدەستهاتوون، ئێستا مرۆڤ دەتوانێ تا ڕادەیەكی زۆر بە ویژدانێكی ئاسوودە بە دڵێكی خۆش، هەم قەرزەكانی ئێوەو میللەتی كورد لەسەر مەلا مستەفا و ئیدریس و لەسەر خۆشم تا ڕادەیەكی زۆر توانیومانە لە زۆر لەو دەسكەوتانە لەگەڵتان بین و بەدەست بێنین. من ئێستاش داواتان لێدەكەم لەو بەرپرسیاریەتیەم عەفو بكەن. خوا شاهێدە من ئەوە بۆ هیچ شتێك ناڵێم، لەناخی دەروونمەوە دەیڵێم.
سوپاس بۆ خوا، سوپاس بۆ شەهیدان و خانەوادەی شەهیدان و سوپاس بۆ ئێوەی تێكۆشەر، ئێوەو ئەوانەی پێش ئێوەش، بابوباپیرانتان، لەوانەیە زۆرتان كوڕە شەهیدو نەوەی شەهیدیش بن، زۆرتان كچە شەهید و كوڕە شەهید و برای شەهید و دایكی شەهیدن. ئەمە بەرهەمی خوێنی ئەوانە، نیعمەتی خوایە. ئەم حزبە، سوپاس بۆ خوا حزبێكی بە ئەخڵاقە، جگە لەوەی كە حزبێكی نیشتمانپەروەر و قارەمانپەروەر و شەهید پەروەرە، ئەخلاقپەروەریشە. من زۆرجار موتەئەسیر دەبم كە حوكم لەسەر ئەو حزبە دەدرێ لەمیانەی ڕەفتاری كادرێك یا بەرپرسێك كە ڕەنگە بەهای ئەو حزبە نەزانێ و هەڵەیەك بكات. بەنیسبەتی ئێمەش پەروەردەی من ئەوە نەبووە، من بۆ سەرۆكایەتی بیكەم، وەكو بە ئێوەم گوت: ئێمە پەروەردەی قوتابخانەیەكین كە دەڵێن ڕێبازی بارزانی، بە هەقیقەت مەبەستم ئەوە نییە هەر چ كەسێك جەمەدانیەكی سووری لەسەربێت، یا لە ناوچەی بارزان بێت یانی بارزانی ــ یە. بارزانی ڕێبازێكە یانی كوردایەتی یانی مەردایەتی. ئێمە پەروەردەی قوتابخانەیەكین كە لە ساڵی 1903 شێخ عەبدولسەلامی شەهید داوای سەربەخۆیی كوردستانی لە ئینگلیزەكان كردووە. سەروەری ئێمە شێخ ئەحمەدی بارزانی 12 ساڵ لە زیندان لە دەست و پێ لە ژووری ئیعدام تەنازوولی نەكرد یەك نامە بۆ حكوومەتی ئێراق بنووسێ بۆ ئەوەی عەفوی بكات. لەسەر جەمەدانی سوور 12 گەنجی بارزانی بە جەمەدانی هەڵواسراون و ئیعدام كران، چونكە ئەحكامی عورفی مەمنوع بوو جەمەدانی سوور ببەستن لە ناوچەی بارزان.
من لەبەردەستی مەلا مستەفا گەورە بوومە. من دەزانم خوا شاهیدە ئامانجی ئێمە ئەوەبووە ئێوە سەربەرز و سەرفرازبن نەك ئێمە سەرۆك بین. ئەوەی لەناو دەروونم بوو، حەزم كرد پێتان بڵێم، كە گوتم تەحەمولم بكەن ئەوەیە. من هەر برای ئێوەم و خزمەتكاری ئێوەم. لەهەر پێگەیەكیش بم من هەر ئەو مسعودەم و ئەو پێشمەرگەم كە منتان ناسیووە.
