ئەنتەرناسیۆنالی کۆمەڵەی رەنجدەران و پڕۆفشنالی میدیای ئەهلی! (بەشی دووەم)

Wednesday, 06/06/2012, 12:00

خوێنەری بەڕیز بەر لەوەی ئەم بەشە بخوێنیتەوە گرنگە بەشی یەکەمی ئەو بابەتە سەیر بکەیت چونکە تەواوکەری یەکن وە بابەتێکی هەستیارە. (بەشی یەکەم)
ئەگەر بچێنە سەر خاڵی جەوهەری سیاسەتی میدیا ئەهلییەکان و ئۆپۆزیسیۆن، دەبینین لە نیوان هەواڵی شارەکان دا، ئەم میدیایانە سیاسەتی (دووبان و یەک هەوا) واتە دەبڵموڕاڵیی. ئەمانە زیاتر گرنگیی و بایەخ بە کارو چالاکیی کەسایەتییە ڕۆشنبیرەکانی سلێمانی زیاتر دەدەن وەک لەهەموو شارەکانی تر، بەلای ئەم میدیایانەوە ئەو رۆشنبیر و نووسەران لە سەرو رەخنەوەن و نابێت قسەیان لەسەر بکرێت، ئەگەر رەخنە و سەرنجێکیشت هەبێت، فەرامۆشی دەکەن و بلاوی ناکەنەوە، لەوە خراپتر لە هەندێک حالەتەدا ناوت دەخەنە لیستی رەشەوە و هیچت بۆ بڵاوناکەنەوە، ئەمەش پێچەوانەی ئەو دروشمانەیە، کە لەسەر مینبەرەکانی راگەیاندن هاواری بۆ دەکەن. سامناکترین رەوشی ئەمانە هەر وەکو حیزبەکانە، کە لە هەوڵی بردنە پێسەوە و دروستکردنی پەیکەری نووسەر و رۆژنامەنووسی گەورەدان، کە بە زۆر بە سەر خەڵکییدا دەیسەپێنن، هەموو دەسەلاتێک کۆمەڵیک نووسەر و روناکبیر و رۆژنامەنووس لە خۆی کۆدەکاتەوە، ئەوانەی کە دەزانێت لەگەڵ سیاسەتی حیزب و دەوڵتدا کۆکن، دەکەونە پرۆپاگەندەکردن و زلکردن و بە پیرۆزکردنی ئەوانە، تا جەماوەری بۆ زیادبکەن، لە هەر کۆڕ و کۆبوونەوەیەکدا بێت، ریکلامی بۆ دەکەن، و هان دەدەن کە خەڵکی بچێت و کۆڕەکەیان بۆ قەرەباڵگ بکەن، کتێبێک و نووسینێکیان هەبێت پێشوەخت پرۆپاگەندیان بۆ دەکەن، چەند دێڕ و قسەیەکیان دەکەن بە نمونە و وەکو قسەی فەیلەسوف و زاناکان دەیخەنە بەر دەمی خەڵکی، تا لە نادیاردا بگوترێ، تەماشاکاەن ئەم زانا و فەیلەسوفە، چۆن بیردەکاتەوە، بیرکردنەوەکانی ساغڵەم و سەلیمانەیە، کەسێک ئاوابێت، کەوابوو خەڵکینە ئێوەش وەکو ئەو مامەڵە لەگەڵ دەسەڵاتدا بکەن و ئەو فەیلەسوفە بە هەڵەدا نەچووە، ئێوەش وەکو ئەو بیربکەنەوە و رێوشوێنی ئەو هەڵبگرن. کار و بیرکردنەوەی دەسەڵات، هەمیشە هەنگاوێک لە پێش خەڵکییەوە بووە، ، بەڵام لە ناو میللەتی وشیاردا پێچەوانەکەی راستترە. میدیای ئەهلیی و ئۆپۆزیسیۆن بە مەبەست ئەم کارە دەکەن، ناتوانن شارچێتیی و هاوڕێیەتی خۆیان لە کارەکانیاندا بشارنەوە و فەرامۆشی بکەن، هەروەک چۆن دەسەڵات موڵکی حیزبە، حیزبیش موڵکی بنەماڵەیە، ئاواش میدیای ئەهلی موڵکی دەزاگایەکە، ئەو زۆربەی دەزگایانەش موڵکی بنەماڵەیەکە و کەسوکار و خزم و هاوڕێکانی خۆیان لیوەی نزیکن و بەڕیوەی دەبەن. هەموویان بەهەمان هەناسە و هەڵسەنگاندنی بێ ویژدانەی دەسەڵات هەڵویست وەردەگرن. بالیرەدا قسە لەسەر ئەو دوونمونەیە بکەین
