نەوشێروان مستەفا گۆڕان و چاکسازیش بە موجامەلە و دەعوەت ناکرێت!

Monday, 16/01/2012, 12:00

چالاکوانی مافپەروەری ئەمریکی، بە ڕەگەز ئەفریقیایی، مالکۆم ئێکس دەڵێت:" مێژوو بیرەوەری(زاکیرەی) خەڵکە، وە بەبێ بیرەوەریش مرۆڤ دادەبەزێت بۆ پلەو پایەی خوارەوەی ئاژەڵەکان"
ئەکتەرو نووسەرو چالاکوانی سیاسی ئەمریکیش، جین فۆندا دەڵێت:"نازانم چۆندەکرێت وڵاتێک، کە گەلەکەی لە هەقیقەت و مێژوو خۆیبێئاگا دەکات، ناوزەد بکرێت بە وڵاتێکی ئازاد"
خۆبێ بیرەوەریکردن و خۆبێئاگاییکردن لە هەقیقەت و مێژوومان، وەک دوو کۆڵەگەی دووانە، لە پانتایی ئەقڵ و بیرکردنەوەماندا دامانکووتاون و جێگیرمانکردوون. بەشێوەیەک بووە بە خووەکی نێگەتیڤی درمی، کە بە بەردەوامی و کاریگەرانە، خۆمانیان پێهەڵئەخەڵەتێنین، بۆ خۆ دزینەوە لە ڕوو بە ڕوو بونەوەی هەقیقەت و ڕاستیەکاندا. وەها ئەقڵی خۆشمان پێیان فۆرماتکردوە، لەگەڵ هەموو ڕووداوێکدا، بە بێ هیچ بیرکردنەوەو لێکدانەوەیەک، زۆر بە خێرایی و بە گەرمیەکی کەم، شیر ئاسا، بێینە قوڵپ و هەڵبچین. هەر دەستبەجێش بە فووەکی بچووک ساردببینەوە، بۆ دۆخی ئاسایی و هەرچی هەشە، لەو ڕووداوانەی کە بە سەرمانهاتوون، بیرمان بچێت، تا هاتنە پێش و ڕوودانی رووداوێکی تر، ئینجا هەمان هەڵس و کەوت دووبارە بکەینەوە. ئەم ڕەوشە ناسروشتیە وامانیلێکردووە، بەردەوام ڕوو لە نادیارو نا ئومێدانە، لە بازنەی گۆشەگیری متمانەو بڕوا بە خۆ نەماندا بسوڕێینەوە. ئەوەتانێ بە بەر چاوی هەموومان و تەواوی گەلەکەمان، بە ناو سەرۆک و حزبە کوردیەکانمان، بەردەوام "هەڵە مێژووییەکان" دووبارەو سەد بارە کەنەوە، بە بێ ئەوەی ئێمەش، بە قەد نووکی دەرزیەک، جووڵە بکەین. کت و مت، بە وێنەی ماری سڕبوو لێیڕاکشاوین، لە تەمبەڵی و خەوی و خۆبێ بیرەوەریکردن و خۆبێئاگاییکردن لە مێژوومان. سەرکردەکانی مەلایی و جەلالیەکان و ئیسلامی و تێکڕای حزبەکان، هەروەک کورد وتەنی" جەنجەر لە کان" لە دووبارە کردنەوەی هەڵەکان، بەبێ هیچ سڵەمینەوەو لەمپەرێک، چونکە تا ئێستا، نە باجی هیچ هەڵەیەکیانداوە، وە دڵنیاشن، کە لە ئایندەشدا تا ئەوکاتەی ئێمە دەستمان بەکڵاوەکانمانەوە گرتبێت، بەبێ باجدان بۆیان دەچێتە سەر. لە تەواوی شەڕەکانی کورد کوژیاندا، کە ئێمەیان بە دەستی یەکتری تیایا بە کوشتنداوە، زۆر بە سەخاوەتەوە، خوێنی خۆمانکردۆتە ناو زەلکاوە بۆگەن و ڕەشەکانیان. وە هەر دەمیش ئامادە بووینە، بۆ دانی هەرچی باجی گەورەو زیان وێکەوتنێک هەیە، کە لە ئاکامی هەڵەی سیاسەتە، خیانەتکارانەو دۆراوەکانیدا دەکەوێتەوە.
