شورشه‌کانی تونس و میسر، سه‌رکه‌وتنه‌کانیان، به‌رهه‌می کامیرای شاراوه‌یه نییه
Saturday, 12/02/2011, 12:00
شورشه‌کانی تونس و میسر، سه‌رکه‌وتنه‌کانیان، به‌رهه‌می کامیرای شاراوه‌یه نییه
پۆڵای موهه‌ندیس- ڤییه‌ننا
خوێنه‌ری به‌ڕێز:
به‌ر له هه‌مو شتێک، پێویسته ئه‌وه بڵێم که‌هه‌ندێ له سه‌رکرده‌کانی ناوچه‌که به‌وانه‌ی خۆشمانه‌وه، پێیانوایه که ئه‌و ڕاپه‌ڕینانه‌ی گه‌لانی ناوچه‌که و ئه‌و سه‌رکه‌وتنه مێژوییانه‌ی به‌ده‌ستیان هێنا که هه‌مومان له شاشه‌ی ته‌له‌فزیۆنه‌کانه‌وه بینیمان، هه‌موی به‌رهه‌می کامیرای شاراوه‌یه و ڕاست نییه
ئه‌مه‌ش پێچه‌وانه‌ی ئه‌و لۆژیکه‌یه که ده‌یان ساڵه سه‌رکرده‌کانی ئێمه ئه‌یاندا به گوێمانا، که پێویسته ئێمه‌ی کورد ده‌رس و په‌ند له شته باشه‌کانی ته‌جروبه‌کانی دونیا وه‌ربگرین
هه‌ندێ پێیانوایه که ئه‌م ڕوداوانه‌ی تونس و میسر هیچ کاردانه‌وه‌ی نابێت له سه‌ر کوردستان، منیش ده‌ڵیم به پێجه‌وانه‌وه کاردانه‌وه‌ی هه‌بو و ده‌شیبێت،، به‌لگه‌یه‌کی زه‌ق ئه‌وه‌یه که نرخی نه‌وت له‌م چه‌ند هه‌فته‌یه‌دا هه‌ڵکشا به‌ره‌و سه‌ره‌وه خۆی دا له سه‌د دۆلار، ئه‌مه‌ش کاردانه‌وه‌ی ده‌بێت له سه‌ر داهاتی عێراق و کوردستان،جگه له‌وه‌ی زۆربه‌ی هێزه جیاوازه‌کانی ناوچه‌ی ڕۆژهه‌ڵاتی ناوه‌ڕاست ئه‌و سه‌رکه‌وتنانه به هی خۆیان ئه‌زانن، هه‌ر له نه‌ته‌وه‌په‌رسته‌کانی عه‌ره‌ب و هێزه ئیسلامییه‌کان به سوننه و شیعه‌وه، بگره قبتییه‌کانی میسر و مه‌سیحییه‌کانی ناوچه‌که‌ش، ته‌نانه‌ت ئێرانییه‌کانیش به سه‌رکه‌وتنی خۆیانی ئه‌زانن، هه‌ڵبه‌ته کوردیش لێی به‌ده‌ر نییه
جگه له‌وه ڕژێمی موباره‌ک، له ماوه‌ی ئه‌م سی ساڵه‌ی ڕابوردو به هه‌مو شیوه‌یه‌ک پشتگیری له دیکتاتۆره‌که‌ی عیراق ده‌کرد، چه‌ندین پسپۆڕی سه‌ربازی ڕه‌وانه‌ی عێراق ده‌کرد بو یارمه‌تیدانی ڕژێمی به‌عس و سوپاکه‌ی، له کاتی ئه‌نفاله‌کاندا ئه‌و هه‌مو زوڵمه له گه‌لی کورد کرا، فززه‌ی لێوه نه‌هات ،ڕۆژێک نه ڕژێمی میسر و نه جامیعه‌ی عه‌ره‌بی له سه‌ر کورد هه‌ڵیان نه‌دایه، ڕژێمی به‌عس له کاتی ئه‌نفاله‌کاندا ده‌یان کچی کوردیان به مه‌لهاکانی میسر فرۆشت ڕێگرییان لێنه‌کرد
هه‌تا ڕۆژی ده‌ستپێکردنی هێرشی ئه‌مه‌ریکا بۆ سه‌ر ڕژێمه‌که‌ی سه‌ددام، موباره‌ک هه‌ر داوای له
ئه‌مه‌ریکا ده‌کرد که ئه‌و هێرشه نه‌کات
ڕۆڵی زه‌قی موباره‌ک له ده‌رپه‌ڕاندنی به‌ڕیز عه‌بدوللا ئۆجه‌لان له سوریا، وه‌ختێ ناوبژی کرد له نێوان سوریا و تورکیا، پاشان بووه هۆی ئه‌وه‌ی که ئۆجه‌لان ده‌ستگیر بکرێت، ئه‌مه‌ش له ئه‌نجامی کۆبونه‌وه‌که‌ی شه‌ره‌م الشێخ بوو که له ناوه‌ڕاستی ساڵی ١٩٩٩ له نێوان کلینتۆن و دیمیریل و موباره‌ک و شای سعودییه به ڕیوه جوو، که یه‌که‌مین کۆبونه‌وه بوو بۆ دژایه‌تیکردنی تیرور وه‌ک کێشه‌یه‌کی نێوده‌وڵه‌تی
بۆیه به‌نده وه‌کو کوردێک زۆرم پێخۆش بوو که ئه‌و ڕژێمه ڕوخا، موباره‌ک به په‌له پڕوزێ میسری به‌جێهێشت.
