پڕ ناوەرۆکترین وێنەی کوردایەتی دیوەخان
Sunday, 03/04/2022, 14:34
تێبینی: ئەم وێنەیەی سەرەوە: شێخ بابۆ کوڕی بچوکی شێخ مەسعود بارزانیە.
پێشمەرگە و کوڕی کوردیش بۆ پارە و مەعاشی ژیانیان بونەتە:
(نۆکەر، پاسەوان، زیندانبان و غولامی ئەم بەچکەیە و هەزار نێرینەی دیکەی بنەماڵەی شێخ- ئاغا- عەشیرەتی بارزانی).
خوشک و برای کوردی ڕۆژهەڵاتم کە گێرۆدەی ئەوینی کوردایەتی بووی، تکایە وچانێک و تەنیا بیست خولەک بیرکردنەوە، تێ‌فکرین و هەڵسەنگاندن
لەم وێنەیە بە خێرایی تێمەپەڕە. بە وردی سرنجی بدەیە، بچۆ ناو قوڵایی ماناکانی. پڕە لە زانستە کۆمەڵایەتیەکانی وەک: مێژوو، سایکۆلۆژی (ڕەوانشناسی)، کەلتوری کۆیلەداری و دەرەبەگایەتی، فەلسەفەی پیرۆزیەکانی کۆمەڵگا وەک شێخایەتی و میرایەتی، فەرهەنگ، پەروەردە، کۆمەڵناسی، سیستمی چینایەتی و پلەداری، هەڵاواردنی ڕەگەزی و ....
پێویست ناکا پسپۆڕ و کۆمەڵناس بی. تۆ دەتوانی بە تێڕامان، لێکدانەوە، بیرکردنەوەی زانستی و ڕەخنەگرانە، کتێبێک لە سەر هێماکان و ناوەرۆکی ئەم وێنەیە بخوڵقێنی.
تۆ بە دڵێکی پاکەوە هۆگری کوردایەتی بووی. پێت وایە ئەم کوردایەتیە هەوێنی ڕزگاری نەتەوەیی، ئازادی، دادپەروەری، پێشکەوتن و خۆشگوزەرانی گەل و نیشتمانتە.( منیش چل ساڵ وەک تۆ بووم)
مێژوو داستان و ئەفسانە نیە کە لە ڕابردوو دا نێژرابێ. مێژوو زانستێکە بۆ ناسینی ئێستا و پێشبینی دواڕۆژ.
لەم وێنەیەدا مێژووی سەد ساڵ کوردایەتی، لە دیوەخانی شێخ مەحمود تا بارەگای مەلا مستەفا و کۆشکی سەری ڕەشی مەسعود بارزانی تێدا دەبیندرێ.
ئاکامی سەد ساڵ کوردایەتی باشور بە چاوی خۆت ببینە. ڕێگا بە خۆت بدە لە سەر باوەڕەکانت گومان بکەی.
زانست لە ڕێگای شک، لێکۆڵینەوە ، تاقی‌کردنەوە، ئیشتبا و ئەزمون حاسڵ دەبێ.
ئەزمونی باشور نیشانی دا کە قیزەونی کوردایەتی تەنیا ئاکامی دەسەڵاتی بنەماڵەی بارزانی نیە.هەرچەند ئەمانە لە خیانەت بە خەونەکانی گەلی کورد پشکی شێریان بەرئەکەوێ.
سرنجێک بۆ وێنەی دووەم لە خوارەوە:
ئەوە وێنەی دەرباز کوڕی کۆسرەت ڕەسوڵە. ئەم پێنج زەلامە ببینن کە چۆن ملیان بۆ شۆڕ کردوە بە شەرمەوە بزەیێکیان خستۆتە سەر لێوان...
کۆسرەت ڕەسووڵ یەکێکە لە مافیا دەرەجە دوەکانی یەکیەتی نیشتمانی کوردستان، کە بۆتە خاوەنی سەدان میلیۆن دۆڵاری دزراوی خەڵکی باشور.