بە درێژایی مێژوو، عەرەب و فارس و تورک، لە مانەوەو نەمانیاندا، لە شەڕو لە ئاشتیاندا، چ دژ بە یەکتری، چ لە ناوەوەی خۆیاندا بە جیا. نەمانی کوردو گلدانەوەی خاکەکەی بەیەکجارەکی، وەکوو پڕنسیبێکی پیرۆز، چەسپاوو جێگیرە، لە ئەقڵ و بیرکردنەوەو پڕاکتیکیاندا. هەموو کاتێکیش، ئێمەی کوردیان بە خاکەکەمانەوە، کردۆتە پەڕۆو پینەی یەکڕیزی و ڕیکخستنەوەی ناو ماڵەکانی خۆیان و قوربانی بەرژەوەندیە ستراتیژیەکانیان. ئەو شەرەی ئەمڕۆی شیعەو سووننەش، ڕووداوێکە، تەنها بە شێوە نەبێت، دەنا بە ناوەرۆک، ئەڵقەی زنجیرەی هەمان ڕووداوە ڕابردوەکانی مێژوومانە، کە هەردەم بە زیانی ئێمە کۆتاییانهاتووە. لە ئێستاکەشدا، گەر بێت و لە دەقی چوارچێوە مێژووییەکەدا، خوێندنەوەو لێکدانەوەی زانستیانەی بەردەوام نەکەین، لە سەر بیرکردنەوەو تێڕوانینی، دوژمنە داگیرکارەکانمان، دەرهەق بە خۆمان و جیۆپۆلیتکی خاکەکەمان. وە لە هەر هەمان دەق و چوارچێوە مێژووییەکەشدا، خوێندنەوەو لێکدانەوەی زانستیانە نەکەین، لە سەر بیرکردنەوەو تێروانینی خۆشمان، لە سەر خۆمان و خاکەکەمان. ئەوا هەرگیز وەکوو چۆن لە ڕابردوودا، ئێستاکەش ناتوانین، نە لە خۆمان، نە لە حزب و سەکردە خائینەکانمان، وە نە لە دوژمنە داگیرکارەکانیشمان تێبگەین. هەرگیز ناشتوانین، زاڵبین و بڕیاری سیاسیانەی ڕاست و تەندروستیش بدەین، بۆ بارو دۆخە سیاسیەکەو ڕووداوەکان. هەرەوەک ئەدیب و شاعیری ئەڵمانیش یۆهان فۆلفغانغ فۆن غۆتە دەڵێت:" ئەوەی کە نەتوانین بە تەواوەتی لێیتێبگەین، ناشتوانین زاڵبین بە سەریدا"
ناپلیۆن دەڵێت:" لەو کاتەی کە دوژمنەکەت لە ئەنجامدانی هەڵکردندایە، هەرگیز نەکەیت بیپچڕێنیت" ئایا ڕاگرتنی ئەو شەڕی نێوان شیعەو سووننە، لە کوێی قازانج و بەرژەوەندی کوردو کێشەکەیەتی؟ لە نێوانی، ئێمەی خەڵکانی کوردستان، دەستەڵاتی مەلایی و جەلالی و دەستەڵاتی داگیرکارانی کوردستان، کێ سوودمەندو سەرکەوتووە، لە نەمانی شەڕی نێوان شیعەو سووننەدا؟ بۆچی هەموو کاتێک، جەلالی و مەلایی و حزبە وابەستەکانیان، یەکڕیزی تەبایی ناو ماڵی کورد، تێکدەدەن و دەیکەنە قوربانی، لە پێناوی تەبایی و یەکڕیزی ناو ماڵی دوژمنەکانمان؟