بەهەرحاڵ ئومیدەوارم، هەركاتێك كە خواحافیزی لەیەكدی بكەین، نەگاتە ئەو بارەی بڵێن دە لە كۆڵمان ببەوە. من ئەوە نیم عاشقی ئەوەبم كە بێزاری خۆتانم لێبكەن. هەر دەقیقەی ئێوە پێتان خۆشبێت، وەڵاهی كەس لەمن ئاسانتر نییە بۆ ئەوەی بڵێم خواحافیز.
مادام واتان لێكرد، حەزدەكەم ئاماژە بە خاڵێكی دیكەش بدەم، زۆر لە ناحەز و دوژمنانی پارتی و بنەماڵەی ئێمە، دڵی خۆیان بەوە خۆشدەكرد كە لەناو پارتی و لە ناو بنەماڵە تەكەتولات هەیە. ئێمە بنەماڵەیەكی زۆرین، یانی بۆ زانیاری ئێوە كە دەڵێن بنەماڵەی بارزان، ئێمە هەر پیاو لە هەزار كەس زیاترین. ئەگەر لەسەر بنەماڵەی ئێمە لەمیانەی بەرخودانی شێخ عەبدولسەلام و شێخ ئەحمەد و مەلا مستەفا حوكم دەدەن، ئێمە قبوڵمانە. ئەگەر حوكم لەسەر بنەماڵەی بارزانی و خەباتی بارزانیان لە ڕێگەی ئێمەمانان دەكەن، تكاتان لێدەكەم تووشی ئەو هەڵەیە نەبن. لەگەڵ ئەوەشدا كە ئێمە بنەماڵەیەكی زۆرین، وەكو هەر بنەماڵەیەكی دیكە خەڵكی باشمان تێدایە، ڕەنگە خەڵكی خراپیشمان تێدابێت. ئەمە شتێكی سرووشتییە، كە بنەماڵەیەك بوو بە هەزار كەس هەر هەموویان وەكو یەك نابن، ئیلتزامیان وەكو یەك نابێت، بەڵام ڕێبازی بارزانی ڕێبازی شێخ عەبدولسەلامە، ڕێبازی شێخ ئەحمەدە و ڕێبازی مەلا مستەفایە، ئی ئەمانەیە. حەزدەكەم و تكاتان لێدەكەم ئەو زوڵمە لە ڕێبازی بارزانی نەكرێت، ئەمە یەك، دووەم: ناحەزان زۆر دڵیان بەوە خۆشبوو كە لەناو بنەماڵەی ئێمە كێشە و گرفت هەیە. جارێ بگاتە ئەو ڕادەیە، نە كێشە هەیە نە گرفت هەیە. شتێكی زۆر سرووشتییە ئەمڕۆ نێچیرڤان هەندێجار كارتی سووری هەڵدەگرێت، من سپیم هەڵدەگرت، یا من سوورم هەڵدەگرت ئەو سپی هەڵدەگرت. ئەمە شتێكی زۆر سرووشتییە. ئایا ئەمە مانای ئەوەیە ناكۆكی و تەكەتولات لەناو ئێمە دایە. ئەندامانی مەكتەبی سیاسی زۆرجاری وا هەبووە بڕیاریان داوەو خواشاهیدە بە دڵیشم نەبووە، بەڵام بڕیاری مەكتەبی سیاسی بووە ئیلتزاممان پێوەكردووە، بەڵام بگاتە ئەوەی یەكێتی حزب، سوپاس بۆ خوا لەناو ئەم حزبەدا تەكەتولات نییە. خاڵێكی دیكە كە زۆر پێی سەربەرزین، پێش ئەوەی لە 2003 ڕژێم بڕوخێ، ئێمە هەوڵماندا هەرچی بەڵگەنامەیە بكەوێتە دەستمان، بەڵگەنامەیەكی یەكجار زۆری ئەمن و موخابەرات كەوتە دەست ئێمە، یەك نەفەری سەركردایەتیش عیلاقەی نەبووە.