به‌نده پێیوایه ئێمه‌ی کورد پێویسته ئه‌م ده‌رس و په‌ندانه له سه‌رکه‌وتنی شۆرشی گه‌لانی میسر و تونس وه‌ربگرین
--جاری ئه‌م تسۆنامییه سیاسیه یان باشتر بڵێم ئه‌م بومه‌له‌زه سیاسییه، ئێران و سوریاش ده‌گرێته‌وه، به قازانجی کوردیش ده‌گه‌ڕێته‌وه
مۆدیلی حوکمڕانیی بنه‌ماڵه‌و قۆرخکردنی هه‌مو جۆمگه‌کانی ژیانی کۆمه‌ڵانی خه‌ڵک، چیتر گه‌لان قبوڵی ناکه‌ن
گرتنه‌ده‌ستی ده‌سه‌ڵات له لایه‌ن حیزبێکه‌وه له ڕێگه‌ی ده‌نگدانه‌وه، واتای ئه‌وه نادات که ئه‌و ووڵاته یان ئه‌و ناوچه‌یه دیموکراسی عه‌یاره بیست و چواره، چونکه ئه پرۆسه‌یه ته‌نها کۆڵه‌گه‌یه‌کی سیسته‌می دیموکراتییه و ده‌توانرێ مۆنۆپۆل بکرێت، هه‌ر وه‌ک ئه‌وه‌ی حیزبه‌که‌ی موباره‌ک به‌ر له چه‌ند ساڵێک کردی، نزیکه‌ی هه‌شتا له سه‌دی هێنا، که‌چی ده‌رکه‌وت میلله‌ت چه‌ند به‌داخه له‌و ڕژێمه.
کۆت و به‌ند کردنی ئازادییه‌کانی تاکه‌کانی کۆمه‌ڵ چه‌ند درێژ بکێشێت، له کۆتاییدا هه‌ر هه‌ره‌س ده‌هێنێت
ڕۆڵی ئه‌رێنی ته‌کنولۆجیا له پرۆسه‌ی به دیموکراتیزه‌کردنی کۆمه‌لگا، کێشمه‌کێشی نێوان حوشتر و فه‌یسبووک، نێوان تانک و وشه
بۆیه به‌نده داوا ئه‌کات هه‌م له ده‌سه‌ڵات و هه‌میش له ئۆپۆسیزیۆن، که پێکه‌وه بکه‌ونه گفتوگۆ له پێناو ئه‌وه‌ی ده‌رهاویشته‌کانی ئه‌م بومه‌له‌رزه‌یه چه‌ند تاسیری ده‌بێت له ناوه‌وه‌ی عێراقو کوردستان، ڕۆڵی تورکیا، هه‌رێمی کوردستان له‌مه‌ودا چۆن ده‌بێت، تورکه‌کان ده‌ڵێن ئه‌مه‌ریکا میسری له ده‌سچو، ئیتر ناچار ده‌بێت گوێ له ئێمه ڕابگرێ، ئه‌مه‌ش چه‌ند کاردانه‌وه‌ی ده‌بێت له سه‌ر ته‌جروبه‌که‌مان، ئه‌گه‌ر له ئێران یان له سوریا گۆڕانکاری تیا چیبو، کاردانه‌وه‌ی چۆن ده‌بێت له سه‌ر تێکڕای مه‌سه‌له‌ی کورد له هه‌ر چوار پارچه‌که‌دا، وڵامی ئه‌م پرسیارانه ڕۆژگار ده‌ریئه‌خات.- ڤییه‌ننا
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
