لیستا (59) و پرسا چاره‌سه‌ریا گه‌نده‌لیێ
Friday, 17/07/2009, 12:00
گه‌نده‌لى ئه‌و ئێشا هه‌ره مه‌زنه یا وه‌كى په‌نجه‌شێره‌كا كوژه‌ك د ناڤ له‌شێ وه‌لاتێ مه‌دا به‌لاڤ بووى ژ قافێ سه‌رى هه‌تا نینۆكێت پیا گرتى تا وى راده‌ى بوویه به‌نیشتێ ده‌ڤێ خویانى و بیانیان؛ و ڤێ چه‌ندێ كریه ئه‌ركه‌كێ نشتیمانى یێ ب له‌ز كو هه‌ر دلسۆزه‌كێ هه‌بت ل چاره‌سه‌ریى َ بگه‌ڕت بۆ وى ده‌ردێ گران ئه‌وێ كارتێكرنه‌كا گه‌له‌ك خراب ل ئه‌ڤرۆ و ئاینده‌یێ مه ڤى مله‌تى نه‌خاسمه بوویه مه‌ترسى ل سه‌ر ئاسایشا نه‌ته‌وه‌یى.
فه‌ره هه‌مى پێكۆل د كارێ به‌رهنگاریا گه‌نده‌لیێدا ده‌ستخۆشى لێ بێته‌كرن، به‌لێ دڤێت هشیار بین ئه‌وێن ئه‌ڤ بارودۆخه په‌یداكرین قه‌ت باوه‌رناكم ئه‌و ب خۆ چاره‌سه‌ریێ بكه‌ن ژبه‌ر دوو ئه‌گه‌رێن ساده و ئاشكه‌را، یا ئێكێ: ئه‌وه وه‌كى هه‌مى دزانن یێ گرفتێ چێكت نكارت چاره‌سه‌ر بكت، یا دووێ: ئه‌ڤه‌یه به‌رئاقل نینه ئه‌وێن هه‌تا نهۆ بۆ خۆ مفایه‌كێ به‌رده‌وام ژێ دیتى و كوردستان بۆ خۆ ب سامان و پاوانه‌كێ تایبه‌ت دزانن به‌رئاقل نینه ب ساناهى و د ناڤبه‌را شه‌ڤ و رۆژه‌كاندا ده‌ست ژێ به‌رده‌ن، له‌وا فه‌ره ئه‌م هه‌مى پێكڤه ل نوژدارێن دلساخ و شاره‌زا بگه‌ڕن و ملێن خۆ بدین بن بارێ وان بۆ وى ئه‌ركێ ژ هه‌مى ئه‌ركان ب له‌زتر و پیرۆزتر كو ئینانا دادوه‌ریا جڤاكیه و ساخكرنا ئیدارا دام و ده‌زگه‌هێن حكومى و یێن دیتر ژى ژ ده‌ردێ گه‌نده‌لیێ، و هه‌ر كه‌سه‌كێ ب وژدان ته‌ماشه‌ى لیستا خزمه‌تگوزارى و چاكسازى بكه‌ت دێ بۆ دیاربت كو فاكته‌رێن ب هێزێن ل ده‌ف هه‌ین بۆ چاره‌سه‌ریا گه‌نده‌لیێ یا كێمكرنا وێ تا راده‌یه‌كا باش، چ ژلایێ هزركى بت كو په‌یام و پرۆژه و ئارمانجێن ڤێ لیستێنه كو چه‌ندین جاران مه‌ترسیا گه‌نده‌لیێ و ل گه‌ل سۆز و په‌یمانان بۆ چاره‌سه‌ریا وێ تێدا دووباره بوویه، و یا مه‌زنتر و گرنگتر بۆ جه‌ماوه‌رێ كوردستانێ نه‌خاسمه ده‌نگده‌ران مێژوویا سیاسیا نێزیك یا پێكهاتیێن ڤێ لیستێ كو چه‌ندین بزاڤێن باش ئه‌نجام داینه د ڤى بابه‌تیدا ئه‌م رێزێن كورت ل سه‌ر دنڤێسن، و ژ وانا به‌رهه‌ڤكرنا چه‌ندین یاداشتنامه‌یان بۆ سه‌رۆكاتیا حوكمه‌تێ و سه‌رۆكێ هه‌رێمێ و پشتى چو گوهداریه‌كا باش بۆ نه‌هاتیه‌كرن ده‌رئێخستنا به‌یانناما بۆ رایا گشتى نه‌خاسمه ئه‌وا ل سه‌رێ سالا ئه‌م تێدا دژین هاتیه به‌لاڤكرن بۆ جه‌ماوه‌رێ كوردستانێ و ناڤه‌رۆكا ڤان هه‌مى یاداشتنامه و به‌یانا وه‌كى هه‌مى دزانن یا ئاڤاكرى بوو ل سه‌ر ته‌وه‌رێ چاره‌سه‌ركرنا گه‌نده‌لیا سیاسى و كارگێرى و مالى بوو.
