سینارێۆی (داعش) و ئایەندەی هەرێم !

Tuesday, 24/03/2015, 12:00

ئەوە سیاسەتبازەکانن، لە ووتارە سیاسییەکانیاندا باس لەوە دەکەن کە میللەت قوربانییە و دەسەڵاتی نییە و چی بکات، مرۆڤی وەفادار بە میللەتەکەی، دەست لەسەر زامەکان دادەنێت و نەتەوەکەی بە لێپرسراو دەزانێ بەرامبەر بە رۆنیشتنتی دکتاتۆر لەسەر کورسی دەسەڵات و بێدەربەستبوونیان بەرامبەر بەنەبوونی سیستەمی دیمۆکراسی...
بێگومان سیناریۆیەک بۆ دروستبوون، گەورەکردن و گەشەکردنی داعش هەیە و داعش بەردەوام بوونی هەمان سیناریۆیە کە بە قاعدە دەستی پێکرد و لق و پۆپی زۆری لێ کرایەوە،
هیچ لۆجیکێک مەدەنی یا سەربازی جێگای ئەوەی تێدا نابێتەوە کە داعش تەنها بەهۆی زەبروزەنگی ناو ئاینی ئیسلام دروست بوبێت، راڤە جۆراوجۆرەکان بۆ ئایەتەکان دەتوانن زەمینەیەکی باش بن بۆ چاندن و گەشەپیدانی بزوتنەوەی تیرۆریستی و وێرانکردن و لەناوبردن و هەموو توندوتیژییەکان دژی (بوون)، بەڵام بەردەوام بوون و خۆ نوێکردنەوە و بەهێز بوون تا ئەو رادەییەی بتوانیت بچیت بە گژ هەموو دنیادا دوورە لەو دینامیکانەوە کە هێزی پێ شیکاردەکرێت...تەنانەت هێزەکانی سروشت لە گڕکان، لافاو، سووتان و هەرەبروسکە ..هتد دەتوانن تا ماوەیەک بەردەوام بن و ئیتر خامۆش دەبن، ئەمە ئەو دینامیکەیە کە هێز هەیەتی، کە واتە راڤەکردنی (هێزی وێرانکەری داعش) لە پشتیوانەکەیدایە نەک لە سەرهەڵدان و زەمینەکەیدا، لەو پەیوەندیانەدایە کە بەردەوامی ئەم جۆرە سەرکێشیە خویناویانە لەگەڵ (بازاڕ) هەیانە و ئەو خزمەتەی دەتوانن بە بازاڕ و سوڕاندنی چەرخی ئابووری بکەن، سیستەمی ئابووری سەرمایە بەرو ئاقرێک بردراوە کە بەبێ ئەم شەڕانە، تووشی ئیفلیج بوون دەبێت، یانی بە ئاشکرا ئەم گۆی زەوییە دو لەتکراوە و لە سەر بیردۆزەکانی (هەمیشە تەکنەلۆجیای سەربازی دەبێت لە پێش تەکنۆلۆژیای مەدەنییەوە بێت. چەند دیمۆکراسی بین دەبێت چەکمان هەبێت، هێزی ئێمە لە بوونی چەکدایە.)، ئێمە دەزانین و رۆژانە دەیبینین کە پێشکەوتوویی تەکنیکی سەربازی بارتەقای پێشکەوتوویی ئەوتەکنیکانەیە کە بۆ چارەسەری نەخۆشییەکان بەکار دێت.

گرفتی ئێستای مرۆڤایەتی لەوەدایە
زاناکانی لەرووی مەعنەوییەوە لە ئاستی سفردان و هیچ بەربەستێک نییە کە رێگربێت لەوەی بەیانیان لە پۆلەکانی زانکۆکاندا وانەی ئاشتیخوازیانە بۆ خوێندکارەکانیان بڵێنەوە و پاش نیوەڕوان لە لابراتۆرەکانی پێشخستنی کوشندەترین چەکدا دژ بە مرۆڤایەتی هاوبەشی چالاک بن، بەڵای مرۆڤایەتی زاناکانییەتی نەک مرۆڤە ئاساییەکان،نەخوێندەوارەکان، مرۆی بێوەین و لە خێر و خۆشی هاورەگەزەکانی خۆیان زیاتر شتیکیان ناوێت و سادە دەژین و سادە دەمرن.
