پەتای گەندەڵی لە ناو دیوانى چاودێری داراییشـــدا بڵاوبــووەتــەوە

Monday, 19/12/2011, 12:00

چاودیریكی داراییی دیاردەی گەندەڵی وەك پەتایـەك لە نێو هەموو جومگەكانى كۆمەڵدا بڵاوبۆتەوە بە تایبەتى دام و دەزگا حكومیەكان، تەنها دەزگایەك كە دوور بو لەو پەتایە دیوانى چاودێرى دارایی كوردستان بوو بە تایبەتى دیوانى چاودیرى دارایی سلێمانى لە كاتى سەرۆكى پیشودا كە نەك بوارى هیچ گەندەلى و سەرپێچییەك لە دیواندا نەبوو بەلكو بەربەستێكى سەخت بوو، هەردەم لە رووبەروو بوونەوەدا بوو لەگەڵ ئەم پەتایە لە دام و دەزگاكانى حكومەتدا بە تایبەتى لە ئیدارەى سلیمانى و گەرمیاندا و توانى بویرانە چەندین كارمەندى ئاسایی و بەرپرس بداتە دادگاوە بە ملیارەها دینار بگەرینیتەوە بۆ خەزینەی حكومەت.
بەڵام سەد حەیف و مخابن لە دواى خانەنشین كردنى سەرۆكی پیشوو دەست بە كاربونى سەرۆكی تازە كاری دیوان سست و لاواز بوو وە لە پاشەكشەدا بوو لەو رووبەرووبونەوە وە تەنانەت پەتاى گەندەڵی توانى بدات لە دەرگاى دیوانى چاودیرى داراى و خۆى بكا بە ژووردا بە تایبەتى دیوانى چاودیرى دارایی سلیمانى بۆیە دەلیین سلیمانى چونكە ئەم دیوانە زۆر لە پیشەوە بوو بە بەراورد لەگەڵ دیوانى چاودیری دارایی هەولیر كە ئەو دیوانە هەر لە سەرەتاوە سست و لاواز بوو وە دیاردەى گەندەلى تیادا رەگی داكوتى بوو.
ئەمانەى خوارەوە چەند نموونەیەكن لەو گەندەلیانەى دیوانى چاودێرى دارایی سلیمانی:
1- بە پێى یاساى دیوانى چاودیری دارایی تازە تەنها یەك بەریوەبەرى گشتى لە سلیمانى دەمینیتەوە لەگەڵأ دوو جیگرى بەریوبەرى گشتى بەڵام بەهۆی جیبەجى نەكردنى یاساكەوە لە دیوانى چاودیرى سلیمانى (1) جیگرى سەرۆكى دیوان و (4) بەریوبەرى گشتى و (4) جیگرى بەریوبەرى گشتى دەوام دەكەن وە هەموویان مووچەى بەرزیان هەیە ئەمەش خۆى لە خۆیدا گەندەلییە چونكە دیاردەیەكى لەو جۆرە لەهەچ فەرمانگەیەكى حكومیدا هەبى دەبیتە جیى سەرنج و تیبینى دەستەكانى دیوان وە بەسەرپیچى هەژمار دەكرێ.
2- لەم ژینگە بێ یاسایەی دیواندا وە نەبونى ئەنجومەنى دیوان كە داینەمۆى هەموو كارووچالاكیەكانى دیوانە دەبینین كەسانى هەل پەرست كە لەكاتى سەرۆكى پیشودا كۆیلەیەكى ملكەچ بوون دەستیان داوەتە گەندەلى بەتایبەتى بەریوبەرى گشتى دیوان (أحمد أمین رشید)كە بەهۆى نەشارەزایى سەرۆكى دیوانى تازە لە ئیش وكاری كارگیرى دیوان بە هەلەیدا دەباو ئەو كارانەى مەبەستیتى ئەنجامى ئەدا . بۆ نموونە -هەموو دەزانین خولى راهینان بۆ كارمەندانى دیوان كاریكى باشە وە تیایدا سەرۆك دەستەكان و چاودیرەكان زیاتر شارەزا دەبن، ئەگەر ئەو خولانە بە پیوەرەكانى نیودەولەتى بن ، بەڵام بەریوبەرى گشتى دیوان هەستاوە بە ریكخستنى خولێك بۆ ماوەى (14) رۆژ بۆ (17) كارمەندى دیوانی چاودیرى داراییى لە ولاتى (مێر) ئەوەى جیى سەرسورمانە لە بەشداربوانى ئەم خولەدا ئەمانەن:-
- ئەم خولە تایبەتە بەبوارى ژمیریارى و ووردبینى وە دەبێ ئەوانەى بەشداربن تیایدا سەرۆك دەستەو چاودیر بن بەلام بەریوبەرى گشتى دیوان بەریوبەرى گشتى ئەندازەى (جلال رشید شوانە) تیادا بەشداركردووە، كە بە پیشە ئەندازیارە وە هیچ پەیوەندییەكى بە ژمێریاریى و ووردبینییەوە نییە و كاتێ لییان پرسیووە تۆ چ پەیوەندییەكت هەیە بەو خولەوە لەوەڵامدا ووتویەتى من دەچم بۆ (راحە و أستجمام).
- بەریوبەرى گشتى دیوان بە هەمان شیوە یاساییەكى تیادا بەشدار كردووە بە ناوى (تحسین عاسى) كە ئەویش هیچ باگراوندیكى بەكارى ووردبینى و ژمیریاریەوە نیە وە خزمى خۆیەتى لەگەڵ كارمەندیكى ئاماردا ئەمە لە كاتیكدا دەیان جیگریى سەرۆك دەستەو چاودیر هەیە پێویستى فعلیان هەیە بەو خولە.
- بەریوبەرى گشتى دیوان (أحمد امین رشید) خۆشى یەكیكە لە بەشداربوانى خولەكە كە خودى خۆى هەلناسێ بە كاری چاودیرى لە دیواندا و تائیستا بەشدارى (5) خولى كردووە لە دەرەوەى وولات.
- بەریوبەرى گشتى دیوان لە كاتى سەرۆكى پیشوودا ئەوەندە مرۆڤیكى بودەلەو ترسنۆك بوو ئەگەر سەرۆك پێى بووتایە دەبێ بە تراكتۆر هاتووچۆ بكەى لارى نەبوو ، بەڵام هەردواى رۆشتنى وە لە كاتى سەرۆكى دیوانى تازەدا پیشنیار دەكات وە نووسراو دەكا لەریگاى سەرۆكى تازەوە بۆ ئەنجومەنى وەزیران بۆ وەرگرتنى رەزامەندى كڕینى چوار (ئوتومبیل تویتا ستیشن پرادۆ) بۆ بەریوبەرە گشتیەكان كە نرخى هەریەكیكیان چواردەفتەرو نیوە كە خودى بەریوبەرى گشتى دەزانى بەپێی یاسا تازەكە تەنها (1) بەریوبەرى گشتى لە سلیمانى دەمینیتەوە وە ئیستا بەریوبەرە گشتیەكان هیچ كیشەى ئوتومبیلیان نیە وە تەنها پاساوى بەریوبەرى گشتى دیوان ئەوەیە كە پارە هەیە لەبوودجەدا بۆ كرینى ئوتومبیل بۆ خەرج نەكریت و بگەریتەوە بۆ خەزینەى دەولەت.
3- یەكێكى، كە لە گەندەلیەكانى دیوان كە سەرۆكى پیشو بە هیچ شیوەیە بوارى بەو سەرپیچیە نەئەدا بریتیە لە خەرج كردنى (4000) دینار رۆژانە لەگەڵ (50000) دینار دەرمالەى هاتووچۆی مانگانە بۆ سەرۆك دەستەو چاودیرەكان كە هیچ بنەمایەكى یاساى نیە وە لە هەچ فەرمانگەیەكى كەدا ئەوە هەبێ لەلایەن دەستەكانى چاودیریەوە چاوپۆشى لی ئەكرا وە بەسرپیچی هەژمار دەكرا وە ڕەنگە داوای لیكۆلینەوە لە بەرپرسانی خەرجیی ئەو فەرمانگەیە بكرایە!
لە كۆتایدا سەبارەت بەم گەندەلیانەى ناو دیوانى چاودیرى داراییى تەنها ئەوە دەلیین (حامیها حرامیها).


