نوێنه‌ری سه‌قز سه‌باره‌ت به ئاودیوكردنی نه‌وت هه‌ڵوێست وه‌رده‌گرێت
Thursday, 07/10/2010, 12:00
فه‌خره‌دین حه‌یده‌ری نوێنه‌ری شاره‌كانی سه‌قز و بانه له په‌رله‌مانی ئێران، رایگه‌یاند: هاتووچۆی تانكه‌ره نه‌وت هه‌ڵگره‌كانی باشووری كوردستان و ئاودیوكردنی نه‌وت له رێگه‌ی شاره‌كانی سه‌قز و بانه و مه‌ریوانه‌وه، جگه له زه‌ره‌ر هیچ قازانجێكی به‌م ناوچانه نه‌گه‌یاندوه.
ناوبراو گوتی: هاتووچۆی تانكری نه‌وت‌هه‌ڵگری باشووری كوردستان به رێگه‌وبانه‌كانی سه‌قز و بانه و مه‌ریواندا، جگه له پیس‌كردنی ژینگه‌ی ئه‌م ده‌ڤه‌رانه و چوونه‌سه‌ره‌وه‌ی رێژه‌ی رووداوه‌كانی پێكدادانی ئۆتۆمبیل، هیچ قازانجێكی نه‌بووه و ئه‌بێ به‌رپرسانی بواری هاتووچۆ چاره‌سه‌رێك بۆ ئه‌م گرفته بدۆزنه‌وه.
حه‌یده‌ری له درێژه‌دا رایگه‌یاند: هه‌موو رۆژێك به لانی كه‌مه‌وه ٢٥٠ تا ٣٠٠ تانكه‌ری نه‌وت هه‌ڵگری باشووری كوردستان به شێوه‌ی فه‌رمی نه‌وت ئاودیوی ئێران ئه‌كه‌ن و سه‌رجه‌م عه‌وارز و ماڵیاتێك كه له‌م تانكرانه وه‌رده‌گیرێت ئه‌خرێته ژماره حیسابی نه‌ته‌وه‌ییه‌وه و به‌م شێوه هیچ قازانجێك له‌و بڕه پاره‌یه‌ش به شاره‌كانی پارێزگای كوردستان ناگات.
ناوبراو هه‌روه‌ها گوتی: هاتووچۆی ئه‌م هه‌موو تانكه‌ره گه‌ورانه زه‌ره‌روزیان به رێگه‌كانی هاتووچۆی ئێمه‌ش ئه‌گه‌ێنێت و له‌وه‌تی هاورده‌كردنی نه‌وت ده‌ستی پێكردوه سه‌رجه‌م رێگه قیرتاوه‌‌كانمان تێك چوون و رۆژ له دوای رۆژ زیاتر خراپ ئه‌بن.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