ئێستا ئێمە زۆر شانازی بە خۆمان و شارستانییەت و داهێنانەکانمانەوە دەکەین (ئەڵبەتە ئێمە نا، مرۆڤ مەبەستم ئەوبەرە، ئێمە لە نرخی نەبوانین و نرخەکەمان هەر هێندەی نرخی لەتێ گۆزەی شکاوە، هێماو سمبۆلین بۆ شارستانییەتێکی کۆن..بۆ وامان لێهات یا ئایا هەروابووین، هۆی زۆرە...کەم تا زۆر هەموومان ئاشنایین بە هۆکارەکان، خۆڵەکە خۆمان دەیکەین بەسەر خۆماندا!!!) جا شانازی کردنمان بەو شارستانییەتی کە هەمانە و بەو تەکنۆلۆجییایەی کە پێی گەیشتووین وا پێدەچێت سەری لێ شێواندبین،
با نموونەیەک بێنمەوە:
لە پرسەگرنگ و چارەنووس سازەکاندا، لەو ساتەوەختانەدا کە بڕیارەکان خوین دەبارێنن و کارەساتی مرۆیی دەخوڵقێنن، ئەو هەموو زانستەی کە پێی گەیشتوین و ماندووبین بۆ بەرهەمهێنانی و ئابوورەیەکی مەزنی تێچووە، وەلا دەخەین و سەرۆکی ووڵاتێک لەگەڵ مەلیکێکی نەخوێنەواردا،(ئۆباما لەگەڵ مەلیکی سعودییە) بڕیاری وا دەدەن کە بۆ دەیان ساڵ مەکینەی زەبەلاحی چەکسازی دەسوڕێنێ و ئیدی دەکەوینە کۆنفراس بەستن و هۆڵەکانی رێکخراوی نەتەوەکان! جمەی دێ لە نوێنەرانی دەسەڵاتەکان و ئەم شانۆیە بۆ هەزاران جار هەزار بارە دەکرێتەوە و خۆپیشاندان وەڕی دەخەین و توڕەدەبین و قەوان هەمان قەوان، سبەی دیسان هەریەک لەسەر کاری خۆی بەردەوام دەبێت و زاناکان دەچنەوە کۆڵیج و لابراتۆرەکان و ئەم سریاڵە کەس نازانێ ئەڵقەکانی کەی تەواو دەبن، ئەمە حاڵی زانست کە هەرگیز نەکرایە بنەمای بڕیاردانێک بە سوودی مرۆڤایەتی، وا پێدەچێت زانست، هەر خەیاڵی ناو مێشکی زاناکان و قسەی ئەفسووناوی ناو کتێبان بێت، ئەگەر راستە و ئەگەر باشە بۆ جارێک ناکرێتە بنەمای بڕیارێکی چارەنووس ساز بۆ مرۆڤایەتی؟!!
من دەڵیم لە(A)ی شارستانییەتەوە تا (Z)ی شارستانییەت، بازارێکی فراوانە، گەورەکان بچوکەکان دەخۆن، بچوکەکان بچوکتر و.... ئەم مرۆڤە پوچتر و بەتاڵتر دەبیتەوە..