بە نزیکبوونەوەی ڕژێمی بەشار ئەسەدی دیکتاتۆری سوریا، لە مەرگی یەکجارەکی و لە ناوچوونیدا. ململانێ و شەڕی بە نەهێنی وبە ئاشکرای، نێوانی ئەمریکاو هاوپەیمانەکانی لە لایەک، وە تەوەری دیکتاتۆری و کۆنەپەرستی ناوچەکە، بە سەرۆکایەتی ئێران، لە لایەکەی تریەوە، تیژڕەوانەتر، هەڵدەکشێت و پەرەدەسێنێت. لە بابەتەکانی پێشووتریشمدا وتوومە: کە ئێران ئێستا شەڕ بە تەواوی دونیا دەفرۆشێت، هەموو هەوڵەکانیشی چڕکردۆتەوە لە پێناوی نانەوەی شەڕێک لە ناوچەکەدا، بەهەر شێوەیەک بێت.... بۆ لە ڕێگەلادان و نەهێشتنی سۆزو پشتگیری کۆمەڵگای نێودەوڵەتی، بۆ شۆڕشی گەلانی سوریا. لە پێناوی ڕزگارکردنی بەشاری دیکتاتۆر. لە بەر ئەوەی سوریا نەوەک، هەر هاوپەیمانی ستراتیژی، بەڵکو سەنگەری یەکەمی بەرگری و مانەوەی ڕژێمی ئاخوندە دیکتاتۆرەکانیشە. زێدەڕۆییکردن نیە، گەر بڵێین: ئەمرۆ کوردستانەکەی ئێمە، کراوەتە گۆڕەپانی بەشێکی هەرە گەورەو، بگرە زیاتریش، لەو ململانێ و شەڕەی نێوان ئەمریکاو ئێران! ئەوەتا جارێکی تریش، داگیرکارانی کوردستان، هەروەک جارانی پێشوو، لە مێژووی ڕابردووماندا، کوردستان و بەرژەوەندیەکانی گەلی کورد، بە پاڵپشتیکردن و یارمەتی، دەستەڵاتی مەلایی و جەلالی و((هێزەکانی ئۆپۆزسیۆن)) دەکەنەوە قوربانی بەرژەوەندی و ئامانجە گلاوەکانیان. ئەوەی سەیرە لێرەدا ئەوەیە، بۆچی بزوتنەوەی گۆڕانیش، لەمکاتەدا بەکوڕکردنی، (تەبەننی) هەمان سیاسەتی مەلایی و جەلالی دەکات؟! ئایا ئەم سیاسەتەی گۆڕان، سەرەتای وازهێنان و گۆڕانی پاشگەزبوونەوەیە، لە گۆڕان و چاکسازی، بۆ سیاسەتی خۆ بە مەلایی و جەلالی کردن؟! ئایا نەوشێروان مستەفا، لە بە کوڕکردنی، سیاسەتی ناوبژیوانی مەلایی و جەلالیەکان، پێچەوانەی ئەو سیاسەت وفکرەی خۆی نیە، لە سەر یەکگرتنەوەو ڕێکخستنەوەی ناو ماڵی کورد؟ چۆندەکرێت، مەلایی و جەلالی، ناو ماڵی کورد تێکبدەن، بەڵام تێکچوونی ناو ماڵی دوژمنەکانمان، هێڵی سوور بێت، بە لایانەوە؟! ئەی هەر چەند ڕۆێک، پێش تێکبەربوونی، مالکی و هاشمی نەبوو، بنەماڵەی بارزانی، بە پاچ و تەوری کورد کوژی، بۆ تێکدانی زیاتری ناو ماڵی کوردی، هێرشیانکردە سەر بارەگاکانی یەکگرتوو؟! خۆ هێشتا دووکەڵی ڕەشی ئاگری ڕق و کینەی کورد کوژی بنەماڵەی بارزانی، نەسڕاوەتەوە لە سەر دیواری بارەگاکانی یەکگرتوو، کەچی مەسعودی سەرۆکی پارتی، بەبێ هیچ هەڵوەستەو شەرم لە خۆکردنێک، بەراکردن دەچێت، دەبێتە ناوبژیوانی عەرەب و عەرەبی عیراقی!
