مینبەرەکانی  ماڵی خوا خەریکە دەبێتە ترسناکترین  جێگە،  مایکرۆفۆنەکانی  بەردەم مەلاکان  دەنگێکی  ترسناک پەخش دەکەن  کە هەڕەشەیەکە، بەدووری نازانم کەنیشتمانی ئێمەش  بێتە   سۆمال ، ئەفغانستان ، یان هەرجێگەیەکی تر کە لێیەوە بانگەوازی جیهاد  دەکرێت .

جیهاد دژی کێ... !؟ 

 لەم ڕۆژانەدا  دەنگی "ناسر ڕەزازی" بڵاو کراوەتەوە کەدەڵێ: من  یارسانیم و موسڵمان نیم .  ئیتر مەلاکان  دەستیان کردووە  بەهێرش و سوکایەتی کردن و هەڕەشەکردن ، ئەوان بیریان چۆتەوە کەمەلان ... !

 ئەمە یەکەمین  جارو دواجاریش نییە  کە مەلاکان  خۆیان بادەدەن و  هاش و هوشیان دەستپێکردوە ،  من کە گوێم  لەم مەلایانە دەبێت دەڵێم  : حەلاج  ، کاک ئەحمەدی شێخ ، مەحوی  ، نالی ، خەرگە ڕەش ...   هتد گۆڕ هەڵتەکێنن  ئەها  میراتگرەکانتان  چەندە بەڕەوشتن  ، بەچرکەش شوێن پێێ ئێوە  بەرنادەن ؟

هەر ئەم چەشنە لەمەلای ترسنۆک بوو کە عەبدولخالق مەعروفیان بەتیرۆرکردن دا ،   مەلاکان  بەسیستەماتیک   جوێن بە هونەرمەند دەدەن، سوکایەتى بە بیرمەند ەکەن  و شاعیر دەکەن،  شعر دادگایی دەکەن ، بوهتان بە زانست دەکەن و لەخۆیانەوە هەموو  کارێکی زانستی دەبەنەوە بۆ ناو قورئان  بەبێ بەڵگە ، گاڵتە یان بە  هزر دێت ، سوکایەتی بەئاینەکانی تردەکەن  نەفرەت لە جوولەکە  دەکەن، نزا لە فەلاکان دەکەن کە تۆویان نەمێنێت ، تەحریفى زەردەشت دەکەن و بوهتان دەکەن کە زەردەشتێکان  لەگەڵ دایکی خۆیاندا  دەخەون ، ئێزدى تەکفیر دەکەن و بەکوردیان نازانن و بوهتانی ئەوەیان بۆدەکەن کەچڵکن و خۆیان ناشۆن و پیسن ، دوایش  ژنى خەڵک دەدزن، عاشقاتى لەگەڵ کچان دەکەن لەڕێگەی فریودانیانەوە.  مافى مرۆڤ پێشێڵ دەکەن و بەبێڕیش دەڵێن ئەو پیاوانەی بێڕیشن  وەک ئافرەتن بەڕووتی ، ژن ریسوا دەکەن و بەنوقسانی  هزر ئەیانشوبهێنن و بەلاواز ئەیانخەمڵێنن .. ئینجا تێر تێر درۆ دەکەن لەمینبەرەکانەوە  و چیرۆکی وادروست دەکەن تەنها بۆ فیلمی کارتۆن دەست دەدات ،دوایش خۆیان کردۆتە نمایندەی خوا .

تەنانەت سوکایەتی بەزمانی کوردی دەکەن و دەڵێن  "بەیانی باش و نیوەڕۆباش و ئیوارەو شەوباش  نابێ بوترێت  .

 بەر لەماوەیەک چاکترە بلێم  پیشتر "عومەر دڵپاک"ی  هونەرمەند تەنها ووتی : باحاجێکان نەچن  بۆحەج ئەو پارەیە بدەنە  خەستەخانەی هیوا .. مەلاکان  دەستیان کردەڕشانەوە و جوێندان  . ماریا هەورامی  گۆرانیەکی  ووت لە شەقامی سالم ، چیان نەکرد  بەو خانمە گۆرانی بێژە !؟  دوایی شێرزاد حەسەن ووتی: لەقوتابخانەکاندا ئێمە داعش پەروەردەدەکەین . مەلاکان  دەهری بوون و دەستیان کردە  هەڕەشەو گوڕەشە، هەموو ئەوەی لەباریشیاندایە  و بووە   جوتەیەک بوو لە شێرە بەفرینەیەکیان دا .   ناسری ڕەزازی و ڕووداوەکەی،  گەلێک ساڵە من گوێ لەگۆرانی کوردی ناگرم ، ئەو گۆرانیانەی  کە لەم ساڵانەدا دەوترێت  هەست دەکەیت  بەرهەمێکە کە زیاتر  ئاوازی ڕەسەن نییە ، جگە لە تێکستەکەی  .

هەڵوێستی  گۆرانی بێژەکان زیاتر توشی ژانەسکم دەکەن ، لەپڕ بانگ دەدەن ، هەمووگیانی بۆتۆکس و جێڵ و فیلەرە   قورئان دەخوێنی ، پاشان  ئەم هەموو ڕووداوە  نەیتوانیوە دوو سێ گۆرانی بەرهەم بێنێت کە  مرۆڤ والێبکەن کە گوێی بگرێت بۆ گۆرانێکان ، هەمووی بووە بەئاوازی تورکی وعەرەبی و تێکستی پوچ .