دەرباز یەکێک لەم لاوانەی باشورە کە ناسراون بەچکە ئۆلیگارشی(کەسانێک کە لە جیاتی کار و کاسبی و داهینان و بەرهەمهێنان لە ڕێگای گەندەڵی و دزینی سەروەتی و سامانی گشتی دەوڵەمەند بوون)
کوردی باشور لەم سەد ساڵە دا، زیاتر لە 3٠٠٠٠٠ شەهیدی لە ڕێگای کوردایەتی داوە. بەڵام لە دوای ٣١ ساڵ دەسەڵاتی کوردی، بە هۆکاری نەبونی خزمەتگوزاری، بێ کارەبایی، بێ نەوت و گازی، بێکاری و بێ مەعاشی ، ساڵانە دەیان هەزار کەسیان ئاوارەی هەندەران دەبن. هەزاران کەسیشیان لە ڕێگای گەییشتن بە ئوروپا لە دەریای ئیژە و ناوەڕاست دا خنکاون!
تا ئێرە بۆمان ڕوون بۆوە کە ئاکامی کوردایەتی دیوەخان بۆ خەڵکی کورد کوژران، ئاوارەیی، هەژاری و ماڵ‌وێرانیە.
بەڵام حیزب‌باز، نەتەوەباز، سیاسەت‌باز، دین‌باز، گەل فرۆش، نەوت فرۆش، شەهید فرۆش و شەنگال فرۆشەکان بە ژیانی ئاسایی لە گوندی لوبنانی، گوندی ئاڵمانی، شاری خەونەکان و شاری دزەکان و ... ڕازی نابن.
نێرینەکانیان جیا لە ویلا، ژیلا وکۆشکەکانی کە لە باشور هەیانە؛ بەشی زۆری ژیانیان کەنارئاوەکانی دورگەکانی قەناری ئیسپانیا، ویلاکانی کەنار دەریاکانی ئۆستڕاڵیا و ئامریکا و کانادا لە گەڵ حۆریە بەژن باریک، قژ زەرد و چاوشینەکان ڕادەبوێرن.
مافیاکانی کوردایەتی دیوەخان هەرشتێکی لە بازاری جیهانی دا قیمەت بکا دەیفرۆشن. تەنانەت ئەگەر٦٣٠٠ ژن و کچی ئیزەدیش بکرێنە سەبایا و کۆیلەی سێکسی. بە شەرتێک کڕیارەکان(ئەردۆغان، ناتۆ وئیسڕائیل) تەمەنی ئاغایەتیان بۆ درێژ بکەنەوە.
چ بزنێک باوەڕ دەکا ١٥٠٠٠ پێشمەرگەی پارتی دێموکڕاتی بارزانی! شەوەکی ٣ی ئابی ٢٠١٤ بێ ئاگادار کردنەوەی ئیزەدیەکان، بێ تەقاندنی یەک فیشەک، لە بەرانبەر ٥٠٠ چەتەی داعش شکست بخۆن و بە سواری سەیارە بە خێرایی حەفتا کیلۆمیتر لە سەعات دا بەرەو هەولێر هەڵبێن!؟
خۆ ئەگەر پێشمەرگە قارەمانەکان پێش هەڵاتن ١٠٪ی چەکەکانیان بۆ خەڵک جێ‌هێشتبا، ئیزەدیەکان دەیانتوانی ڕۆژێک بەرگری بکەن و هەلی هەڵاتن بۆ ژن و مناڵەکانیان بڕەخسێنن.
کوردایەتی لە هەر پارچەیێکی کوردستان بە دەسەڵات بگات، وەک باشوری ئێستا یەک ئاکامی هەیە. چونکە لە بنەڕەت دا کوردایەتی یەک نێوەرۆک و یەک ماهیەتی نەگۆڕی هەیە.
کوردایەتی بریتیە لە ئاوات و ئارەزۆکانی چینی سەردەستی کورد. ئەم چینە دوشمنی سیستمی ستەمکاری، چەوسانەوە و نابەرابەری دەوڵەتانی داگیرکەری کوردستان نیە. بەڵکە ڕەقیبی دەسەڵاتی عەڕەب، فارس و تورکە بۆ ئاغایەتی، میرایەتی، چەوساندنەوەی خەڵکی کورد و تاڵانی سامانی سەر زەوی و بن‌زەویەکەی.