پەیکەرەکەی میرەو لەقلەقەکە
١) سەرەتا دەستخۆشی لە میرە (ئەوەی کە پەیکەری گویدرێژەکەی دروستکردووە)، هەروەها هەموو ئەوانە دەکەم کە پەیکەرەکەیان لە شاری سلیمانی دروستکرد، ئەمە جوانی و سەرەتایەکی بەمەدەنی و هوشیارکردنەوەی تاکی کوردە کە واز لەو دڕەندەییە بهێنێ بەرامبەر ئاژەڵ. بەڵام ئەوەی من سەرنجم دابێت ئەم پەیکەرە بەهۆی ئەوەی لە سلێمانی دروست کرا میدیای ئەهلی و کەنالی KNN , NRT بەهەواڵ دایان پۆشی بەردەوام قسەیان لەسەری دەکرد، بەردەوام لە هەموو هەنگاوەکاندا ئاگامان لێیان بوو، وەکو: (دروست دەکرێت... دروستکرا... تێکدرا... دژ بەتێکدانی کەمپینی بۆ کرا کە خۆشم واژوم کرد) بەواتای بە (فعل و فاعل و مەفعول بە) بەڵام کارێکی ئاوا بەهەمان ئاست لە هەولێر ىێت، بە بچووکی باسی دەکەن و پەراوێز دەخرێت وەک شتێکی لاوەکی سەیری دەکەن، بەمەرجێک ئەگەر لە پەیکەری گوێدرێژەکەی سلێمانی گەورەتر و چالاکتر و گرنگتر بێت، ئەمەش یەک مانا دەدات ئەو دروشمانەی بەرزیان کردۆتەوە نەگەیشتۆتە ئاستی هوشیاری ئەو بەرپرسانەی کە سەرپەرشتی هەواڵ داگرتنی سیاسەتی راگەیاندنەکان دەکەن. بەڵکو زیاتر هەڵچونێکی سلێمانیانە بەسەریاندا زاڵە، ئەگەرنا ئایا دروستکردنی پەیکەر بۆ ئەولەقلەقە کە نمونەی وەفا و نەفرەت لەشەری ناوخۆ وتیرۆرە، بۆچی بەئاستی هەمان پەیکەرەکەی میرە گرنگی پێ نادەن و دەبێت بەتەلەفۆن و چەندین ئیمێل بکەین تا دەیکەنە هەواڵ، کە جاری واهەیە ئەمەش ناکەن؟ من بەوردی چاودێرییم کردووە بچوکترین کارو چالاکی لە سلێمانی بکرێت چەندین هەواڵی لێ دروست دەکرێت، بەڵام لەم ئەوروپایە بێ چالاکیەی هەموو پارتەکانی باشور، یان کارو چالاکیەک تایبەتمەند بەهەولێر یان بەبادینان بێت، لەبڕی ئەوەی گرنگی پێبدەن چونکە کەمە، پێچەوانە رەفتار دەکەن؟. لەوەش سەیرتر زۆرینەی ئەوانەی واژویان بۆ تێکدانی بەشیک لەپەیکەرەکەی میرە کرد، واژوو بۆ دروستکردنی پەیکەری لەقلەقەکە ناکەن، لەکاتێکدا پەیکەرەکە کەمێک شکاوە، بەلام ئەو لەقلەقە تیرۆرکراوە و هەوڵدەدرێت بکرێتە رەمزی دژە شەر و ئاشتی، لێرەدا هەست دەکەی ئاستی واژوو گرنگیدانەکان بەپێی ناوچەکە دەوەستی نەوەک لەگەڵ ئاستی هوشیارییان.
