هەوڵی گۆڕینی ئەم کۆمەڵگایە ماندووبوونی نییە

ئایا ئێمەی جیلی دوو دونیاکەی؛ وەختی رژێمەکەی سەدام و پاش ئەویش، بێ ئومێدبووین لەو گۆڕانکاریانەی خەڵکەکە بە حەسرەتەوە چاوەڕوانیانن؟ نەخێر بێ ئومیدنەبووین و نەخێر ماندوونەبووین و چونکە تاکەکانی ئەو  میللەتەی لە هەڵکۆڵینی چیای غەدرو داپلۆسینی صەدام و دارودەستەکەی کۆڵی نەدا...

لەم کارەشدا، هیلاک و نائومێد و ماندوو بێت. بۆیە نا ئومید نین  ناشێ  نەبووین و هەموو کەسێکیش دەزانێت، کێشەکان چین و لە کوێوە سەریانهەڵداوەو مێژووەکەیان بۆ کەی دەگەڕێتەوەو کێ هاندەر و کێ  کێ سەرچاوەیانە. دەکرێت ئەمانەو چارەسەرییەکانشیان لەم چەند خاڵەدا کە راستی بنەماکانی کێشەکانە بۆ خوێنەر روون بکرێنەوە:  

١ -  بە داخەوە، لەبەر درێژەکێشان و بەردەوامیی کێشە نەتەوەییەکانمانەوە، زۆربەی هەرە زۆری خەڵکانی ئەم میللەتەمان وا راهێنراون وا فێرکراون کە دەبیت هەمیشە پێویستیان بە کارێزمایەکی قیادی هەبێت، بەڵێ ئەمە حەقیقەتێکە، بەڵام حەقیقەتێکی تاڵە، حەقیقەتێکە دیوی ئەو دیوی هاوکێشەکەی بە کەمزانینی توانای فیکری و قودرەتی بیروباوەڕی خەڵکانی بە ئەمەکی خۆمانە. کارەساتێکە دژ بە هەموو بنەماکانی رەچەو پرۆسەکانی هەڵکشانی دیموکراتیەت. بەداخەوە ئەم خاڵە کەمەرشکێنەی نەتەوەی ئێمە لەم بەشەی کوردستاندا، بووتە هۆیەکی سەرەکی لە پەرتەوازەبوونی سەرچەمی خاڵەکانی گرێدانی ئێمە بە یەکەوە وەکو نەتەوەیەك، وەك هەرێمێکی نیمچە دەوڵەتی و چەشنی کۆمەڵگایەکی پڕ ویستی گەشەکردن. نەتەوەی ئێمە هەر لە مێژەوە بەم دەردەوە تلاوەتەوەو ئێستاش هەر پێیەوە دەناڵێنێت. بیستوومانە کە خەڵکانمان تا ۱۹۷٥ ەکان ئەو کارێزمایەیان لە مەلا مستەفادا دەبینیەوە، هەڵبەتە ئێمەش و ئەوانەی ئێستاش هەر وا بیر دەکەینەوە ، یاخود ئاوها ئاخنراوەتە مێشکمانەوە، بێ خەبەر نین و تا رادەیەکیش ئاگامان لە بەرئەنجامە نەگەتیفەکانی ئەو دیاردەی ناسینی کەسێ بە کارێزمای قیادی و بە فریادڕەس. ئێمە هەر هەموو ئەم حەقیقەتە نەویستراوە دەزانین بەڵام لەبەر ئەوەی چ وەکو بیری عەشیرەتی و چ وەکو بناخەی بۆچوونی دینی وا فێرکراوین ، کە گەل مێگەل و گایەلین و مێگەل و گایەلیش بێ شوان و بێ گاوان نابێت. بۆیە بەردەوامیدان بەو جۆرە  بۆچوون و بیرکردنەوەیە، لەم کۆمەڵگایەماندا رەوایی داوەتە تەخوینکردنی هەر هەموو بۆچونێکی جیاواز و بە خاین زانینی هەر خاوەند رەوتێکی دوور لە رەوتی (قیادەی ئەوحەدی فریادڕەس). لە ئاکامیشدا ئەم کۆمەڵگایەی ئێمە هەتاکو دێت هەر لە بازنەی چەواشەکاریدا خوول دەخوات و هیچ بوارێکی پێ رەوا نابینرێت بۆ دۆزینەوەی چارەسەری راستەقینەی بنیاتی کۆمەڵگایەکی یەکسان. یەکسانیەك کە شایانی شان و شەوکەتی میللەتێك بێت کە هیچ ماڵێکی تێدا نییە شەهیدی نەبێت و هاوبەشی ئازار و پەتپەتیە نەتەوەییەکان نەهاتبێت.

