بۆکسەکانی نێو پەرلەمان و خۆدزینەوەی گٶڕان
Monday, 06/04/2015, 16:07
ترس، تۆقاندن و هەرەشە لە کەلتوری پارتی دیموکراتدا، وەکو پاشماوەیەکی دەستەڵاتی عەشایریی و خێڵەکیی لە عەقڵیەتیی سەرکردایەتی ئەو پارتەدا پێشینەی هەیە، ئەمیش لە ئەنجامیی پەروەردەبوونیان لە ژینگەیەکی خێزانی لەو جۆرەدا.
ئەندامانی بنەماڵەی بارزانی، ئەو جۆرە عەقڵیەت و بڕوایەیان خستۆتە بواری کارپێکردن لە ژیانی سیاسیی و رێکخراوەییدا لە هەردوو قۆناغی شاخ و دوای شاخیش.
بەدرێژایی تەمەنی بیست و سێ ساڵ لە دەستەڵاتدا لە باشووری وڵات، سەرکرداییەتی پارتی بە ئەزمون بۆیان سەلماوە، کە لە ئەنجامی خستنە بواری کارپێکردنی ئەو جۆرە عەقڵییەتە توانیویانە تا رادەییەکی بەرچاو سەرکەوتن بەدەست بهێنن، ئەمیش:
یەکەم: لە کۆنتڕۆل کردنی ئەندامانی خۆیان.
دووەم: لە بێ دەنگ بوونی میللەت دەر هەق بەو هەموو ئەو ناڕەواییانەی لە هەرێم ئەنجام دەدرێت.
سێهەم: ملکەچکردنی زۆربەی پارت و سەرکردەکانی باشوور بۆ بنەماڵەی بارزانی.
گومان لەوەدا نییە هیچ ئەندامێکی پارتی جورئەتی ئەوە ناکات هەنگاوێک بهاوێژێت، ئەگەر پێشوەخت ئامادەباشیی ئەوەی وەرنەگرتبێت کە ماڵی بارزانی، هێزی زێرەڤانی، هێزی تایبەت، دەزگای پاراستن و ئاسایشی لێ زویر نابێت، لەو دیدەوە ئەوەی لە نێو هۆڵی پەرلەمان گوزەرا ئەندام پەرلەمانێک درا بەر بۆکس لە ٢٥ی مانگی رابردودا، بە پلانێکی درێژراو بووە.
سەرکرداییەتی پارتی خاوەن ئەزمونێکی دەوڵەمەندە لە مامەڵەکردن لەگەڵ گٶڕان لە هەردوو قۆناغی ئۆپۆزسیۆن بوونیان و لە قۆناغی بەشداریان لە حکومەتی بنکەفراواندا، لە هەردوو ئاستی سەرکردایەتی و ئەندامانی خوارەوەیان.بنەماڵەی بارزانی پێشوەخت هەڵسەنگاندنی خۆیان ئەنجامداوە لەوەی ئەو جۆرە رووداوە کاردنەوەی نێگەتیڤی نابێت لەسەر پەیوەندیان بە یەکتری.
ئیمڕٶ سەرکردایەتی هەر دوو پارت (پارتیی و گۆڕان) زۆر شتی لەوە گەورەتر بەیەکترییان دەبەستێتەوە وەکو دەرامەتی نەوت، پۆست، پارە دەستەڵات و بەرژەوەندی.بۆ هەر دوو سەرکردایەتیی ئەندازەی ئەمانە ئێجگار گەورەترە لە ئەندازەیی دەستدرێژیکردنە سەر پەرلەمانتارێک بە مەبەستی تێکشکاندنی کەسایەتیەکەی.لە ژینگەیەکی سیاسیی لەو جۆرەدا چاوەڕوان دەکرا گٶڕان هەوڵبدا ئەو شتە بە بێدەنگی تێبپەرێنێت.لەسەرەتادا هەر زوو ئاری دەرسین ئەندامی پارتی داوای لێبوردنی کرد لەسەر ئەو مەسەلەییە، گٶڕانیش لە رێگای کەناڵی تەلەفزیۆنەکەی خۆیدا (کەی.ئێن.ئێن) بە پەلە بە نێو میللەتدا بڵاوی کردەوە.
رێکخەری گشتی گٶڕان، بوونی وەکو سکرتێری کۆمەڵەی رەنجدەرانی مارکسی لینینی، کە بەدرێژایی ژیانی رێکخراوەیی ئەو کۆمەڵەیە لە ئاستی سەرکردایەتییەکەی پڕ بوو لە کێشمە کێشمەی نەگونجان، یەکتر قبوڵنەکردن، شەر لەسەر بوون بە کەساییەتی یەکەمی نێو ئەو هێزە، خۆنزیک کردنەوە لە تاڵەبانی وەکو بڕیاربەدەستی یەکەم لە نێو یەکێتی نیشتمانیدا.ئەمانە هەمووی هۆکاریی گرنگن لەوەی کە خاوەن ئەزمونێکی دەوڵەمەندە لە بواری سیاسەتدا، ئاراستەکردنی چارە سەری کێشەکان بەو شێوەیەی کە مەبەستە.