ئایا هۆکاری سەرەکی، لەو سووکایەتیەی کە چەندین ساڵە، بە دەستی مەلایی و جەلالیەکان و هەرچی حزبی خۆفرۆشی کوردی هەیە، کە پێماندەکرێت، هەر خۆمان نین؟!
ئاخر نەوەک هەر لە لۆژیک و ڕیالیستیەتی ژیاندا، بەڵکو لە ناو فکرو خەیاڵی ناو چیرۆکە فەنتازیەکانیشدا، نەبووەو نە بیستراوە، کە بەرخ، بە شەڕو یەکتریخواردنی ناو گەلە گورگە بخۆرەکانی تەنگەتاو بێت. هەرگیز بەرخ، نەبۆتە ڕیش سپی و ناوبژیوانیکاری شەڕی ناوەخۆی گەلە گورگەکان و ئاشتکەرەوەیان، بۆ دەستبەتاڵبوونیان،تا باشتر لە جاران بەربنەوە گیانی و بیخۆن. تۆ بڵێی ئێمەش، بێ ئەوەی بە خۆمان بزانین، کۆمەڵگەیەک بین لە بەرخ و گورگیش حوکمڕانمانبێت؟! هەروەک، فەیلەسوف و ئابووریناسی فەڕەنسی بیرتراندی دی جۆنفیل دەڵێت:" کۆمەڵگەیەک لە بەرخ، زوو یان درەنگ، حکومەتێک لە گورگان حوکمڕانیان دەکات" باشە، ئەگەر جەلال تاڵەبانی و مەسعود بارزانی، خۆیان بە خائین نازانن، بە تایبەتیش مەسعود، بۆچی تا ئێستا نەهاتووە، لە پێناوی یەکڕیزی و تەبایی ناو ماڵی کورد، کۆتایی بەو شەڕە کورد کوژیە بێنێت، کە مەلا مستەفا بارزانی باوکی، لە نزیکەی ٥٠ ساڵ، لە پێش ئێستادا هەڵیگیرساند؟ سەیرکەن، لەو ڕۆژەی ڕادەستکردنەوەی حکومەت باسیلێکراوەو ئامادەکاری بۆ دەکرێت. شەڕی مەلایی و جەلالیش دەستیپێکردوە، لەسەر هەموو ئاستەکان. گەر هاتباو ئەندام و لایەنگرەکانی خۆیان،هەروەها جەماوەری کوردستانیش بە تایبەتی، لایەنی هەرەکەمی پەرچەکرداری پۆزەتیڤانەیان هەبوایە، بۆ لایەنگری و پشتگیریکردنیان، لەوەی ئێستا بەرامبەر بەیەکتریدەکەن. ئەوا دەمێک بوو جارێکی تر، یەکتریان خەڵتانی خوێنی کورد کوژی دەکردەوە. تەنانەت، لەو پەلاماردان و هێرشەی بنەماڵەی بارزانی، بۆ سەر بارەگاکانی یەکگرتووی ئیسلامیش گەر، لایەنی هەرەکەمی پشتیوانیکردنیان هەبوایە، لە لایەن کادێرو ئەندامەکانی خۆیان، یان، لەو هەزار مێرەی بنەماڵەکەیان، بە دڵنیاییەوە خەڵکێکی زۆری یەکگرتوویان دەکوشت، بگرە هەر لە ناو بارەگاکانیاندا، دەیانسووتاندن.
