بۆ كۆنگرەى دووەمى كۆمەڵى ئیسلامى

Saturday, 17/04/2010, 12:00

دەستپێك:
حیزب و رێكخراوە سیاسییەكان بەپێى پەیڕەو و پرۆگرامیان، چەند ساڵ جارێك لەبارى ئاساییدا كۆنگرەى خۆیان دەبەستن، كۆنگرەش لەنێو حیزبدا بە بەرزترین و باڵاترین ئۆرگان دێتە ئەژماردن ، ناكرێت هیچ دەزگاو ئۆرگانێكى حیزب سەرپێچى بكات.
كۆنگرەش لە كۆمەڵێك ئەندام پێك دێت و دیارى كردنیان لە حیزبێكەوە بۆ حیزبێكى تر دەگۆڕێت، بۆ نمونە ئەندامانى كۆنگرە لە كۆمەڵى ئیسلامیدا، پێك دێت لە ئەندامانى سەركردایەتى و ئەندامانى مەكتەب و مەڵبەندەكان و ...تاد.
ماوەى بەستنى كۆنگرە بە هەمان شێوە لە حیزبێكەوە بۆ حیزبێكى تر دەگۆڕێت، هەرچەندە ئێستا واباوە ئەو ماوەیە كورت بێت، ئەویش بەهۆى ئەو هەموو گۆڕانكارییە خێرایانەى روودەدات لەسەرجەم بوارەكانى ژیاندا .
بەپێى پەیڕەى ناوخۆى كۆمەڵى ئیسلامى، كە لە كۆنگرەى یەكەمی ساڵى 2005 پەسەند كرا، كۆمەڵ چوار ساڵ جارێك كۆنگرە دەگرێت ، ئەمەو بڕیار وایە لە چەند مانگى ئایندەدا كۆنگرەى دووەمى خۆى ببەستێت .
تایبەتكارییەكانى كۆنگرە زۆرن، هەموو لایەنەكانى سیاسى و كارگێڕى و دارایى دەگرێتەوە:
یەكەم/ بوارى كارگێڕى: هەڵبژاردنى ئەندامانى سەركردایەتى و دیاریكردنى ژمارەیان.
دووەم/ بوارى رامیارى
1- هەڵسەنگاندنى راپۆرتى سیاسى و بڕیار لەسەردانى.
2- دیاریكردنى هێڵە گشتییەكانى حیزب.
3- پەسەندكردنى بەرنامەو پەیڕەوى ناوخۆ.
4- دیاریكردنى ئارم و ئاڵا و دروشم و ناوى حیزب.
5- بڕیارى هەڵوەشانەوەى حیزب یان یەكگرتن لەگەڵ حیزبێكى تردا.
سێیەم/ بوارى دارایى: هەندێك لە حیزبە سیاسیەكان لە كۆنگرەدا هەڵدەستن بە دیاریكردنى بوجەى گشتى و پەسەندكردنى و دابەشكردنى بوجەكە وەك خەرجى بەسەر دەزگاو دامەزراوەو رێكخستن و چالاكییە جۆراوجۆرەكانى حیزبدا.
دواى ئەم دەستپێكە، بەپێویستى دەزانم بچمە نێو ناوەڕۆكى باسەكەمەوە ئاماژەیەكى كورت
بەچەند پرس وخاڵێكى گرنگ بدەم كە پێویستە لەكۆنگرەدا راوەستانى جدى لەسەر بكرێت : سەرەتا پێویستە دەرك بەو راستیە بكەین كە تێگەیشتنى ورد و دروست لەو قۆناغەى كۆنگرەى تێدا دەبەسترێت زۆر گرنگ و هەستیارە بۆ سەركردایەتى و ناكرێت بەسادەیى و سانایى بازى بەسەردا بدرێت ، چونكە وەك دەوترێت چى بچێنێت ئەوە دەدوریتەوە .
ئەم كۆنگرەیەش لە قۆناغێكدا بەڕێوە دەچێت، كە عێراق و هەرێمى كوردستان بە دۆخێكى هەستیار و ئاڵۆز و ترسناكدا گوزەر دەكات، لە رووى سیاسى و ئابورى وكۆمەڵایەتى و فەرهەنگى و...تاد.
جا پێویستە كۆنگرەى دووەمى كۆمەڵى ئیسلامى بۆ ئەم هەموو پرسانە، هەڵسەنگاندن و خوێندنەوەى خۆى هەبێت ودواتر لەمیانەیەوە هەڵوێست و پلان و بەرنامەى رون و ئاشكرا دابڕێژێت.
