بۆ مێژوو ... گیا له‌سه‌ر بنجی خۆی ئه‌ڕوێت ... !!!
Monday, 25/04/2011, 12:00
شه‌وێکی ساڵی 1974 ، چه‌ند سه‌رکرده‌یه‌کی شۆرشی ئاشبه‌تاڵی ئه‌یلول ، له ماڵی ئامر هێزی ئه‌زمر ، شه‌هیدی ڕێگای سه‌ربه‌خۆی کورد و کوردستان ، کاکه (حه‌مه‌ی سه‌ید عه‌لی حافز) میوان بوون ... ئه‌و شه‌وه خوالێخۆشبوو کاک (نوری ئه‌حمه‌دی ته‌ها) ش له‌وێ بوو ... کاک نوری له کاتی خۆیدا و پێش ڕوودانی دووبه‌ره‌کی نێوان باڵی مه‌کته‌بی سیاسی و مه‌لا مسته‌فا ، ئه‌ندامی مه‌کته‌بی سیاسی پارتی دیموکراتی کوردستان بووه .. ئه‌و شه‌وه زۆر قسه و باس کرا ، باسێکیان هۆکاره‌کانی جیابوونه‌وه‌ی باڵی مه‌کته‌بی سیاسی پارتی بوو به سه‌رۆکایه‌تی ئیبراهیم ئه‌حمه‌د له مه‌لا مسته‌فا ، که له ساڵی 1966 دا ئه‌و باڵه چه‌کی جاشایه‌تییان کرده شان و میلله‌ته سه‌ربه‌رزه‌که‌مان ناویان لێنان جاشه‌کانی شه‌ستوشه‌ش ، که به ئامان و زه‌مان ئه‌و ناوه‌یان لێنابێته‌وه ، ئه‌وتا هه‌تا ئه‌مڕۆش که‌سێکی وه‌ک که‌مال که‌رکوکی له ناو هۆڵی په‌رله‌ماندا و له‌به‌رده‌می به‌رهه‌م ساڵحی سه‌رۆکی حکومه‌ت و ئه‌رسه‌لان بایزی جێگری سه‌رۆکی په‌رله‌ماندا ، سوکایه‌تی به یه‌کێتییه‌کان ئه‌کات و شه‌ستوشه‌شیان به بیر ئه‌هێنێته‌وه ... به‌کورتی و به کوردی ، ئه‌و شه‌وه‌ی ماڵی کاکه حه‌مه ، به‌م دوو گویێانه‌ی خۆم گوێم لێبوو کاک نوری ووتی : (ئه‌وه‌ی له ناو مه‌کته‌بی سیاسی پارتیدا ئاگری دووبه‌ره‌کی و جیابوونه‌وه‌ی دژی مه‌لا مسته‌فا خۆشده‌کرد ، گه‌لاوێژ خانی خێزانی ئیبراهیم ئه‌حمه‌د بوو ، گه‌لاوێژ خان به‌بێ ئه‌وه‌ی ئه‌ندامی پارتی بێت ، به ئاره‌زووی خۆی و به بێ پرس ئه‌هاته ناو گه‌رمه‌ی کۆبوونه‌وه‌کانی مه‌کته‌بی سیاسییه‌وه و ده‌نگی له ده‌نگی هه‌موو ئه‌ندامه‌کانی مه‌کته‌بی سیاسی زاڵتر بوو ، به هه‌موو هێزێکێیه‌وه هانی جیابوونه‌وه‌ی ئه‌دا ، ئیبراهیم ئه‌حمه‌دی سکرتێرێشمان به ته‌واوی له ژێر کاریگه‌ری زۆری ئه‌و دا بوو) .
