ئامۆزایه‌کی دکتۆر بەرهەم ساڵح دوو ملیۆن دۆلار لە ئاهەنگی ژنهێنانەکەیدا سەرف دەکات!
Friday, 29/04/2011, 12:00
(شوان)ی کوڕی حەمەی حاجی ساڵحی قاسم، کە ئامۆزای (د. بەرهەم ئەحمەد ساڵح)ی بەناو سەرۆکی حکوومەتی هەرێمی کوردستان، ماوەی چەند ساڵێک دەبێت نیشتەجێی (واشنتۆن)ی پایەتەختی ووڵاتە یەکگرتووەکانی ئەمەریکایە و لەو ووڵاتە ژیانێکی شاهانەدا دەژی، کە جێگای سەر سووڕمان و پرسیاری کوردەکانی ئەو ووڵاتەیە! لە ماوەی چەند مانگی پێشوودا ژیانی هاوسەری لەگەڵ ئافرەتێکی تورکدا پێک هێناوە، چەند مانگێک پێش داڕمانی دەسەڵاتی موبارەک لە میسر، بۆ ئاهەنگی گواستنەوەکه چۆتە ناوچەی (شەرم ئەلشێخ) لە ووڵاتی میسر. بە پێی سەرچاوەیەکی زۆر نزیک لە خاتوو (سەرباخ)ی هاوسەری دکتۆر بەرهەم ساڵح زانراوە، کە ئەو ئاهەنگی ژن گواستنەوەیە زیاتر لە دوو ملیۆن دۆلاری تێچووە. ئاشکرایە ناوچەی (شەرم ئەلشێخ) لە میسر یەکێکە لە شوێنە گەشتیارییە بەناوبانگەکانی ڕۆژهەڵاتی ناوەڕاست و ساڵانە زۆربەی سەرۆک ووڵات و کەسایەتیە بەناوبانگ و دەوڵەمەندەکانی ئەو ناوچەیە بۆ بە سەربردنی کاتی پشوودانیان سەردانی دەکەن. هەر لە زاری هەمان سەرچاوەوە زانراوە، کە یەکێک لەو خێزانانەی، پەیوەندی خزمایەتی و کۆمەڵایەتیان هەیە لەگەڵ بنەماڵەی دکتۆر بەرهەم‌دا، لە شوانی ئامۆزای (دکتۆر بەرهەم)یان پرسیوە: ئایا چۆن توانیوێتی بڕی دوو ملیۆن دۆلار بە تەنها لە ئاهەنگی ژن گواستنەوەکەیدا سەرف بکات و ئەو پارەیەی لەکوێ بووە؟ لە وەڵامدا شوان زۆر بە ڕاشکاوانە پێی ووتوون:
(ئەگەر پیاو پارە و ماڵێ دنیا لە ڕۆژی ژن گواستنەوەکەیدا سەرف نەکات، ئەی کەی سەرفی بکات!)، هەروەها ووتوویەتی: (لە سایەی سەری کاکە بەرهەمەوە بەس لەم ساڵ و نیوەی پێشوودا سێ پڕۆژەم بەهۆی ئەوەوە وەرگرتووە و لە کۆی هەرسێ پڕۆژەکە 13 ملیۆن دۆلارم قازانج کردووە، با دوو ملیۆن دۆلاری بۆ ژن هێنانەکەی خۆم سەرف بکەم!).