بنەماڵەی بارزانی، لەگەڵ جەلال تاڵەبانی و یەکیەتیدا، گەیاندویانەتە سەر مریشکە ڕەشە. بە ئیعازی خودی مەسعود، فازل میرانی بەربۆتە، جەلال تاڵەبانی و یەکیەتی و هەڕەشەکردن و جنێودان و سووکایەتیکردن پێیان. هەر لە هەڕەشەکردنەکەی بە، سی هەزار، مێرە خودکوژەکانی بارزانی، تا گەیاندەیانە ئەو ئاستەی، کە فازل میرانی، ڕاستەو ڕاست، بە جەلال تاڵەبانی و یەکیەتی ووت: "ئێوە پیاو نین" بەوەش نەوەستان، لەدوای کۆبونەوەی سەرکردایەتیان، هاتن وتیان: فازل میرانی زۆر کەمی وتووە، بە ملیۆنان کەس، ئامادەیە، خۆی بۆ مەسعود بارزانی بداتە کوشت! لەوەیان خراپ نیە، گەر ئاگاداربن و بیرتاننەچێت، بە تایبەتیش بۆ مەسعود بارزانی، دوێنی بوو موعەمەر قەزافیش، بەر لە ڕووخان و دەستگیرکردنی، ئەی ووت: بە ملیۆنان کەس لەگەڵمدان! بەڵام کاتێک، کە لە لایەن جەماوەریش دەستگیرکرا، وێنەکەمان بینی، کە لە "پارچە دارێك" بەو لاوە بترازێت، هیچی تری لە دواوە نەبوو!! قسەی خۆشمان بێت، بنەماڵەی بارزانی، دەرهەق بە یەکیەتی ڕاستدەکەن، چونکە تا ئەو کاتانەی، کە جەلال تاڵەبانی و یەکیەتی پیاو بوون، پێشمەرگەکانی یەکیەتی هەر بە پشتیکراوە، شەڕی بنەماڵەی بارزانیانکردەوە و چاکترین، (ماراسۆن وانیشیان) لێدروستکردبوون! هەقیانە، چونکە ئەمڕۆکە، ئەو ڕۆژ نیە! جا بابزانین، لەو ماوەیەدا، لە پێکهێانی حکومەت، جەلال تاڵەبانی و یەکیەتیەکەی، ئەو ناپیاوە دەبن، وەکوو ئەوەی فازل میرانی پێی ووتن، ملکەچانە وەک هەمیشەیان، بۆ بنەماڵەی بارزانی، هەموو هاوکاری و پشتگیریەکیاندەکەن و حکومەتەکەیان بۆ پێکدەهێنن، وە ئەمجارەش، بنەماڵەی بارزانی زیندوو دەکەنەوە، یان دەبنەوە پیاوەکەی جاران، دەنگ بەو حکومەتە نادەن و کۆتایش بە ئیتیفاقە ستراتیژیەکە ئەهێنن و کوردستانیش بەرەو هەڵبژاردنێکی پێشوەخت دەبەن؟ بۆ کۆتایی پێهێنانی یەکجارەکەی، بە بۆگەنیەتی بنەماڵەی بارزانی.
لورد بایرون شاعیری ئینگلیزی دەڵێت:"ڕاستی هەردەم سەیرو سەمەرە ترە لە خەیاڵ" دەبێت، مەلایی و جەلالیەکان، لە پیشیانەوەش بزوتنەوەی گۆڕان، ئەمڕاستیە چاکبزانن، کە(١٧ی شوبات) قادسیەی سەدام نەبوو، ئەوانەی لە ١٧ی شوبات، خۆێنیان بە ئازادی و گەڕانەوەی کەرامەتی پێشێلکراوو دزراوی ئەم گەلە بەخشی، بۆ پەیداکردنی مووچەی مانگانەیان نەبوو! ئەو سووکایەتیە بە خەڵکانی ڕاپەڕیوی ١٧ی شوبات و شەهیدەکانیان مەکەن. هەروەک قادسیەی سەدام لە جیاتی خۆێنی ڕۆڵەکان، مەعاش و ئەرزە، بدەن بە دایک و