بەڕێز جەنابى مام جەلال
بەڕێز جێگرى سەرۆكى هەرێم كاك كۆسرەت رەسوڵ
بەڕێز جێگرى سەرۆكى ئەنجومەنى وەزیران كاك عومەر فەتاح
بەڕێزان ئەندامانى مەكتەبى سیاسى یەكێتى نیشتمانى كوردستان

ب / دەست لەكار كێشانەوە
وەك ئاگادارن دیوانى چاودێری دارایی بە بڕیار و پشتگیری بەڕێزتان دامەزرێندراوە، وەك لە نیزامى دیوانى چاودێری دارایی ژمارە (212)ى ساڵى/1999دا هاتووە .
ئەو بڕیارە لەوەوە هات كە بوونى ئەم دەزگایە، بۆ هەر حكومەتێك و لەهەر وڵاتێكى پێشكەوتوو و یاسا سەروەردا بایەخێكى زۆری هەیە، چونكە ئەم دەزگایە بەرپرسە لە داكۆكى كردن و پارێزگاریكردنى موڵك و ماڵى میللەت و حكومەت و بەكار هێنانیان لە چوارچێوەى یاسا و بڕیارەكاندا .
دیوانى چاودێری دارایی لەكاتى دامەزراندنییەوە تائێستا دڵسۆزانە و لەخۆبوردووانە كاری خۆی كردووە و مانگانە سەدان ملیۆن دینار و دەیان هەزار دۆلار بۆ خەزێنەى حكومەت ئەگێڕێتەوە، هەروا سەرپێچى و لادان و گەندەڵى لە دەزگاكانى حكومەتدا دەست نیشان ئەكات و ئامۆژگارى دارایی و یاسایی پێویستیان، بۆ پێشخستنى كارەكانیان ئەداتىَ. بەدرێژایی ئەو ماوەیە دیوانمان نەك هەر ڕەخنە و گلەیی لەلایەن بەڕێزتانەوە نەهاتۆتە سەر، بەڵكو بە پێچەوانەوە بەردەوام ستایش و دەسخۆشیتان لە دیوان كردووە، تەنانەت لەكاتى پاڵاوتن و دیاریكردنى وەزیرەكانی كابینەى حكومەتى یەكگرتوودا ڕاپۆرتەكانى دیوانمان، لەبارەى هەندێك بەرپرسی حكومەتەوە بە گرنگ وەرگیران، هەرچەندە ئێمە بە هیچ جۆرێك پێشنیارمان بۆتان نەكردبوو كە ڕاى ئێمە لەم مەسەلەیەدا وەربگرن. ئەوەبوو دواى دیاریكردنى وەزیرەكانى یەكێتى بە ڕۆژێك بەڕێز د. بەرهەم بە تەلەفۆن پەیامى سوپاس و پشتگیری بەڕێز مام جەلالى پىَ ڕاگەیاندین. دواتریش بەڕێز مامۆستا جەلال جەوهەر هەمان پەیامى بە تەلەفۆن و بەهاتن بۆ ماڵمان پىَ ڕاگەیاندین. لەگەڵ ئەو ڕاستیانەدا و لەگەڵ ئەو پشتگیرییە پێشەكیەى جەنابی مام جەلال و ئێوەدا، دەزگاكەمان (دیوانى چاودێری دارایی) بەرەوڕووى ئاستەنگى جىَبەجىَ نەكردنى ناوەڕۆكى ڕاپۆرتەكان بۆتەوە لەلایەن سەرۆكایەتى ئەنجومەنى وەزیران و وەزارەت و فەرمانگە پەیوەندیدارەكانەوە.
بەڕێزان: لێرەدا ئەمانەوىَ، بۆ ئێوە و بۆ مێژوو، ئاماژە بۆ هەندىَ شتی دیكە بكەین :
1. خۆتان ئەزانن كە من ڕۆژێك لە ڕۆژان داواى هیچ جۆرە پۆست و وەزیفەیەكم لە بەڕێزتان نەكردووە، هەر پۆستێكیشم وەرگرتبێت دواى ئیلحاح و ئیسراری بەردەوامى ئێوە بووە، بۆ نموونە: بۆ پۆستى بریكاری وەزارەتى دارایی ئەوكاتەى ئەنجومەنى وەزیران جەنابی سەرۆكى ئەنجومەنى وەزیران كاك كۆسرەت ڕاستەوخۆ و لە ڕێگاى هەندىَ برادەری نزیكمەوە ئیلحاح و داواى لىَكردم و ڕازى نەبووم ئەو پۆستە قبوڵ بكەم. سەرەنجام كار گەیشتە ئەوەى جەنابی مام بۆ خۆی بە تەلەفۆن پەیوەندى پێوە كردم و بەوپەڕی لوتف و مەحەبەتەوە و بەجۆرێك داواى قبوڵكردنى ئەو پۆستەى لىَكردم كە نەمتوانى بىَ ئەمری بكەم. بەڵام بۆ پۆستى سەرۆكى دیوان ، بەڕێز د. بەرهەم شایەتە كە ئەمەشیان هەر بە ئەمر و داواى جەنابی مام بوو ، چونكە من ڕازى نەبووم ئەو پۆستە وەربگرم، لەجیاتى ئەوە داوام كرد كە خانەنشین بكرێم و مووچەى خانەنشینییەكەشم بە دەزگاى شەهیدان، یان دەزگاى كەم ئەندامان ببەخشم، لەهەمان كاتدا پێشنیاری كەسێكى ترم بۆ كرد لەناو دیوانى چاودێری دارایی كە بكرێتە سەرۆكى دیوان، بەڵام د. بەرهەم پىَى وتم ئەمە قبوڵ نیە، چونكە جەنابی مام تۆی بۆ ئەم كارە كاندید كردووە و لەبەرئەوەى من ئەندامى یەكێتى نیم، جەنابی لە كۆبوونەوەى مەكتەبی سیاسی فەرموویەتى كە (جەلال حیسەى منە بۆ ئەو پۆستە) .
من كە ئەو پۆستەم قبوڵ كردووە بۆ ڕوو سووری خۆم و بنەماڵەم و میللەتەكەم و جەنابی مام و جەنابی كاك كۆسرەت و جەنابی كاك بەرهەم ێالح كە ئەم متمانەیەیان پىَداوم، بەهیچ جۆرێك پۆستەكەم بۆ بەرژەوەندى خۆم و كەس و كارم ئیستیغلال نەكردووە ، بە پێچەوانەوە جگە لە مووچەكەم هیچ جۆرە ئیمتیاز و پاداشتێكم لەهیچ كەس و لە حكومەت قبوڵ نەكردووە و تەنانەت ڕازى نەبووم كە حیمایەشم هەبێت. هەروەها لەكاتى خۆیدا دوو جار بە نووسراوى ڕەسمى داوام كردووە كە مووچەكەم كەم بكرێتەوە ، چونكە ئەوكاتە باری دارایی حكومەت باش نەبوو ، ئەم داواكارییەش لە ڕوون كردنەوەكانى دیوانى چاودێری داراییدا بڵاوكراونەتەوە كە لەكاتى خۆیدا نێردراوە بۆتان.
2. دواى ئەوەى لەماوەى دوو ساڵ زیاتر و تائێستاش دیوان و سەرۆكى دیوان ڕووبەڕووى بىَشەرمانەترین و ناشرینترین شاڵاو بوونەتەوە، وەك لە پاشكۆی ئەم نووسراوەدا پیشاندراوە، بۆیە مافی خۆمانە بڵێین:

أ - جەنابی مام جەلال ئێستا جەنابتان تەنیا سەركردەیەكى هەرێمى و ناوچەیی نین ، بەڵكو سەركردەیەكى گەورەى جیهانیشن، بەناوى دیوان و سەرۆكى دیوانەوە، هێندەی گەورەیی خۆتان گلەییتان لىَئەكەین ، چونكە ئێوە ، هەروەك لەسەرەوە باسمان كرد بەڵێنى پشتگیریتان پىَداین ، كەچی لەگەڵ ئەوەى بەڕێزتان ئاگاداری ئەسڵى كێشەكە بوون ، بە كردەوە هەستمان بەپشتگیری بەڕێزتان نەكرد ، هەربۆیە گلەیی گەورەمان لە بەڕێزتانە، بە تایبەتى ئێمە هەمیشە داواكاری پشتگیری لە هەق بووین، نەك پشتگیری شەخسی.
لەبەر هەموو ئەم هۆیانە مافی خۆمە وەك هاووڵاتییەك ، پێش ئەوەى سەرۆكى دیوان بم، داوا لە جەنابی مام جەلال بكەم، بەو سیفەتەى سەرۆك كۆمارە و جێگری سەرۆكى سوسیال دیموكراتى جیهانییە ، كە ئەمر بفەرموێت: لێپێچینەوەى حیزبی لەگەڵ قادر حەمە جان بكرێت، بەهۆی ئەو هەموو درۆ و بوختان و تەشهیر و قەزفەى كە بەرامبەر بە دیوان و سەرۆكى دیوان كردوویەتى و بەرامبەرى گەندەڵییەكانى كە لە ڕاپۆرتەكانماندا هاتوون، و (لە پاشكۆی ئەم نووسراوەماندا بەشێكى ئەبینرێن) بۆئەوەى وەكو ئەندامێكى سەركردایەتى هەقی خۆی وەربگرێ ، چونكە بە راى ئێمە رەفتارەكانى ناوبراو پەڵەیەكى ڕەشە بە ناوچەوانى یەكێتى نیشتیمانى كوردستانەوە ، كە خاوەنى ئەو هەموو سەروەرییەیە و ئێستا بە شانازییەوە بووەتە ئەندامى سوسیال دیموكراتى جیهانى، چاوپۆشی كردن لە بوختان و درۆ و دەمدرێژى ناوبراو و گەندەڵییەكانى یەكێكە لەو هۆیانەى كە خەڵك گلەییمان لىَدەكات و باسمان دەكات و تەنانەت لێشمان دەرەنجێت لەبەر گەندەڵى لەو جۆرەى كە بۆتە ویردى سەرزمانى هەموو كەس. ئەگەر چاوپۆشی كردن لە گەندەڵى و دەستدرێژى كەسانى درۆزن و گەندەڵ، سەدان كەسمان لە دەرەوە و ناوەوەى یەكێتى لىَ بڕەنجێنێت ، بەڵام لێپرسینەوە و سزادانى ئەم جۆرە كەسانە هەزاران لایەنگرانمان بۆ دروست دەكات و ڕێگا بۆ پاراستنى حورمەتى یاسا و بەرز ڕاگرتنى سەروەرى یاسا خۆش ئەكات.

بەڕێزان..
ئەوا بۆ دوو ساڵ دەچێت ژمارەیەك دەعواى یاساییمان لە دادگاى سلێمانى لەسەر ئەم بوختانكەرە تۆمار كردووە، هەست ئەكەین یا دەستێك هەیە لەدادگا، یا لە ئەنجامى ترسێكەوەیە، كە نایەڵىَ ئەم دەعوایانە ڕێگاى ئاسایی و یاسایی خۆیان بگرن. بۆیە بۆ جارێكى كە ڕوو ئەكەمەوە جەنابی مام جەلال ، وەكو یاسا ناسێك ، كە بەرپرسێكى گەورەى یەكێتى رابسپێرێ بۆئەوەى داوا لە سەرۆكى دادگا بكات كە ئەو دەعوایانە ڕێگاى یاسایی و ئاسایی خۆیان بگرنە بەر و ئاگاداری بكەن كە یەكێتى نیشتیمانى كوردستان بەهیچ جۆرێك زەخت ناكات كە هیچ تۆمەتبارێك ، لەم مەسەلەیەدا ، لە یاسا بەدەربكرێت و نابێت یەكێتى ڕێگە بدات لە پێناوى لىَنەپرسینەوە و ئابڕونەچوونى كەسێك یان چەند كەسانێك وڵاتێك ئابڕووى بچێت.
مامى بەڕێز و خۆشەویست بىَئەندازە لە سنگ فراوانى و دڵسۆزى و دادپەروەریتان دڵنیام، هەروەها لەبەر دڵسۆزیشم بۆ ئەم حكومەتە كوردییە و بۆ ئەم دیوانى چاودێرییەى ئەركى چاكسازى و پاكسازیی گرتۆتە ئەستۆ، ڕێگەم بەخۆم دا بەو جۆرە راشكاوانە ئەم نووسراوەتان بۆ بنووسم و ئاراستە بكەم.