 ناسر ی ڕەزازی  سرودەکانی لەگەڵماندا ژیاوە ، جارێک لەهۆلەندا  مامۆستا نامدار چیرۆکی  تۆمارکردنی ئەوسروودانەی بۆباسکردم هێندەی تر لام خۆشەویست بوو ، ئەی شەهیدان  لەلوتکەی  سروودێکی  هێندە بەرزدا یە کە بۆتە مێژووی ناسری ڕەزازی ، وەک چۆن  "سڵاوی گەرمی ئێمەت پێشکەش " ناسنامەی خاتوو مەرزیەیە ، نەجمەدین غوڵامیش بە پارتیزانی پاچدەران دەناسمەوە . 

جارێک  هاوڕیەک لەشەوە ئاهەنگێکدا  ویستی باسی ناسرڕەزای بکات  بەرلەدوو دەیە  ..من ووتم تکایە  ئەم باسە بوەستێنە  چونکە  هەرچی بکەیت  و هەرچی بڵێیت ، ناتوانی ئەی شەهیدانم لێ بسەنیتەوە .

 من ناسری ڕەزاری و کاڵێ و نەجمەدین غوڵامی و مەرزیەم دیوە کە لەمالومە سرودو گۆرانیان چڕیوە   ، ئەوان بۆمن مێژوویەکن  کە کاڵنابنەوە ، بەڵام هەرگیز نەم ویستوە لەنزیکەوە بیان دوێنم ، ئەوانیش مرۆڤن  شایەنی هەڵچون و داچون و تەنانەت هەڵەشن . 

 ووتارێکی کاک ناسر حەفید هەیە  لەسەر  هەردووهونەرمەند  ناسری ڕەزازی و  مەررزیە خانم بەناونیشانی   

ووڵاتێک لەدرۆ. 

  کە من هیچ لەسەر  ئەو هەڵوێستەیان  ناڵێم   چونکە  کاک ناسر حەفید   زۆرجوان شیکاری  بۆئەم هەڵوێستەیان کردووە . 

 من دەزانم  ناسری ڕەزازی بەهەموو مانایەک  هونەرمەندەو  زمان زانەوە هەموو زاراوەکانی کوردی دەزانێت و گومانم نییە کە لەبوارەکەی خۆیدا  زۆر ئاگامەندە ، تەنانەت کتێبێکی زۆر نایەبیشی لەسەر "بتۆڤن " وەرگێڕاوەو من  کتێبەکەم خوێندۆتەوە  زۆرچێژم لێبینی  چونکە بتۆڤن گەشتێک بۆ مۆسکۆ دەکات . 

بەرلەچەند ساڵ لەسلێمانیەوە  شەوێک  بەفڕۆکەیەک گەشتم کرد بۆ ستۆکۆڵم پایتەختی سوئید ،ڕێکەوت  ناسری ڕەزازی و خێزانەکە تازەکەی لەتەنیشتم بوون  ، پەستا پەستا  گەشتیارەکان دەهاتن وێنەیان لەگەڵ دەگرت ، من کتێبێکی ئۆشۆم پێبوو کتێبی "پیاو "  دەمخوێندەوە   یەک ووشە چیە  لەگەڵ ناسری ڕەزازیدا  نەم ووت : گەرچی  سەیریشی دەکردم  بەڵام   پێم خۆش نەبوو  هونەرمەندێک ، کە لای من  وێنەیەکی  جیاوازی هەیە  ،ئێستا ئاوێزانی  ئەو دەسەڵاتە بووە ، ئەوەش نا لەدوکان  دراوسێ ماڵی  تەها محیەدین مەعروفی سەرۆک وەزیرانی بەعسی تاوانباربیت و  سرودی شەهیدانیش ناسنامەت بێت !؟ 

 مرۆڤ زۆرجار بەچەکی خۆی خۆکوژی دەکات ، بۆیە زۆرگرنگە ئەوانەی بەهرەیەکیان هەیە  ، ئیتر هەر بەهرەیەک بێت ئاگاداری  ڕەفتارو ڕەوشتیان بن  بۆئەوەی  هونەرەکەیان یان بەهرەکەیان  نەبێتە جێگەی گومان .

ئێستا کە ئەم  ئیسلامیە  داعشانە دەستیان کردوە بە  هێرشێکی ناڕەوا  بەرامبەر  ناسری ڕەزازی من لەگەڵ هەموو ئەوڕەخنەیەی کە ئاراستەم کردووە ، پشگیری هەموو مرۆڤێک دەکەم  کە هەڵگری هەر باوەڕێک بێت  ، یان هەرئاینێک پێی خۆشە  و ئازادە  ناسری ڕەزازیش بەهەمان شێوە مافی خۆیەتی  کە  موسڵمان نەبێت .  

مەلاکان ئەو هەموو تاوانەی ئێران و تورکە فاشیەکان نابینن ، بەڵکو هەر  غیرەتیان نییە باسیشی بکەن  دێن هەر مانگێک بەسەر هونەرمەندێک ،شاعیرێک ، بیرمەندێک ، دەکەنەئامانج و مینبەری پێ پڕدەکەن  لەهاش و هوش ، دواجار پرسیارێک لەمەلا کان دەکەم ئێوە ڕۆژانەدرۆدەکەن کە بەلێشاو خەڵک دەبێتە موسڵمان ، ئەی چی دەبێت گەر موسڵمانێک بچێتە سەر ئاینێکی تر ، ئێوە بۆ خۆتان تێکداوە ، مەگەر خۆتان ناڵێن هەرکەسێک  بەرپرسە لە چارەنوسی خۆی... !؟