جەلال تاڵەبانی ئاسۆس هەردی و ئەحمەد میرە ڕزگارت ناکەن

Sunday, 25/09/2011, 12:00

سەرکردایەتی یەکیەتی نیشتمانی، لە پێشیانەوە جەلال تاڵەبانی. بە جۆرێک بەڵانسی ئەقڵ و سیاسیان تێکچووە، هەروەکوو مەڕی گێژ ڕەمەکیانە، لە تەنگژەو هەڵدێرێکی سیاسیەوە بۆ تەنگژەو هەڵدێرێکی تر، بەبێ هیچ بیرکردنەوەو هەروەستەیەک، یان پرسیارکردنێک لە خۆیان، بۆ چارە سەرکردنی گرفتە سیاسیەکانیان ملیان ناوەتە ڕێگا بەرەو نادیار. بە ڕاست و چەپیاندا دەستیانکردوە بە هێرشکردن و شەق وەشاندن.
بەم هەڵس و کەوتە بێ سەروبەرو هەنگاوە نا سیاسیانەشیان، ڕۆژ بە ڕۆژ، کەڵێنی لێکدابڕانیان لێ فراوانتر دەبێت لەگەڵ جەماوەری کوردستان، بەتایبەتیش خەڵکە ڕۆشنبیرو خاوەن فکرو ڕۆژنامەنووس و نووسەرەکان.
ئەو تەڵەزگە سیاسیەو کەوتنە ڕەوشتیەی، کە تێشیکەوتوون، لە خۆیان قووڵترو گەورەتری دەکەن، بە شێوەیەک کە دەرباز بوون ئاستەمە بۆیان. جەلال تاڵەبانی لە کۆتایی و دوا بەشی تەمەنی خۆی و تەمەنە سیاسیەکەی، بەو ئیتیفاقیەی ملکەچی و سەرشۆڕی بۆ بنەماڵەی مەلا مستەفا بارزانی خائین، بە ناو ئیتیفاقیەی ستراتیژی.
یەکیەتی لە هێزێکی جەماوەری و چەپ و سۆسیال دیموکرات، کرد بە هێزێکی مێلیشیایی تفەنگ تەقێن و شەق وەشێن، وە خاڵیشیکردەوە، لە هەر هەموو پرێنسیبە فکری و ڕەوشتە سیاسی و ڕەوشتە کۆمەڵایەتیەکانی.
یەکیەتی، لە هێزێکی شۆڕشگێڕەوە کرد بە هێزێکی مافیایی، بۆ پارێزگاریکردن، لە بەردەوام بوونی لە دزی و تاڵانی میللەت. وە یەکیەتی، نەوەک هەر گەیاندە ئاستی یەکسانکردنی، لە قێزەونی و خیانەتکاری بنەماڵەی مەلامستەفا بارزانی ئاشبەتاڵچی، بەڵکو گەیاندیە ئاستێکی گەلەک نزمتر .
کارڵ مارکس زۆربلیمەتانە دەربارەی ئەمجۆرە سەرکردانە پێکاویەتی و دەڵێت:" ئەگەر ویستت ببیت بە کەسێکی هیچ و پووچ، ئەوەی لەسەرتە تەنها پشت کردنە لە نیگەرانی کەسانی تر".
 یەکیەتی،هەر لە شاخەوە، هەر کاتێک توشی تەنگژەو تەڵەزگەی ڕێکخستنی و سیاسی بووبێت، چ لەناوەخۆی، یا لەدەرەوەی، بەماوەیەکی کەم توانیویەتی خۆی دەرباز بکات و زیانەکانیشی، بە باشتر قەرەبۆ بکاتەوە.
بەڵام ئەو تەڵەزگە سیاسیە قووڵەی کە ئەمڕۆ جەلال تاڵەبانی و یەکیەتیەکەی تێیکەوتوون، بیرکردنەوەو ئەقڵیانی بە تەواوەتی بە بنبەست گەیاندوەو لە پەل و پۆی خستوون، وە بە یەکجارەکی لەوەش چوونەتە دەرەوە کە بتوانن، بە ئەقڵیەت و بە شێوەیەکی جیاواز، لەوەی ئێستایان بیر بکەوەنە.
