جمهوری ئیسلامی ئێران.. سەرسەخترین دوژمنی نەتەوەی کورد

Monday, 23/06/2014, 12:00

بەڕێگادا ئەڕۆشتم و لەگەڵ هەر هەنگاوێکدا ئاوازەکانی عەباسی کەمەندی دەیخستمە نێو دەریای خەیاڵ و زیاتر و زیاتر هەستم بە نامۆبوون دەکرد لەم واقیعە بێ بەزەییانەی؛ فەرامۆشکردن و ناحاڵی بوون باڵی تاری بەسەر مرۆڤەکانماندا کێشاوە، بە ئاوازێکی غەمگین لەگەڵ گیانی پاك و گوشادی عەباسی کەمەندیدا (کە تەنیا تەمەنی ٦٢ ساڵ بوو، بەڵام بە شێوە لە پیرەمیردێکی ١٠٠ ساڵەی دەکرد) دەمگوت (با وەکـــوو سوفــــــرە لە داخـــــا بدڕێ ورگـــــی ڕەقیــــب)، بیرم لە هەڵبژاردنی پراوپڕو تەواوی ئەو کەڵە هونەرمەندو ئەدیب و مرۆڤە دەکردەوە بۆ وشەکان، کە چۆن لە پشتیانەوە چەوساندنەوەی میللەتێك ڕەنگ دەدەنەوە، خنکاندنی دەنگی رەوای نەتەوەیەك و تاساندنی سەدای کەڵە پیاوەکانی، پاشان دەنگی ئاوازەکە لە دڵمدا بەرزتر بووەوە و هەر لەبەرخۆمەوە ئەم چوار دێڕەم دەگوتەوە:
تاڵــــعم نەحسە ئەترســــم کە لەژێــــــر بـــــــاری فـــراق
بمــرم و ڕۆژێ نەبێ دەوڵـەتـــی وەسڵــــم وە نەسیــــــب
وەرە دەستـــت بنــە نێـــو دەستــــم و پێــــکەو بدوێیــــــن
با وەکـــوو سوفــــــرە لە داخـــــا بدڕێ ورگـــــی ڕەقیــــب

هەتا هۆش وچاوانمی پەلکێشی دوا وتاری ئەو کەڵە هونەرمەندە کردەوە خوێندبوومەوە، کە خۆی لە خۆیدا مەرگی پێشوەختی لە ناخەوە هەژاندمی، دوا وتاری ئەو وتارە بوو لە ڕۆژنامەیەکدا لە ١٦/٩/٢٠١٣ دا خوێندمەوە لە ژێر ناوی (جگە لە قاچ ئێشە و ژانە دڵ و سوکایەتی هیچمان دەس نەکەوت) تیایدا هاتووە:
"بە هیچ هۆو هۆکارێك چاوەڕوانی ئەوەم لە دەوڵەتی ئێران نەبووەو داوام نەکردووە کۆشك و عەماراتم بۆ دروس بکەن، نەمگوتووە پێمبدەن، گوتومە: من مرۆڤێکی لاوازم لە تواناو تاقەتمدا نییە..... پشتی بێهێزو بێدەسەلات لەئەرزدان شانازی نییە، کەسێك کە لە خاکدا گەوزاوە و هێزی نەماوە، کوا شانازییە پشتی لە ئەزر دەی..... دەوروبەری دوو ساڵ لەوەپێش زوڵمێك لە لایەن چەن کەسێك لە دەنگ و ڕەنگی سەداو سیمای کرماشان لە من کرا کە بوو بە هۆی بەرزبوونەوەی زەختم، ئەوە خەریکە بەرە بەرە کوێرم ئەکات.... وخراپتر لەوانە دەستگرتن بەسەر ماشێنی کوڕەکەم بە ناوی دزیاری.."
