ڤاتیکان و نه‌جه‌ف و که‌ربه‌لا
Tuesday, 25/01/2011, 12:00
چه‌ند ساڵیکه به‌شێک له شیعه‌کان، نه‌جه‌ف و که‌ربه‌لا به ڤاتیکان ئه‌شوبهێنن. بگره هه‌ندێکان داوای ئه‌وه ده‌که‌ن که وه‌کو ڤاتیکان پێویسته به‌یاسا و پشتبه‌ستن به ده‌ستوری تازه‌ی عێراق ستاتۆیه‌ک به هه‌ردوو شاری نه‌جه‌ف و که‌ربه‌لا بدرێت وه‌کو ئه‌و ستاتۆیه‌ی که ڤاتیکان هه‌یه‌تی
هه‌ڵبه‌ته ڤاتیکان ده‌که‌وێته ناو جه‌رگه‌ی ئیتاڵیاوه، به‌ڵام ئاڵا و هه‌یکه‌لی ده‌وڵه‌تی خۆی هه‌یه و .
نوێنه‌ری له یو ئێن و سه‌فاره‌تی له زۆربه‌ی ووڵاتانی دونیا هه‌یه
ڤاتیکان ڕۆبه‌ره‌که‌ی 0.44 کیلۆمه‌تر چوارگۆشه‌یه ، ژماره‌ی دانیشتوانی ده‌گاته ٨٠٠ که‌س، هه‌ندێ یه‌که‌ی ئاینی بچوک ده‌که‌وێته ده‌ره‌وه‌ی سنووری فاتیکان به‌ڵام هه‌ر سه‌ربه فاتیکانه ، هه‌موو دانیشتوانی فاتیکان پێکهاتووه له کرێکاران و پیاوانی ئایینی ، وه پاپا به سه‌رۆکی ئه‌و ده‌وڵه‌ته داده‌نرێ ، که هه‌موو ده‌سه‌ڵاته سیاسی و کارگێڕیه‌کانی وڵاته‌که‌ی له ده‌ستدایه تیمێکی گارگێڕی هاوکاری ده‌که‌ن، وه‌زیری وڵات کاردیناڵێک ده‌بێ که پاپا دایده‌مه‌زرێنی به‌رپرسه له په‌یوه‌ندیه‌کانی ده‌ره‌وه ، فاتیکان بچووکترین و کۆنترین سووپای جیهانی هه‌یه که ژماره‌یان ده‌گاته 100 سه‌رباز پاپا یۆلیوسی دووه‌م له ساڵی 1507 ز درووستی کردووه ، فاتیکان هێزی ده‌ریایی و هێزی ئاسمانی نیه ، به‌رگری لێکردنی ده‌که‌وێته ئه‌ستۆی وڵاتی ئیتاڵیا ، داهاتی ساڵانه‌ی نزیکه‌ی ٣٥٥ ملیۆن دۆڵاره، که زۆربه‌یان له گه‌شت و گوزار و چالاکی بانکی و به‌خششه وه دێت. ئه‌و وڵاته یه‌ک نووسینگه‌ی پۆسته‌ی هه‌یه له‌گه‌ڵ یه‌ک به‌نک و بازاڕ هه‌روه‌ها پۆلیسیشی هه‌یه.
به‌نده پێی وایه هه‌تا ماڵی عه‌ره‌ب پارچه پارچه بێت، ئه‌وه‌نده له قازانجی کوردایه،بۆیه هه‌ر کارێک که ببێته هۆی که‌مکردنه‌وه‌ی ده‌سه‌ڵاتی مه‌رکه‌زی له به‌غدا ، ده‌بێته هۆی زیادبونی زه‌مانه‌ت بۆ مانه‌وه‌ی ئه‌م ته‌جروبه‌یه‌ی هه‌رێمی کوردستان.
به‌نده پێی چاکه ڕۆشنبیرانی کورد، ئه‌ندامانی په‌رله‌مانی کورد له به‌غدا هانی شێعه‌کان بده‌ن بۆ ئه‌وه‌ی هه‌ردوو شاری نه‌جه‌ف و که‌ربه‌ڵا له ڕووی ده‌ستورییه‌وه ستاتۆیه‌کی هاوشێوه‌ی ڤاتیکانی پێ بدرێت. ئه‌م کاره‌ش ده‌بێته هۆی
-چه‌سپاندنی بیری فیدرالییه‌ت (هه‌رچه‌نده له ڕووی ئایینیوه‌یه)، به‌ڵام هه‌ر هانگاوێکه به‌ره‌و ئه‌و ئاقاره.--
-که‌مکردنه‌وه‌ی ده‌سه‌ڵاته‌کانی مه‌رکه‌ز و به‌رفراوانکردنی ده‌سه‌ڵاتی یه‌که هه‌رێمییه‌کان.--
شیعه‌کان پێشتر به گه‌رمی پێشوازییان له فیدرالییه‌تی خوارووی عیراق ئه‌کرد، به‌ڵام ئه‌وان ئێستا وا بیر --
ئه‌که‌نه‌وه که ئه‌مان هه‌مو عیراقیان به‌ده‌سته‌وه‌یه، چ پێویست ئه‌کات ئێستا ده‌سه‌ڵاتی خۆیان بچوکبکه‌نه‌وه بۆ سه‌ر پارچه‌یه‌کی عیراق.
قوتبوونه‌وه‌ی هه‌ردوو شاری نه‌جه‌ف وکه‌ربه‌لا به شێوه‌یه‌کی ڕه‌سمی تر وه‌کو مه‌رکه‌زێکی شیعه به‌رامبه‌ر --
به هه‌ردوو شاری مه‌ککه و مه‌دینه ، هه‌روها به‌رامبه‌ر به شاری قوم له ئێران.ئه‌وه‌نده‌ی تر ناکۆکییه‌کانی نێوان شیعه و سوننه قوولتر ده‌کاته‌وه، که به‌داخه‌وه سه‌رکردایه‌تی کورد شانازی به‌وه‌وه ده‌که‌ن که هه‌مو هه‌وڵێک ده‌ده‌ن بۆ ڕیکخستنه‌وه‌ی نێوانیان
به‌نده به‌ر له چه‌ند ساڵێک له گه‌ڵ هه‌ندێ عه‌ره‌بی شیعه کۆمه‌ڵێ بابه‌تمان نارد بۆ ڕۆژنامه ئه‌لیکترۆنییه‌کان سه‌باره‌ت به فیدرالیه‌تی خوارووی عێراق، ته‌نانه‌ت ئاڵایه‌کمانیش دروست کرد که ، ئه‌مه‌ی خواره‌وه‌یه، به‌ڵام هێشتا کارکردنی له سه‌ر ده‌وێت
بۆ زیاتر زانیاری ده‌رباره‌ی ئه‌و هه‌وڵانه ده‌توانن ته‌ماشای ئه‌م لینکه بکه‌ن
http://www.basraelc.com/news.php?action=view&id=3608
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
