پەكەكە تەنها قەندیلی لە پشتە
Friday, 21/10/2011, 12:00
بەرپرسانی تورك دەڵێن: نامانەوێ دەوڵەتی كوردی دامەزرێت، تەنانەت ئەگەر لە ئەرژەنتینیش بێت
ئێستا لەشكری ئامادەباشی توركیا دوو هەزار كیلۆ مەتر لە ئەنقەرە و ئەستەمبوڵەوە دوورن، بڕیاری لەنێو دانی پەكەكەش ڕووی دەرەوەی بانگەشەكانیانە، ڕووی ناوەوەش بریتی یە لە گومانە جۆربەجۆرەكانی ئێمە، تا ئێستا بێجگە لە بەدیل گیران و كوشتنی چەند توركێك و سەرقاڵ كردنی تەواوی میدیاكانی ناوچەكە و دونیا هیچ ئەنجامێكی ڕوون نیە، ئەوەی ماوەتەوە بیڵێین بوونی پەكەكەیە لە قەندیل و شاخە سەختەكانی سنووردا، بوونی ئەوان بوونێكی سەراسیما و موعجیزە ئاسایە، مانەوەیان لەو چیا هەوربڕانەدا ئامادەیی مەبدەئو كاردانەوەیەكی قوڵی دەروونی لە پشتە، ڕۆژنامەنوسێكی نیۆرك تایمز دەڵێ: گەر توركەكان بزانن ژینگەی ژیانی پەكەكە چەند سەخت وپێچاوپێچە، هەرگیز ملكەچی فەرمانی ژەنەڕاڵەكانیان نابن، ئەوە تەنها خودایە و پاشان گەریلاكانن دەزانن ئەو نێوەندە چەندە سەختە، چەند ساڵێكە ئەشكەوتەكان و بەردە زلەكان و دۆڵە تاریك و نوتەكەكان دەست و پلی گەریلاكان زبر دەكەن و چەكەكانیان بۆ جەنگێكی نوێ پاك دەكەنەوە، ئەم دەربڕینەمان بۆ پەكەكە دەربڕینی واقیعێكە كە خۆی لە چەند بوارێكدا دەبینێتەوە، پەكەكە لەگەڵ جەنگ و جیدالی توندا نیە، ئەوان بەردەوام جەنگ وەستانەكانیان تاك لایەنە بووە و لایەنی بەرانبەر هیچ ئەرزشێكی بۆ گوتاری ئەوان دانەناوه، هەروەكو چۆن ئەرزش بۆ هیچ بەهایەكی كوردیشی دانانێن لە هەر دورگەیەكی ئەم دنیایەدا بێت ،پەكەكە لە1/10/2006 جەنگیان راگرت لە ساڵانی 1993-1995-1997-1998یش بە تاك لایەنە جەنگیان ڕاگرت و دەستی گفتوگۆیان درێژ كرد، بەڵكو بە ڕێگایەكی ئاشتیانە چارەی كێشەكەیان بكرێت، بەڵام بەرپرسانی تورك نەك هەر بڕوایان بە گفتوگۆكردن نیە لەگەڵ پەكەكەدا، بەڵكو لەگەڵ بەرپرسانی كوردستانی باشووریش هەمان بڕوایان هەیه، لە میدیاكانی ئەم دوایەشدا ئەوەمان باش زانی، هەر بۆیە دەبینین لە ساڵی 1992 پاشان لە ساڵی 1995 توركیا سنورەكانی هەرێمی بەزاند و 35هەزار سەربازی هێنایە هەرێمەوە، لەدوای داگیركردنی بەغدایش لە 2003دا پەكەكە دەستی كردەوە بە جموجوڵ و كاری سەربازی لە باشوری ڕۆژهەڵاتی ئەنازۆڵ، هەر بۆیە دیسانەوە ئۆپەراسیۆنێكی نوێ كەللەی جەنەڕاڵەكانی توركیای داگیر كردەوە و ئاڵۆزیەكانی عێڕاقیش لەم قۆناغەدا متمانەی بەرەنگاری لای پەكەكە زیاد كرد، ئەمەش لە كاتێكدایە كە حكومەتی عێڕاقی تەنانەت بەغدادی بۆ كۆنتڕۆڵ ناكرێت، چ جای قەندیل و ئەو خاڵانەی كەلە نەخشەشدا نین، لێرەوە كەشێكی بەهاری بۆ پەكەكە ڕەخساوە، بە جۆرێك وڵاتانی دراوسێ ئێستا بیر لەم هێزە دەكەنەوە، هەرچەندە تا ئێستا توركیا و سوریا و ئێران ئەمنیەتی خۆیان پاراستووە، بەڵام ئیدی ڕەنگە ئاگری ئەو ڕۆژەی ئاڵای كوردستان بگاتە ئەوانیش، ئەوەی گەریلاكانی چالاكتر كردوە فشارەكانی‌ئەمریكایە بۆ سەر توركیا، ئەمریكا داوا دەكات ئەردۆغان لەدەست بردن بۆ چەك دوور بكەوێتەوە، یەكێتی ئەوروپاش كێشه كه ی بەستوەتەوە بە وەرگیرانی توركیا لە یەكێتی ئەوروپا تا 2015، لەبەر ئەوە ووڵاتانی دراوسێش لەم بونەی پەكەكە نیگەرانن، ئێستا دەزانن دواكەتوون لە هاوكێشەی پەكەكەدا، دەبوایە چەند ساڵێك پێشتر سۆراخیان بكردایە، بەڵام كار لە كار ترازاوە، چونكە كارتی كوردی كارتێكی بەهێزە لە ڕووی سیاسی و ستراتیژی و تەنانەت لە ڕووی ویژدانی مڕۆڤایەتیشەوە، بە جۆرێك پرسیار لەسەر بە تیرۆریست بوونی پەكەكە پرسیارێكی گوماناویە، ئەوان بۆ تیرۆریستن؟ تا ئێستاش ڕووبەڕووبوونەوەیان لە ناوچەكانی ئوراماری و جۆلەمێرگ دا كوشتاری خەڵكی سیڤیل نی یە، تا ئێستاش سكەی قیتار و بازاڕ و نووسەر و بیرمەندەكان جێی ئامانج نین، تا ئێستا خواستی ئەوان بەدەر نیە لە ئاشتی و خواستی دیموكراتی، ئەمە لە لایەك ، لەلایەكی ترەوە وتەی بەرپرسانی توركیا لێرە و لەوێ زۆر توندو تیژانەیە لە دوای ڕووخانی بەغدادەوە وەزیری دەرەوەی پێشوو (پاكیش) دەیوت لێرەوە ڕێكەوتنی 1926ی ویلایەتی موسڵ دەبێت پیایدا بچینەوە، ئەم ماراسۆنەی سوپای تورك گومانی تێدا نیە بەشێكە لەم پێداچوونەوەیە، هەروەها توركەكان سیغەی فیدڕاڵی لە عێڕاق و لكانی كەركوك و ناوچەكانی تر بە هەرێم و ئاڵای هەرێم بەكارلەكار ترازان ئەزانن، ئیتر ئەبێ سەركردەكانی كوردیش لەو لێدوانانە باش تێبگەن، بیستیان كە توركەكان دەیانوت نامانەوێ دەوڵەتی كوردی تەنانەت لە ئەرژەنتینیش دروست بێت، لە درێژەی ئەم ئاڵۆزیانەدا لە بەرامبەر ووتەكانی بارزانی بەرپرسێكی باڵای تورك ووتبوی بارزانیش دەخزێنینە لای ئۆجەلانەوە و زیندانی دەكەین، لەگەڵ هەموو ئەمانەش دا كۆبوونەوەی ووڵاتانی دراوسێ كۆبوونەوەی بەرژەوەندی و مراندنی گەریلا بێ كەس و بێ دەرەكانە، ئێستا ئەوە ڕوون دەبێتەوە كە ڕاستە كورد تەنها چیاكانی لە پشتە، لێرەوە دەپرسین دەبێت لە بەرامبەر هێزێكی میانڕەو كە تەواوی كایەكانی توركیای لە پشتە، بۆچی گەریلاكان چەكەكانیان فڕێ نادەن، دیارە پارتی دادو گەشە پێدان و پەرلەمانەكەی لە بەرژەوەندی نیشتمانی دا بڕیارێكی نیشتمانی دەرنەكردووە تا گەریلایەك چەكەكەی فڕێ بدا، تەنانەت ئەم دەستورەی كە ئێستا ئامادە كراوە هیچ ئاماژەیەكی بۆ بوونی گەلی كورد تێدا نیە، دەستوری نوێ زۆر بە ئاسانی بوونی ملیۆنان كوردی لە ووڵات سڕیوەتەوە و نوێنەرانی پارتی كۆمەڵگەی دیموكراتیی لە پەرلەماندا كۆكن لە خیانەت باركردنی گەریلاكانی پەكەكە، ئێستا لە توركیا جڵەو لە دەستی پارتی دادیش دا نیە، لەوێ هەستێكی دەمارگیری بەهێز وەكو هەستی سەردەمی گروپەكانی تۆڵەی دژ بە ئەرمەن و یۆنانەكان تەواوی شەقامی توركی و گورگە بۆرەكان و گەنجە خوێن ئەتاتوركیەكانی وروژاندووە، لە مێژووی توركیادا ئەوەندەی ئەم چەند ڕۆژانەی دوایی ئاڵای سووری توركیا لە نێو كوچە و شەقام و سەر حەوشەی ماڵەكاندا نەبینراوە، نازانرێ بۆچی سەرۆكی ئەركان (یەشار بویوكانیت) تەنها زمانی هەڕەشە دەزانێت، بۆ شارعی توركی دژایەتی كورد دەكات و بە گاڵتەوە دەگوترێت بارزانیش بكەنە لای ئۆجەلان، تا كەی سیڤیلە كوردەكان لە دەستی گروپە توركیەكاندا جێگای مەهزەلە و گاڵتە جاڕین، تاكەی كچانی دیاربەكر و وان حەزە هەرزەكاریەكانی تورك خاڵی بكەنەوە، ئەمە لە كاتێكدایە پەكەكە خواستی ئەوەی هەیە بە دادگەری و دیموكراتی كێشەكانی چارەسەر بكەن، خواستی بڕیارێكی هەیە تا زیندانە سیاسیەكان ئازاد بكرێن، ئەوان نایانەوێ ژیان لە ئەشكەوتا بەسەر بەرن، خواستی دەستورێكیان هەیە كە بە ئینسانیان بزانێت و بڵێ تەنها تورك لەم وڵاتەدا نیە، هەموو ئەمانە لە كاتێكدایە كۆبوونەوەی نێو دەوڵەتی و دراوسێكان و سەردانی ڕایس و فشاری نەتەوە یەكگرتووەكان لە ئارادایە تا گوێ بۆ حكومەتی توركیا بگرن، بەڵام هیچ هەوڵێك بۆ گوێ گرتن بۆ بەرامبەر نیە،ئەمەش ئاماژەی چارەنەكرانی كێشەكەیە.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