ئاخر ئەمە چ گالتەجاریەکە ناوی "میدیای ئازاد و ئەهلی... هتد " لە خۆت بنێیت! باس لە مەدەنیەت بکەی، کەچی لەبڕی هەوڵی خەبات بۆ پەیکەرێکی دژە شەر وەک سەرەتایەکی مۆدێرنکردنی کۆمەڵگا هەنگاوی بۆ بهاوێژی، کەچی قین بگری لەیەکیک لەوانەی بەشدارەلەم هەوڵە و بایکۆتی سەرجەم کار و چالاکیەکان بکەی؟ باشە چ جیاوازیەک لەگەل ئەقلی خێڵەکیی دەسەڵات و ئێوەدا دەمێنێتەوە !؟ لە هەمووی سەیرتر ئەوەشیانە دواتر بچی دەیان هەواڵی لەشیوەی کۆچی باوکی عەلی باپیر بڵاو بکەیەوە، یان ووتەیەکی نیچیر بەزیرەکانە وەک ڕیکلام لەهەواڵێکا بۆی دابڕێژی!؟
ئەگەر خوێنەر سەرنجی داڕشتنی زۆربەی هەواڵی میدیا ئەهلییەکان بدەین، کەسی وشیار هەست دەسکات، کە ئەو هەواڵانە لەسەر قسەی بەرپرسانی درۆزن و هەوالی سیاسی دەخولێتەوە و داهێنان لەهەواڵێکدا ناکەن. کێ هەیە ڕۆژانە دەیان هەواڵ لەم ماڵپەرانە نەبینێ وەکو (ئەم بەرپرسە وای ووت، وا رۆیشت،.....) بەکورتی شیوەی هەواڵەکانی میدیای ئەهلی و ئۆپۆزیسیۆن لەگەڵ دەسەڵاتدا یەک ڕێرەوی کلاسیکییە، هەردوولا بە سیاسەتکردنی کۆمەڵگا و قسەی بەرپرسانە بەئاوازی جیا، کەمترین هەواڵ دور لەنەفرەت لەشەر، سروشت پاراستن، گرنگی بە ئاژەڵ، شوێنەوار..... ئەمەش کۆمەڵگایەکی ناتەندروست پەروەردە دەکات.
٢) نەک هەر ئەمە، بەڵکوو ئەوەی لەم ماوەیەدا سەرنجم دابێت، پەشێو لەچەندین شاری کوردستان کۆڕی ساز کرد، بەهەر پیوەرێک سەیر بکەین، کۆڕەکانی شایستەی هەواڵ بوون لەو دوو بەشەی میدیا نزیک بوو (ئەهلی و گۆڕان)، بەلام چونکە ناوەڕۆکی شیعرەکانی و دژی دەسەلات و گەندەڵییەکان بوو دەسەڵات، خۆی نەدۆڕاندبوو، لەگەل ئەو ژمارە ئامادەبووەی کۆڕەکانی، واتا جولان و ڕووداوێک لەشاردا رویداوە.. بەڵام ئایا ئەوەی نە دەهێنا وەک هەواڵ بڵاوی بکەنەوە؟ بەدوایدا بچن و بیکەنە هەواڵ وراپۆرتێکی لەسەر بنووسن؟ من دوو هۆکار بۆ ئەمە دەزانم، یەکەمیان پەشێو خەڵکی سلیمانیی نییە، هەروەها وەک ئەوانەی بۆ ڕۆشنبیرو ناوەندەکانی ڕۆشنبیری سلێنمانی دەیکەن، دووەمیش هێشتا خۆی نەفرۆشتووە و دەسەلات پارچە زەویی و پارە و خانەنشینی بۆ نەبڕیوەتەوە، لەبەر ئەوە میدیاکان ئیرەیی پیدەبەن و نایانەوەێ کەسێک کە لە خۆیان جوانترە، بەو جوانییەوە بیخەنە بەردەمی خەڵکی، ئاخر لە پیشاندانی پەشێودا، ناشرینی هەندێکیان دەبینرێت! (ئەوەی من بینیم تەنها ٢ جار سبەی و یەک جار لە ئاوێنە)دا بە کورتی و بە کوردی قسەیان لەسەر کرد، پرسیار ئەوەیە، ئایا ئەگەرپەشێو خەڵکی سلێمانی بایە ئایا شێوەی هەواڵەکان لەو ئاستە دەوەستا؟ ئایا ئەوەندەی ئێستا ریکلام بۆ کتێبەکەی بەختیار عەلی و کۆڕە بێ هەڵوێستەکانی شێرکۆ دەکەن، نەدەکرا کەمێک بۆ پەشیویش بکرایە!؟ ئەگەر میدیای ئەهلی ومەدەنی و ئۆپزسیۆنی جدین !؟ گەرچی پەشێو وەک دەبینین بێ راگەیاندنیش جەماوەری تایبەتی خۆی هەیە، هاوکات دلنیاشم بەختیار پارە نادات بۆ هەواڵ بڵاوکردنەوەی لە زۆرینەی ماڵپەرو کەناڵە ئاسمانییەکان؟؟ ئایا نەدەکرا کەنالی کەی ئێن ئێن وەک کۆرە سیاسی و شیعریەکانی ک دەنگە دیارەکانی سلێمانی سازی دەکەن بەکاتژمێر بۆیان بلاو دەکاتەوە یان بە هەواڵی گرنگ وەک ئەوەی لەم ڕۆژانە لەسەر کۆڕەکەی شێرکۆ کردیان، بەهەمان شیوە بۆ پەشێویان بکردای؟ ئایا پەشێو رێگر بوو؟ ئەی ئەگەر ڕیگربوو چۆن تەنیا شعرەکەیتان لەسەر سەردەشت خوێندەوە؟

پرسیار ئەوەیە ئەوهەموو کەناڵە ئێستا ریکلام بۆ کتێبێکی وەک بەختیار عەلی دەکەن ئایاهەلچونێکی سلێمانیانیە یان بەراستی بەختیار شایستەیە؟! هەرچەندە هەموو دەزانن، کە بەختیار عەلی داکۆکی لەگەندەڵیی دەکات، لە رۆژنامەکانی پاراستندا دەنووسێ، بەختیار عەلی بەناوبانگە بە لووتبەرزیی و جوێندانی بازاڕیانە، وەکو ئەوەی بە یاسین بانیخێڵانی دا، زۆر جار جنیوەکانی هێندە ناشرین و سەرشەقامیانەیە مرۆڤ رووی نایەت دووبارەی بکاتەوە؟ ئایا ئەگەر هەردەنگ و رەنگێکی هەولێر یان بادینان، کە کەسایەتی دیاری رەخنەگری ئەو دەسەلاتە بێت وەک نووسەری رەهەندیەکان، چەماوە بێت بۆ دەسەڵات و داوای پارچە زەوی بکات، نامەی سازشکارانە بۆ دەسەڵات بنووسێت، داکۆکی لەگەندەڵی دەزگای سەردەم بکات یان وەکو ئەمانە لوتبەرز بێت وەکو بەختیار عەلی لە ئاستێکدا بێت، ئەوەی کە رەخنەیان لێ بگرێت بە ڕێوی وەسفی بکات، ئایا دەرگای ڕەخنە گرتن ئاوا لێی دادەخرا؟ بڕوانە ئەم شیعرەی بەختیار عەلی، بزانن چی دەڵێت؟ بزانن هیچ فەیلەسوف و زانا و عاقڵ و مرۆڤدۆستێکی ئەوروپی و ئەمەریکی و جیهانی شتی ئاوای لە دەم هاتۆتە دەرێ و ئاوا بیری کردۆتەوە:

(به‌ختیار عه‌لی: تا ماته‌می گوڵ، تا خوێنی فریشته‌، کۆی به‌رهه‌مه‌ شیعرییه‌کان.1983/2004.چاپخانه‌ی ڕه‌نج.2006.سلێمانی. ل 413 :-")


لە کۆتاییدا دەڵێم:
ماوەیەکە کە رەخنە لەسەر میدیای ئەهلیش کۆبۆتەوە، ئامانج لێی هەرگیز دژایەتی نییە وەک کە ئەوان بانگەشەی بۆدەکەن، بەئاستی ئەوەی دەمانەویت هەر لەسەرەتاوە، تا سیمای پارتی ویەکێتی لەناویاندا زیاتر گەرا دانەچێنێت و پێشی بگرین. باشترین نمونەش لەم بارەوە، ئەگەر لە شاخەوە گیانی رەخنە بەرامبەر یەکێتی و پارتی هەبوایە، ئەوا ئەو هەموو نەخۆشیە پیسە سیاسیانەیان لەناو کۆمەڵگا بڵاو نەدەکردەوە. لەوەش گالتەجارتر هەر رەخنەیەکیان لێ دەگری دەڵێن لە ئەوروپا دانیشتوە ئێمەش لەبەردەم گرتن و هەرەشەی تیرۆر، گەرچی من زۆر قسەم لەسەر ئەوروپابونی خەبات و کەسیتی خۆمان لەکوردستان کردوە بەڵام ناکرێت بەو پاساوەش بەئارەزوی خۆت رەفتار بکەی؟
هاوکات دەبێت بلێین مەرج نییە ئەوە بیروبوچونی هەموو ڕۆشنبیرێکی سلێمانی یان میدیاکانیان بێت، بەپێچەوانەوە سەدانیان دژ بەم رەفتارانەن، لەگەل زۆردەنگ و قەلەمی جوانی سلێمانی لەو ٢٢ ساڵەی دەسەڵاتی کوردی کارو چالاکیم لەگەڵیاندا کردووە، کردوە، هەیانە بەهەمان شێوە میدیاکارە و سەرپەرشتەکانی دەنگی سلێمانیە بەپێچەوانەوە رەفتار دەکات لەم بارەوە دەتوانین بەپلەی یەکەم کوردستانپۆست و رادیۆی نەوا دابنینن، بەردەوام گرنگی بەپلەی یەکەم بەپێێ هەواڵ داوە، نەوەک هی کام نووسەر و شارە؟ دواتر مینبەرەکانی تری وەک ئاوێنە و سبەی، هاولاتی... ئەمە جگە لەوەی زۆریان هەن بەهۆی ئەوەی خەڵکی سلیمانیشن بەڵام لەگەلیان هاورا نین گرنگیان پێ نادەن، بەنمونە فاروق رەفیق تا لە هەولێر پۆست دەینوسی گرنگیان پێ دەدا، بەلام لەدوایی ١٧ی شوباتەوە کەمتر کراوەتەوە، یان ناسک قادر کە ئەمرۆ لەهەموو ژنە چالاکڤانەکان بوێر و مەیدانی ترە لەبەشداری کارو چالاکیدا، کەچی ئەو میدیای ئەهلیە گرنگی بەو نادات بەلکو بەهەندێ چالاکڤانی ژن دەدات کەخاوەنی هیچ بەروبومێک نین؟ بەپێچەوانەوە بەختیارێک بۆرۆژنامەی پاراستن دەنوسێت و لەو هەندەرانە رۆژێک بەشداری هیچ کارو چالاکیەکی نەکردووە، کەچی دەبینین، هەڵویست و گەندەڵییەکانی پەردەپۆش دەکرێت! بۆیە بایکۆتکردن، پیرۆزکردنی کەسەکان، داکۆکییکردن لەگەندەڵی، نەبونی هەناسەی ئازادی لەمینبەرەکان، شارچێتی... هەر یەکە گەر دەسەلات یان ئۆپزسیۆن و میدیای ئەهلی و ڕۆشنبیر بیکات، کارێکی ناشرین و ناوشیاریی و قێزەوندە، ئەگەر لە خەمی پاشەڕۆژی میللەتەکەماندا بین، پێویستە رێگای لێبگرین.
 
بەشی یەکەم:
http://www.kurdistanpost.com/view.asp?id=cc6e162a