 هەرچی دەستی بۆ دەبەن و هەرهەنگاوێک دەیهاوێژن، ئاکامەکەی بە شکست و بە ڕیسوا بوون تەواو دەبێت بۆیان.
ئەنشتاین دەڵێت:"ناتوانین چارەسەری کێشەیەک بکەین، بە، بەکار هێنانی هەمان ئەقڵیەتی کە کێشەکەی خوڵقاندووە".
 ئەم ڕەوشە نالەبارەو گێژاوە سیاسەی کە یەکیەتی تێیکەوتووە. جارێکی ترئەو ڕاستیە ڕەهایە دەسەلمێنێتەوە، بۆ خودی جەلال تاڵەبانی و سەرکردەو ئەندام و کادێرەکانی یەکیەتی و تەواوی، بەناو ئەو ڕۆشبنیرو ڕۆژنامەنووس و حزبە بچووکە، کەرامەت فرۆشەکان بە جەلالی و مەلایی.
 لەوەی کە، نەوشێروان مستەفا هەر لە سەرەتاوە، لە ناو یەکیەتیدا، بەردی پارسەنگی تەرازووەکەو خاڵی چەقی هێزی ڕێکخستنەکان و پێشمەرگایەتی و جەماوەری و سیاسی یەکیەتی بووە. دەرکەوت کە نەوشێروان مستەفا، داینەمۆی سیاسەتی بەڕێوە بردنی یەکیەتی بووە. لە دەربازکردنی یەکیەتی لە تەنگژەو تەڵەزگە سیاسیەکانی، هەروەها سەرخستن و بەرەو پێشەوە بردنیشی، لە ئەنجامدانی ئەرکە نەتەوەیی و نیشتمانی و پێشکەوتنخوازیەکانیدا، وە دەرکەوت کە جەلال تاڵەبانی بەبێ نەوشێروان مستەفا یەکسانە بە هیچ.
هەر لەو ڕۆژەی نەوشێروان مستەفا، ئەو دەریایەی کە بە ناو گەڵی جەلال تاڵەبانیدا ڕایکێشا، جەلال تاڵەبانی بە هەموو ئە‌قڵێ خۆی پێیوابوو کە دەتوانێت بە پارەی دزی و تاڵانی ئەومیللەتە، بەربەستی بۆ دابنێت و بەری پێبگرێت و، وشکی بکات. هەوڵیدا، شوێنی نەوشێروان مستەفاو ئەو ئەندام و کادێرو پێشمەرگە هاوهەڵوێستەکانی، لە ناو یەکیەتیدا، بە پارەی دزی و تاڵانی و سیخوڕەکانی ناو حزبە بچووکەکان، پڕ بکاتەوەو قەرەبۆی بکاتەوە.هێشتاکەش نایەوێت دان بەو ڕاستیە دابنێت، لەوەی کە نەوشێروان مستەفا بە هاتنە دەرەوەی لە ناو یەکیەتیدا، جەلال تاڵەبانی کردوە بە یەکەمین و گەورەترین " قەلۆشی" سیاسی لە کوردستان! وە یەکیەتیش بووە بەو هێزە، بە ناوو بە قەبارە گەورە، بە ناوەرۆکیش بەتاڵ و پووچ.
ئەوەتا جەلال تاڵەبانی قەلۆشی سیاسی، لە بەردەم کورژ بوونەوەو بچووک بوونەوەی یەکیەتیەکەی، هیچی پێنەماوە دەستیکردوە بە کۆکردنەوەی ئەو سیخوڕانەی کە لەناو حزبە بچووکەکان دروستیکردبوون و بڵاویکردبوونەوە، بانگیان دەکاتەوە بۆ ناو یەکیەتی. بە بێ گوێدانە هەست و ماندوو بوون و خەبات و قوربانی تەواوی ئەو ئەندام و کادێرانەی کە هەردەم ڕەنگی خوێنی خۆیان بە سەوز زانیوە لە ناو یەکیەتیدا. دێت لەسەر حیسابی ئەوان، بێ شەرمانە پۆستی سەرکردایەتی دەداتە، یەکێک لەو سیخوڕانەی، کە لە کاری سیخوڕیکردن بەسەر قادرعەزیزەوە خزمەتێکی زۆری هەبووە بۆ جەلال تاڵەبانی.