لەدەرەوەی ئەو هێزەشدا نەوشیروان مستەفا بووە لە بڕیار بەدەستەکانی ساغ کردنەوەی پەیوەندیەکانی یەکێتی لە گەڵ پارتە کوردییەکان، عیراقییەکان، پەیوەندی دەرەکی ئەو هێزە لەگەڵ وڵاتانی کە کوردستانیان بەسەردا دابەش کراوە.ئەمانە هەموو هۆکاری گرنگن لەوەی کە رێکخەری گشتی ئەو پارتە کاتێک هەرچ هەنگاوێک بهاوێژێت بە خۆرایی نییە و دەزانێت رووداوەکان بەرەو کوێ دەرٶن، بەرژەوەندییە تایبەتیەکان چۆن پارێزگاریان لێدەکرێت.
لە نێو یەکێتی نیشتمانییشدا هەندێک دیاردە سەری هەڵدابوو لە قۆناغی شاخەوە، دوایش درێژەی هەبوو لە قۆناغی دوای شاخ.دروست بوونی جەمسەری ناکۆک لە ئاست سەرکرداییەتی، سەرهەڵدانی کەساییەتی کە توانیبوویان لەسەر ئاستی نێو رێکخراوەکە و میللەتدا پێگەی جەماوەری، ئابووریی و چەکداریی بۆخۆیان دابمەزرێن.لەگەڵ بەهێز بوونی یەکێتی ئەوانیش خۆیان بەهێز دەکرد.لەدەرئەنجامی ئەوانەدا توانیان بیکەن بە چەکێک بۆ فەرزکردنی مەرجەکانیان، مانەوەیان لە سەنتەری بڕیارداندا لەکاتی توندبوونی گرژیەکانی نێو کوتلەو باڵەکانی سەرکردایەتی ئەو پارتە.
رێکخەری گشتی گٶڕان، نایەوێت ئەو جۆرە ئەزمونە لە نێو پارتەکەی سەرهەڵبدات، لە ئەنجامدا کەسایەتی، جەمسەری بەهێزی تیادا دروستبێت کە نەتوانێت کۆنترٶڵیان بکات، یان جەمسەرکان لە ئایندەدا رووبەرووی بوەستنەوە لە تای تەرازوەکەدا خۆیان لە ئاستی ئەو ببیننەوە.ئەمە هۆکارێکی ئیجگار بەهێزە کە دوو تێبینی ئیجگار گرنگ دەکرێت لە نێو گۆڕاندا:
یەکەم: ئەوانەی لە سەرکرداییەتی یەکێتیدا هەڵوێستیان جووت بوو لەگەڵ رێکخەری گشتی ئەو پارتە و لەگەڵی لە یەکێتی جیابوونەوەو بزوتنەوەی گٶڕانیان دامەزراند، خاوەن ناو دەنگ، پێگەی کۆمەڵایەتیی، سیاسیی و رێکخراوەیی بوون، ئێستاکە زۆربەیان دوورە پەرێز کراون.
دووەم: ناوە ناوە لە نێو ئەو بزووتنەوەیەدا کەسایەتی تازە سەرهەڵدەدن، میدیای گٶرانیش دەیانهێنێتە پێش، بەڵام تەمەنی سیاسیان کورتە و زوو وون دەبن، نە وەکو واجیهەی گٶران دەمێننەوە و نە لە میدیاکانیشیان گرنگییان پێدەدەن.
عەلی حەمە ساڵح، لە رێگای میدیایی گٶڕانەوە گرنگی پێدراو بواری بۆ رەخسێندرا خۆی بە جەماوەر بناسێنێت، لە ئەنجامدا لە هەڵبژاردنەکەی ساڵی ٢.١٣ی پەرلەمانی کوردستان، دەنگێکی زۆری هێنا.گومان لەوەدا نییە ئەو کەسەی پاڵپشتی لەو ئەندام پەرلەمانە کرد، تەنیا بای ئەوەندە رێگای پێدرا، تاوەکو ئەندام پەرلەمانی بڕوات لەوە بەدواوە ناهێڵن سەربخرێت و ببێت بە جەمسەرێکی بەهێز و خاوەن پێگەییەکی جەماوەریی، کە لە ئەنجامدا کورسی سەرٶکی هەرێم و سەرکردایەتی پارتەکەی خۆی بخاتە مەترسیەوە.
هاوڵاتیانی هەرێم لە ژێر فشارێکی ئیجگار زۆر گوزەران دەکەن، زۆرینەی سادە بە تایبەتی لە نێو گەنجەکان سۆز بەسەریاندا زاڵە، ئەگەر میدیای گٶڕان نیو ئەوەندەی جاران گرنگی بەو ئەندام پەرلەمانە بدابایە، پێشبینی ئەوە دەکرا ئەو رووداوە بەجۆرێک گەورە بکرێتەوە، ببێت بە هۆکارێک بۆ تەقینەوەی دەنگە نارەزاییەکانی نێو خەڵکیی و جەماوەر، ئەو پەرلەمانتارەش وەکو سەرۆکێکی ئەو ڕاپەرینە میللەت چاوی لێبکردبوایە.روودانی ئەو ئەگەرە بێگومان جێگەی دڵخۆشکەریی نییە نە بۆ سەرٶکی هەرێم و نە بۆ سەرکرداییەتی و لێپرسراوی یەکەمی نێو گٶڕان
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