خوێنەری بەڕێز:ئەمە حاڵی ژیان و کەیف و سەفای خزم و کەسوکاری به‌رپرس و ده‌سه‌ڵاتداره‌کانی کوردستانه، به‌تایبه‌تیی ئەو (د. بەرهەم ساڵح)ـە کە ساڵانێک خوێندکارانی زانکۆ و خوێندنگاکان و توێژی گەنجانی سلێمانی کردبوویانە قیبلەی هیواو ئاواتەکانیان و چەندین بەڵێنی (بێکرداری) پێ داون، هەر بۆیە ئێستا لە نێو خوێندکارانی زانکۆی سلێمانی دا بە (د. کردار ئەحمەد ساڵح) ناوی ده‌هێنرێت و چەندین نوکتە و قسەی گاڵتەئامێزی لەسەر دەکرێت و لە نێو خوێندکاران و گەنجاندا هەر کە گاڵتە بە کەسێک بکەن ئەوە پێی دەڵێن (کردار شەرتە)! بۆیە ئێمەش لە ڕێگای مینبەری (کوردستانپۆست)ی ئازیزەوە ئەم پرسیارانە لە (د. بەرهەم ساڵح) دەکەین:
١: ئەگەر (شوان)ی ئامۆزات 13 ملیۆن دۆلاری قازانج کردبێت، ئاخۆ به‌ڕیزتان خاوه‌نی چه‌ندین ملیۆن دۆلاربن و له‌و قازانجه‌ی که شوانی ئامۆزات کردوویه‌تیی دەبێت بەشی جەنابتان چەند بووبێت؟
٢: دەبێت ئەو یاسا و ڕێساکان کامانەبن، که بە بێ مونافەسە سێ پڕۆژەی ئاوەها چەوری پڕ پارە لووشکردن دەکەوێتە دەست کاکە (شوان)ی ئامۆزاتان؟
٣: خەڵکی سلێمانی بە تایبەتی خەڵکی گەڕەکی عەقاری زۆر بە باشی دەزانن ئێوە وەک بنەماڵە لە ڕووی موڵک و پارەوە خاوەنی چی بوون!، زۆر باشمان لە بیرماوە ئیمکانیەتی پارەی باوکی ڕەحمەتیت چەند بووە، زۆر باشیشمان لە بیرماوە باپیری جەنابتان واتە باوکی دایکتان کە ناوی (ڕەووفی عزیز بەگ) بوو هەتا پێش مردنی بەیانیان لە گەڕەکی عەقاری ده‌رامه‌تی چۆن بوو؟ (دوو ساڵ لەمەوبەر ماڵپەڕی کوردستانپۆستی ئازیز بابەتێکی تێرو تەسەلم لەسەر ئەم ڕابردووی باپیری جەنابتان نووسی)، ئەگەر ئەمە حاڵی ئیمکانیەتی مادی بنەماڵەکەتان بێت ئەرێ پێمان ناڵێیت کاکە (بەتین)ی برا بچووکی جەنابتان کە تا ساڵی 2001 لە وڵاتی (به‌ریتانیا) هەموو کارەکەی ئەوەبوو دیلیڤەری پیتزای دەکرد بۆ ماڵان و هەموو دەستکەوتەکەی ئەو بەخشیشە بوو، کە وەری دەگرت، ئێستا پێمان ناڵێیت پاش ئەوەی لە ساڵی 2001 وە هێناتەوە بۆ سڵێمانی چۆن و بە چ ڕێگایەک بوو بەم ملیۆنەره‌ی کە ئێستا دەردەکەوێت لە سلێمانی و مۆڵی (ساڵح) دروست دەکات!
٤: به‌ڕێز (د. بەرهەم)، خوێندکار و لاوە نەگبەت و بەش مەینەتەکانی شارەکەمان، هێشتا تۆیان باش نه‌ده‌ناسی، جەنابتیان کردبووە قیبلەی هیواو ئاواتەکانیان، بەڵام جەنابتان بە پێچەوانەوە بوونە قیبلەی خێر و بەرەکەت بۆ براو ئامۆزا و پوورزا و یەکە یەکەی خزم و بنەماڵەکەت، ئەرێ پێمان ناڵێیت (گوڵاڵەی مامە عەزە) ئەگەر بەهۆی تۆوەنەبێت چۆن ده‌توانێت له ماڵه‌که‌یدا(3) قاسه‌ی پاره دابنێت، که هه‌ر قاسه‌یه‌کیان زیاتر له ملیۆنیک دۆلار و پڕئاڵتوونه (ئه‌مه قسه‌ی یه‌كێکه له بووکه‌کانی، که له ماڵه‌که‌دا له‌گه‌ڵیاندا ده‌ژی)، به‌ڵێ له‌و ماڵه‌دایه،هێنده قه‌شه‌نگ و به‌رزه ده‌توانیت لە هەموو شار بڕوانێت.
٥: پێمان ناڵێیت خاڵه(به‌رزان)ت ئه‌گه‌ر به‌هۆی گه‌نده‌ڵی تۆ و ئیستیغلالی پۆسته‌که‌ی تۆوه نه‌بێت چۆن ده‌توانێت ئه‌رز و موڵکی خه‌ڵک داگیر بکات، له نموونه‌ی ئه‌و زه‌ویانه‌ی سه‌رئاوه‌که‌ی دووکان(قه‌شقۆڵی)،لای کابینه‌کان که به‌زۆری زۆرداری داگیری کردووه!.