٢ - ئەم میللەتەی ئێمە، بەرامبەر بە نا دیموکراتیەتی سیستەمی حیزبی و سیاسی و ئیداری، دەناڵێنێت، بێزارە، گەیشتۆتە سەر ئێسقانی و هەموو بوارێکی ژیانی قەیراناوی کراوە. بۆیە لێرەو لەوێ خەڵکانێك ، گرۆپهایەك هەڵدەستن و خۆ رێکدەخەن و لە بیری ئەوەدا دەبن کە ئەم نا سیستەمییە، ئەم پاشاگەردانییە، ئەم پێشبڕکێی قەیران بە قەیرانکردنانە...، بە کارو کردەی سیستەمی دیموکراتی و یاسای و قانونی چارەسەر بکەن. ئەمانەش چ حیزب بن و چ خەلکانی هەڵگری ئەم جۆرە بۆچوونە، دەبێت خۆیان بەشێک نەبن لە بەردەوامی برەودان بەو حاڵەتە دژوارانە، هەڵبەتە مەبەست ئەوەیە کە چ لەناو خودی کاروبار و دەسەڵاتی بەڕێوەبردنی حیزبەکانیان و چ لە شێوازی تعاملیان لەگەڵ خەڵک و جەماوەرو چ وەکو ئاستی کۆمەڵایەتی ژیان و گوزەرانی، دەبێت جیاواز بن و سەدوهەشتا پلە پێچەوانەی ئەو رەوتانە بن کە لە ئارادابوون. بۆیە بۆ ئەو گۆڕانکارییانەی بە نیازن بیکەن و بەرەپێشەوەی بەرن و سەریخەن.  سەرەتا دەبێت لە خۆیانەوە دەست پێ بکەن و پاکلەمیش کردنیش سەرەتا دەبێت لەناو خۆدی ئەوانەوە بێت کە پێشەنگایەتی ئەم رەوت و ئەم نیازە دەکەن. دەبێت هەر لە ئێستاوە، لە سەرەتای کارەوە، نموونایەتی لە کاروکردەو نیازیاندا بکەنە ئەمری  واقیع. رۆژانە کراوەیی و شەفافیەت پیشان بدەن و بیکەنە ئەرمەغان و پێشکەشی جەماوەر و دەوروبەریانی بکەن. ئیتر پاش ئەوەیە کە رۆڵ و ئەرکی بۆچوونی سییەم دێت و دەست پێ دەکات ...... 

٣ – کە ئیسراری خەڵکە بۆ گۆڕانکاریی راستەقینە و راماڵینی هەر دەسەڵاتێکی گەندەڵکارو قەیران دروستکەر. لەمەشدا مەرج نییە ئامرازی کار راپەێن و رووخاندن و سووتاندن بێت. هەرچەندە وەکو هەر عەمەلیاتێکی جراحی بێ ئیحتمالی کێشە نابێت.  

ئەوەی ئێمە گەرەکمانە بۆ ئەم گۆمەڵگا مەییووەمان و بۆ ئەم نەتەوە چەقبەستووەمان ، گۆڕانکاریی بناخەییە ؛ واتە ویستمان دامەزراندنی بناخە ئابوریی کراوەو شەفافە بۆ کۆمەڵی نوێی کوردەواری، رۆچوونە بەرەو هەڵسانەوەو هەڵکشانی بواری چاندن و پێشەسازی و بازرگانییە. پلاندانە بۆ گۆڕینی سەرتاسەری سیستەمی فێرکردن و پەروەردە؛ ئیتر چ لە خودی کاری ئیداری پەروەردە بێت  و چ لە بابەت و ماددەکانی فێرکردن وخوێندن بێت. جێبەجێکردنی رێڕەوێکی نوێباوی خزمەتگوزارییە تەندروستیەکانە، کە بە داخەوە لە ئێستادا ئەو خزمەتگوزارییانە تا رادەی قەیران بێسەروبۆرییان پێدا لکاوە. وەڵاکردنی دەروازەیەکە بۆ شیتەڵکردنەوەی سیستەم و  پێکهاتەی کۆمەڵایەتی، واتە بە گشتی نەهێشتنی عەشیرەت و عەشیرەتبازی و بەکارهێنانی نەگەتیڤی نازناوی عەشیرەتییە لە دەسەڵات و لە کارو کردە بازرگانیەکاندا. سووربوونە لە سەر جیاکردنەوەی ئاشکرای دەسەڵاتی حکومەتی و ئایین و مەزهەب؛ رێزگرتنی بێ پایانە لە ماف و لە کاری ئاینی خودا و خۆدی تاك ، گێڕانەوەی ئایین و مەزهەبە بەرەو ناو مزگەوت و کلیسە و جەمخانەو شوێنە ئاینێکان، لە هەمان کاتدا گرنگیدانی بی پایان بە لاوان و گەنجان و هەموو ئەو ئەو ئەرك و کارانەی دەبنە هۆکار بۆ سەربەرزی و بەختەوەری و مسۆگەرکردنی ئایندەیان.  وە ئەگەر بێ ماندووبوون سوور و جەسوور نەبین لەسەر گواستنەوەی قسەو گوفتارو پلانەکانمان بۆ سەر ئەرزی واقیعی ژیان و گوزەرانی خەڵکەکانمان، ئەگەر ئەمانە نەکەین و بەرەو ئەو ئاسۆیانە هەنگاو نەنێین، ئێستا بێت و سبەی بێت، کارەکانمان دەبێتە هەوڵی هەڕاکردنی بازنەیی لە سفرەوە بەرەو سفر. واتا دوبارەکردنەوەی کاروکردەی بێ بەرهەم و وەعدو پەیمانی بی ئاسۆی ئەم زیاتر لە ٢٥ ساڵەی حیزبە تەقلیدەکانمان گەڕانەوەمان 

چوار گۆشەی سفری ئەوەڵمان ........