بۆ كرێكاران و جووتیارانى شارەزوور و دەوروبەری

Saturday, 24/08/2013, 12:00

بەرێزان كۆمپانیای ئیكسون مۆبیل بەنیازە رۆژانی داهاتوو لە شارەزوور، بەرزنجە، پێنجوێن، سیتەك، ناڵپارێز و زەلان بەدوای نەوت و گاز بگەڕێت و كارەكەی بە گرێبەستی تایبەت لەگەل كۆمپانیای(GGFZ) راسپاردووە.
كرێكاران:
كۆمپانیاكە دەیەوێت بەشێوەیەكی نائینسانی، سوود لە زۆری رێژەی بێكاری و گرانی بازاڕ وەربگرێت، بۆیە بەنیازە
1- هەفتەكە 6 رۆژ كارتان پێبكات،
2- رۆژانە 12كاتژمێر كاركردن، واتە لە 6بۆ6
3- كرێی كارى رۆژانە 30هەزار دینار،
4- ژەمی خواردن و كرێی هاتووچووتان لەسەر ئەركى خۆتان.
5- بە گرێبەستی كاتی دادەمەزرێن.
خۆشەویستان ئەو مەرجانە بەروونی پیشانی دەدا كە ئەو كۆمپانیە"شارستانیە"، چەندە چاوچنۆك و دوورن لە مەرجی ئینسانی كاركردن و هەر لەسەرەتاوە یاسا نێودەوڵەتی كاركردن پێشێلدەكەن.
جووتیارانی خۆشەویست!
ئەزموونی كۆمپانیەكان لە كرێكاران و جووتیارانی ئاواییەكانی(كانی پەمو، رەزوار، كوردە میر، حەسیر، میل قاسم، كۆرەمۆر و ئەوانی تر لە قادر كەرەم) پیشانیدا كە كە ئەو كۆمپانیایانە بۆ راورووتكردن و تێكدانی كشتوكاڵی و پیسكردنی ژینگەكەمان هاتوون و دەیانەوێت بە نرخی تەڕەتۆڵەكە لێتان بكڕن.
ئێوە خاوەن خەبات و رەنج و بەرگرین، بۆیە دەنگی خۆتان یەكبخەن و جیاوازی نەكەن لەنێو خۆتان، واتە(خاوەن زەوی تاپۆ و خاوەن زەوی ریفۆرمی كشتوكاڵی)و زەوییەكانتان نە هەرزانفرۆش بكەن و نە لە هەڕەشەى ناڕەوای وەزارەتی كشتوكاڵی بترسن.
كرێكاران و جووتیاران
رژێمی بەعس مرۆڤ و دێهاتەكانى ئەنفالكرد و روخاندی و ئێستا كۆمپانیا زلهێزەكانی جیهان هاتوون بۆ ئەوەی سەروەت و سامانى خۆتان و نەوەی داهاتوومان چەپاوبكەن و بەشی ئێمەش هەر چەوسانەوەو زۆردارى و ناعەداڵەتی.
بۆیە بانگەواز دەكەین بۆ ئەوەی شەرەفی بەرگری لە كرێكاران، زەوی، ئاوی ژێر زەوی، ژینگەو ژیانمان بەمشێوەیەی خوارەوە لە ئەستۆبگرن
1- كاركردنی رۆژانە تەنها 8 سەعات نەك 12 سەعات. بەم شێوەیە دەتوانن رێژەى بێكارى كەم بكەنەوە.
2- كرێی كارى مانگانە لە ملیون و دوو سەد هەزار دینار كەمتر نەبێت.
3- ژەمی خواردن و هاتووچوو لە ئەستۆی كۆمپانیەكەیە.
4- داواى قەرەبووكردن بكەن بۆ هەر زیانێك بە زەوییەكەتان بگات.
5- داوا لە وەزارەتی سامانە سرووشتیەكان و وەزارەتی كشتوكال بكەن هەستن بە پێداچوونەوە لەبارەی نرخی هەر دۆنەمێك.
لیژنەی مافی كرێكار، خەڵك و ژینگە
شەمال رەئوف، هوشیار عەبدولعەزیز، جەوهەر شوكور، هاورێ پێشڕەو، هیوا محەمەد، سیروان نەوروز، سەلام عەبدوڵلا
07702109388