وەك وتمان وڵات بە بارودۆخێكى سیاسى ئاڵۆز و دژواردا گوزەر دەكات، كێشەى سیاسى وئابورى و كێشە كۆمەڵایەتییەكان و كێشەى بوارى پەروەردەو فێربوون و كێشەى لاوان و ژنان و چەندین كێشەى ئاڵۆزى تر لەئارادان، پێویستە كۆمەڵى ئیسلامى خوێندنەوەیەكى بابەتى و زانستیانەى بۆ ئەم پرسانە هەبێت و لە بەرنامەو پلانیدا چارەسەرى كرداریى پێبێت، تا كۆمەڵ ببێتە جێگاى متمانەى خەڵكى و رەوتى ئیسلامیش لەم جوغزە بەرتەسكە بچێتە دەرەوەوبازنەى حزبە بچوكەكان تێپەڕێنێت و لە بازنەیەكى فراواندا كاربكات و خزمەت بە سەرجەم چین و توێژەكانى كۆمەڵ بكات و خۆى بە خەمخۆرى خەڵكى بزانێت و خاوەن پرۆژە بێت بۆ هەریەك لەو پرسانە. بە واتایەكى تر، كاتى ئەوە هاتووە رەوتى ئیسلامى بەگشتى و كۆمەڵى ئیسلامى بەو ئاراستەیە كاربكات، تا ببێتە بزاڤێكى سیاسى كۆمەڵایەتى، لەنێو گۆڕەپانى كوردستان و عێراقدا، بۆ چاككردنى واقیعى سیاسى و ئابوورى و كۆمەڵایەتى، بەجیهانبینییەكى ئیسلامى و بە تێڕوانین و پرۆژەى هاوچەرخ و مۆدێرن و، هەروەها بەلاوەنانى وتارى شەرمنانە، خستنەڕووى وتارى رون و سادەو شەفافانە، كە هەڵگرى كێشەو خواستەكانى خەڵك بێت و، هەموو تاكێك لێى بگات و خواست و بەرژەوەندیەكانى خۆى تێدا ببینێتەوە.
ئەمەو دەبێت كۆمەڵ لە ئەدەبیاتى خۆیدا، جەخت لەسەر بەرنامەى حوكم ڕانى و بەڕێوەبردنى پێگەیشتوو بكات ، كە لێپرسینەوەو لێپێچینەوەو شەفافیەت لە هەموو بوارەكاندا هەبێت و، هاوڵاتى بوون بنچینەو پێوەرى ماف و ئەركەكان بێت، بەبێ جیاوازى.
گەر خوێندنەوەیەكى تەندروستانە و بابەتیانە بۆ پەیكەرو دامەزراوەكانى ئێستاى كۆمەڵ بكەین بێ سێ و دوو كردن بۆمان دەردەكەوێت ئەم ئامانج و كارانە بەم حاڵەتەى ئێستا جێ بەجێ كردنى ئەستەمەو ناكرێت ، چونكە دامەزراوەكانى كۆمەڵ دامەزراوەى تەقلیدین و لەگەڵ ئەم قۆناغ وسەردەمەو گۆرانكاریەكاندا یەك ناگرێتەوە ، ئەمەش ئەوە دەخوازێت پێداچوونەوە بە پەیكەرو بونیەى سیاسى و چاكسازى رێكخراوەیى و حیزبى ئەنجام بدرێت .
تا هاوشان و هاوتەریبى گۆڕانكاریەكانى دەوروبەرمان بێت ، ئەركى سەرەكیی كۆنگرەیە لەبارەیەوە بدوێت و كارى لەسەر بكات.
ئەمەش ئەوە دەخوازێت پێداچونەوە بەكۆى سیستەمەكاندا بكرێت و هەڵسەنگاندنى پێویستى بۆ بكرێت ، لەمیانەیەوە ئەو بوارو تەوەرانەى پێویستیان بە چاكسازى هەیە چاكسازى تێدا بكرێت و ئەو تەوەرو بوارانەى پێویستیان بە گۆرانكارى هەیە گۆڕانكارى تێدا بكرێت و ئەوانەشى پێویستى بەداهێنان و نوێگەرى هەیە زیاد بكرێت .
هەروەها لە كۆنگرەدا دەبێت رێوشوێنى پێویست بگیرێتە بەر بۆ بە دامەزراوەیى كردنى دام و دەزگاكانى كۆمەڵ و چیتر بوار نەدرێت وەك دروشم و بانگەشە سەوداو مامەڵەى لەگەڵدا بكرێت .
هەروەها بۆ هەر دەزگاو ناوەندێك پێوەرو مەرجى بابەتى دابنرێت و بەپێى ئەو مەرجانە كەسەكان دابنرێت ، و بازنەى موراعات بەلاوە بنرێت و چیتر بەرژەوەندیە گشتیەكان نەكرێتە قوربانى موراعات و رەچاو كردنى ئەم و ئەو ، لە رابردوشدا باجى زۆر دراوەو زیانى گەورەش كەوتۆتەوە .
ئەمەوپێویستە كۆنگرە بریارو راسپاردەى خۆى دەربكات بە پێكهێنانى چەند لیژنەیەك لە ئەندامانى كۆنگرەو كەسانى تەكنۆكرات و شارەزا لە دەرەوەى خۆى بۆ دانانى پلانى ستراتیژى و بەرنامەو هێڵە گشتیەكان ، گەر لەنێو كۆنگرەدا ماوەو بوار نەرەخسا بۆ هەندێك پرس و بابەت لیژنەكان دواى كۆنگرە كارى خۆیانى لەسەر بكەن و سەركردایەتى نوێ بە ئامادەبونى لیژنەكان پەسەندى بكات .
هەموو ئەو پرس و تەوەر و پرۆژانەى ئاماژەیان پێكرا پێویستیان بە میكانیزمى گونجاو هەیە بۆ ئەوەى بچنە بوارى جێ بەجێكردنەوە ، ئەمەش هەوڵ و كارى دڵسۆزانەو لێبڕاوانەى دەوێت . لەكۆتاییدا دەڵێین پشتیوان بەخواو ئینجا هەوڵ و هیممەتى دڵسۆزان خوازیارین كۆنگرە بكرێتە وێستگەى پێداچونەوەوخاڵى وەرچەرخانى جۆرى و بابەتى بۆ كارو پرۆژەى ئیسلامى و بەدیهێنانى ئامانجە ئیسلامیەكان ..