هونەر کە بۆ خۆی بۆتە مەکینەیەکی زەبەلاحی ئابووری و لە هەموو بنەما ئینسانییەکانی داماڵدراوە و رووتبوونەوە و رووتکردنەوە مەرجی یەکەمێتی و زەمینەی هەڵهێنانی پارە، ئەو سیفەتەی خۆی هێدی هێدی لە دەست دەدات، کە پشت و پەنای مرۆڤ بێت و هێمای بەرگریی مرۆڤ بوون، ئەو ئیتر بەشێکە، لە چەرخە گەورەکە و کاری سەرەکی بۆتە خڵەفاندن و خەریککردنی ئینسان بە هیچەوە....بۆ نمونە بەناوی ئەوەوە کە هونەرمەند و شاعیر و ئەم بابەتانە، ئیسانگەلی جیاوازن و تایبەتن، رێگەیان بەخۆیان داوە و رێگەیان بۆ هەموارکراوە، هەموو سنوورەکان ببەزێنن ...دەڵین چەتەکان کاتێک دەچوونە ماڵێک، داوایان لە خانەخوێکەیان دەکرد کەمی نمەک(خوێ) و پارچەیە نانیان بۆ بێنی و نان و خوێکەیان دەخوارد وەک هێمایەک بۆ ئەو وەفایەی کە تا مردن دەبێت پابەندی بن بەرامبەر بەو ماڵە، ئەو پەندەی دەڵیت: نان و نمەکیم کردووە، لەو سیفەتە جوان و بەرزەی چەتەکانەوە هاتووە، یادتان بەخێر، نمونەی وەک ئێوە لەناو کۆمەڵگای ئیستای ئینساندا دەگمەنە، ئێمە رێگە بەخۆمان دەدەین بە ناوی هونەرەوە، نەک سنووری خانەخوێکەمان، ببەزێنین، بەڵکو لەیەکەمین چرکەوە هەوڵ دەدەین رووتیان کەینەوە....ئەفسوس، ئەرێ ئەم هاوبەشیە زەقە چییە لە نێوان پیاوەکان و داعشەکاندا سەبارەت بەژن، چما ئەوی ئەملا پەسەندکراوە و ئەوەی ئەولا ناپەسەند؟!!، خۆ پیاوەکانی ئەمبەریش بۆیان بلوێ لە ٤ ژنی تیدەپەڕێنن، ئەوانەی بۆیان لوا کردیان، ئێمە کە نەمان کردووە بۆمان نالوێ، یەک لێپرسراوم نیشان بدەن، تازەی نەکردبێتەوە (ئەمە زاراوەی خۆیانە، ئەوەندە رێزی ژنیان لەلایە، لە خەڵوەتیشدا، هونەربازەکان و سیاسەتبازەکان و شاعیرەکان و...هتد هەر هەمان رەفتاریان هەیە...ئەفسوس بۆ ژنان کە بە زاراوە دەخەڵەفێن، لە رۆژهەڵاتی گۆی زەوی بەجۆریک و لە خۆرئاوای گۆی زەوی بە جۆرێ تر ئەفسوس... .

کە شەڕی عێراق ئێران وەڕێخرا، ئیمام خومەینی ووتی : جنگ یک نعمت (الهی) یست.
جەنگ نیعمەتێکی خوداییە، ئەی کە راستی ووت، هەمیشە جەنگ نعمەتە، هیچ نعمەتێ وەک نعمەتی جەنگ بازاڕ نا سورێنێ، کۆنفرانسەکان وەڕێ ناخا، فرۆکەکەکان نافڕێنێ و هوتێلەکان ئاوەدان ناکاتەوە و رستۆرانتەکان ناگێڕێ...سی و پێنج ساڵ زیاترە، پیاوانی ئاین نوێنەرانی خودا لەئیران لە بەری جەنگ دەخۆن و ئەوا خەریکە بەرەکەی بەتەواوی دەچننەوە و هاکا بوونە هێزی بڕیاردەر بەرامبەر بە ووڵاتانی سونەی عارەوی، بە بۆمبای ئەتۆمەوە دەبنە هێزی کاریگەر و لە ئێستاوە کارخانەکان، ریزیان بەستووە بۆ سەرمایەگوزاری لە ئێرانی پاش قەیراندا، ئێران دەتوانێ تا ساڵانێکی زۆر لەبەری ئەم پەیوەندییەی
رۆژهەڵات رۆژئاوایە بچنێتەوە، بازاڕی سەرمایە وای دەوێ، حەقی ئینسان و مافی ژنانی ئێرانی و دیمۆکراسییەت، ئەگەر لە سەر راستە رێگای بەرژەوەندییەکان نەبێت و خزمەت بە بازاڕ نەکات، فڕێدەدرێنە زبڵدانی سەرمایەوە، ئەو مافانەی کە خەڵاتی نۆبیلی فریودەر کە خەڵاتیکی سیاسی زۆر قیزەونە، رۆژگارێک، ژنێکی ئێرانی کردە قارەمان، ئێستا نەک ئەو مافانە باش نەبوون، خۆفرۆشی و لەشفرۆشی و ماددەهۆشبەرەکان رۆژی هەزاران گیانی ژنانی ناچارکراو لە ئیراندا پەژموردە دەکات، بەڵام ئەوە کەی بابەتی بازاڕی سەرمایەدارییە، ئێستا زەمینەی بازارەکە پێویستی بە گواستنەوەیە، ئەوە قسەی یەکەم دەکات، دەڵین بەرێوەبەری بانکێک، باوکێکی فرە میهرەبان بوو، بەڵام کە دەچووە بانکەکە، بەرژەوەندی بانک وای دەخواست، فرە دڵڕەقانە رەفتار بکات..... .