 وەکوو ئەوەی کە ئێستا لەناو یەکیەتی کادیرێکی لەم سیخورانەی پیاوترو چاکتری تیا نەمابێت. بەمکردەوە سەقەتانەی پێیوایە، دەتوانێت شەبەقەکانی ناو یەکیەتی پینە بکات و یەکیەتی پێ قەبە بکاتەوە، وە نیشانیشیبدات کە یەکیەتیە مردووەکەی هەر زیندووە!
لێرەدا پرسیارێک بۆ ئەو ئەندام و کادێرانەی ئێستای ناو یەکیەتی : ئایا لە ناو یەکیەتی ئێستا ئێوە ڕێز لێگیراوو بە قیمەترن یان ئەو سیخوڕانەی کە جەلال تاڵەبانی لە ناو حزبە بچووکەکان و ئەملاو ئیملا کۆیان دەکاتەوەو دەیانهێنێت، دەیانکات بە بەر پرس و بە سەرکردایەتی بە سەر ئێوەوە؟!
جەلال تاڵەبانی هەر بەو سەر لێشێواویەو هیستریایەی، کە لە داخی نەوشێروان مستەفا توشیبووە، مەکتەب سیاسیەکەی تەواو ئازادکردووەو بە بڕیاریش ڕایسپاردوون، کە بچن هەرچی خەڵکانی ئازادیخوازو ڕەخنەگر هەیە لە خۆیان، بە تایبەتش ڕۆژنامە نووس و نووسەرەکان، بدەنە بەر شەق و ڕاپێچی زیندانیان بکەن. بریندار کردنی ئاسۆس هەردی و هەڵکوتانە سەر ئەحمەد میرە بەو شێوازە مافیا گەریە، هەروەها چاو سورکردنەوەو هەڕەشەی، بە ڕاستەو خۆو ناڕاستەو خۆو، لە ڕێگای تەلەفۆنیشەوە، نەوەک هەر بۆ ڕۆژنامە نووسان و نووسەرانی ئازادیخوازی ناوەوەی کوردستان، بەڵکو بۆ ئەوانەی دەرەوەی کوردستانیش، دەڵێن: ئێوە بە قسە کردن و نووسینە ڕەخنە ئامێزەکانتان، لەسەر جەلال تاڵەبانی و یەکیەتی، زەرەر بە خۆتان دەگەیەنن! ئەمە بەشێکی ئەو سیاسەتە، بێ ئومێدانەیە، کە جەلال تاڵەبانی گرتوویەتیە بەر، لە هەوڵێکی نەزۆک بۆ زیندووکردنەوەی یەکیەتیەکەی! لە بەردەم شکستەکان و نەمانیدا، بە تایبەتیش لەبەردەم بەرەو پێشەوە چوون و سەرکەوتنەکانی بزوتنەوەی گۆڕان و نەوشێروان مستەفادا.