بۆ ئەوەی كاروباری حزبی بە ڕێكوپێكی بڕوات، كە من ئەركەكانم زۆرە، مەسەلەی سەرۆكایەتی هەرێمە، لەبەرئەوە بەپێی ئەوەی لە پەیڕەو هاتووە كە دەبێ جێگری سەرۆكیش هەڵبژێرم. من نێچیرڤان كوڕی كاك ئیدریس بارزانی دەپاڵێوم بۆ جێگری سەرۆك. هەم بۆ ئەوەی یارمەتی من و ئیوەش بدات هەم وەڵامێكیشە بۆ كوێرایی چاوی دوژمنان و ناحەزان.
زۆر سوپاستان دەكەم هەر سەركەوتوو بن.
*******************************************
ده‌قی وته‌که‌ی نێچیر بارزانی
بەڵێنی ئەوەتان پێ دەدەم كە وەك خزمەتكارێكی بەڕێزتان و خزمەتكاری ئەم میللەتەو ئەم حزبە هەموو هەوڵ و توانایەكم بەگەڕ بخەم بۆ ئەو ئەركانە بەجێ بگەینم لەخزمەتی پارتی دیموكراتی كوردستان و گەلی كوردستان دابم
چۆن لەرابردوو سەلماندمان كە پارتی قاڵبووی خەباتی شاخ و كوردایەتیە لەشاریش بەهەمان شێوە سەلماندمان كە پارتی هەوێنی دیموكراسی و ئاوەدانی و خۆشگوزەرانی وڵاتە
ئەم كۆنگرەیە ئەركێكی مێژوویی گرنگ بەدی دێنێ لەنوێبوونەوە هەروەك دروشمی كۆنگرە دەری دەخات لەژێر هیچ فشارو گوشارێك دەستبەرداری مافی ڕەوای گەلەكەمان نابین پێویستە پارتیمان لەم قۆناغەدا لەگەڵ ئەوە ڕابێت چۆن كێبڕكێ بكات و شێوازی تازە بێنێتە ئایا بۆ ئەوەی پشتگیری زیاتری خەڵك بەدەست بێنێ
جەنابی سەرۆك بارزانی و سەرجەم هەڤاڵانی پارتیمان دڵنیا دەكەمەوە كە بەشانازیەوە ئەو ئەركەی پێتان سپاردم قبووڵی دەكەم و بە پەرۆشەوە چاوڕەوانی ئەوەم بەهەناسەی تەبایی و برایەتی و یەكگرتوویی و بە پابەندبوون بە بڕیارو راسپاردەكانی كۆنگرەی سێزدەهەم بەئومێدو بڕواوە كاربكەین
بەڕێز سەرۆكی خۆشەویست...
پێشەكی گەرمترین پیرۆزیاییت لێ بێت، كە هەڤاڵانی هێژای كۆنگرەی 13ی پارتی دیموكراتی كوردستان بەشانازیەوە جەنابتانیان هەڵبژارد بەسەرۆكی ئەم پارتە، من رێگە بەخۆم نادەم خەبات و ڕۆڵی مەزنی سەركردایەتیتان هەڵبسەنگێنم، دوای نسكۆی ساڵی 1975و بەتایبەتیش دوای ساڵی 1979 كە لەگەڵ جەماوەرو هەڤاڵانتان لەسەركردایەتی پارتی و پێشمەرگە قارەمانەكان و خۆڕاگرەكانی كوردستان پارتیتان بەسەربەرزی ئەمڕۆ گەیاند، هەر لێرەدا دەمەوێ یادی ئەو هەڤاڵانەش بكەمەوە ئەوانەی لەسەركردایەتی پارتی دیموكراتی كوردستان كە شان بە شانی بەڕێزتان هەوڵیاندا خەباتیان كرد لەسەركردایەتی لەڕۆژانی سەخت، كە پارتی تووشی كێشەی زۆر ببوو لەگەڵ جەنابتان و لەگەڵ رەحمەتی كاك ئیدریس مانەوەو ئەمەیان گەیاندە ئەم رۆژە سوپاسی تایبەتی ئەوان دەكەم.