٦: پێمان ناڵێیت له نێو ئه‌و هه‌موو خاوه‌ن بڕوانامه و ده‌رچووی کۆلێژ و‌ده‌رچووی په‌یمانگاکانی کوردستاندا بۆچی بازێکت دا به‌سه‌ر هه‌موویاندا و له (له‌نده‌ن)ه‌وه کوڕی پوره‌که‌ی خۆتت بۆ ئیستیراد کردین، که ناوی (سۆران جلال عزیز)ه و هێناته‌وه و کردت به به‌ڕێوبه‌ری نووسینگه‌ی سه‌رۆکی حکوومه‌ت؟
٧: پێمان ناڵێیت (به‌رزانی حه‌مه‌ی فه‌ره‌جه فه‌ندی) ئه‌گه‌ر به‌هۆی ئه‌وه‌وه نه‌بێت که به منداڵی هاوڕێت بووه، چۆن ده‌یتوانی ئه‌و هه‌موو ئیش و مقاوه‌لاته‌ی بدرێتێ، به‌تایبه‌تی ئیش و مقاوه‌لاته‌کانی وه‌جبه‌ی یه‌که‌می سه‌رۆک حکومه‌تیه‌که‌ت ئه‌و کاته‌ی سه‌رۆکی حکومه‌تی ئیداره‌ی یه‌کێتی بوویت دوای ساڵی2000، ته‌نانه‌ت به‌هۆی تۆوه ئه‌وه‌نده ده‌وڵه‌مه‌ند ببوو، جارێک پاره‌یه‌کی زۆر زۆری له یه‌کێک له قومارخانه‌کانی ئه‌سته‌نبووڵ دۆڕاندبوو، ئه‌و هه‌واڵه‌ش گه‌یشته زۆر له‌سه‌رانی مه‌کته‌بی سیاسی و سه‌رکردایه‌تی یه‌کێتی و به‌خاڵیکی لاواز له سه‌ر جه‌نابتان حساب کرا، هه‌ر بۆیه، که گه‌ڕایه‌وه خۆت بانگت کردبوو و گازنده‌یه‌کی زۆرت لێ کردبوو له سه‌ر ئه‌و هه‌ڵسوکه‌وته‌ی، چونکه زۆر له‌سه‌ر تۆ که‌وتبوو! ئه‌رێ پێمان ناڵێیت له نێوان ئه‌و هه‌موو خاوه‌ن ئیش و به‌ڵێنده‌ر و خاوه‌ن کۆمپانیایانه‌ی شاری سلێمانیدا، که زۆربه‌یان خاوه‌نی ڕابردوویه‌کی پاک و پڕ هه‌ڵوێستی نیشتیمانپه‌روه‌رانه‌ن، بۆچی ده‌بێت زۆربه‌ی ئه‌و ئیش و مقاوه‌لاتانه له‌لایه‌ن تۆوه بدریت به (به‌رزانی حه‌مه‌ی فه‌ره‌جه فه‌ندی)؟! که خه‌ڵکی سلێمانی زۆر چاک ئه‌م که‌سایه‌تییه ده‌ناسێت، هه‌میشه خۆشی و بنه‌ماڵه‌که‌شی له پێناوی مه‌سڵه‌حه‌ت و پاره و مه‌نسه‌بدا له‌گه‌ڵ ئەو لایه‌نه‌دا بوون که له‌ده‌سه‌ڵاتدا بوون، له‌گه‌ڵ به‌عس به‌عسی بوون له‌گه‌ڵ پارتی خۆیان ده‌که‌نه پارتی، له‌گه‌ڵ یه‌كێتی و تۆش خۆیان ده‌که‌نه یه‌کێتی، به‌کوردی و به‌کورتی به‌رزان و بنه‌ماڵه‌که‌ی پێش ڕاپه‌ڕین و دوای ڕاپه‌ڕینش له کوێ بای هاتبێت ئه‌وان شه‌نی مه‌سڵه‌حه‌تی خۆیان له‌وێ کردووه!.
٨: پێمان ناڵێیت (ڕووناک) خانی دایکی جه‌نابتان ئه‌گه‌ر به‌هۆی گه‌نده‌ڵی تۆ و پۆسته‌که‌ی تۆوه نه‌بێت، چۆن ده‌توانێت به‌ناوی ڕێکخراوێکی مه‌ده‌نی و پارێزگاری له منداڵانی کوردستان بۆ بوودجه‌ی مانگی (2،1 ی2011) بڕی700 ملیۆن دیناری وه‌رده‌گرێت له کاتێکدا ئه‌و ڕێکخراوه‌ی دایکتان ئه‌م پاره‌یه‌ی به ناوه‌وه وه‌رگرتووه هه‌تا نووسینی ئه‌م بابه‌ته‌ش باره‌گاکه بوونی نییه!
٩: پێمان ناڵێیت گه‌نده‌ڵی له‌مه زیاتر که 22 دۆنم زه‌ویت له بناری (پیره‌مه‌گروون) کڕیوه، یان داگیرتان کردووه به‌ناوی دایکته‌وه، به‌حساب به‌ناوی پڕۆژه‌ی ئاوه‌دانی بۆ منداڵانی شه‌هیدان! (بڕوانه ئه‌رشیفی کوردستانپۆست 12/2/2011).
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