 سەرکردایەتی یەکیەتی، بەم پەلامارە ئەحمەقانەو لێکنەداوەیان، بۆ ئەم هێرشەی کە کردیانە سەر ئاسۆس هەردی و ئەحمەد میرە، نەوەک هەر لەبەرامبەر جەماوەری کوردستان خۆیان ڕیسوا کرد، بگرە بنەماڵەی خائین و دزو تاڵانچی خێڵەکی مەسعود بارزانیش، زۆر بە چاکی ئەو مەسەلەیان قۆستەوە، بە بێ ئەوەی ڕەچاوی ئیتیفاقیەی ملکەچی و سەرشۆڕی ستراتیژی جەلال تاڵەبانی بۆخۆیان بکەن،هاتن بە مەسینە هەڵگرێکیان (جەعفەر ئیبراهیم) ئابڕوی یەکیەتیان کردە تەنەکەی خۆڵەوە. بە چاوپێکەوتنێکی لە گەڵ(گۆڤاری سڤیل) ووتی:(لێدانی ئاسۆس هەردی ئێمەی نیگەرانکرد... وە ئێمە بە دواداچونمان بۆ سەر سکاڵاکەی ئەحمەد میرەش نەکردبوو، کەسیش مافی نیە لە جیاتی ئێمە بەدواداچوون بکات)
سەیرکەن ئەمە هەقیقەت و ڕیاکارییەتی هەردوو بنەماڵە دزو تاڵانچیەکەیە. لە هەر دەلیڤەیەکی بچووک فرسەتیان بۆهەڵکەوێت لەیەکتری، بێ ئابڕوانە دەیقۆزنەوەو وەکوو ئەژدیها پەلاماری یەکتر دەدەن. بنەماڵەی بارزانی کورد کوژ خۆیان زۆر پێ شەریف ترە لە جەلالیەکان، وەکوو ئەوەی کە ئەو بنەماڵە خائینەی بارزانی، ڕۆژنامە نووس سەردەشت عوسمانیان تیرۆر نەکردبێت!!
ئەوەنە جەلالی و مەلاییەکان، لەوەتای هەن تەبایی نێوانیان، تەنها لە سەر خیانەتکردن و کورد کوژی بووە، دەنا ئەوەی تر هەرچی هەیە لە سەری ناکۆک و دوژمنی یەکن. مەسعودە قەزەمەکەی مەلا مستەفا بارزانی دۆڕاو، تازە بەتازە دێت لە سلێمانی داوای یەکگرتن و یەکخستنی نێو خۆی ماڵی کورد دەکات! دوای ئەوەی لە هەرچی سیاسەت و ئەقڵ و ڕەوشت و مرۆڤایەتی هەیە قەلۆش بوون، جا ئەو کاتە ماڵی کوردیان دێتەوە بیر. پرسیارێک بۆ جەلالیەکان، بە تایبەتیش بۆ مەسعودی گەمژە، باشە دەتوانیت پێمان بڵێیت: هەر لە زەمانی باوکە ئاشبەتاڵچیەکەت تاوەکوو ئێستا، کەی ماڵی کورد یەکگرتوو بووە؟!
 دەتوانیت پێمان بڵێیت کە ماڵی کورد چ کاتێک، بە ئێستاشەوە، ئێوە هەردەم شەڕو نا تەباییتان لە ناویا نەناوەتەوە؟ هەی لە مەلا مستەفا بارزانی باوکت دۆڕاوترو قەلۆش تری سیاسی. ئێوەی جەلالی مەلایی پێتانوایە بە دیکتاتۆریەت و پارەی دزی و تاڵانی دەتوانن بەردەوامبن؟ یان دەتوانن بە لێدان و گرتن و کوشتنی خەڵکانی ئازادو ڕۆژنامەنووسان و، سەرکوتکردنی ئازادی.
 کۆمەڵگا بینا بکەن و ئازادی تیایا فەراهەم بکەن؟! ئێوەی دیکتاتۆر، کەی ئەقڵ و زمانی گفتوگۆی سەردەمیانەتان هەبووە، جگە لە زمانی مەرگ؟ ئیوەش هەروەک دیکاتاتۆرە هاو خوێنەکانتان، کەی براواتان بە ئازادی میللەت هەبووە؟ ئێوە دوژمنی ئازادین هەرەوک ولیەم ڕالف ئینغ دانەرو قەشەی ئینجیلی ئینگلیزی دەڵێت:"دوژمنانی ئازادی وتوێژ ناکەن،بەڵکو هاوار دەکەن و تەقە دەکەن"
ئەوەی تا ئێستاکە هەیە لەو دەستەڵات و ئازادیە هەر هەمووی بە خۆێن و ڕەنج و خەباتی ئەو میللەتە بووە، بەڵام لە سایەی دیکتاتۆریەتی ئێوەوە، هەمووی بۆتەوە بە نەهامەت بەسەریدا و هیچ سوودیشی نەبووە بۆیان.