ئەم وتارە کە پڕە لە نموونەی زوڵم و زۆری زاڵمخانەی جمهوری نائیسلامی ئێران، هیچ کەسێکیشی لە پێش مردنی هونەرمەند عەباسی کەمەندی ڕانەچڵەکاندو لێینەکۆڵیەوە، بۆچی ئەو مرۆڤە بەو دەردە ببردرێت؟ تا کار گەیشتە ئەوەی لە دڵی خۆمدا گوتم نەك وتارو نووسین و ڕۆشنبیری و خوێندنەوە کار لەسەر ویژدان و ژیریی و دڵ و رای مرۆڤی کۆمەڵگای ئێمە ناکات، بەڵکو کوشتن و تیرۆرکردنی محەمەدی ڕەبیعی لە کرماشان و سۆرانی مامەحەمە لە کەرکوك تەنانەت نیشانەی پرسیارێك لای ئێمە جێناهێڵێت. تا کار دەگاتە ئەوەی شوێنکەوتووانی (یارسان) یەك یەك لە داخا ئاگر لە جەستەی خۆیان بەردەن.
لە ٤/١٠/٢٠٠٨دا به‌شی کوردی ده‌نگی ئه‌مریکا ڕایگەیاند : " كۆمیته‌ی پـشـتیوانی بۆ بوژاندنه‌وه‌ی فه‌رهه‌نگ و كه‌لتوری كورد له‌ كوردسـتانی ئێران نووسه‌ر و شـاعیر و هۆزانوان حه‌سه‌ن سـه‌ڵاح سـۆرانیان بۆ خه‌ڵاتی ئاشـتی نۆبڵ كاندید كردووه"‌.
کەچی حەیفو مەخابن هەر ماوەیەکی کورت دوای بڵاوبوونەوەی ئەو دەنگۆو سەدایە ئەو کەڵە نووسەرو هزرمەندە لە لایەن جمهوری تاوانی ئێرانەوە ژەهر خوارد کراو کەس نەهاتە دەنگ!.
ئەوان نایانەوێت میللەتی کورد ببێتە خاوەنی هزرمەندو کەڵە مرۆڤ و داهێنەر.. هەر وەك چۆن لە بەرانبەردا لێکۆڵینەوە مێژوویەکان ئەوە دەردەخەن لە ماوەی چەند سەد ساڵێکدا نیوەی خاکی ئێران بە شیعە کراوە، هەر لە ڕۆژهەڵاتیەوە تا باکورو باشور و ڕۆژئاوای ئەو وڵاتە.
هەر لە زنجیرەی ئەم ڕووداوە تراژیدیانەدا جارێکی تر ستەمی رەشی ئەو دەوڵەتە فاشیستە باڵی کێشا بەسەر دڵ و دەروونی هٶشمەندانی کورددا، کە ئەم هەواڵە لە ناکاوە لە دەرگای دڵ و ویژدانی داین:
بانە 3 حوزەیران/ یۆنیۆ٢٠١٣
" تەرمی سینەماکاری لاوی کورد تەها کەریمی، لە رێورەسمێک دا لە شاری بانە بەخاک سپێردا"
خەڵکێکی سادە بە چەواشەکاریی ڕاگەیاندنی دەسەڵاتی کوردی باشوور، کە هەردەم هاوکارن لەگەڵ ئیتلاعاتی ئێران هەڵخەڵەتان، کە گوایە ئەو سینەماکارە بە رووداوی هاتووچۆ لە باشوور کۆچی دوایی کردووە، لە کاتێکدا لەبەردەم دادگای کۆنی سلێمانی بە گوللـە تیرۆر کرا.
ئەی هەر ئەوان نەبوون بە نوێنەرایەتی سوپای ئێران ١٠ ساڵ شەڕی ناوخۆیان لە کوردستان بەرپاکرد، تا کار گەیشتە ئەوەی پارتی فریای خۆی کەوت و پشتی بە سوپای داگیرکاری عێراق بەست بۆ ڕووبەڕووبوونەوەی یەکێتی بە پشتیوانی سوپای ئێران. ئەمە جگە لە لیستی دوورو درێژی ئەو کەسایەتیە سیاسی و پێشمەرگانەی ڕۆژهەڵات کە لە باشوور لە ماوەی ڕابردوو تیرۆر کراون.