بەپێی ئەو دەستورەی کە ئیمام خومەینی فۆرمۆلەکەی دارشتەوە، لە هەموو جێگایەکی دنیا جەنگ بۆ کۆمەڵێکی کەم نعمەتە و بۆ زوربە بەدبەختیە، ئەمەش خۆی دەستورە، هەرواهاتووە، کۆمەڵێکی کەم، بەهەرناوێکەوە بووە با ببێت، گرنگ ناو نییە، گرنگ کردارەکەیە،(وەک لەسەرەوە لە مەسەلەی پیاوەکانی ئەم بەر داعش و پیاوەکانی داعشدا باسم کرد سەبارەت بەژن کە هەردووبەرەکە ژنیان دەوێ...)، ئەم جەنگەی داعش نعمەتە بۆ هەندێ سەرکردە و بنکردە و بازرگان و تەنانەت بۆ پەرلەمانیش، لەوکاتەوەی داعشیان هێنا، یا پلانەکە وابوو کە دەبوو بهاتایە، لەوکاتەوە بەهەزاران ئاڵۆگۆڕکراون لەگەڵ داعشدا، هیچ نعمەتێ ئاوا (حکومەتی هەرێمی کوردستان ئەڵبەتە شتێکی وا کەس باسی ناکات خۆیان نەبێت) ئەم حکومەتەی رزگار نەدەکرد لە لێپرسراوێتی بەرامبەر بە نەتەوەکە، ئێستا هەرچی بڵێی وەڵامەکە داعشە، خەڵک بیری چۆتەوە کە پارەکان چی لێهات، خۆ ١٢- ١٣ ساڵ بودجەیەکی زەبەلاح دەهات و گومرگەکان حەشریان دەکرد و نەوت دفرۆشرا و هەزاران شتی ژێر بەژێر،ئەوانەی بەناوی دیمۆکراسییەوە ٢٤ ساڵە پۆستی یەکەمیان هەموو شتێکیان زیندوو بوویەوە و کابرای فەرەنسیش شەرم ناکات، دێت و باسی دیمۆکراسی دەکات لە کوردستان، وەک ئەوەی بە نەتەوەکەمان رابوێرن، دیارە دیمۆکراسیە فشەکەی کۆمۆنەی پاریس و هاش و هوشی فەلسەفەکانیان هەر ئەوەندەی بڕکرد، کە دیکتاتۆرێک بکەن بە دیمۆکراتخواز، رۆژنامەنووسەکانیش یان نەیان ویرا یا لەبەر بەرژەوەندی نەیان پرسی ، جەنابی سەرۆکی فەرەنساوی، ئەو پیاوەی تەنیشتت ٢٤ ساڵە لەپشتی ئەو میکرۆفۆنەوە وەک سەرۆک قسان دەکات، چما ئێوە نازانن؟!! کتێبی قەبە و قسەی زلم بۆ چیە، ئەوانە هەمووی درۆی چاپکراون.
کە منداڵ بووین هەر شتیک دیار نەدەما لە ناو خیزانەکانمدا و دەمان پرسی چی لێهات، دەیان ووت (پشەکە خواردی!!) ئێستا کە گەورەبووین و خوێنمان دزرا و مێژوومان قیزەوونکرا و رەنجام بێوەر و گەنجمان شاراوە، هەر دەپرسین دەڵین داعش خواردی، خولانەوە لە بازنەیەکی نیو سەدە لە بێهودەیی سیاسیدا... ئایا داعش ئەو نیعمەتە یەزدانییە نییە کە خوێنی رژانە ناو رەگی وشک بووی زۆر لە پۆستەکان لە کوردستاندا، خوێنی ئەو رۆلە کوردانەی ئەمڕۆ بە ناوی بەرگری لە هەموو جیهان، دەکرینە قوربانی، وا لە ئەستۆی دەسەڵاتی کورد لە باشووری کوردستاندا.