ڕەقابەتی چەوسێنەری کورد زمان لە دژی چەوسێنەری بێگانە ، وەک کێشەی دێوەرە(چەرچی) و جەردەی شێعرە بەرزەکەی عەبدوڵا پەشێوە:
دێوەرە و کەر
دێوەرەیەک بە سواری کەر
ڕێيەکی دووری گرتە بەر
نەیهێڵا کەر بدا بێنێ
تا ڕێيان کەوتە بژوێنێ
کەر کە بينی وا لەو ناوە
گياوگۆڵ سەری پێوەناوە
میوانی گەورەی سروشتە
نە خێو، نە باری لە پشتە!
بە زەڕەزەڕ، بە غارەغار
دنيای هەموو کردە بەهار
لەپڕ خاوەن کەری زۆرزان
هەستی کرد وا لەوديو تەلان
هەرا و هۆريا و دەنگەدەنگە
ئيتر زانی کاری لەنگە!
گوتی: “کەرە گيان، گوێ گرە
ئەوە دەنگە دەنگی ڕێگرە!
هەتا زووە با بارت کەم
لە ڕێگران ڕزگارت کەم”
کەر دايە قاقای پێکەنين…
گوتی: “قوربان، هاوڕێی شيرين!
بارەکەی من لە خۆت بار کە
هەتا زووە خۆت ڕزگار کە.
کە من کەر بم، بارەبەر بم
کورتان لە پشت، هەشبەسەر بم
فەرقی چييە؟ دەرد هەر دەردە
کەری تۆ بم، يا هی جەردە!”
خوشکانی کوردی ڕۆژهەڵاتەکەم
ئێوە لە ناو سیستمی کوردایەتی دیوەخان هیچ ڕێز و حورمەتێکتان نیە. تەنانەت ئەگەر بنەماڵەکەتان سەر بە چینی سەردەست و مافیای دەسەڵات بێت . چونکە کەلتوری ئەم کوردایەتیە زۆر کۆنەپەرەست تر لە چین و دەسەڵاتی داگیرکەرانە.
پرسیار:
بۆچی ژنان و کچانی بنەماڵەی بارزانی لە هەمو شوێنێکی سیاسی، فەرهەنگی، کۆمەڵایەتی، تەنانەت هەڵسوڕان لە ڕێکخراوەیێکی ژنان، مافی مرۆڤ یان ژینگەپارێزی لە ئاست و ئەندازەی وێنەیێکی بچوکی سەر تەلێویزیۆن و ڕۆژنامەش غایب و نادیارن؟
جواب- چونکە پارتی بنەماڵەی بارزانی وەک دایکی کوردایەتی دیوەخان و ڕێبەری چینی سەردەستی کورد، تا ئێستا قۆناغی کەلتوری دەرەبەگایەتی تێپەڕ نەکردوە و نایکات.
ئەم چینە هەڵگری کەلتوری کۆنەپەرەستانەی هەزاران ساڵ لەوە پێشە. لە دونیای ئەمانە دا جێگەی ژن لە قوژبنی ماڵەوەیە. مافی نیوە پیاویشی نیە. دایکە بۆ بە دونیا هێنانی کوڕان، خزمەتکاری مێرد و براکانیەتی، کانگای چیژوەرگرتنی سێکسیە. بەڵام مێردەکەی بە پێی دەوڵەمەندی دەتوانێ هەوێی بە سەر بێنێ یان ویلا و ژیلای تایبەتی لە ناوەوە و درەوەی کوردستان هەبێت.
برای کوردی ڕۆژهەڵاتم؛
پێت وا نەبێ لە ژێر سیستمی دەسەڵاتی کوردایەتی دیوەخان بە ئاسانی دەتوانی پێگە و جێگەی پاسەوان و بادیگاردەکانی بابۆ بارزانی بە دەست بێنێ و ببیە خاوەنی مەعاشی زۆر، خانو و سەیارە و...