سوپاسی ئەو هەڤاڵانەی سەركردایەتی دەكەم لەگەڵ بەڕێزتان بەتایبەتی دوای وەفاتی كاك ئیدریس و هەتا ئەمڕۆ كە وەكو مامۆستا لەگەڵ من شەخسی مانەوە من دەمەوێ سوپاسێكی تایبەتی ئەو هەڤاڵانە بكەم، كە هەتا ئەمڕۆ هاوڕێ بووین هەڤاڵ بووین پێكەوە و من ئەوان بە مامۆستای خۆم دەزانم لەم رۆژەدا سوپاسیان دەكەم، پارتیمان لەژێر سەركردایەتی بەڕێزتان بەقۆناغێكی سەخت و دژوار تێپەڕیوە چەندین دەستكەوتی مەزنی بۆ گەلی كوردستان مسۆگەر كردووە، شەرەفمەندم كە لەسەر پێشنیاری جەنابتان و بەدەنگی ئێوەی بەڕێز و هەڤاڵانی پارتی پۆستی جێگری سەرۆكی پارتی دیموكراتی كوردستانم پێ بەخشرا، لێرەوە لەم سەكۆیە لەناو كۆنگرەدا وێڕای سوپاسگوزاریم بۆ هەموو لایەكتان، بەڵێنی ئەوەتان پێ دەدەم كە وەك خزمەتكارێكی بەڕێزتان و خزمەتكاری ئەم میللەتەو ئەم حزبە هەموو هەوڵ و توانایەكم بەگەڕ بخەم بۆ ئەو ئەركانە بەجێ بگەینم لەخزمەتی پارتی دیموكراتی كوردستان و گەلی كوردستان دابم، سوپاسی بڕواو متمانە پێ بەخشینتان دەكەم.
بەڕێزان:
لەقۆناغی خەباتی شاخ پارتی دیموكراتی كوردستان وەك بزووتنەوەیەكی ئازادیخوازی نەتەوەیی بۆ هێنانەدی مافەكانی گەلەكەمان و چەسپاندنی دیموكراسیەت خەبات، خەباتی كردووەو قوربانی زۆری داوەو دوژمنانی گەلەكەمانی ناچار كردووە چۆك دابنێن بۆ مافەكانی گەلەكەمان، هەروەها لەقۆناغی خەباتی شەڕیش دوای گۆڕانی هاوكێشە سیاسیەكان لەهەرێمی كوردستان و ئێراق پارتی دیموكراتی كوردستان لەگەڵ پارت و لایەنە سیاسیەكان بووە دینەمۆی بنیاتنانی كۆمەڵگەیەكی دیموكرات و شارستانی و مۆدێرن، وەك چۆن لەرابردوو سەلماندمان كە پارتی قاڵبووی خەباتی شاخ و كوردایەتیە لەشاریش بەهەمان شێوە سەلماندمان كە پارتی هەوێنی دیموكراسی و ئاوەدانی و خۆشگوزەرانی وڵاتە، هاوكات وەك پارتی سیاسی بەهێزو ڕاستەقینە بڕواو متمانەیەكی زۆر بەخۆی و بەجەماوەری كوردستان بەشداری سەرجەم ئەو هەڵبژاردنانەی كرد كە لەهەرێمی كوردستان و تەواوی ئێراق ئەنجامدران و پێگەو سەنگی پارتی وەك هێزێكی نیشتمانپەروەر هەمیشە لەهەڵكشان و بەرزبونەوە دابووە، بەستنی ئەم كۆنگرە لەجێی خۆیەتی بەتایبەتی لەكاتێكدا كە گۆڕانكاری زۆر بەسەر ئێراق و ناوچەكەدا دێت ئەركی پارتیمان كە جاران رووبەرووبوونەوە بوو لەگەڵ چەوسانەوەو توندوتیژی ئەركی ئەمڕۆمان بونیاتنان و چەسپاندنی زیاتری دیموكراسی و سەروەری یاساو پەرەپێدانی وڵاتە.