به‌لێ مخابن ل ڤێرێ پرسیاره‌ك گۆمانكه‌ر دئێته ئازراندن و مه‌ره‌م ژى دیاره كو بێ ئومێدكرنا هاولاتیێ كورده ژخه‌بات و بزاڤا ره‌وایا لیستا خزمه‌تگوزارى وچاكسازیێ بۆ نه‌هێلانا گه‌نده‌لیێ ئه‌ڤه ب تنێیه نه‌تشته‌كێ دیتر، ژبلى وێ راستیا ته‌حل كو ئه‌ڤ پرسیاره دانپێدانه ب (الڕمر الواقع) یێ گه‌نده‌لیێ، پرسیار ژى ئه‌ڤه‌یه: "ئه‌رێ ئه‌ڤ كه‌سێن هێرشان دبنه سه‌ر چه‌په‌رێن گه‌نده‌لیێ گه‌لۆ نه ژبه‌ر وێ چه‌ندێیه چونكو چو د ده‌ستاندا نینه، و ئه‌گه‌ر ئه‌و ژى بگه‌هن سه‌رۆكانیا پاره و سامانێ كوردستانێ ئه‌و ژى دێ وه‌كى یێن دى ناكه‌ن؟! "
به‌رسڤ بێ گۆمان دێ ب نه‌رێ بت و به‌لگه ژى گه‌له‌كن، به‌لێ دێ دووان ب تنێ بێژین:
یا ئێكێ: ئه‌وه پێكهاتیێن ڤێ لیستێ یێن سه‌ره‌كى ئاڤاكرنا مرۆڤێ پاك و چاك كرینه په‌یره‌و و ئارمانج و شیاینه مرۆڤى ئاڤاكن ل سه‌ر دلسۆزیا وه‌لاتى و ترسا ژ خودێ، ئه‌ڤه باشترین رێگره ل ده‌ستدرێژیا ل سه‌ر مال و سامانێ گشتى.
یا دوێ: هێژ روهنتره كو پاره‌یێ كه‌فتى د ده‌ستێ لایه‌نێ سه‌ره‌كى یێ لیستێ كو یه‌كگرتووى ئیسلامى كوردستانه ب وى پاره‌ى ب ده‌هان هزاران سێوى یێن پێ خودانكرین و ب سه‌ده‌هان پرۆژه وه‌كى نه‌خۆشخانا یێن پێ ئاڤاكرین.
له‌وا هه‌مى ده‌نگده‌ران بێى دوودلى بێژن به‌لێ بۆ چاره‌سه‌ركه‌رێ ئێشا گه‌نده‌لیێ، به‌لێ بۆ ژماره (59)، به‌لێ بۆ لیستا خزمه‌تگوزارى و چاكسازى.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
