پێنگاڤێت داگیرکەریێ یێن دەولەتا ترک ل باشوورێ کوردستانێ، ئارمانج ژێ: ژناڤبرن و نەهێلانا قەوارەیا هەرێما کوردستانێ یە!
Sunday, 14/02/2021, 0:42
گەلی کورد و کوردستانیان هێز و ئالیێن نیشتیمان پەروەر
د بەردەوامیا پیلانێن داگیرکەریێ یێن دەولەتا
تورکیا فاشیست و دژە کورد و کوردستانێ دا، ب ئارمانجا تێکدان و ژناڤبرنا قەوارەیێ
هەرێما باشوورێ کوردستانێ. دیسان بەردەوامی ب هێرش و ئۆپەراسیۆنەکا لەشکەری یا
زەمینی و ئەسمانی بۆ سەر دەڤەرێن چیایێ گارە هەتا دینارتە کرن. دهەمان دەمدا
دئامادەکاریێ دەیە ژی ژ بۆ هێرشەکا مەزن بو سەر شەنگالا بریندار. ددەمەکی دا، ئەڤ
هێرش ل دژی هەموو یاسا و رەسایێن نێڤدەولەتی و بنپێکرنا سەروەرییا ئاخا پیرۆزا
کوردستانێ یە و دبیتە مەترسیەکا مەزنا سەر مان و نەمانا قەوارەیێ هەرێما
کوردستانێ. ئەو دەستکەفتێ کو ب خوینا هەزاران جانگۆری و کەد و خەبات و خوەڕاگرییا
گەلێ کوردستانێ بدەستڤە هاتی. پاراستنا ڤێ دەستکەفتێ ئەرکێ هەر نیشتیمانپەروەرەکی
یە، هەروەها ئەرکەکە ل سەر هەموو هێز و ئالیێن وەڵاتپارێز و شۆڕشگێر کو ملێن خوە
بەر بملێن هەڤدوو و ل دژی ڤێ پیلانا قڕێژا دەولەتا داگیرکەرا تورکیا و دویڤەلانکێن
وێ راوەستن. مخابن! هندەک ئالی ب گرێدانا پەیمانێن بازرگانی و
بناڤ ئەولەهیێ لگەل دوژمنان یێن ل دژی بەرژەوەندیێن گەلێ کورد چارەنڤیسێ قەوارەیا
هەرێما کوردستانێ ب ئەجندایێن دەولەتا تورکیا و ب تایبەت دەستهەڵاتداریا ئاردۆگان
ڤە گرێداینە. هەر ئەو ژی بووینە سەدەم و ئەگەرێن قەیرانێن مەزن د هەرێمێ دا. ب
پڕاتیک زەمینە ژ بۆ پیلانێن دژمنان خوەشکرنە و ب هێزا خوە یا چەکداری و سیخوڕی
چاڤساخیێ بۆ هێرشێن داگیرکەریێ دکەن و رەوایەتیێ ددەنە داگیرکاری یا دەولەتا تورک
یا ل باشوورێ کوردستانێ. ژ ئالیەک دی ڤە بێ دەنگی و بێ هەلوێستییا حکومەتا عێراقێ
ل هەمبەر ڤێ داگیرکارییێ، گومانا بەشداربوونا وێ یا ژ بۆ ژناڤبرنا قەوارەیا هەرێما
کوردستانێ سەرڕاست دکەت. بەروڤاژی وێ یا فەرە دەولەتا عێراقێ ب ڕێیێن یاسایی و
نێڤدەولەتی ل هەمبەر داگیرکاریێ راوەستیت و بکەڤیتە ناڤا لێگەڕینان. ب ڤان پێنگاڤێن بەرفرەهبوونا داگیرکاریێ و
قەیرانێن هەمەجۆرێن دەسەڵاتداریا باشوور، مان و هەبوونا قەوارەیا هەرێما کوردستانێ
د مەترسەکا مەزن و بەرچاڤدا یە. ئەم بناڤێ ” کاروانێ گەل ” کۆمەک ژ ئەندام و کادر
و پێشمەرگەیێن دێرین یێن پارتی گەل، ب توندی ڤان هێرشێن دەولەتا تورک بۆ سەر
هەرێما کوردستانێ و هەڤکاری و چاڤساخیا هێزێن تەسلیمبوویی ئیرادەیا داگیرکەران
شەرمەزار دکەین و داخواز ژ هێز و لایەنێن وڵاتپارێز و گەلێ خوە یێ بەرخوەدێر دکەین
کو ل دژی هێرش و پلانێن داگیرکەریێ راوەستن و دەنگێ نەڕازیبوونێ بلند بکەن و ژ بۆ
پاراستنا ئاخا کوردستانێ ب ئەرکێ خوەیێ نیشتیمانپەروەریێ رابن. - ئەم بانگی هەموو هێز و
پارتیێن کوردستانی و هەروەها هێزێن بەشدار د دەسەڵاتا باشوورێ کوردستانێ دا دکەین،
کو ل هەمبەر ڤان پیلان و هێرشان خوەدی هەلویست بن و خوەدی ل ڤێ قەوارەیێ دەرکەڤن. - هەر ئالیەک یان هێزەک کو
رەوایەتیێ بدەتە ڤان هێرشان، ئەم ب هەڤاڵبەند و هاریکارێ دەولەتا تورکیا دزانین و
دیرۆک رەحمێ پێ نابەت و رزگار نابیت. - ئەم بانگی پێشمەرگەیێن دلسۆز
و قەهرەمان و هەروەها هێزێن ئەولەهیێ یێن هەرێما کوردستانێ دکەین، ب ئەرکێ خوەیێ
نەتەوەیی رابن و ڤێ پیلان و داگیرکەریێ شەرمەزار بکن. - داخواز ژ چالاکڤان و کەسایەتیێن
وەڵاتپارێز دکەین، هەر چ ژ دەستێ وان بهێت دەنگ و دۆزا گەلێ کورد ب سازیێن
نێڤدەولەتی بگەهینن و ئەڤ داگیرکەریا دەولەتا تورکیا بو سەر باشورێ کوردستانێ ب
رایا گشتی یا جیهانێ بەڵاڤ و شەرمەزار بکەن. سڵاڤ ژ بۆ هێزا بەرخوەدێر و قەهرەمانا پاراستنا
گەل و ئاخا کوردستانێ! سەرکەفتن بەهرا گەلێ کورد و کوردستانێ یە!
شەرمەزاری و نەمان ژبۆ داگیرکەر و دژمنانە!
