ئۆپۆزسیۆنا موخەرب

Tuesday, 17/03/2020, 22:50

ل هەر جهەکی ئۆپۆزسیۆن هەبت تێدا بزاڨێن ئۆپۆزسیۆنێ خودان هزر و پرۆگرامن و نیشتیمانپەروەرتر و نەتەوەپەروەرترن ژ دەستهەڵاتێ، و ئەگەرێ دژایەتیکرنا وان بۆ دەستهەڵاتێ دزڨرت بۆ حەژێکرنا وان بۆ وەڵاتی و ڨیانا وان ژبۆ خزمەتکرنا مللەتی بشێوەکی باشتر، ئانکو بگشتی ل جیهانێ بزاڨێن ئۆپۆزسیۆنێ ئەلترناتیڨەکێ گونجای بۆ هێزا دەستهڵاتدار پەیدادکەن. لێ ئەڨ تشته ب تەمامەتی نه راسته ل کوردستانێ، یێ کو تێدا بزاڨێن ئۆپۆزسیۆنێ نه خودان چ هزر و پرۆگرامن بەلکو بتنێ ژ ترسنۆک و موخەربان پێک دهێن یێن کو بتنێ کارێ وان چێکرنا بەلبەلێ و خرابکرنه، و لشوینا نەفرەتکرن ل دز و خائینان خەلکێ هانددەن داکو نەفرەتا ل کوردبوونا خۆ و کوردستانێ و ئاڵای بکەن .
ل کوردستانێ حکومەتا کوردی رادبت بکارئینانا هەستێن نەتەوی ژبۆ خاپاندنا مللەتی و دزینا وەڵاتی، و خۆ زیانبەخشترین کارێن خۆ ب بەرگەکی نەتەوی دادپۆشت ژبۆ خاپاندنا مللەتێ ساده و خشیم. هەروەسا بزاڨێن خۆ ب ئۆپۆزسیۆنێ ژی دئیننەدەر رادبن ب یاریکرن ب ئێش و ئازارێن مللەتی و بکارئینانا وان وەک کارتەکا فشارێ ژبۆ گەهشتن ب ئارمانجێن خۆ یێن تایبەت. و ژبەر نەبوونا پرۆگرامێن دوومدرێژ و هەستێن نەتەوی یێن راستگۆ لنک ڨان بزاڨێن ئۆپۆزسیۆنێ لەوا بتنێ رادبن بچێکرنا بەلبەلێ و خرابکرنێ بێی گەهاندنا چ مفای بۆ مللەتی. هەروەسا ژبەر ترسنۆکییا خۆ یا زێده ئەڨ بزاڨنه و بەردەستێن وان نەوێرن ئەگەرێ ئاریشەیێن وەڵاتی بشێوەکی راستەوخۆ بکەنه دستۆیێ دەستهڵاتدارێن گەندەڵ و خۆفرۆشڨه بەلکو دکەنه دستۆیێ کوردایەتی و کوردبوونا مللەتی دا و وەل مللەتی دکەن نەفرەتا ل وەڵاتی و ئاڵای و کوردبوونا خۆ یێن بێ گونەهـ بکەن. ئەڨ کارێن پیس و ئاست نزم دیاردکەن چەند ئەڨ بزاڨێن "ئۆپۆزسیۆنێ" د موزەیەف و ژەهراوینه و دهاریکارن دگەل دەستهەڵاتێ ژبۆ خرابکرنا وەڵاتی.
کوردایەتی نه مولکێ چ کەس یان بنەماڵ یان حزبایه، هەروەسا کوردایەتی ناهێته نوێنەرایەتیکرن ژلایێ چ مرۆڨێن ترسنۆک و پیس و گەندەڵڨه چ دەستهڵاتدار بن یان ئۆپۆزسیۆن بن. کوردایەتی کۆمەکا هەست و هزرانه یێن کو پێک دهێن ژ حەژێکرنا کورد و کوردستانێ و ڨیانا قوربانیدانێ بۆ کوردستانێ و کارکرن ژبۆ پێشخستن وخزمەتکرنا کورد و کوردستانێ و دژایەتیکرنا دوژمنان. هەر بزاڨەکا کوردی ڨیانا گهۆرینێ و رزگارکرنا گەلێ کورد و باشترکرنا رەوشا وی هەبت دڨێت بزاڨەکا نەتەوی یه توندڕەو بت و ب هەموو شیانێن خۆ کاربکەت ژبۆ بەڵاڨکرنا کوردایەتیێ دناڨ کورداندا. کوردایەتی دەرمانه بۆ هەموو دەردێن گەلێ کورد، کوردایەتی گهۆرین و ئازادى و هوشياريه، کوردایەتی چەکه ژبۆ ژناڨبرنا نەزانین و دوژمن و خائینان و رزگارکرنا وەڵاتی.