ب - گلەیی دووەممان لە بەڕێز جێگری سەرۆكى ئەنجومەنى وەزیران (كاك عومەر فەتاح) هەیە، چونكە جەنابی چ لە ڕێگاى ڕاگەیاندن و چ لە ڕێگاى ئێمەوە بە نووسین یان قسەكردنى ڕاستەوخۆ لەگەڵ ئێمە ، لە تەواوى ئەو مەسەلەیە ئاگادار كراوەتەوە ، بەڵام جەنابی زۆر خەمسارد و بىَباك بوو. ئەم خەمساردى و بىَباكییەى كاك عومەر بوونە هۆی ئەوەى كە قادر حەمەجان درێژە بدات بە درۆ و تەشهیر و بوختان هەڵبەستن بۆ دیوان و سەرۆكى دیوان و زیاتر پىَ لەسەر ئەم كارە ناڕەوایەى دابگرێ، ئەمەیش پرسیارى لاى دڵسۆزانى گەلەكەمان دروست كرد كە بۆچی حكومەت و حیزب لەم شاڵاوە ناڕەوایە بىَدەنگن؟! ئێمە دڵنیاین كە گەلەكەمان وریایە و ڕەش و سپی لێك جیائەكاتەوە و ئەزانىَ ئێمە كێین و چی ئەكەین و قادر حەمەجانیش كىَیە و چى ئەكات. بەڵام پرسیارەكە ئەوەیە كە قادر حەمەجان چ نەبەردى و جوامێری و سەروەرییەكى وەهاى بۆ یەكێتى و گەلەكەمان كردووە ، جگە لە دروست كردنى كۆشك و مەسبەح و باخ ، تا بەم جۆرە چاوپۆشی لىَبكرێت ، كە بووە هۆی ئەوەى نەك هەر سوكایەتى بە دیوان بكات (كە پىَى نەكرا) ، بەڵكو تەنانەت سوكایەتى و بىَحورمەتى بە یەكێتى نیشتمانى كوردستانیش بكات، چونكە ناوبراو ئەندامى سەركردایەتى یەكێتىیە و ئەم دەزگایەش لەلایەن یەكێتى و حكومەت (ئیدارەى سلێمانى) دامەزرێندراوە و لەكاتى كابینەى كاك كۆسرەت ڕەسوڵدا نیزامەكەى دەرچووە.
ئایا قادر حەمەجان كە ئێوە باش ئەیناسن، ئەوە ئەهێنىَ كە دەزگایەكى گرنگى وەك دیوان و سومعەى یەكێتى بكرێنە قوربانى؟ دواى ئەوەى دۆست و دوژمن درۆ و دەلەسەكانیان لە ڕۆژنامەدا خوێندەوە؟ كە ئەم درۆ و دەلەسە و بوختانانە، بمانەوىَ و نەمانەوىَ، بوونە لەكەیەكى دیار لە ئەرشیفی حكومڕانى نەتەوەییماندا و بوونە پەڵەیەكى شەرم لەسەر مێژووى حیزب.
ئا بەو جۆرە ئەم پیاوەى كە هەموو لایەك وەك سەرۆكى شارەوانى سلێمانى متمانەى دایە، بىَباكانە، ئەم گەمەیەى بە موڵك و ماڵى دەوڵەت كردووە ، بۆیە جێگاى سەرسوڕمانى شارەكەمانبوو كاتێك بۆ یەك دوو جار ناوى قادر حەمەجان بڵاوكرایەوە لە ڕۆژنامەدا، كە گوایە دەكرێت بە بەڕێوەبەرى ئاسایشی گشتى! سوێندتان ئەدەم بە مێژووى خۆتان و خەباتتان كە ئایا ئێوە ئەم پیاوە ناناسن؟ چۆن شارى سلێمانى كە بە شارێكى هۆشیار بەناوبانگە و پىَى ئەوترێ شاری هەڵمەت و قوربانى و داگیركەران پێیان وتووە شارە ێەعبەكە، بەچ پێوەر و ویژدانێك موقەدەراتى ئەم شارە و ئاسایشەكەى ئەخرێتە ژێر دەستى كەسێكى ئاواوە؟! ئاوا پاداشتى قوربانییەكانى ئەم شارە ئەدرێتەوە؟!


ئەوەى كە قادر حەمەجان لە ماوەى زیاتر لەو دوو ساڵەدا لەگەڵ دیوان و سەرۆكى دیوان كردوونى هەموویان لاى ئێوە ڕوون و ئاشكران. ڕاستییەكەى ئەم بێحورمەتییە پێش هەر شتێك بێحورمەتى بووە بەرامبەر شارەوانى سلێمانى، هەروا بێحورمەتییە بەرامبەر حكومەت و یەكێتى نیشتمانى كوردستان. بە دڵنیاییشەوە ئەڵێین: كە كارەكانى ناوبراو هەرگیز ڕوویەكى گەشی یەكێتى نیشتمانى كوردستان دەرناخات، چونكە لە مێژووى عێراق و كوردستان و ڕەنگە دەرەوەى وڵاتیشدا، كەسێك نەبووە توانیبێتى بەم جۆرە درۆ و بوختان بۆ دەزگایەكى بە قانوون پارێزراو هەڵبەستىَ.
ئەمانەوێت ئاماژە بۆ ئەوە بكەین كە هیچ كاتێك نەبووە فەرمانگەیەكى فەرمى (رسمى) ئیهانەى فەرمانگەیەكى دیكەى فەرمى بكات ، وەك ئەوەى ڕاگەیاندنى سەرۆكایەتى شارەوانى سلێمانى بە دیوانمانى كردووە ، تەنانەت لەكاتى دانانى یاسای سزادانى عێراقی ژمارە (111)ى ساڵى/1969دا یاسادانەر (مُشڕع) هیچ بەندێكى دانەناوە بۆ تاوانباركردن یان سزادان بۆ ئەو حاڵەتە ، چونكە یاسادانەر هەرگیز بیری لەوە نەكردۆتەوە ڕۆژێك لە ڕۆژان حاڵەتێك لەو جۆرە ڕووبدات لە حكومەتدا ، كە بەندى/225 بڕگەى (ب) ببێتە بەڵگەیەكى گەورە بۆ ڕۆژگاری خۆی. شایانى باسە بەندى ناوبراو سزاى بۆ ئەو كەسە ئاسایىیانە داناوە كە ئیهانەى چەند لایەنێكى پیرۆزى دەوڵەت دەكەن هى وەك ئاڵا و سوپا و دادوەری و دەستوور و .... هتد. یاسادانەر بیری لەوە نەكردۆتەوە ڕۆژێك لە ڕۆژان حوكمەتێك دروست ببێت، یان حوكمەتێكى كوردى دروست ببێت كە خۆتان زۆر باش دەزانن بە چ قوربانىدان و لافاوى خوێنى ڕۆڵە دڵسۆزەكانى دروست بووە و لەگەڵ ئەوەیشدا قادری حەمە جانى تێدا هەڵبكەوىَ كە لە پۆستێكی فەرمیدا و لە ڕاگەیاندنێكى فەرمیدا بۆ ماوەى پتر لە دوو ساڵ ئەم هەموو هێرشى درۆ و دەلەسە و بوختان و تەشهیر و قەزفانە بكاتە سەر دیوانى چاودێری دارایی، كە تاكە گوناهى ئەوەیە گەندەڵى و دزى و سەرپێچى بىَشەرمانەى ناو دەزگاكەى جەنابی لە ڕێگەى دوو ڕاپۆرتى نهێنىیەوە دەرخستووە ، كە تیایدا هەمان كات بە شێوازێكى نهێنى باسی ئیجرائاتەكانى سەرشانى خۆمانمان وەك ئەركێكى ئاسایی تێدا كردووە.