خۆسیە ڕیزاڵ بەرهەڵستکاری دژ بە داگیرکەرانی ئیسپانی، وە یەکێکە لە کەسە سەرەکیەکانی دامەزراندی فلپین دەڵێت:" چ دەسکەوتێکمان لە سەر بەخۆیی دەبێت، گەر کۆیلەکانی ئەمڕۆ ببنە دیکتاتۆری بەیانی"
ئەوەی کە ئێمەش لە سایەی بە ناو ئەو ئازادیە بەدەستمان هێناوە، جگە لە بەردەوامیەتی تەواوکردنی دەستەڵات و ئەجیندای داگیرکەرانی بێگانە، لە لایەن جەلالی و مەلاییەکان شتێکی زیاتر نیە. ئەوەتا پێمان دەڵێن نان و ژیانتانمان دابینکردوە، کەچی ئاگری بێ ئومێدی لەئایندەو ژیان، بەر دەبێتە جەستەی(بەناز جەواد) دەڵێن ئازادی ڕادەبڕین و ئازادی ڕۆژنامە گەری و ئاسایش هەیە، بەڵام بە بەرنامە ڕۆژنامە نووس و دەنگی ئازاد تیرۆر دەکەن!
کەس نابێت شتێک بڵێت کە جەلالی و مەلاییەکان بەدڵیان نیە. نوسەرو رۆژنامە نووسی میسری مستەفا ئەمین لە مبارەوە دەڵێت:" ڕۆژنامەی ئازاد، ئەوەی کە میللەت دەیەوێت بە دەستەڵاتی دەڵێت، نەک ئەوەی کە دەستەڵات دەیەوێت بە میللەتی بڵێت"
ناکرێت باس لە ئاسایش بکرێت، بە بێ ئازادی ڕۆژنامەگەری. تۆماس جفرسونیش، زۆر بە جوانی باسیلێکردوەو دەڵێت:" گەر هات و ڕۆژنامەگەری ئازاد بوو، وە لە توانی هەمووانیشدا هەبوو بیخوێننەوە، ئەو کات ئاسایش هەیە"
جەلالی و مەلاییەکان، باشبزانن خەڵکانی ئازادیخواز لە بەرەی گەل، بەتایبەتیش ڕۆشبیرو ڕۆژنامەنووس و نووسەرەکان، بڕیاریانداوە کە تا دوا هەناسە لە پێناوی ئازادی کۆمەڵگای کوردی و تاک بەتاکی کورد کۆڵنەدەن. سۆرانی مامە حەمەو سەردەشت عوسمانتان، لە ئێمە تیرۆرکرد، نەتانتوانی ئیرادەی ئازادیخوازیمان بشکێنن.
ئاسۆس هەردی و ئەحمەد میرەو نەبەز گۆران و چەندانی تر شەهیدی زیندوون، جاونەترسانە لە ڕێگای بەدەستهێنانی ئازادی بەڕێوەن.
هەروەک گیڤارا باس لە ئازادی دەکات و دەڵێت:"پێمدەڵێن گەر بینیت کۆیلەیەک خەوتووە بە ئاگای نەهێنیت نەبادە خەون بە ئازادیەوە ببینێت، پێیاندەڵێم گەر کۆیلەیەکم بینی خەوتووە بە ئاگای دێنم و باسی ئازادیشی بۆ دەکەم"
مەلایی و جەلالیەکان، ئێمەش ڕۆشبیران و ڕۆژنامە نووسان و نووسەرەکان، نەوەک هەر لەسەرتاسەری کوردستان، بەڵکو لە هەر کونج و کەلەبەرێکی ئەم دونیایە، هەر کۆیلەیەکی کوردی خەوتوو ببینین بە ئاگای دێنین و تێر تێریش باسی ئازادی بۆ دەکەین. ئێوەش منەتتان نەبێت.