پێشینیانی ئەم کوردەوارییە حەیاتە قسەیەکیان هەیە کە هەموو دەیزانین و بێگومانیشین کە ( شێر هەر شێرە،چ مێ چ نێرە). ئەمە زێڕینە رستەیەکە کە لە پای خەڵکانی وەکو (خانزاد و قەدەم خێر و فاتیمە رەش) ـەوە گوتراوە. ئێستاش بەرامبەر بە دڕندایەتی داگیرکەران و لە سۆنگەی هۆکارەکانی لە پاش بەجێمانمان لە سەرتاپای بوارەکانی ژیان و گوزەران،ئەم قسە زێڕینە وەکو قەوان هەر دەڵێینەوەو بەڵام بە داخەوە نە لە شاخ و نە لێرەشا هەندە عەمەلمان پێ نەکردووە!

لەبەر ئەوەی کاروانە رێگەی ئەم کوردایەتیەمان، بە داخەوە هەمیشە لە شەڕ و کوشتاردا بووەو، شەرتی خۆ رێکخستن و وەخۆکەوتنی گەرەک بووە. بۆیە ئێمەمانانی عاشقی خەون، هەمیشە لە خەونی یەکگرتوویی هێز و وەخۆکەوتنی ژنان و پیاوان بووین. واتە یەکێ لە دیاردە زەقە سەپێنراوەکانی مێژووی ئەم گەلەمان شەڕی سەپێنراوی داگیرکەران بووە،لە بەرامبەردا سەهەڵدان و بەرخۆدان و شۆڕش، وەڵامی بێ ئەڵتەرنەتیڤی ئێمە بووە. شایانی باسە لە سەرتای هەر بەرنگارییەکیشا،دەستەی ژنان و ئافرەتانی ئێمەی کورد، بە ژیری و بێ بانگهەڵدان،زانیوویانە کە لە هەر دیاردەیەکا (پیاوان چۆگەن و ژنان بنەوانن) بۆیە هەردەم ویستوویانە بە ئەندازەی توانای خۆیان سەنگەرگر بن ورۆڵی بەرچاویان هەبێت لەو ئەرکە شەرەفمەندانانەدا. بەڵام بەداخەوە،سەردەستەی شۆڕشەکانی ئێمە لە باشوور و لە رۆژهەڵاتیشا،بەرامبەر بە هاوبەشی ژنانی شۆڕشگێڕمان، شۆڕش و خەباتی درێژخایەنیان هەر لە چوارچیوەی رەفتاری(ماین و مەیدان،تفەنگ و نیشان)دا بینیووە.

سەرکردەکانی شۆڕشی ئەیلولمان،لەباتی ئەوەی هاتنی دەیان و بگرە هەزاران شۆڕشگێڕی وەکو (مارگرێت) بخستایە سەر چاوان،ئەوەیان پێکرد کە کردیان !  سەرکردەکانی شۆڕشی نوێش لەباتی ئەوەی بەگەشکەوە بەخێرهێنانی کچە خوێندکارەکانی دانیشگاکانیان بکردایە،کە وەکو دیاردەیەکی تازەگەری شۆڕشگێڕانە بە ئارەزووی خۆیان خوێندنیان بەجێدەهێشت و دەهاتنە ڕیزی شۆڕشەوە،هانیان بدەن و بیانکەنە نموونە بۆ کچان و ژنانی تر، کەچی مارکسیەکانمان پێیان دەگوتن :( ئەرێ بۆ هاتوون،لە شار شوویەک نەبوو بیکەن!!). ئێمە ئاوها لە شۆڕش و لە ژیانی حیزبایەتی و لە ژیانی کۆمەڵایەتیماندا مامڵەمان لەگەڵ کچانی ئازادە و ژنانی شۆڕشگێڕمان کرد، بۆیە لە ئاکامدا بەهەزاران کێشمەکێش بە نیوە گەیشتین و ئێستاش رۆژمان لە جێی خراپدا لێ ئاوادەبێت و زۆربەی کاتیشمان گەنم پەرش و جۆ بڵاو دەبێت!

خۆشبەختانە،ئەو پەرژینەی ئێمە پێمان لانەبرا،ئەوان؛ ئەوانی گریلا و شەڕوانان لایانبردو شکاندیان. ئەو تەمە قورسەی بەرچاوی خەڵکانی شۆڕشگێڕی ئێمەی گرتبوو، ئێمە بێ توانابووین لە لابردن و رەوینەوەی. ئەوان؛ ژنانی کۆبانێ، سوری ئامەد، شیرناخ، جزیرەو نوسەیبین،عەفرین  ....، رەواندیان و لەناویان برد و بۆ حیکایەتی بەرئاگردانیان بەجێهێشت.

ئێستاش،لە بۆ گرتنی سەر خەتی راستی،بۆ هەڵسانەوەی یەکدەستی،بە کۆمەڵ نەک بە نیوەیی،لە هەر هەنگاوێکا دوو زەین شەقاومان پێوویستە. ئێستاش کاتی ئەوە هاتووە کە بۆ ژنانی بە تواناو پڕ ئەمەک و بە جەسارەتمان – کە هەندە زۆرن لە ژمار نایەن، بوار بۆ هاتنە پێشەوەیان بە سوپاسەوە واڵا بکرێت. دەرگەی بوونە سەرکردەی سیاسی و حیزبی و پەلەمانی و دادوەری و کۆمەڵایەتی و روناکبیرییان بێ رێگری بێت. دە ساڵێك لەمەوپێش کێ دەیزانی ئێمەی کورد کەڵە ژنانی وەکو (لەیلا زاناو رۆژدا و فیدان و ئەفێستاو ... )و سەدان ژنە هاوڕێی ئەوانمان لێ پەیدا دەبێت؟ کەواتە ئەی بۆ هەر دەبێت پیاوان سەرکردەی سیاسی و حیزبی و پەرلەمانی  و دادوەری و روناکبیریی و ئیداریی ئەم نەتەوەیە بن؟ بۆ هەر دەبێت زەلام پێشەنگ بن و ژنیش سێبەرو تارمایی؟ خۆ هەر هەموو بێ شكین کە ئێمە لە پەنجا ساڵی رابردووماندا،بە نیوە تا نیوەشمان پێ سەرنەخرا،ئەی کەواتە بۆچی هەنگاوی گۆڕانکاری جدی  نەهاوین، چی رێگرە کە ئیتر لەمەودوا لە کاری سیاسی، لە کاری حکومەتی و لە کاری دادوەری و لە کاری بەڕیوەبەرایەتی و لە مەیدانی میدیاکاریدا، پێشەنگەکانمان و زیاتر لە ٥٠ % سەرکردە و وەزیر و بەڕیوەبەرەکانمان ژنان و ئافرەتانی بە ئەمەک بن ؟  بۆ دەبیت هەر ئاڵای شڕوپڕی ئەو تەڵسەمە کۆنەی پیاوسالارییە بێ سوودە لاکەلاك بەرز بکرینەوە؟ بۆ یەکسانی ژنان و پیاوان، ئافرەتان و زەلامەکان نەکەینە دروشمی ئەم عەسرە، ئەم چاخە، ئەم کاتە ئەنگوستەچاوانەمان؟