داوا لە بەڕێزتان دەكەم كە یان ئەو دەزگایە هەڵوەشێننەوە بۆئەوەى قادر حەمەجان و ئەمسالى ئەو بە ئارەزووى خۆیان یارى و تەراتێن بە سامان و موڵك و ماڵى حكومەت بكەن، چونكە ئەم دیوانە لە وڵاتانى پێشكەوتوودا دەزگایەكى گرنگ و باڵادەستە، كەچی لە وڵاتى ئێمەدا بەو جۆرە پەلامار بدرێ و هیچ لایەنێكى حكومى و حیزبیش لەسەری هەڵ نەداتىَ، بىَ هیچ جۆرە گومانێك دەبێتە هۆی لاوازبوونى و پەككەوتنى. یان لیژنەیەكى تایبەتى حیزبی بۆ لێپێچینەوە و لێكۆڵینەوە لەم مەسەلەیە پێك بهێنرێت، ئەگەر ناوەڕۆكى ئەم نامەیە و ڕوونكردنەوەكانى دیوانمان ڕاست دەرچوون و دەركەوت كە ئێمە ناهەقی و بىَحورمەتیمان بەرامبەر كرابوو، سزاى حیزبی بدرێت، هەر بەو شێوەیەى كە جەنابی مام جەلال داواى كردووە سزاى ئەو ئەندامانە بدرێت كە ناو و ناوبانگى یەكێتى ئەزڕێنن. هەروەها بە پێویستى ئەزانین لیژنەیەكى حكومیش لەم مەسەلەیە بكۆڵێتەوە بۆئەوەى سزاى ئیداری بسەپێنرێت بەسەر لایەنى خەتاباردا. ئێمەش لاى خۆمانەوە لە دادگادا، وەك مافی شەخسی خۆمان، چەند داوایەكمان لەسەر ناوبراو تۆمار كردووە، هەرچەندە دیاردەكان ئەوە ئەگەیەنن كە دەست ئەخرێتە كاری دادگاوە، بەڵام ئێمە لە مافى خۆمان خۆش نابین. هەموو ڕێگایەكى یاسایی و ئاسایی ئەگرینە بەر بۆئەوەى بیسەلمێنین كە ئەم غەدرە چ بۆ دیوان و چ بۆ خۆمان و چ بۆ بنەماڵەكەمان قبوڵ ناكەین، كە وەك وتمان سەرباری سووكایەتى كردنەكانى بە دیوان لە مانشێت و لاپەڕەى ڕۆژنامەكانیشدا (183) جار بە شەخسی و بێڕێزانە بە (گەندەڵ ، موختەلیس، ....هتد) ناوى بردووین، بۆیە ئامادەین سەریشمان لەم ڕێگایەدا ببەخشین، بەڵام ناهێڵین گەندەڵكاران بەبێ سزا دەربچن.
لێرەدا جێگەى خۆیەتى بپرسین: ئایا ئەم شاڵاوى درۆ و بوختان و تەشهیرەى بۆ ماوەى دوو ساڵێكە دژی دیوان و سەرۆكى دیوان ئەكرێ شایەنى ئەوە نەبوو هێندەى كێشەى نێوان سایەقی ئەندامێكى مەكتەبی سیاسی و بەرپرسی ئیدارەى مەكتەبی سیاسی (كە وەك لە ڕۆژنامەدا بڵاوكراوەتەوە لیژنەى تەحقیقی بۆدانراوە) بایەخى پىَبدرێت و بەدواداچوونى بۆ بكرێت؟!.
ئێمە وەكو دیوانى چاودێری دارایی، لەماوەى ئەو چەند ساڵەدا، زۆر بە دامەزراندنەوە و پێشخستنى دیوانەوە هیلاك بووین، بە شەونخونى ئەو كادیرە پێشكەوتووانەى دیوان توانیمان دیوان بگەیەنینە ئەو ئاستەى كە مانگانە زۆر بەبێ دەنگى و نهێنى سەدەها ملیۆن و هەندێك جار دەیان ملیار دینار و دەیان هەزار دۆلار بگەڕێنینەوە بۆ خەزێنەى حكومەت. ئەمەیش نەك بە قسە ، بەڵكو بە ژمارە و ئامار، كە جەنابی كاك عومەر فەتاح وەك جێگری سەرۆكى ئەنجومەنى وەزیران لەمە ئاگادارە، بۆ نموونە تەنها لەو پارانەى كە ساڵانێكە لاى كەسانێكى ناوەوە و دەرەوەى حكومەتن یان بە نایاسایی سەرف كراون و دەبێت وەربگیرێنەوە بەپىَى ڕاپۆرتەكانى دیوانمان نایگەڕێننەوە ئێستا لەژێر گوشاری ئێمەدا شەست و حەوت ملیار دینار خەریكى وەرگرتنەوەیانن ، ئەمەیش خۆی لەخۆىدا سیولەیەكى نەقدی بۆ حكومەت پێك دێنێ و دەتوانین بەم پارەیە دەیان قوتابخانە و خەستەخانە و پرد و ڕێگاوبان و پڕۆژەى ئاو ..... هتد لە قەزا و ناحیەكاندا دروست بكەین. جگە لە ملیارەها دیناری تری پارەى ئاو و كارەبا و تەلەفۆن كە بەدواى وەرگرتنەوەیانین و بەڕاپۆرت نێردراوە بۆ لایەنە پەیوەندیدارەكان، جگە لەوەى زیاتر لە شەش ملیار دینارمان بۆ حكومەت گەڕاندۆتەوە لە ڕێگاى نەهێشتنى دوو مووچە و سێ مووچەى ژمارەیەك لە فەرمانبەران.
دەزگایەك ئەمە كارەكانى بێت، كەچی بەم جۆرەیش بەر پەلاماری وەها كەوتبێت و ئێوەیش بەم جۆرە خەمسارد و بىَدەنگ بن بەرامبەرى ، ئەم دەزگایە بۆ داخستن باشە!.

ج - گلەیی سێیەممان لە سەرۆكى پەرلەمانە، ئێمە تائێستا سێ جار نووسراومان ئاراستەى سەرۆكایەتى پەرلەمان و سەرۆكى پەرلەمان كردووە بۆ لێكۆڵینەوە لە ڕێگاى لیژنەیەكەوە ، كە خۆیان دایبنێن ، تەنانەت كار گەیشتە ئەوەى كە بەڕێز عومەر فەتاح بە نووسراوى ڕەسمى داواى لىَكردین كە ئەگەر بەباشی بزانین ئەم مەسەلەیە بدەین بە پەرلەمان. بۆ ئەم مەبەستە و بۆ جىَبەجىَ كردنى ئەو نووسراوە جێگری سەرۆكى دیوان و بەڕێوەبەرە گشتییەكان سەردانى نووسینگەى پەرلەمانیان كرد لە سلێمانى و زۆر بە فراوانى باسی شاڵاوى درۆ و بوختانەكانى ڕاگەیاندنى شارەوانى سلێمانییان بۆ كردن و زیاتر لە دە ئەندامى پەرلەمان لەلیستى جۆراوجۆر ئامادەبوون. ئەو ئەندامانەى پەرلەمان پشتگیری داواكەى ئێمەیان كرد و بە یاداشتێك دایان بە سەرۆكى پەرلەمان، كە تیایدا داواى لێكۆڵینەوەیان كرد لەم كێشەیە، لەكاتێكدا ئەو كێشەیە ئەوەندە درێژەى كێشا كە بووە عەیبەیەك بۆ هەموو لایەك، بە تایبەتى حكومەت و حیزب، كە ئەبوو لیژنەكەى پەرلەمان ئاگاداری حكومەت و پەرلەمانى بكردایە لەلایەنى خەتابار، بەڵام پەرلەمان تەنانەت ئەم كارەشی نەكرد .