ئەو کاتانەی پێویست بوو دەتوانرا و دەبوو یارمەتی بەشێک لە نەتەوەکەمان بدەین لە رۆژئاو، ئەو کاتە بەناوی رێگرتن لە داعش، خەندەقمان هەڵکەند تا رێگای رزگاری و گەیاندنی یارمەتی لە کۆبانییەکان ببەستین، بۆیە داعش ئەو نیعمەتە لابەلایە بوو کە زۆر کەس چاوەڕوانی هاتنی بوون و ئیشیان بۆ هاتنی کرد و زەمینەیان بۆ خۆشکرد و هێنایان.

چەند سەرنجێک:
موچەی بن دیوارەکان... (گۆڕان) بێ ئەوەی بەخۆی بزانێ، خزمەتێکی گەورەی کرد بە دەسەڵات و بەهانە و پاساوی بۆ هێنانەوە کە نیوەی بودجەی هاتوو لە بەغداوە دراوە بە خەڵک، وەک زۆر لێکدانەوەی تریان، لەم مەسەلەیشدا کورتیان هێناو زۆر رووکەشانە سەریان لە خەڵک شێواند و ئیتر دەسەڵات و ئەو پارە زۆرەی دیار نەما لە بیر چۆوە و کار گەیشتە رادەیەک کە (ئابووریناسەکەیان) وەک گەنجێکی ١٤ ساڵ بەڵام لە بەرگی پەرلەمانتاردا، لە فەیسبوکدا لیستەی ناوی بڵاو دەکردەوە، کە ئەوە کارێکی زۆر نایاساییە و ئەگەر یاسا هەبوایە دەبوو لێپرسینەوەی لێ بکرێت، بەڵام کێ بەکێیە، چوار شاری بێ دەرگا و پەنجەرەمان هەیە،

با شی بکەینەوە:
سەرنجی یەکەم:

گریمان ٣/٢ ی ئەو بودجەیە کە لە بەغداوە تا ٢٠١٣ هاتووە دراوە بە موچەی فەرمانبەران، کەواتە ٣/١ ی ماوەتەوە، نەوتی فرۆشراو و گومرگەکان و داهاتی فەرمانگەکان ئەگەر بە ئەندازەی بودجەی هاتوو نەبن، شتێکی وای کەم نییە، ئەی ئەوە چی لێهات، ژووری ئابووری گۆڕان؟!!
دەبوو گۆڕان بەرگری لە خەڵک بکردایە ، هەموو کەس مافی خۆیەتی پارێزگاری لە کەرامەتی ئینسانیی بکرێت و بەرامبەر بەو ئەرکەی کە کێشایان و رەنجی فەرهادیان دا بۆ حەوانەوە و شاردنەوی پێشمەرگە و پیتاک کۆکردنەوە بۆ شۆڕش، بەرامبەر بەوە دەبوو تا ئەوەندەی دەی پاراستن لە خلیسکان بۆناو زەلکاوی گەندەڵی، یارمەتیان بدرایە و پێویستییەکانیان بۆ دابین بکرایە، ئێستا (گۆڕان) بەم قسە روکەشانە خەڵک بە تاوانبار دەزانێ و ئەو فەرمانبەرانەی کە کوردستانیان خۆشدەوێ و بۆ گەشانەوەی ووڵاتەکەیان ماندووبوون نازانن، ئەوان تاوانبار و حکومەت، بێتاوان.

کێ بندیوارە، لێپرسراوانی هەموو حزبەکان، بە رۆژهەڵاتیشەوە، یان خەڵکی رەنجدەری ئەم نیشتمانە دزراوە؟! پێم ناڵێن، کام لێپرسراوە لە حزبەکان حەقی ئەو هەموو سەدان هەزار دولارەی لە کێ وەرگرت و بەرامبەر بەم کام خزمەتە بۆ نەتەوەکەی، وەری دەگرن؟
ئەم هەموو تەنتەنە و تیفتیفەیە، ئەم هەموو کەناڵە ئێچ دیانە(HD , (رادیۆیانە، ئوتومبیل و فەرمانبەر و چاپخانە و رۆژنامانە.....بەچی و لە کوێ و لەپای کام ماندووبوونەتان؟!!،
خەڵک بندیوارە؟!!