باوکیان. لە چاوپێکەوتنەکەی، لە کەی ئێن ئێندا، نەوشێروان مستەفا لە جیاتی دەستپێشخەریەکی نوێ، بۆ ئەم ڕەوشە سیاسیە هەستیارەی ئێستا پێشکەش بکات. کەچی هات، مێخ زنجیرێکی تری، بە وێنەی کۆبونەوە گوماناویەکەی، کوتایە ئومێدی، ڕەوتی گۆڕان و چاکسازی. نەوەک وشەیەک، تەنانەت یەک پیتی نوێش. لە قسەکانیدا نەبوو. بێجگە لە گلەیی و موجامەلەی دبلۆماسیانەی دەستەڵات! بۆ نموونە نەوشێروان وتی: تا ئێستا ئێمە لە هیچ شتێکی خۆمان پاشگەز نە بووینەوە. زۆر ڕاستە، بەڵام تەنها بە قسە، پاشگەز نەبوونەتەوە! وتی: تا ئێستا لە بەغدا، بستێک خاکی کوردیان، لە جێناکۆکەکان وەرنەگرتۆتەوە. باشە کاک نەوشێروان، مەگەر تۆش وەکوو ئێمە نایزانیت، جەلالی و مەلایی، لەوەتای هەن، هەر بە گوریس، خاکی کورد ئەدۆڕێنن، بێجگە لە دەستەڵات و تاڵانیکردنیش لەم کوردە، هیچیتریان مەبەست نەبووە؟! دەڵێی ناو ماڵی کوردی بە موجامەلەو دەعوەت رێکناخرێت. ئەی باشە بۆچی خۆت، بۆ ئەم ڕێکخستنە موجامەلەیاندەکەیت؟ نەوشێروان مستەفا، ئایا پێتوایە بە موجامەلەکردنت بۆ دەستەڵات"پاکیجەکەی" چاکسازیت بۆ جێبەجیدەکەن؟ هەر بۆ مێژوو، ئەو قسەیە دەکەین: دڵنیابە، تا وەکوو یەک کەسی جەلالی و مەلایی مابێت لە کوردستان و حوکمڕانیان بە دەستەوە بێت، ئەو "پاکیجەی" تۆ بۆ چاکسازی، بە سیاسەتی موجامەلەو دەعوەتکردن، لە سەر (ڕەفەکانی) دەستەڵات، جاڵجاڵۆکە تەونی لەسەر دەکات، خۆرەکەو مۆرانەش لێیدەدات، مشکەکانیش دەیخۆن. لە ئێستاکەدا، تەنها قسەو باسکردن و بەڵێندان بۆ چاکسازی کۆتاییهاتووەو خەریکە دەبێتە شتێکی بیزارکەرو گرنگی نامێنێت. هەروەک ئابووریناسی ئەمریکی بە ڕەگەز کەنەدی دەڵێت:" هیچ گرنگ نیە کە ڕێکلام بۆ بەرهەمەکانی خۆراک بڵاو بکەیتەوە بۆ برسیەکان، نە بۆ بەرهەمەکانی سووتەمەنیش، بۆ ئەو کەسانەی کە لە سەرمادا دەمرن، نەبۆ خانووبەرەش بۆ ئەوانەی ئاوارەو دەربەدەرن" ئەوەی لەمڕۆکەدا گرنگە بۆ خەڵکانی کوردستان، وەک وتیان:"کردار شەرتەکەیە" ئەمڕۆ شەقامەکانی کوردستان لە هەرهەموو کاتێک زیاتر پێویستە بە جوڵە بخرێت، ئێستا ڕاپەرێنی خەڵکانی کوردستان، لە هەر هەموو کاتیک لە بارترو پێگەیشتووترو گونجاو ترە. کە چی نەوشێروان مستەفا تۆش لەمکاتەدا دێیت خۆت لە ئێمە دەکەیتە(عیسایەکی) ناوەخت و دەتەوێت، بە موجامەلەو دەعوەت و لاواندنەوەی دەستەڵاتی جەلالی ومەلایی، گۆڕان و چاکسازی بکەیت؟ شکسبیر دەڵێت:" لە کرداریشدا هەرگەورە بە، هەروەک چۆن لە فکردا گەورەبوویت" .