بە مافی خۆمانى دەزانین ڕووى بەشێكى گلەییەكانمان ڕووبەڕووى زۆربەى برایانى مەكتەبی سیاسی بەڕێز بكەینەوە، چونكە تا ئاستێكى باش ئاگادارییان هەیە، كەچی ئەوانیش بىَدەنگن! لەهەمان كاتدا سوپاس و پێزانینى خۆشمان ئاراستەى بەڕێزان مامۆستا جەلال جەوهەر و د. فۆاد معێوم و كاك عادل مراد ..... ئەكەین، كە هەریەكەى بە جۆرێك لە بەشێكى كێشەكانماندا هەڵوێستیان هەبووە ولاى دیوانمان نرخێنراوە.

لە ئەنجامدا ئەڵێم:
1. ئاشكرایە لە هەر وڵاتێكى یاساسەروەردا، بەرپرسێكى حكومى پلەكەى هەرچەندىَ گەورەبێ، ئەگەر ناوى كەوتە ناو ڕاپۆرتەكانى دەزگایەكى گرنگى وەك دیوانى چاودێرییەوە و سەرپێچى كردبوو ئەبێ ئەوكەسە لێپرسینەوەى لەگەڵدا بكرێت، بە تایبەتى دیوانى چاودێری دارایی، لەخۆڕا، یا لەسەر چرپەى ئەم و ئەو، لەكەس هەڵناپێچێ. بەڵكو پشتبەست بە موستەنەد و ژمارە و بەڵگەى زیندوو گەندەڵییەكان ئاشكرا ئەكات. ڕاپۆرتەكانیشی كاری تاكەكەسی نین تا گومانى رق و كینە و بەرژەوەندى تایبەتیان لىَبكرێت، ئەو ڕاپۆرتانە لەلایەن دەستەیەكى چەند كەسییەوە ئەنجام ئەدرێن و دوایی بەلاى چەند بەرپرسێكى وەك سەرۆكى دەستە و جێگری بەڕێوەبەرى گشتى و بەڕێوەبەرى گشتى و جێگری سەرۆكى دیواندا تێئەپەڕن ئینجا ئەگەنە سەرۆكى دیوان. كەچی لەم هەرێمەى ئێمەدا، ئەنجام نەك هەر پێچەوانەى ئەو دەستورە گشتییەیە، بەڵكو كەسانێكى گەندەڵ، بە تایبەتى پلە گەورەكان، یا وەك بەرزەكى بانان بۆی دەرئەچن، یا پلەى گەورەتریان ئەدرێتىَ، یا ئایەتەكە وەرئەچەرخىَ و ئەوان خۆیان ئەكەن بە مودەعی و دەزگاى دیوان و بەرپرسەكانى تاوانبار ئەكەن! وەك لەم نووسراوە و نووسراوەكانى پێشووماندا ڕوونمان كردۆتەوە. ئەم دیاردەیەش بۆتە هۆی ئەوەى گەندەڵییەكان ڕۆژ لەدواى ڕۆژ پەرەبسێنن و پەزمەندە (تراكم) ببەستن بە جۆرێك كار گەیشتۆتە ئەوەى جەنابی مام جەلال كارە گرنگەكانى خۆی وەك سەرۆكى كۆمار بەجێبهێڵێ و بگەڕێتەوە بۆ كوردستان بۆ چارەسەری ئەو گەندەڵیانە كە لە ڕاستیدا ئەوە ئەركى سەرشانى بەڕێزیان نیە و لەگەڵ ئەركە زۆرەكانى لە بەغداد ناگونجىَ. ئەبوو هەر لەسەرەتاوە گرنگى بدرایە بە ڕاپۆرتەكانى دیوانمان و گەندەڵیەكان لە بێشكەدا بخنكێنرایە، بەوەش ئەزموونى هەرێمەكەمان بە ڕاستى ئەبوو بە ئەزموونێكى نموونەیی بۆ عێراق و بۆ هەموو ڕۆژهەڵاتى ناوەڕاست.
دیوانى چاودێری لەماوەى كاركردنیدا بە زیاتر لە (2390) ڕاپۆرت تا 31/12/2008 دەستى خستۆتە سەر گەندەڵییەكان، كەچی جێگەى داخە كە ئەو ڕاپۆرتانە هەر ئەوەندە بڕ ئەكەن تا ئەگەنە وەزارەتەكان و لایەنە پەیوەندیدارەكان ئیتر زۆرینەیان ئەخەوێنرێن و تۆزیان لەسەر ئەنیشێ! ئەمەش ڕاستییەكى ئەوەندە ئاشكرا و لەبەرچاوە كە نەك هەر ڕۆشنبیران و نووسەران بەردەوام لەسەری ئەنووسن و ئەو گەندەڵییانە ڕووخساری ئەزموونەكەمانى ناشرین كردووە، بەڵكو ئەگەر، لەناو بازاریش محاسەبەى بازرگانىَ، قەسابێ، سەوزەفرۆشىَ بكەى، بە ڕووتا هەڵئەگەڕێتەوە و ئەڵێ: تۆ جارێ بچۆ گەندەڵییەكانى ناو حكومەت چارەسەر بكە، ئەوسا بەرۆكى من بگرە؟! ئێمە سەربارى ڕاپۆرتەكانى پێشوومان، لەدواى یەكگرتنەوەى دوو ئیدارەكەوە، زیاتر لە سەدەها ڕاپۆرتمان ناردووە بۆ جێگری سەرۆكى حكومەت كە گەلىَ كێشەى گرنگ و كاری نایاساییان لەخۆ گرتووە لەسەر هەموو ئاستەكان، بە تایبەتى پڕۆژەكانى وەك: (شەقام، پرد، ڕێگاوبان، بیناى فەرمانگەكان و ...... هتد) كەچی دواى دوو ساڵ هەندىَ لەو ڕاپۆرتانەمان، كە داوامان كردبوو لەلایەن سەرۆكایەتى ئەنجومەنى وەزیرانەوە لێكۆڵینەوەیان لەسەر بكرێت لەبەر گرنگى ناوەڕۆكەكانیان و ئەو سەرپێچى و لادانە ترسناكانەى تیایاندا هاتووە، بەڵام ئەو ڕاپۆرتانە وەك خۆیان مانەوە و پێیان ڕاگەیاندین كە بیاندەین بە وەزارەتى دارایی تا ئەوان لێكۆڵینەوەیان لەسەر بكەن!! لەكاتێكدا بەشێ لەو ڕاپۆرتانە وەزارەتى داراییش ئەگرێتەوە و ئەبێ لێكۆڵینەوەیان لەگەڵدا بكرێت. وەزارەتى داراییش بە ناچاری هەندىَ لیژنەى بۆ ئەو مەبەستە پێكهێنا، بەڵام لە ڕاستیدا ئەو لیژنانە لەئاستى ئەو كارانەدا نین، بەڵكو ئەبوایە لیژنەیەك لەئاستى سەرۆكایەتى ئەنجومەنى وەزیراندا بەو كارە هەستایە. ئێمە، لەبەر گرنگى ئەو بابەتە، لێكۆڵینەوەكانمان نەداوە بە وەزارەت و دەزگاكان، چونكە هەندێكى بەرپرسی یەكەم ئەگرێتەوە. ئیتر چۆن لیژنەیەكى لاواز تواناى لێپرسینەوەى ئەبێ لەو كەسی یەكەمانە؟!
ئەو ملیارەها دینارەى باسمان كرد و دیوانمان دەستینشانى كرد و بە نووسراو ئاگاداری سەرۆكایەتى ئەنجومەنى وەزیران و وەزارەتى داراییمان كرد، ئەبوایە وەزارەتى دارایی خۆی لەوانە بەئاگا بووایە و بەدواداچوونى لەسەر بكردایە بۆ وەرگرتنەوەیان پێش ئەوەى هی چەند ساڵێك كەڵەكەببێ، لەكاتێكدا خودى وەزارەتى دارایی و خەزێنەكانى ئەو پارانەیان داوە، هەروەها بڕێكى زۆر پارەى كارەبا و تەلەفۆن و ئاو كە زیاترە لە (52) ملیار دینار (پەنجا و دوو ملیار دینار)، ئەویش ئەبوایە وەزارەتە پەیوەندیدارەكانى خۆیان بەدواداچوونیان لەسەر بكردنایە و كەڵەكە نەبوونایە ، وەك چۆن كاتىَ بەڕێز كاك (عماد أحمد) جێگری سەرۆكى ئەنجومەنى وەزیران بوو، تەنیا لە ئەنجامى یەك مانگ بەدواداچووندا لەگەڵ هەموو وەزارەتەكان، وەك لە دەوڵەت زانێك (رجل الدولە)، دەیان ملیۆن دیناری گەڕاندەوە بۆ گەنجینەی حكومەت و دەیان لە ڕاپۆرتە هەڵواسراوەكانى ئێمەش كۆتایی پىَهێنرا و داخران. بەڵام دواى ئەو مانگە، كێشەكە چووەوە دۆخى پێشووى، چونكە ئیتر بەدواداچوون نەما.