ئەوانەی کە دەبنە نۆکەر، پاسەوان و کاربەدەستی دەسەڵاتی کوردایەتی دیوەخان؛ لە پێشدا دەبێ حەوت خانی ڕۆستەم نا؛؛؛ بەڵکە حەوت خانی بێشەڕەفی، خیانەت، جاسوسی، تیرۆری ڕۆژنامەنوسان و ئازادیخوازان، خۆفرۆشی و تەنانەت گەوادی بە سەر ژن و خوشکی خۆیان و خەڵکی دیکە تێپەڕێنن.
ئەگەر شاعیرێکی گەورە بی وەک خالید ئاغای حیسامی، دەبێ بۆ تیرۆری سەدیق ئەنجیری بێدەنگی هەڵبژێری ، یان وەک مامۆستا هەژار لە جیاتی قاتڵ(مەلامستەفا) قوڕبانی(سلێمان موعینی) تاوانبار بکەی و بۆ بەژن و باڵای مەلا و کوڕەکانی شێعری بە قەوت بهۆنیەوە، ئەوبکات دەتوانی تا مردن لە بن سێبەری کوردایەتی بە عیزەت و ئیحتڕام بژی. دەنا وەک ماۆستا هێمن دەتکەن بە پیرە جاش و لە دۆڵەتو زیندانیت دەکەن.
پێت وانەبێ ئەم کوردایەتیە تەنیا لە باشوری کوردستان و لە ژێر سێبەری بنەماڵەیی شێخانی بارزانی و تاڵبانی ئاوا قیزەونە و کوردایەتی ڕۆژهەڵات(حیزبە سونەتیەکانی ڕۆژهەڵات)جیاواز دەبێ.
پرسیار:
بۆچی دێموکڕاتەکانی چوار پارچەی کوردستان، گشت ئیخوانەکان و ٩٩٪ی ئۆلیگارش، دەوڵەمەندە بێبەرهەمەکان، ئاغاوات، شێخ و سەرۆک عەشێرەکانی کورد ؛ مەلا مستەفا، کوڕ و نەوە و نەتیجەکانی بە هێمای پێرۆزیەکانی گەلی کورد ناو دەبەن؟
جواب- چونکە بنەماڵەی بارزانی مەرجەعی چینی سەردەستی کوردە.
لە ئاکامی سیاسەتی دەوڵەت-نەتەوەکانی حاکم، هەڵکەوتەی جوگڕافیایی سەر‌سنور، دورەپەرێزمانەوە، شەڕ و نائارامی، سەرمایەداری بەرهەمهێنەری سەربەخۆ لە کوردستان پەرەی نەستاندوە.
لە جیاتی چینی سەرمایەداری بەرهەمهێنەر(بورژوازی)، ئەم کۆمەڵە توێژانەی خوارەوە بوونیان هەیە کە سەرجەم وەک چینی‌سەردەست پێناسە دەکرێن و ١٠٪ی کۆمەڵگای کوردی پێک دێنن:
توێژەکانی چینی سەردەستی کوردستان:
بازەرگانەکان، ڕانتخۆرانی دەوڵەت ، دەڵاڵ و سەوداگەران، بنەماڵە دەست ڕۆییشتوەکانی شار، پاشماوەی ئاغاوات و مڵکدارەکان، کەسانی خاوەن مڵکی ناو شار،پاساژ، دوکان، و خانووی زیادی بۆ کرێ و....
چینی سەردەستی کورد ئەگەر توێژی لاوازی بورژوازی لێدەرکەین، نە تەنیا لە بەرهەمهێنانی ئابوری کوردستان نەخشێکی نیە، بەڵکە بارێکی قورسە لە سەر شانی چینی ژێردەست.
ئەم چینە ژیانێکی ئەنگەلی هەیە. سوننەتی و کۆنەپارێزە. نایهەوێ بۆ وەدیهێنانی سیستمێکی پێشکەوتوو، بەرهەمهێنەر و دادپەروەر هەنگاو هەڵێنێ. چونکە بە قیمەتی نەمانی خۆی تەواو دەبێ. بەتاڵە لە هەر خەونێکی گەورەی ئینسانی.
