دەمی ڕاپەڕینە دەمی ڕاپەڕین هەتاکەی بە سستی و بە پەستی بژین ،بیست و پێنج ساڵ لەمەوبەر لە ئیستگەی گەلی کوردستانەوە گوێبیستی ئەو سرودە بووم و تائێستاش لە گوێمدا دەزرنگێتەوە  ،یادەوەری سەردەمانێکی پڕ سەروەری و بەرخودانم بە بیردێنێتەوە.

ئەوکات من منداڵ بووم ئیرەیم بەو گەنجانە ئەبرد کە بە پۆزەوە تفەنگەکانیان نابوو بە نەڕەی شانیانەوە و باسیان لە بەعسی قڕان ئەکرد ،باسیان لە زەماوەند و شانەی چەکداری نەهێنی ئەکرد بەڵام من سەرم تەقەی ئەهات و هیچ حاڵی نە ئەبووم، وام ئەزانی خەڵکی خۆڕسکانە و بێ بەرنامە هەڵیان کوتاوەتە سەر دەزگا داپڵۆسێنەرەکانی بەعسی ئەفلەقی.

تا دواتر ئاشکرا بوو کە ڕاپەرین پلان و نەخشەداڕێژی بۆ کراوە و ئەندازیاری ئەو نەخشەسازیەش نەوشیروان مستەفا بووە.

ئێستاش ئەوەندە ساڵ تێپەڕیوە و سەر لەنوێ خەڵکی خوازیار و تامەزرۆی ڕاپەڕینە .

جاران بەعسیەکان کوڕەکانیان ئەکوشتین و چاویان لەسەر ئابڕوی کچەکانمان بوو ،مڵک و ماڵیان زەود ئەکردین بەڵام هەرگیز دوڕوو نەبوون و بە ئاشکرا دوژمنایەتی خۆیان دژ بە گەلەکەمان ڕاگەیاندبوو.

بەڵام ئێستا بەرپرسانی کورد هاوشێوەی بەعسیەکان کوڕەکانمان بەکوشت ئەدەن وچاویشیان لە ئابڕوی کچەکانمانەو مڵک و سامانی ئەم میللەتەش بە تاڵان ئەبەن کەچی بەو پەڕی دووڕوییەوە ئەڵێن ئێمە کورد پەروەر و بەدیهێنەری مافەکانی خەڵکی کوردستانین.

بەڕێز باوکی نما ئەندازیاری پێشوی ڕاپەڕین ،دیسان پێویستمان بە نەخشەو پسپۆڕی   جەنابتە بۆ یەک دەنگی و یەکڕیزی خەڵکی بەشخوراوی کوردستان وسەرلەنوێ ڕاپەڕین.

دودڵمەبە لە بڕیارت لەئێستادا تەنها چارەسەر بۆ دەسەڵاتێکی یاخیبوو ڕاپەڕینە ،سەبارەت بە هەولێر و بادینان ئەوان لەڕابردوشدا واتە ساڵی 1991 بە زەبری هێز ڕزگارکران لە ئێستاشدا هەروا ئەبێت، دەست لە دەست و قوەت لە خودا چاوەڕوانی هیمەتی جەنابتین.

تەنانەت خوداش بە دەقی ئایەتی قورئان دەفەرمێت (ان الله لایغیرما بقوم حتى یغیرما بانفسهم) .واتەخوداپەناو پشتیوانی مللەتێک ناکات کە بۆخۆی خوازیاری گۆڕانکاری نەبێت.