ئەگەر خەڵک بندیوارە، ئیوە سەردیوارن و لەهەموو بنەما نەتەوەیی و شۆرشگێری (کە بانگەشەی بۆ دەکەن) لەهەموو رەحم و بەزەییەکی ئینسانی بێبەرین، سیاسەتی چەوتی هەمووتان، نەتەوەکەی بەرە و نەهامەتی و سەرگەردانی بردووە!!!
قارەمانیی پێشمەرگە مەدەنەوە بەرووی ئێمەدا، ئەوانە فەرزەندانی بە ئەمەکی ئێمەن و ئیوە بازرگانی بە خوێنیانەوە دەکەن، کوڕو کورەزاکانی ئێوە، خۆتان باش دەزانن سەرگەرمی چین.؟!!! ئاخر کورد پێویستی بە ٢٤ سەعات هەڵەوەڕییە لە تەلەفزیۆنەکانتانەوە، تەنها پارەی ٢٤سەعاتی کەناڵیکتان بەشی موچەی دەیان فەرمانبەر دەکا، بۆ قوڕی پێدا نادەن و پارەکەی نادەن بە چەند خیزانێک، دڵنیاتان دەکەمەوە، کە بۆتان باشترە و ئەمڕۆ باشترە و سبەی درەنگە، هەمووتان باسی ژینگە دەکەن پەلاماری یەکتر دەدەن لەسەر گازۆیل، بەلام ٢٤ ساعات، ئەو هەموو کارەبایە سەرف دەکەن، پیتان وایە خەڵک گێلە، بە ناوی سەربەخۆ بوونەوە، زوڕنای شەیتان دەژەنن...

سەرنجی دووەم: پۆشاکی ژنانی پێشمەرگە

ئیتر بۆ کورد سەلمێندرا، کە سیاسەت و بەرەنگاری بەتایبەت لەناو ژنانی کوردا، لە باکور و خۆرئاوایە و ژنانی باشوور و رۆژهەڵات بۆ ئەوەی رزگاریان بێت لە سیاسەت و زاڵێتی بیری چەوتی پیاوانی باشووری و رۆژهەڵاتی و بتوانن رۆڵی گرنگی خۆیان ببینن و تواناکانیان بە فیرۆ نەچێت، دەبێ بچنە قوتابخانەی خوشکەکانیان لە (باکور و خۆرئاوا)، هەموو ئەزمونەکانی باشوور و خۆرهەڵات شکستیان هێنا و ژنانیان بە ئاقاری زۆر مەترسیداردا برد و ئێوە خۆتان باشتر لە رەفتارەکان شارەزان.... ئێوە نابێت هیچ زاراوەیەکی قەبە و بریقەدار قەبوڵ بکەن، پیاوەکان لە سیفەتی داونانەوە بۆ ژناندا لەگەڵ پیاوانی داعش هیچ جیاوازییەکیان نییە، داوەکان بناسنەوە و ئاگاداربن، قسە تا نەبێتە رەفتار، پوچ و بەتاڵە، بەتایبەت ئەوەی بۆ ئێوە و بەناوی ئێوەوە دەکرێت... ئێستا لە باشووری برینداردا، لە باشووری ماندوویی پێشمەرگەدا، وەک خۆشەویستی بۆ برا پێشمەرگەکان، کیژانی کورد پۆشاکێکی تایبەتی لەبەردەکەن، کە بەداخەوە، پۆشاکی کوردی نییە و بەدڵنیایەوە لێتان نایە، ئیوەیان فریوداوە، ئەو جلی پێشمەرگە نییە، ئێوە بەتەمەن منداڵن و رەنگە زوربەتان کارەساتەکانتان نەدیبێ، ئەوە جلی (ئەو ژنانەیە کە حزبی بەعسی عارەوی رەگەز پەرست، لەبەری ژنەکانی ئەوسەردەمەی دەکرد و پێیان دەوترا ماجدات کە فرە ناشرین و ناقۆڵایە و لێتان نایە، ئەو داڵە بەلای هیچ سمبۆلێکی کوردیدا ناچێت، خوشکەکانم...جلی شایستە بۆ ئێوە، ئەو جلانەیە کە خوشکە شۆڕشگێرەکانتان، ئەو فریشتانەی دنیای بیدادیان هەژان و مانایەکی تریان دا بە ئازادی راستەقینەی ژنان، جلی شۆڕشگیرەکانە لە قەندیل و خۆرئاوا، ئەو جلانە فڕێبدەن و جلی بەرخۆدان و شۆڕشگێڕی راستەقینە لەبەر بکەن، دڵنیام برا پێشمەرگەکانتان رایان لەگەڵ منە، سەرتاپای ئەو جلانە وەرگیراوە لە جلی سەربازی عێراقی و بەتایبەتی بەعسی کۆن و هەموو نیشانەکانی سەرشانتان عێراقین، لە حاڵیکدا من دەزانم ئێوە بەرۆح کوردستانین...بگەرێنەوە بۆ ناو گۆڤەندی بەرەنگاری خوشکەکانتان لە کۆبانێ و دڵی برا پێشمەرگەکانتان بە جل و رەفتاری شۆڕشگێرانەتان خۆش بکەن...نەفرەت بکەن لەهەر رەفتارێک پەیوەندی بە عارەو و بەعسەوە هەیە و کوردستانی نییە....