لێرەدا حەز دەكەم هەریەك لە ئێمە ئەو پرسیارە لەخۆی بكات كە ئایا دەبێت لەئایندەدا بەرنامەی پارتی چۆن بێت؟ پارتی چۆن مامەڵە لەگەڵ ئەو بارودۆخە بكات؟ جەنابی سەرۆك بارزانی لەوتاری كردنەوەی كۆنگرەدا چەند بوارێكی گرنگی پێشنیار كرد كە پێویستە هەموومان كاری لەسەر بكەین و لەرۆژانی داهاتووی كۆنگرەدا هەموومان بەیەكەوە بەوردی تاوتوی بكەین، دواتریش بیكەین بە بەرنامەی كاری خۆمان، ئێمە دەبێت چەند هەنگاوێكی گرنگ بهاوێژین بۆ دووبارە رێكخستنەوەو پێكهاتەی پارتی و نوێكردنەوەی دامودەزگاكانی حزب، لێرەدا مەبەستم تەنیا كردنەوەو زیادكردنی بارەگای پارتی نییە، دەبێ ئەو هەڤاڵانەی ناو بارەگا بەبیرو تێڕوانینی واقیعیانە پەیامی ڕاست و دروستی پارتیمان بەجەماوەری كوردستانمان بگەیەنن، ئەركی ئەو هەڤاڵانە قوڕسترە دەبێت كاتێك بیانەوێ كاتی زیاتر بۆ حزبەكەیان تەرخان بكەن، لەقۆناغی داهاتوو چاوەڕوانی ئەم هەنگاوەتان لێ دەكەین، ئەم كۆنگرەیە ئەركێكی مێژوویی گرنگ بەدی دێنێ لەنوێبوونەوە، هەروەك دروشمی كۆنگرە دەری دەخات.
بۆیە لێرەوە ئەرك و كاری راستەقینەی ئێمە دەست پێ دەكات، ئەویش بەچالاك زیاتركردنی لق و ناوچەكان لەشارو شارۆچكەكانی كوردستان. زۆر گرنگە بۆ هەموو لایەكمان كە هەریەكە لەهەڤاڵانی كۆنگرەو ئەندامانی پارتیمان بەهەناسەی ئەم چەند رۆژەی كۆنگرە بڕوای تەواومان بە پەیڕەو و پرۆگرامی پارتیمان بۆ نوێبوونەوەو پابەندبوونمان بەكاری پارتایەتی و ئەركی سەر شانمان لەپێناوی خزمەتكردنی میللەتەكەمان دووپات بكەینەوە. پێویستە لەسەرمان هاوشان لەگەڵ پێشكەوتنەكانی جیهان و تەكنەلۆژیای سەردەم بڕۆین. پیویستە زیاتر سوود لەتەكنیكی شارستانی و پەیوەندی و گەیاندن وەربگرین. دەبێت وەك ئەندامانی پارتی كاری باشتر بكەین بۆ گەیاندنی پەیامی خۆمان و ئاگاداركردنەوەی هاووڵاتیان و ئەندامان و دۆستان و تەواوی كۆمەڵگە لەبۆچوون و هەڵوێستی سیاسەتی پارتیمان بەرامبەر ئەو پرسانەی دێنە پێش كە ئێمە هەردەم بەرژەوەندییە باڵاكانی میللەتەكەمان لەسەر سەرووی هەموو بەرژەوەندییەكان دەبینین. لەژێر هیچ فشارو گوشارێك دەستبەرداری مافی ڕەوای گەلەكەمان نابین. پێویستە پارتیمان لەم قۆناغەدا لەگەڵ ئەوە ڕابێت، كە چۆن كێبڕكێ بكات و شێوازی تازە بێنێتە ئایا بۆ ئەوەی پشتگیری زیاتری خەڵك بەدەست بێنێ، ئەو خەڵكەی تائێستا نەمانتوانیوە بیانهێنینە سەر ئەو بڕوایەی كە دەبێ دەنگ بە پارتی بدەن.