شەڕی ئەم چینە وحیزبەسیاسی و دینیەکانی لە گەڵ دەوڵەت-نەتەوەی حاکم، کێشەی سەروەری و دەسەڵاتە بە سەر چینی ژێردەستی کوردستان(نزیک ٩٠٪ی جەماوەر)
گەورەترین ئامانجی ئەم چینە دروستکردنی قەوارەیێکی دەوڵەتی کوردیە لە پارچەیێکی خاکی کوردستان.
بەڵام چونکە ئەم ئاواتە بە خەونێکی نەزۆک دەزانێ، ڕازیە بە ئیمارەتێکی کوردی ژێر دەسەڵاتی داگیرکەرێک. وەک ئیمارەتە فیئۆداڵیەکانی بابان و ئەردەڵانی ژێر دەستی ئێران و عوسمانی.
ئیخوان و حیزبە سونەتیەکانی چوار پارچەی کوردستان بە گشتی نوێنەر و پارێزەری بەرژوەندی چینی سەردەستی کۆمەڵگای کوردین. هەمویان گوێڕایەڵی بنەماڵەی بارزانین و بنەماڵەی بارزانیش گرێدراوی داگیرکەرانی چوار پارچەی کوردستانن.
مارکس دەڵێ: " کرێکاران نیشتمانیان نیە" بەڵام لە کوردستان ئەوە چینی سەردەستی کۆمەڵگایە کە نیشتمانی نیە.
کوردایەتی لە ناوە وە و دەرەوی بنەماڵەی بارزانی یەک نێوەرۆک، یەک ئامانج و یەک ئاکامی هەیە.
پرسیارەکانی دوێنێ:
-ئاغاکەت فارس بێ یان کورد؟ شەپی بێگانە بە ئازارترە یان شەپی کوردی؟ پدەر سەگ تاڵترە یان سەگاب؟ "کۆت و شەڵوار پۆش" ماڵت بخوا یان "ڕانک و چۆغە پۆش"؟ زیندانبانەکەت بێگانە بێ یان کورد زمانی نۆکەری بێگانە؟ ڕۆژنامەنوس و ڕووناکبیرەکانت بێگانە تیرۆریان بکا یان کوردی نۆکەری دەوڵەتێکی بێگانە؟
جوابەکانی ئەمڕۆ- نە ئەو و نە ئەم. ئێمە چیدی ڕەعیەت نابین تا "ئاغای فارسی کۆت و شەڵوار پۆش" لابەرین و کوردی کەوا پانتۆڵ،جامانە و کاڵە پۆش" بکەین بە ئاغا و سەروەری خۆمان.
ڕێگای سێهەم
لادان لە کوێرە ڕێی کوردایەتی دیوەخان و هەنگاونان و ڕێپێوان لە گەورەڕێی ئازادی، بەرابەری، مرۆڤدۆستی و پێکەوە ژیانی گەلان.-لە جیاتی دەروێشایەتی لە سەرگوێلکی خانەقای شێخانی کوردایەتی، ئاسۆی ڕوانین و بیرمان فراوانتر بکەین.
٩٥٪ی ڕۆئیاکانمان لە گەڵ ڕووناکبیران، ئازادیخوازان، چینی مامناوەند و ژێردەستی گەلانی هاوچارەنوسمان لە ئێران یەک دەگرنەوە. وەک:
ئازادی، دادپەروەری کۆمەڵایەتی، بەرابەری ڕەگەزی، فێر کردن و بارهێنانی خۆڕایی، دەرمانی خۆڕایی، هەلی کار بۆ هەموان بە یەکسانی، خانو و ماڵ بۆ هەموان، پێشکەوتنی پیشەسازی و ئابوری، ئاوەدان کردنەوەی شار و دێهاتەکان و...
" تا مێشکەکان ئازاد نەبن؛ نیشتمان ئەگەر ئازادیش بێت، دەبێتە بەهەشتی مافیای دین فرۆش وەک ئەفغانستان، یان مافیای نەتەوەفرۆش وەک باشوری کوردستان ؛ و جەهەنەمێکی بۆگەن بۆ هاووڵاتیانی بە ڕەعیەت و کۆیلە کراو"
******
***
*
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