هەبوونا هۆشیاریا نەتەوی پێنگاڨا ئێکێ یه ژبۆ ئەنجامدانا گهۆرینێن بنچینەی و رزگارکرنا کورد و کوردستانێ. ژبەرکو چ کارێن مەزن د مێژوویێدا نه هاتینه ئەنجامدانه بێی هەبوونا حەژێکرن و باوەریێ، لەوا حەژێکرنا کورد و کوردستانێ مەرجێ ئێکێ یه ژبۆ هەبوونا ڨیانا رزگارکرنا وەڵاتی و مللەتى و بەرهەڨی ژبۆ دانا قوربانیێن مەزن ژبۆ گەهشتن بۆ ڨان ئارمانجێن نەتەوی یێن بەرز، بێی هەبوونا ئەڨ حەژێکرنا راستگۆ تشتەک نه دشیاندایه بهێته کرن. هەبوونا هۆشیارییا نەتەوی دێ وەل هەر کوردەکی کەت یی هایدار بت کو ئەو نه بتنێ یه بەلکو بەشەکه ژ مللەتەکێ ژ ملیۆنەها کەسان پێک دهێت دیەکگرتی دئێک یەکەدا کو مەزنتر و بهێزتره ژوی بتنێ، و پاشەرۆژ و هەبوونا وی ب هەبوونا مللەتێ وی ڨه یه گرێدایه. هەروەسا هۆشیاریا نەتەوی دێ وەل هەر کوردەکی کەت یی هایداربت کو بتنێ ئەو خودانێ ڨی وەڵاتی یه و بتنێ ئەڨ ئاخه وەڵاتێ وی یه، و بتنێ ئەو بەر‌پرسه ژ پاراستن و پێشکەڨاندنا وەڵاتێ خۆ. نەبوونا هۆشیاریا نەتەوی وەل هاوڵاتیان دکەت دبێ باوەری و خەمسار و ئەنانی بن، کو بتنێ ب خۆ هزر بکەن و مایێ خۆ د چ کاران نەکەن ئەگەر ب بەرژەوەندییا وان یا کەسی ڨه نە یه گرێدای بت، خۆ ئەگەر ئەڨ کارنه ب نەتەوا وی و پاشەرۆژا وەڵاتێ ویڨه دگرێدای بن. حکومەتێ و دوژمنی ئەڨ هاوڵاتیێ کورد دڨێن یێ خەمسار و ئەنانی یێ کو چ گرنگیێ نادەته پاشەرۆژ و رەوشا مللەت و وەڵاتێ خۆ بەلکو بتنێ خۆ دپشت ڕستا "نه شۆلا منه\ من شۆلەپێ یه" ڨەدشێریت.
ئاریشەیا مەزن یا ئەو کەس و بزاڨێن خۆ ب نوینەرێن گهۆرین و پاشەرۆژێ دئیننەدەر نەبوونا دیتن و ئارمانجێن مەزن و دوومدرێژێن نەتەوی یه. بەلکو دیتنا ڨان ژ دفنا وان نابۆریت و ئارمانجێن وان ژ سنورێ ئارمانجێت ماددی یێن سەخیف وەک کارەبا و غاز و گاز...هتد دەرناکەڨن، و هەر چ گاڨا دەستهەڵاتێ ئەڨ ئاریشەنه چارەسەرکرن هەموو پرۆگرام و هزرێن ئۆپۆزسیۆنێ ژناڨدچن، و ئەڨ بزاڨنه مێشکێ خۆ ژدەستددەن و رادبن ب لێگەریان لهندەک ئاریشێن دی یێن سەخیف یان ئەو بخۆ ئاریشان چێدکەن. ئەڨ مرۆڨنه خۆ دژایەتییا وان کارێن حکومەتێ دکەن یێن باش و دخزمەتا هاوڵاتییان دا، و ئەڨەژی خرابی و موزەیفیا ڨێ "ئۆپۆزسیۆنێ" دیاردکەت. هەر ئاقلدارەک دزانیت کو تاکه چاکسازی یا دشایندایه بهێته کرن بۆ ڨێ دەستهەڵاتێ ژناڨبرنا وێ یه ب تەمامی و دانانا سیستەمەکێ نەتەوی یی دادوەره ژلایێ مللەتی و ژبۆ مللەتی. لێ ئەڨ کارێ پیرۆز و مەزن چ جاران نه دشیاندایه بهێته ئەنجامدان ژلایێ ڨان جۆره مرۆڨێن ترسنۆک و کەر یێن کو فاسدترن ژ حکومەتێ بخۆ.