نابێ تەنها بەو رێژەیە ڕازی ببین، كە تا ئێستا بەدەستمان هێناوە. پێویستە لەسەرمان هەموو بەیەكەوە ئامانجی خۆمان دیاری بكەین بۆ ئەوەی ببینە پارتی زۆرینەی ڕەها لەهەرێمی كوردستان كە ئەویش مافێكی سروشتی ئێمەیە بۆ بەدیهێنانی ئەم ئامانجانە دەبێ كار لەسەر چەند لایەنێكی كرنگ بكەین:
یەكەم: گرنگیدان بەچینی لاوان بەر لەكۆنگرەو لەبەشداریكردنمان لەكۆنگرەو هەستمان بە بوونی توێژێكی بەتواناو كاریگەری لاوان كرد لەناو پارتیدا. دەبێ ئەو هێزو توانایەی تا ئێستا تاڕادەیەك پەرتەوازە بووە نەتوانراوە وەك پێویست سوودی لێ وەربگیرێ و كۆبكەینەوەو سوود لەبیرۆكەكانیان وەربگرین لەنزیكەوە لەگەڵیان بین كاربكەین و زیاتر لێیان فێربین. دەبێ بزانن و بەچ زمانێك لەگەڵیان بدوێن تا لەیەكتر تێ بگەین. زۆرجار گوتوومانە لاوان ئایندەی ئەم گەلەن دەبێ بە بڕواو بەكردەوە بیسەلمێنین كە بەڕاستی لاوان ئایندەی گەلەكەمانن، هاوكات لاوانیش دەبێت بزانن كە ئێمە جیددین لەم مەسەلەیەدا.
دووەم: بەشداریكردنی ئافرەت وەك پرسێكی گرنگ كە هەردەم لەبەرنامەو سیاسەتی پارتیماندا هەبووە بەهەند هەڵدەگرین. وەك چۆن ئافرەتانی قارەمان و كۆڵنەدەر لەخەباتی شاخ ڕۆڵیان بینی، ئەمڕۆش لەسەر ئەم رێچكەیەش بەردەوام دەبین كە بڕوامان بە بەشداری بەرچاوی ئافرەت هەیە شان بەشانی پیاو لەپرۆسەی سیاسی و كۆمەڵایەتی و بوارەكانی دیكەی ژیاندا.
هەڤاڵانی بەڕێز...
داواتان لێ دەكەم كەوا بەیەكەوە، شێوازێكی تازە بدۆزینەوە بۆ چۆنیەتی زیادكردنی ڕۆڵی ئافرەت لەناو ئۆرگانەكانی پارتیمان و پشتگیریكردنیان لەبەشداری كارایان لەچالاكی و پارتایبەتی و لەسەر هەموو ئاستەكانی دیكە. بەشانازیەوە دەیڵێم كە ئەمڕۆ ژمارەیەكی باشی ئافرەتان لێرە لەگەڵمانن بەشدارن لەداڕێژەرەوەی سیاسەت و پەیڕەو و پرۆژەی پارتیمان، بۆیە لێرەوە بەپێویستی دەزانم ئێمەش دەستی هاوكاری و پشتگیریان بۆ درێژ بكەین و لەم قۆناغەی تازەی نوێبوونەوەدا گوێ لەڕاوبۆچوونەكانیان بگرین و پێشوازی لەهاتنیان بكەین بۆ ناو پرۆسەكە، ئەگەر تا ئێستا كەم تا زۆر گلەیی لەشێوازی كاری رێكخستن و كەمتەرخەمی لەبەدواداچوونی ڕاپۆرت و بیروبۆچوونی هەڤاڵانمان لەئاستە جیاجیاكان هەبووبێت پێویستە لەم قۆناغەدا زیاتر بایەخی پێ بدرێت و راشكاوانە دەستنیشانی خاڵە لاوازو گرنگەكانی كاری پارتایەتی بكرێت و پێشوازی لەرەخنەی بونیاتنەر بكەین و سوود لەئەزموونی هەمووان وەربگرین، ئەویش بە ئاراستەی زیاتری خزمەتكردنی پارتی دیموكراتی كوردستان و پشتگیری كردن لەبەرنامەكان و لەپێناو پەرەپێدانی كۆمەڵگەی كوردستان.
هەڤاڵانی خۆشەویست.