بەڕێزان:
بەرامبەر ئەم واقیعە تاڵ و نالەبارە، ئێمە وەك دەزگاى دیوانى چاودێری، بەر لەهەر كەس و لایەنێكی تر، خەمیان پێوە ئەخۆین. بۆیە راشكاوانە پێتان ئەڵێم: ئەگەر ئەم دەزگاى چاودێرییە بەڕاستى بۆ چاكسازى و لەناوبردنى گەندەڵییە، ئەبێ هەیبەتى بپارێزرێ و پشتى بگیرێ و ڕاپۆرتەكانى جىَبەجىَ بكرێن، خۆ ئەگەر تەنیا دەزگایەكى ڕووكەشە و بۆ خۆڵكردنە چاوە، ئەوا من بەش بەحاڵى خۆم شەرەفمەندنیم بە مانەوەم لەم وەزیفەیەدا، چونكە وەزیفە لاى من خزمەتە و مێژوو، نەك ناونیشان و مووچەى بەرز و ئیمتیازات، كە بەكردەوەش خۆم لىَ پاراستوون، بۆیە هەست دەكەم جسمێكى غەریبم لەناو جەستە گەورەكەى حكومەتدا، بۆیەكا بۆ جاری پێنجەم داوا لە بەڕێزتان دەكەم لە كارەكەم ئیعفام بكەن، داواكاریشم لە بڕیاری ئیعفا و خانەنشینكردنمدا بنووسرێت كە لەسەر داواى خۆم بووە، هەرچەندە لە دێرزەمانەوە دەمەوىَ تا مردن بە ئەوپەڕی دڵسۆزىیەوە خزمەتى كورد و كوردستان بكەم وەك كەسێكى نەتەوەیی، ئەشمەوىَ بڵێم كە ئەو ڕۆژەى لە وەزیفەكەم دەرئەچم خاوەنى یەك مەتر دووجا خانوو ، یان زەوى نیم.
2. من بڕوا و متمانەى تەواوم بە جەنابی مام جەلالە كە ناهەقی قبوڵ ناكات و حیساب بۆ یاسا و مافی مرۆڤـــــ ئەكات و لە مەكتەبی سیاسیش دڵنیام، بۆیەكا چاوەڕوانم ئێوە بە جۆرێكى دادپەروەرانە لە داواكانمان بپرسنەوە و هیوادارم وەك هەمیشە بىَ ئومێدمان نەكەن، بە پێچەوانەى ئەوەوە دواى خانەنشین كردنیشم ناچار دەبم هەموو ڕێگایەكى یاسایی و ئاساییكە بگرمە بەر. بە ڕاستیش پێتان ئەڵێمەوە كە ئامادەم سەریشم بەخش بكەم لە پێناوى ئەوەدا كە گەندەڵكاران بكرێنە عیبرەت و نەیەڵین موسەیلەمەیەكى كەزاب و گۆبڵزێكى تری نازى و موحەمەد سەحافێكى تری گاڵتەجار لە كوردستان دروست ببێت.
ئێستاش لە ڕێگاى میدیاكانەوە میللەتەكەمان دڵخۆشە بە هاتنەوەى جەنابی مام جەلال كە سەركردایەتى هەڵمەتى چاكسازى و پێداچوونەوە ئەكات لە حكومەت و حیزب دا ، ئێمەش هەر لەم ڕوانگەیەوە دەڵێین باشترین مەیدان و مەحەك بۆ سەرەتای جىَبەجىَ كردنى ئەو كارە ئەم داوایەى ئێمەیە، لەهەمان كاتدا كاراكردن (تفعیل) كردنى ڕاپۆرتەكانى دیوانى چاودێرىیە، (كە زیاتر لە (2390) ڕاپۆرتن)، ئەمە باشترین ڕێگایە بۆ كەم كردنەوە و ڕووبەڕوو بوونەوە و نەهێشتنى گەندەڵی، چونكە زۆربەى ئەم لادان و سەرپێچىیانەى هەن لە دام و دەزگاكانى حكومەتدایە و كاریگەرى خۆیان كردووە و ڕەنگدانەوەى خراپیان لەلاى كۆمەڵانى خەڵك دروست كردووە. هیوادارین ئەم هەڵمەتە ڕێچكەى ئاسایی خۆی بگرێت و بەردەوام بێت و كاتى نەبێ و بۆ مەبەستێكى دیارىكراو نەبێت لەگەڵ هیوا و ئامانجى كۆمەڵانى خەڵك یەك بگرێتەوە. سەرەتاى ئەم هەڵمەتەش، وەك بەڕێز مام جەلال دەستى خستۆتە سەر، جیاكردنەوەى حیزبە لە دەسەڵات. ئەگەر كاتى خۆی بیانوویەك هەبووبێ بۆ باڵادەستى حیزب بەسەر حكومەتەوە، ئێستا دواى (17) ساڵ، بەهیچ جۆرێك ئەو بیانووە نەماوە. ڕاستە مافی هەر حیزبێكە هەوڵ بدات زیاترین قورسایی هەبێ لە پەرلەماندا، هەروەها مافی حیزب و پەرلەمانە چاودێری حكومەت بكات، بەڵام مافی هیچ حیزبێك نیە خۆی بسەپێنىَ بەسەر دام و دەزگاكانى حكومەتدا. ئەو دام و دەزگایانە ئەبێ بدرێنە دەستى مرۆڤى پاك و تەكنوكرات دوور لە حیزبایەتى و خزمایەتى و دوور لە وەلاو بۆ ئەم حیزب یا ئەو حیزب یان ئەوكەس. لە ڕاستىدا هۆی سەرەكى جىَبەجىَ نەكردنى ڕاپۆرتەكانى ئێمەش ئەو باڵادەستییە حیزبییەیە بەسەر ئەو دام و دەزگایانەوە. چونكە هەڵسووڕاوە حیزبییەكان، لە وەزیرەوە تا كارگوزار، خۆیان لەسەرووى یاساوە ئەبینن، هەر ئەو تێڕوانینەشە ئەیانخاتە زەلكاوى گەندەڵییەوە و دوایی گەندەڵییەكە تەشەنە ئەكا بۆ سەرتاپاى حكومەت بۆ بازاڕ و كێڵگەكانیش و ئەنجام سەری حیزب و دەسەڵاتیش ئەخوات.