هندەک تشتێن دی یێن سەیر یێن لگەل ڨان بزاڨێن کوردی دهێنه دیتن ئەون لیبرالیزم و ناڨنەتەوایەتی و خۆ دوورکرن ژ کوردایەتی و دۆزا کوردی نه، بتنێ داکو خۆ بوێنێ بزاڨێن سەردەم\مۆدەرن دەربێخن و داکو بزاڨێن وەکی وان دفاشل ل رۆژئاڨا دەستخۆشیێ ل وان بکەن. براستی ئەڨ جۆره بزاڨنه خودان هزرێن سەخیف و ترسنۆک و فاشل و دوور ژ راستیێ(واقعی)نه. راستی ئەوه ئەو بخۆ نه خودان چ هزرێن رەسەن و تایبەتن بخۆڨه بەلکی بتنێ وەک بەبەغایا گۆتن و هزرێن بزاڨێن سياسی و کەسێن فاشل یێن رۆژئاڨایی دووباره دکەن، بێی چ هزرکرنەک يان گرێدان بواقعێ مه ڨه. ژوان وەره ئەو یێ دجيهانا خەیالاندا یان یێ ل دیزنی لاند دژین یێ کو تێدا هەموو مرۆڨ حەژ پێکڨەژیانێ و ئاشتیێ دکەن و رێز ل مافێ مرۆڨان دهێته گرتن و هاريكاريا لاوازان دهێته کرن. لێ دراستیێدا و دوور ژڨان هزرين زارۆکان، گەلێ کورد یی دۆرپێچکرییه ب هندەک مللەتێن خودان هزر و ئایدیۆلۆجیێن شۆفینی یێن هەبوونا کوردان چ جاران قەبول ناکەن. ئەم یێ ل جیهانەکێ دژین کو تێدا بتنێ رێز ل وی مللەتی دهێته گرتن یێ خودان هێز. هەروەسا سروشتێ مرۆڨان یێ دڕنده نه دشیاندایه بهێته گهۆرین بهندەک هزر و دروشمێن جوان و دوور ژ راستیێ.
دڨێت هەر کوردەک و هەر بزاڨەکا سیاسی یه کوردی بزانت دۆزا کوردی ب تەمامی دۆزەکا نەتەوی یه، و کورد ئێک مللەته و کوردستان ئێک وەڵاته، و پاشەرۆژ و رەوشا هەموو کوردان یه پێکڨه گرێدایه و ئێکه، و نه دشیاندایه ب چ گهۆرینان یان چاکسازیان بهێته هزرکرن بێی وەرگرتنا رەوشا کوردان ل دەڨەرێ و جیهانێ. خۆ دوورکرن ژ نەتەوایەتیێ (كوردایەتیێ) و دۆزا کوردی بتنێ ترسنۆکی و هەژارییا هزری یا بزاڨا سیاسی یا کوردی دیاردکەت . ئازادی و ئاشتی ب دروشمێن جوان و خشکوک بدەستڨەنائێن بەلکو بتنێ ب خوین و ئاگری بدەستڨەدئێن.
کورت و کرمانج، هەر بزاڨەکا کوردی بڨێت بمینت و گهۆرینێن بنچینەی ل کوردستانێ ئەنجام بدەت و مللەتێ کورد ڕزگاربکەت دڨێت خودان ئایدیۆلۆجیەکا نەتەوی یه توندڕەو بت و نابت ب چ شێوەیان مساوەمێ لسەر بنەمایێن خۆ یێن نەتەوی بکەت، هەروەسا دڨێت خودان هێزەکا لەشکەری یان پارالەشکەری بت یا کو بتنێ وەلائا وێ بۆ کورد و کوردستانێ نەک بۆ هندەک کەس يان بنەماڵ يان حزبەکی دیارکری. دڨێت ئارمانجا ڨێ بزاڨێ خزمەتکرنا کورد و کوردستانێ بتنێ بت، و نابت ب کارێ پۆڵیسا رابت و غولامیا بیانیان بکەت. توندڕەوی د حەژێکرنا وەڵات و مللەتی بتنێ دێ بته ئەگەرێ بەرهەمئینا کارێن مەزن و باش.
بکارئینانا هێزێ بتنێ چ ب شێوێ چەکی بت یان بڕژاندن لسەر جادان بتنێ دێ بته ئەگەرێ چێبوونا بەلبەلێ و بتر خرابکرنا رەوشێ و چ گهۆرینان بەرهەمنائینیت. هەروەسا بتنێ هەبوونا هزر و ئایدیۆلۆجیێن جوان و بهێز بێی چ کار دێ بتنێ هندەک مرۆڨێن بێغیرەت و پڕبێژ بەرهەمئینت. ژبۆ ئەنجامدانا هەر گهۆرین و چاکسازیەکا راست و دروست و دوومدرێژ ڨێت چەک و هزر لگەل ئێک بهێنه بکارئینان. هەر کوردەکێ ڨیانا خزمەتکرنا وەڵاتێ خۆ کوردستانێ و نەتەوا خۆ هەبت دڨێت یی ئامادەبت چەکی هەلگرت و ترسنۆکیێ و دوژمنان ژناڨببەت و قوربانیێن مەزن بدەت. بێی چەک و دانا قوربانیێن مەزن چ جاران نه دشیاندایه ئازادی بهێته بدەستڨەئینان دبن سیبەرا ڨێ دەستهەڵاتا بنەماڵان، یا بتنێ بناڨ دیموکراسی.