ئەندامانی بەڕێزی كۆنگرەی 13ـەهەمینی پارتی ئەمڕۆ ئێوە زامنی پێشخستن و سەركەوتنی پارتیمانن لەداهاتوودا ئێوە ئاڵا هەڵگری مەشخەڵی رێبازی بارزانین بۆ گەلی كوردستان، كەس ناتوانێ نكۆڵی لەدڵسۆزی و تواناو لێهاتوویتان بكات من دڵنیام هەریەك لەئێوە دەتوانێ لەشێوەیەك لەشێوەكان و لەبوارێك دەتوانن خزمەت بە پارتیمان بكەن، ئەگەر سەركردایەتی حەكیمانەی پارتی و دڵسۆزی و وەفاداری ئێوە نەبوایە بێگومان پارتی دیموكراتی كوردستان نەیدەتوانی بەرگری ئەو هەموو پیلان و فشارەی ناوخۆو ئێراقی هەرێمانە بكات كە لەقۆناغەكانی رابردوو خرابوونە سەری ئێشتا وەنەبێت دوژمنانی گەلەكەمان دوورەپەرێز لەپیلانڕێژی دژی پارتیمان ڕاوەستابن، نەخێر ئێستاش مەترسیەكان بەردەوامن، چونكە ئەوان ئازادی كوردستان لەبەهێزبوونی پارتی دادەبینن، بۆیە دەبێت هۆشیارانە رەفتار لەگەڵ پێشهاتەكان بكەین، هۆكاری ئەمەش دەگەڕێتەوە بۆ هەڵوێستە نەگۆڕەكانی سەرۆك مسعود بارزانی و خەباتی بەردەوامی پارتیمان بۆ هێنانەدی تەواوی مافەكانی گەلەكەمان.
هەڤاڵانی بەڕێز.
ڕووی وتارم لەئێوە دەكەم، چونكە ئێوە لەدوای كۆنگرە دەچنەوە ناخی جەماوەرو ئەركتان پێ دەسپێردرێ هەریەك لەئێوە دەبێت فاكتەرێك بێت بۆ كەمكردنەوەی خەمی هاووڵاتیان و سڕینەوەی فرمێسكی دایك و خێزان و منداڵی شەهیدان، هەناسەی تەنگی پەككەوتەیەك، داواكاری جووتیارێك، پێشنیاری قوتابیەك، ئێوە دەبێت لەخەڵكی تر زیاتر دەستپێشخەربن ببنە فریادەرسی سەرجەم توێژەكانی گەلەكەمان. بێگومان ئەم هەنگاوەش لەپێشت مێزەكان و بەخۆشاردنەوە لەخەڵك نایەتەدی دەبێت دەرگاتان بەڕووی هەموو كەسێكدا بكەنەوە سەردانی خەڵك بكەن و هاوبەشی خەم و ناخۆشی و پێویستیەكانیان بن.
پارتی خاوەنی حزبێكی خاوەن خەبات و ناسراوە لەسەرتاسەری جیهان. خەباتی بەردەوامی پارتیمان بۆ ئازادی و دیموكراتی و دژی زۆرداری و جەورو ستەم جێگەی شانازی هەموو ئازادیخوازێكە لەسەرتاسەری جیهان زۆرێك لەو حزبانەی وەكو پارتی خەباتیان كرد ئێستا لەحوكمڕانیدان و وڵات بەێوە دەبەن، كەواتە زەمینەیەكی باش لەئارادایە كە پارتیمان پەیوەندیەكانی لەگەڵ پارتە سیاسی و پێشكەوتنخوازە دیموكراتیە جیهانیەكان پەرە پێ بدات.
هەڤاڵانی بەڕێز.
هیوادارم كۆنگرەی 13ـەهەمینی پارتیمان جەخت لەسەر شكاندنی دیوارەكانی نێوان بەرپرس و هاووڵاتیان بكاتەوە، با ئێمە دەستپێشخەربین وەك حزبێكی پێشكەوتووخواز لەسەر بنەمای دادپەروەری رەفتار بكەین، ئەو دادپەروەریەی هەمیشە بارزانیی نەمر جەختی لەسەر كردۆتەوە، بەم هەنگاوە دەتوانین هەڤاڵە تۆراوەكانی پارتی ئاشت بكەینەوەو پارتی دیموكراتی كوردستانیش زیاترو رۆژ بەرۆژ بەرەو پێشەوە ببەین.