چەند ڕۆژێك پێش هەڵبژاردنی ٢٩/٤/٢٠١٤ نوێنەرانی یەکێتی چوونە ئێران و بەڵێنیان نوێ کردەوە کە بۆ دەرچوونیان لە هەڵبژاردن و بەدەستهێنانی دەنگی پێویست، پێویستیان بە کۆمەکی و دەسەلاتی مالیکیە، لە بەرانبەریشدا بەڵێنیان دا پشتیوانی لیستی مالیکی بکەن بۆ دامەزراندنی حوکمەت. ئەوان لایان وایە سیاسەت مانەوەی خۆیانە گەر لەسەر حسابی مەسەلە چارەنوس سازەکانی میللەتی کوردیش بێت، ئەوە بوو مالیکی سەد هەزار فۆرمی هەڵبژاردنی بەتاڵی بۆ یەکێتی نارد. لەگەڵ ئەمەشدا ڕێیان پێدرا بە شێوەیەکی بەر بڵاو تەزویرو ساختەکاریی بکەنو دوای ناڕەزایی دەربڕینیش سکاڵاکان هیچ ئەرزشێکیان پێ نەدرا.
مالیکی ئەو تاوانبارەیە بودجەو ڕزقو ڕۆزیی خانەوادەکانی کوردی ئێراقی بڕی، ئەو تاوانبارە پیاوێکی تەسبیح فرۆش بوو لە سوریا، لە ڕێی ئێرانەوە وەك کەسایەتی دڵسۆزو هەڵبژاردەی حیزبی دەعوە کرایە سەرۆکی وەزیرانی ئێراق، کە لەو ڕۆژەوەی بووە بە سەرۆك وەزیران ڕۆژانە حوکمی سێدارەو تەقینەوەو پاکتاویی و وێرانکردن و تۆقاندن وەکو کونەپەپو لەسەر کەلاوەکانی ئێراقێکی وێرانی دەستی بەعسیەکان دەخوێنێت، پێش ئەوەی ببێتە سەرۆك وەزیران سیاسەتمەدارە کاڵفامەکانی لەمەڕ خۆمان پێیان وابوو بە لابردنی جەعفەری و هاتنی مالیکی دەسەڵاتێکی دادپەروەر دێتە دی، ئەی نازانن ئەوانە هەموو ئەجندایەك جێبەجێ دەکەن کە لە پشت سنوورەوە بۆیان دێت؟ ئەوانە دوژمنی هەموو دڵسۆزێکی کوردو ئێراقن کە هەوڵی بوژاندنەوەو گەشەسەندن و دادپەروەریی بەرن، هەر ئەمەش بووە هۆی جێبەجێکردنی وەلائی زیاتر بۆ دەوڵەتی تەشەیوعی ئێران و ناردنی هەزاران سەرباز بۆ سوریا، بۆ کوشتنی خەلکی ڕاپەڕیوی ئەو وڵاتەو بەرگری کردن لە ستەمی دیکتاتۆریی بەعسیەکانی سوریا.
نوری مالیکی تەزبیح فرۆشی تایەفەگەر، دەیویست شوێن پێی سەدام هەڵبگرێت لە دیکتاتۆرییەتدا، زیادەیەکی تریشی خستە سەر ، ئەویش تەرخانکردنی سامان و هێزی عێراق بوو بۆ بە شیعەکردنی خەڵک و جێبەجێکردنی ئەجندای ئایەتوڵاکانی ئێران تا ئێراقیش ببێتە موستەعمەرەیەکی ئاغاکانی دەسەلاتی توندرەوی ئێرانی بە ناو جمهوری ئیسلامی! بەڵام داخ و مەخابن بەناو سیاسەتمەدارە ناحاڵیەکانی لای خۆشمان هەر لە هەوڵی گیرفان و بەرژەوەندی خۆیاندان و بەمەبەستی گەشتنە مەرامە شەخسی و حیزبیەکانیان ئامادەن هەموو بەهایەك لە دەستبدەن.