کەسایەتی ناجێگیر، ناراستگۆ، لەرزۆک و لاوازی لێپرسراوانی کورد، ئێمەیان بەم رۆژە گەیاند

Wednesday, 23/07/2014, 12:00

خەرمانەی خەبات و ماندو بوونی تەمەنی بەهاری چەند نەوەیەکتان لە چوارچێوەی رێکخراوێکی مارکسی لینینی، نیشتمانی و نەتەوەیی، یان ئیسلامی رێکخست و لە قاڵبتان دا، خستتانە ناو چوار چێوەی خەباتی کوردایەتی و مافی چارەی خۆنووسین، رازاندتانەوە بە دروشمی بریقەداری سەربەخۆیی، ئازادیی، سەرفرازیی و دەست هێنانی مافی چەوساوەکان.
بە هەزاران هەزار گەنج و لاو بە بڕوا پیێ بوونێکی زۆرەوە، هەنگاویان هەڵنا بەرەو پەتی سێدارە، یان لە ژێر دارو بەردا شەهید بوون، لەگەڵ خۆشیان بە هەزاران خەو، ئاوات، حەز و ئارەزوویان بردە ژێر گڵەوە، بە هەزاران هەزار گەنج و لاو لە زیندانەکانی بەعسدا ئەشکەنجە و ئازاریان کێشا لە پێناو ئەو دورشمانەی کە ئێوە بەرزتان کردبوویەوە.
بەهەزاران دایکتان، جەرگ سووتاو کرد و مندالتان بێ باوک کرد، لە ئەنجامی شەری براکوژی، جۆش و خرۆشتان دان بەوەی کە مەلا مستەفا کابرایەکی نەخوێندەوار بوو، توانای رابەرایەتی کردنی شۆرشی میللەتی کوردی نەبوو، لە بنەرەتدا شۆرشی ئەیلول بزوتنەوەیەکی عەشایری بووە و هیچ مقاوەماتێکی نیشتمانی و نەتەوەیی تیادا بەدی نەکراوە.
ووتان، مەلا مستەفا، لە ژێر کارێگەری هەندێ لە ئەفسەرانی کورد پەروەری زەمانی خۆی و ئامۆژگاری ئەوان، جۆر و ئاراستەی بزوتنەوەکەی گۆڕی بۆ بزوتنەوەیەکی نیشتمانی نەتەوەیی.
ووتان، مەسعود بارزانی و بنەماڵەکەی نۆکەری ئیمپریالستن و پیاوی ئێرانن، چەند پەرتووکێکتان لەسەریان بڵاوکردەوە" البارزانی و مخگگاتە الامپریالیە" . ئەو جۆرە سەرکردایەتیە تەقەلا دەکا و هەوڵدەدا بۆ چەسپاندنی دەسەڵاتی خێڵەکی و عەشایری. ئەمەش تەنیا بۆ ئەوە بوو، کە مامتان ببێ بە سەرکردە و کەسایەتی یەکەم لە مەیدانی سیاسی باشووری ووڵات.

ووتان، شۆرشی نوێ ئەو جارە گڕو بڕوای رەنجدەران و هەژاران، ئاراستەیەکی تازەی مۆدرنی هەیە، نەوەی تازە دەسەلاتی عەشایری و خێڵەکی قبوڵ نییە، بۆیە کەسایەتی ئیمە و رێبازەکەمان کە رێبازێکی مارکسی لینینیە و رابەرایەتی چینی چەوساوە و ماف خوراوی ناو میللەتی کوردی باشووری ووڵات دەکا، زۆر جیاوازەو خەون و ئاواتە سیاسیەکانیشمان بەقەد ئەرزو ئاسمان لێک دوورن.

ووتان، شۆرشی نوێ بڕوای بە توانای ژن هەیە، ژن لە ژێر حوکمی بنەماڵە و خێڵ ئەسیرە، ئێمە زۆر جیاوازین. ئەمەش بۆ ئەوە بوو کە هۆ و هۆکار بدۆزنەوە بە هەمووتان پشتیوانی لە هێرۆ بکەن و بیهێننە پێشەوە بۆ رازی کردنی دڵی مامتان. کەسایەتی لاواز و لەرزۆکی، مەکتەبی سیاسی و سەرکردایەتی یەکێتی و کۆمەڵەی رەنجدەران بوو بە درێژایی مێژووی یەکێتی نیشتمانی، ژنێکی وەکو هێرۆی کرد بە دەسەڵاتدار لە ناو یەکێتی، کە ئیمڕۆ خۆی و خوشکەکەی بوون بە بڕیاردەر لە دەستنیشان کردنی سەرۆک کۆماری عیراق. بە دوای ئەوانیشەوە کۆمەڵێک ژن (ئاڵا، بێگەرد، ئاواز) هەموویان تاڵەبانیان بە خۆیانەوە ناوە، یەک لە دوای یەک بوون بە بڕیار بەدەست.
ووتان، ئەندامانی مەکتەبی سیاسی کاتێک جیا بوونەوەیان لە ساڵی ١٩٦٤ لە مەلا مستەفا، کۆمەڵێک خەڵکی رۆشنبیر و خوینەدەوار بوون و بروایان بە بزووتنەوەی عەشایری و خێڵەکی نەبوو، وەکو بارزانی هەموو کاتێک سێ چوار هەزار چەکداریان بە دواوە نەبووە، بۆیەش بارزانی بۆ حەسم کردنی گیرو گرفتەکان و کێشەکان و ناکۆکیەکان زۆر بە ئاسانی دەی توانی بیان کوژێ و لە ناویان ببا.