لەدوا وتەمدا و پێش ماڵئاوایی لە كارەكەم بە پێویستى ئەزانم كە هەر بۆ مێژوو عەرزتان بكەم كە دیوانى چاودێری دارایی لە سلێمانى دەزگایەكى كارامە و لێهاتوو و بە توانایە، خاوەنى (21) بیست و یەك دەستەى چاودێرییە، كە وردبینى لە دەزگاكانى حكومەتدا دەكات و تائێستا زیاتر لە (2390) ڕاپۆرتى زۆر ورد و گرنگى، بە نەزاهەت و دادپەروەرانە و نەترسانە، لەسەر هەموو دام و دەزگاكانى حكومەت و ڕێكخراوەكان ئامادە كردووە، بە پێچەوانەى دیوانى چاودێری دارایی لە هەولێر، كە بەهۆی دۆخى تایبەتى خۆیانەوە نەیتوانیوە وەك پێویست كارەكانى خۆی بە ئەنجام بگەیەنێت. لەبەرئەوە لەكاتى یەكگرتنەوەى هەردوو دیوانەكەدا، كە كارێكى پیرۆزە، واى بە چاك ئەزانین كە ئەم دیوانە بەتوانا و كارامەیە (لە سلێمانى) بكرێت بە مەركەزى سەرەكى و لەگەڵ دیوانى چاودێری دارایی لە هەولێر و دهۆك سەرپەرشتى هەموو دام و دەزگاكانى حكومەتى هەرێم بكەن، ئەمەش پێشنیارێكە بۆ مێژوو.
لە ڕاستیدا دەكرێت تەنانەت هەندێك لە وەزارەتەكانیش لە پایتەخت نەبن و بەپىَى سروشتى كارەكانیان بەسەر شارەكانى سلێمانی و دهۆكدا دابەش بكرێن، جگە لە هەندىَ وەزارەتى گرنگ كە دەبێت لە پایتەخت بن، وەك وەزارەتى دارایی، وەزارەتى ناوخۆ، وەزارەتى پێشمەرگە و هەر وەزارەتێكى تر كە لەو ئاستەدا بێت، هەر بەو جۆرەى لە هەندێك وڵاتانى وەك كۆریاى باشوور و سوید و هەندىَ وڵاتى تر ڕەچاو دەكرێن، چونكە پێشكەوتنى تەكنۆلۆجیا و ئاسانبوونى پەیوەندى كردن لە ڕىَى تەلەفۆن و فاكس و ئیمەیل و پەیوەندى داخراوى تەلەفزیۆنىیەوە دەتوانرێت بە ئاسانى پەیوەندى و تەنسیق لەگەڵ پەرلەمان و سەرۆكایەتى ئەنجومەنى وەزیران و وەزارەتەكاندا بكرێت، ئەم كارە لە ڕووى ئابوورى و كۆمەڵایەتى و بوژاندنەوەى شارەكانیشەوە بایەخى خۆی هەیە بە هۆی پێشكەوتنى تەكنۆلۆجیا كە كارەكانى ئاسان كردووە، هەروەها دابین كردنى دادپەروەرییە لە تێڕوانین بۆ شارەكان.

لەگەڵ ڕێزماندا ....

تێبینى: ئەم نووسراوە لە پێش چەند مانگێكدا ئامادە كرابوو كە پێشكەش بكرێت، بەڵام بەهۆی سەرقاڵى و سەفەرى جەنابی مام جەلالەوە، پێشكەش كردنەكەى دواكەوت دواى هەندى دەستكاری.





وێنەیەك بۆ /
بەڕێز مامۆستا جەلال جەوهەر / ئەندامى مەكتەبی سیاسی و بەرپرسی مەكتەبی چاودێری و پشكنینى (ی.ن.ك) / بۆ ئاگاداری بەڕێزتان و لەبەرئەوەى بە شێوەیەكى فەرمى پێمان ڕاگەیەنراوە كە وێنەیەكى ڕاپۆرتەكانى دیوانمان ئاڕاستەى بەڕێزتان بكەین، بەو هۆیەوە لە سەرەتاوە ئاگاداری ئەم هێرشە ناڕەوایە بوون كە ڕووبەڕووى دیوانمان بۆتەوە و هەڵوێستى ویژدانیتان و نەتەوەییتان تیایدا هەبووە، تكا و داوامان ئەوەیە كە ئەم نووسینەمان و پاشكۆكەى بە شێوەیەكى ڕەسمى لەلایەن بەڕێزتانەوە بخرێتە بەرنامەى كاری یەكێك لە كۆبوونەوەكانى مەكتەبی سیاسی بەڕێزەوە كە جەنابی مام جەلال بەشداری تیا ئەكات. هەروەها داوا لە بەڕێز مام جەلال بكرێت بە گشتاندنێك ئەم نووسراوەمان بدرێتە ئەندامانى سەركردایەتى (ی.ن.ك) و ئەگەر بەڕێزیان بە گونجاوى بزانن، وێنەیەكى بدرێتە میدیاكانى (ی.ن.ك) و ئاگادار كردنەوەمان لەگەڵ ڕێزماندا....
نووسینگەى تایبەتى سەرۆكى دیوان / لەگەڵ وێنەیەك لە پاشكۆی ئەم نووسراوە.