ئه‌م قسه‌یه‌ی به‌هه‌شتی کاک نوری به‌ڵگه‌یه‌کی مێژووییه ، که بنه‌ماڵه‌ی خۆسه‌پێنه‌ری ئیبراهیم ئه‌حمه‌د له پێناوی ده‌سه‌ڵات و سه‌روه‌ت و ساماندا ، زۆر ده‌مێکه شێت و شه‌یدای قۆرخکردنی ده‌سه‌ڵاتن و له‌و پێناوشدا هه‌زاران لاوی کوردیان به کوشتداوه و ئاماده‌شن به کوشتی بده‌ن .. ئه‌مڕۆ هه‌ڵسوکه‌وتی هیرۆی ژنی تاله‌بانی ڕاستی قسه‌کانی کاک نوری ئه‌سه‌پێنێت . ئه‌وه‌تا هێرۆ له‌سه‌ر بنجی خۆی ڕواوه و به ته‌واوی ده‌ستی به‌سه‌ر مه‌کته‌به سیاسییه کارتۆنییه‌که‌ی یه‌کێتیدا گرتووه و بۆته باوه‌شێنی ئاگری ئاژاوه و هه‌موو جموجۆڵێکی بازرگانی و بازاره‌کانی سلێمانی خستۆته ژێر رکێفی خۆیه‌وه و به ئاره‌زووی خۆی تاله‌بانی و یه‌کێتی به هه‌ڵه‌دا ئه‌بات و پاره‌ی دزراوی میلله‌ته ژێر ده‌سته‌که‌مان ، ئه‌دا به جاش و چه‌ک و جبه‌خانه و فیشه‌ک و دارلاستیک و هه‌ڵمات بۆ سنگی ڕووت و قوتی ڕۆڵه‌کانی سلێمانی ، ئه‌و سلێمانییه قاره‌مان و سه‌ربه‌رزه خۆڕاگره‌ی ، له مێژووی پڕ شانازی خۆیدا ، نه هه‌رگیز سه‌ری بۆ هیچ دز و زۆردارێکی ڕوو زه‌رد چه‌ماندووه ، و نه هیچ زاڵمێکی گرگن و کۆیله و گۆچان به ده‌ستیش توانیویه‌تی بێده‌نگیی بکات ... مێژووش شاهیده ، ئه‌وه‌ی دژایه‌تی شاری هه‌ڵمه‌ت و قوربانی کردبێت ، وه‌ک ئه‌و گه‌وجه شێته وا بووه ، که سه‌ری خۆی خستبێته ناو ده‌می شێره‌وه ... ئه‌مڕۆ تاله‌بانی له ژێر کاریگه‌ریی هێرۆ دایه ، نه به‌و ته‌مه‌نه‌وه زۆره‌وه ده‌ستبه‌رداری سامان و پۆست و پله و پایه ده‌بێت ، نه تا مردنیش چاکسازییش ئه‌کات . بۆیه گفتوگۆکردن له گه‌ڵ ئه‌و دوو ده‌سه‌ڵاته‌دا ، که له خوێنڕشتن و درۆ و تاڵانکردندا ، چه‌پییان نییه له یه‌ک ، به فیڕۆ دانی کاته ، چونکه له قسه‌ی خۆیان زیاتر ، گویێ له قسه‌ی که‌س ناگرن و هیچیان له داگیرگه‌ران نه‌گه‌ڕاوه‌ته‌وه . ئاخر که‌سێک ویژدانی سه‌گ نه‌یخواردبێت ، ئاوا بێ باکانه فیشه‌ک و دارلاستیک و هه‌ڵمات ، ئاڕاسته‌ی سنگ و چاوی گه‌شی ڕۆڵه‌کانی سلێمانی ئه‌کات ... ئه‌مڕۆ ته‌نها چاره‌سه‌ر هه‌ر هێزی له بن نه‌هاتووی ڕاپه‌رینی میلله‌ته نه‌به‌زه‌که‌مانه ، که بتوانێت ده‌رگای دۆزه‌خی مێژوو به ڕوویی دیکتاتۆری وه‌ک تاله‌بانی و بارزانی و هێرۆدا بکاته‌وه .
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