بەڕێز جەنابی سەرۆك بارزانی.
دووبارە سوپاستان دەكەم بۆ ئەو متمانەیەی بە منتان بەخشی وەك جێگری سەرۆكی پارتی دیموكراتی كوردستان شەرەفێكی زۆر گەورەیە، منیش لێرەوە لەم سەكۆیە پیرۆزەدا بەڵێنتان پێ دەدەم كە لەئاست ئەو بەرپرسیارێتیە بم كە بە منتان ڕاسپاردووە، پێشنیاری جەنابتان بۆ كاندیدكردنم بۆ ئەو پۆستە تەنیا رێزگرتن و لەبەرچاوگرتنی هەوڵ و خەبات و ماندووبوونی من نییە، بەڵكو رێزگرتنە لەخەبات و قوربانیدانی ئیدریس بارزانی هەمیشە لەیادو ئاماژەیەكە بۆ وەفاداری جەنابتان و پارتی بەرامبەر بەسەركردەو هەڤاڵانی، بێگومان سەركردایەتی بەڕێزتان هەڵوێست و تێڕوانینتان بووە مایەی ئەوەی كە بگەینە رۆژگاری ئەمڕۆ، ئەو ڕۆژگارە كە خەڵكانێك هەبوون نەیاندەتوانی پێشبینی بكەن، ئێوە لەرۆژانی سەخت و دژواردا لەرۆژانی تەنگانەو پڕ مەینەتیەكانی رابردوو توانیتان پارتیمان بەهێزو بەیەكگرتوویی ڕابگرن هەنگاو بنێن بەرەو رۆژێكی گەشتری وەكو ئەمڕۆ ئێوە جەنابتان بەحیكمەت و لێهاتووییتان توانیتان رابەرایەتیتان بكەن بكەن و بمانگەیەننە ئەمڕۆ تا بتوانین لەسایەی ئاشتی و دادپەروەری و ئارامیدا بژین و بیر لەئایندە بكەینەوە، بۆیە لێرەدا ئەركی هەموومان قوڕستر دەبێت لەلایەك پاراستنی ئەو سەركەوتنانەو ئەو دەسكەوتانەی كە بەڕێزتان هەموو ژیانی خۆتان بۆ تەرخان كردووە ئەمڕۆ ئێمە بەرهەمەكەی دەبینین. ئێمە دەبێت هەوڵ بدەین ئەو دەستكەوتانە رۆژ بەرۆژ زیاتر بكەین لەپێناو پاراستنیان و گەشەكردنیان وەكو پێشمەرگەیەك شەونخوونی بكەین بۆ ئەوەی ئەو خەونانە بێتەدی كە جەنابتان لەرۆژی یەكەمەوە بوون بە پێشمەرگە خەباتتان كردووە قوربانیتان داوە ئەمڕۆش لەسەری بەردەوام بن لێرەوە جەنابی سەرۆك بارزانی و سەرجەم هەڤاڵانی پارتیمان دڵنیا دەكەمەوە كە بەشانازیەوە ئەو ئەركەی پێتان سپاردم قبووڵی دەكەم و بە پەرۆشەوە چاوڕەوانی ئەوەم بەهەناسەی تەبایی و برایەتی و یەكگرتوویی و بە پابەندبوون بە بڕیارو راسپاردەكانی كۆنگرەی سێزدەهەم بەئومێدو بڕواوە كاربكەین بۆ مسۆگەركردنی ئایندەیەكی باشتر بۆ پارتیمان لەژێر سەركردایەتی بەڕێزتان.
دووبارە زۆر سوپاس بۆ هەموو لایەك
ئێوەش هەر شادو سەركەوتوو بن
زۆر زۆر سوپاس
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