سینارێۆکان...
بیست و ئەوەندە ساڵ دەرفەت درا بە باشوورییەکان، تا بزانرێ توانای خۆ بەرێوەبەرییان هەیە، هەموو پشتگیرییەکیان لێ کرا، چاودێری کران و لە رەفتارەکانیان کۆڵرایەوە، بە راکشاوی و بە ئاماژە و تیر و توانج تییان گەێنرا کە ئەوە رێگا راستەکە نییە و ئەوە چەوتە رێگایە...بەڵام نەبیسترا و نەویسترا و نەنیەتی چاکبوون هەبوو، نەدی و بدی کەوتن بەسەر پارەیەکی مۆڵدا، نەبەرنامەیەک هەبوو نە پلانێک، پارەی لابەلا کە(با) دەیهینێ، بەدەستی سەردیواری نەزان و نادڵسۆزەوە لەگەڵ خۆیدا گەندەڵێ و فەساد دەهێنێ، ئەمە دەستورە و سیفەتی پارەیە، پارە جڵەوی نەگری، قورتمت دەگرێ و ئاوات لێدەکات کە هەموومان دەیبینین و تازە رێگای بەرەو پاشەوە چوون نییە و بە هیچ کەسێک ئەو بارە راست ناکرێتەوە، چونکە بنەمای راست بوونەوەی نییە...
ئیستا ئێمە (باشوورییەکان) پێمان ناوەتە ناو ئەڵقەی یەکەمی پێشەکی سیناریۆکەوە، کە شەکەتکردنی ئەم بەشە لەگەلەکەمانە لە باشووری برینداردا و ئامادەکردنمانە بۆ قەبوڵکردنی ئەڵقەکانی تری ئەم شانۆگەرییە.