ئەمانەتان هەمووی کرد بە موبەریراتی جاشایەتی مامتان لە ساڵی ١٩٦٦، پەردە پۆش کردنی ئەو مێژووە شەرمەزارییە کە زۆربەی سەرکردایەتی یەکێتی و کۆمەڵەی رەنجدەران، ئەو کات لەگەڵی بوو، بوون بە جاش و لە مۆڵگەکانی بەکرە جۆ و بەغداد گوزەرانیان دەکرد.
ووتان زروف و زەمانی مارکسیەت و پارتە عەقائیدیەکان بەسەر چووە ، بزوتنەوەکان لە دونیای ئەوڕۆدا، ئاراستەیەکی تری فرە حیزبی، فرە بیروباوەرو مۆدرنە بۆ گەیشتن بە سیستەمی دیموکراتیەت، ئیمڕۆ  زروف وزەمان، وادەخوازێ ئەو رێکخراوە لەناو یەکێتیدا بتاوێتەوە، بەرەو پارتێکی سۆشیال دیموکرات ئاراستە بکرێ، باشترە و زیاتر خزمەت بە دۆزی ڕەوای میللەتەکەمان دەکا! بەو جۆرە هێزەکەی کۆمەڵەی رەنجدەران حوکمی لە سێدارەدانی دڕا لە قاسمە ڕەش.

ووتان ٣١ی ئاب خەیانەتیکی مێژوویە دەرهەق بە بزاڤێێ رزگاری میللەتەکەمان کراوە، ئەوانیش ووتیان ئەمە هەمان ئەزموونی جاشایەتی ساڵی ١٩٦٦ی ئێوەیە وەکو ئێوە بوونمان لە مەترسیدا بوو بۆیەش ئەو بڕیاڕەمان دا.

دوایش بە سەدان دۆکۆمێنتی شاراوەی شەری براکوژی و خەیانەتکردنتان لەسەر یەکتر زەقکردەوە، بۆ پاکانە کردن و ڕاکردن لە لێپرسراوەتی مێژوو.
ووتان، بنەماڵەی بارزانی و هێرۆ کە بەرجەستەن لە دەسەڵاتی سیاسی هەرێم، ناشەفافن، دزن، جەردەن، پیاو کوژن و درۆ و دراو بووە بە پیشەیان، دامو دەزگاکان و واجیهەی پارتەکانیان، پڕ بوون لە کۆنە بەعسی و سەرۆک جاش و جاشولکە و نەوەیان و خەڵکی بێ ئابروو.

دیسانەوە ووتان، گرێ بەستە ژێر بەژێرەکانی نەوت هەمووی شاراوەن، هەر لایەک بووە بە جاشی وڵاتیکی دراوسێێ وەکو ئێران و تورکیاو سووریا. کەچی دوای خۆتان بوون بە بەشێک لەو دەسەڵاتە کە سەرۆکی هەرێم مەسعود بارزانییە، سەرۆکی حکومەت نێچیر بارزانی و جێگرەکەی قوبادی کوری هێرۆیە، پێکهاتەی ناوەوی ئەو دەسەڵاتە پێکهاتەیەکی گەندەڵی گەنیوە. بەهەمان شێوەش پشتیوانیتان کرد لە کۆنە بەعسی و ئەو خانم و کەسایەتیانەی کە خاوەن کێشەی سیاسی و کۆمەڵایەتی بوون لە ناو کۆمەڵگای کوردی باشوور.

ئەوە ئەنجامی کەسایەتی، ناجیگیر و لەرزۆک و لاوازو ناراستگۆی ئێوە بوو، پەبرەو کردنی سیاسەتی هەڵە و دارشتنی تاکتیکی خوار و خێچ و نەبوونی ستراتیژی نیشتمانی و نەتەوەیی بوو، کەوا بەوجۆرە خەرمانەی خەباتی میللەتێکتان گڕ تێبەردا و باشوری وڵاتتان دابەش کرد بە سێ بەش، ناوچە وازلێهێنراو و داگیرکراوەکانتان کرد بە ناوچەی دابڕاو و مادەی 140تان بۆی دروست کرد، تا مێژوو لێتان نەپرسێتەوە و دادگاییتان نەکات، حکومەتی هێرۆ لە سلێمانی و حکومەتی مەسعود و نێچیر لە دهۆک و هەولێر، هەریەکە لەلای خۆشیوە دەستی گرت بەسەر بیرە نەوتەکانی ناوچەکانی ژێر دەسەڵاتی خۆیاندا، سێ چارەک زیاتری شار و دێهات و نیشتیمان کوردتان لە باشور لەسەر خۆیان تاپۆ کرد، ئینجاش هەموویان لە ژێر دەسەڵاتی حکومەتی ناوەندی بەغداد و میللەتی کوردیش بێ وڵات و بێ دەرامەت.