حزبەکانی باشوور، هیچ یەکێکیان، تازە و کۆن، ئەوانەی رۆژهەڵاتیش چارەنووسیان بەستراوەتەوە بە باشوورەوە، جا هیچ کام لەو حزبانە پلانێکیان نەبووە بۆ داهاتوو، هەمیشە شوێن رووداوەکان کەوتوون و گەلەکەمان لە باشوور و رۆژهەڵات لە پێش ئەوانەوە بوون، حزبەکان سەرگەرمیی خۆیان هەیە، بەرامبەر بەوان حکومەتی ناوەندی سەرەرای هەموو توندو تیژییەکان خەریکی دروستکردنەوەی ژێرخانی حکومەتێکی (شیعەی) دامەزراوە، لە هەموو بوارەکاندا گەنجانی خۆیان ناردووە بۆ پەروەردەبوون و فێربوونی تەکنیکە سەردەمییەکان، تەریب لەگەڵ گەندەڵی و فەسادا، هێدی هێدی خەریکی دروستکردنی حکومەتیکی دامەزراون، بە پشتیوانی ئەزموونی قوڵی حکومەتداری ٢٥٠٠ ساڵەی ئێران،
کە گەل شەکەتکرا و بیدادی زۆری بۆ هێنا، ئەڵقەی دووەم دەست پێدەکات، کە هەڵوەشاندنەوەی دەستوری عێراقە چونکە ئەو دەستوەرە لە حالەتێکی بوحرانی و ئاوارتەدا دەنگی بۆ دراوە، رەنگە ئەمە لای زۆربەمان کە تاکو ئێستا مەستی هەرێم و رەنگە دەوڵەتی کوردیش بین، دەوڵەتی قسە، رەشبینی و ناخۆش بێت، بەڵام ئێمە بۆ ئەوەی بتوانین بەر بە کارەساتەکان بگرین دەبێ راستی بڵێین و هەوڵ بدەین کە هیچ نەبێت هەرێم ئاگادار بکەینەوە لە مەترسییەکان...بەرای من سەردەمێک دێت، دەبێ شەڕ لەسەر ئەوە بکەین کە پارێزگارەکانمان کورد بن....تا ئەو رادەیە، ئاماژەکان نوقڵانەی شەڕیکی خوێناوی و وێرانییەکی بێ ئەمان دەدەن...برواننە خۆراوا، ئەوان کاتێ لە حاڵەتی شۆڕشدا بوون، پلانی ئەمڕۆیان داڕشت، بەرگری لە کۆبانێ کە (مێژووی نوێی کورد لەو رۆژەوە دەست پێدەکات) بەرنگارییەکی پلان بۆ دارێژراو بوو، تەفرەی قسەی باق و بریق مەخۆن، ئەو شانازییە لە لوتکەدا بێ رێک خستنێکی پۆڵاینی سەردەمیانە مەحاڵی مەحاڵ بوو، ئەو رۆژئاوایانەی کوردستان، بە گەنم و جۆ و سەوزەوات پار ٨ ملیار دۆلار دەرامەتیان بووە، نە گومرگ و نە نەوت و نە لە سەدا حەڤدەی هیچ بودجەیەکیان بۆ نەهاتووە، میللەت کە رابەری بوو، رابەر بووە سمبۆلێک و رەفتاری لە قسەی زیاتر بوو، موعجزەی ئاوا دەخوڵقێنی، سەرم بەرزە بەئێوە ئەی شێرە ژنانی کۆبانێ....

پێشنیازێک :

خۆرهەڵاتییەکان بۆ ئەوەی رزگاریان بێت لەوابەستەییان بە باشوورەوە، کە زۆر گرنگە، با جاڕی وازهێنان لە سیاسەت بدەن و بگەڕینەوە بۆ هونەر، ئیوە بۆ خوڵقاندنی هونەری راستەقینە دروست بوون، تا ئێستا سیاسەتان ئەزمواند و مایە پوچ دەرچوون، چونکە هەمان ئەزمونی باشورتان دووبارە کردەوە، هەمان کارەساتتان بەسەر خیزان و ژن و منداڵی رۆژهەڵاتدا هێنا و ئێوە لەناو ئەم هەموو شکستەدا منداڵەکانتان گەورەبوون، سیاسەت بۆ رۆژهەڵات گونجاو نییە، ئێوە بەهونەرەکەتان دەتوانن نەتەوەکەتان بەرنە لوتکە، وەرن بگەڕێنەوە بۆ سەرچاوەی رەسەنایەتی کوردایەتی و هونەرمان پێشکەش بکەن، تینویی هونەری رۆژهەڵاتین کە هەموو جوانییەکانی ئەم نەتەوەییەی تیدا کۆبۆتەوە، واز لە سیمینار و هۆڵ و کۆبوونەوەکان بێنن، لە باشترین حاڵەتدا، حزبەکانتان هەر ئەوە دوبارەدەکەنەوە کە لە باشوور فێری بوون و دیویانە، لە یادتان نەچێ حزبەکانی رۆژهەڵات دایکی راستەقینەی هەموو حزبەکانی باشوورن......ئەم خالە فرە گرنگە.

سیاسەت بۆ باکورییەکان جیدەهێلین و دڵنیا بن، کەشتییەوانی ئەم کەشتیە لەناو ئەم زەریا بە شەپۆلەدا زۆر شارەزا و دڵسۆزە و ئەو دەتوانێ بەرەو کەناری ئارامیمان بەرێ...